1 Mose 21
21
Isaki ayi Isamayeli
1Yave wunuanina Sala, mu kumvangila makankamba. 2Wubaka buemba, wubutila Abalahami muana wubakala, mu bununu buandi mu thangu yinkamba Nzambi. 3Abalahami wuvana zina Isaki kudi muana wumbutila Sala. 4Buna Abalahami wuzenga sutu di muana andi bu kadukisa nana bilumbu, banga buntumina#21.4 Tala 17.12, Mav 7.8. Nzambi. 5Abalahami wuba khama mvu thangu muana andi Isaki kabutuka. 6Sala wuyamikina: «Nzambi wutsevisidi mu kiese. Woso mutu wumwa disolo di Isaki, kafueti seva#21.6 Tala 17.19. mu diambu diami.» 7Wutuba diaka: «Mu kedika nani lenda nkangu kudi Abalahami ti Sala lenda yemika bana? Buabu mbe buta muana wu bakala mu bununu buandi.»
Abalahami kukidi Angali ayi Isamayeli
8Buna muana wuyonzuka. Bu kalembo yema mabeni, Abalahami wusadisa ndikulu yinene mu lumbu beni.
9Lumbu kimosi Isamayeli, muana wowo Abalahami kabuta ayi Angali, muisi Ngipiti, waba sakinina Isaki, muana wu Sala. 10Bukamona bobo Sala wukamba Abalahami: «Kuka kisadi kiokio kinketo ayi muana andi, bila muana wukisadi kalendi vingila kimvuama kiaku ko ayi Isaki#21.10 Tala Ngal 4.29-30..»
11Vayi diambu diadi divanga beni phasi mu ntima Abalahami, bila wuba muana andi. 12Buna Nzambi wukamba Abalahami: «Kadi fuema mu diambu di muana bakala ayi kisadi kiaku ki nketo. Wa mamo malembo kambi Sala, bila mu Isaki muawu muela totukila nkuna wela tedolo mu zina diaku#21.12 Tala Lom 9.7, Ebe11.18.. 13Vayi mu muana kisadi kiaku ki nketo mandi vanga phe tsi, kadi niandi phe widi nkuna aku.»
14Abalahmi wukotuka mu nsuka nabu, wubonga dipha ayi mvungu nlangu wuvana biawu kudi Angali. Wutula muana va mavembo ma Angali ayi wunkuka. Buna wuyenda kue zungananga mu tsi yikhatu yi Beli-Seba. 15Buna nlangu wu mvungu wumana, ayi wuyekula muana ku tsi mua nti fiba na meza. 16Buna wuyenda kala mua thama va ndambu. Wutuba mu tsi ntima: «Mbengi mona vamfuila muana ami.» Wubokana dila. 17Buna Nzambi wuwa mbembo muana bakala, ayi tona ku zulu mbasi yi Nzambi yitela Angali. Yinyuvula: «Mbi bidi yaku, Angali? Kadi mona wonga bila Nzambi wilu mbembo muana vana va kadi. 18Telama, tedimisa muana ayi wunsimbi mu koko bila mu niandi mandi vanga kanda dinnene.» 19Buna Nzambi wunzibula meso, ayi wumona tho yi nlangu. Wuyenda wesa mvungu ayi wunuikisa muana.
20Nzambi wuba ayi muana bakala, wuyonzuka ayi wukala mu tsi yikhatu yi Palani, wukala mbendi mbasa. 21Wukala mu tsiyikhatu yi Palani, ayi ngudi andi wunkuedisa nketo wu muisi Ngipiti.
Abalahmi vengi nguizani ayi Abimeleki
22Mu thangu yina, Abimeleki wuyiza ayi Pikoli, mfumu ma sodi mandi mu nkangu Abalahami:«Nzambi widi yaku, mu mamo ma wulembo vangi. 23Buabu leva ndefi va fulu kiaki ti wulendi kuphangila diambu dimbi ko, kudi minu, kudi bana bami, ayi kudi nkuna ami, banga phila ndivangidi, ngeyo phe wuphangila bo buawu ayi tsi yi wulembo kadi mu kinzenza ayi kikundi kikio.» 24Abalahami wuvutula: «Ndidi ndefi.»
25Buna Abalahami wunionga kudi Abimeleki mu diambu di dibulu di nlangu dibaziona kudi bisadi bi Abimeleki. 26Buna Abimeleki wunkamba: «Ndi kadi zaba nani wuvengi diambu diodio. Ngeyo phe wukadi kukhamba, ayi buabu kuandi nguilu diawu.» 27Abalahami wubonga bibulu bifioti ayi binene, wuvana biawu kudi Abimeleki, buna bawu babole bavanga nguizani. 28Abalahami wutula tsambudi di bana ba mameme va ndambu. 29Buna Abimeleki wukamba Abalahami: «Bana ba mameme mama mavengumuni mbi mansala vava?» 30Yandi wuvutula: «Bonga mu mioko miami tsambudi dibana ba mameme. Mamaba kimbangi kudi minu mu songa ti minu ndikaba dibulu dinlangu beni.» 31Diawu batedila fulu beni Beli-Seba kadi va fulu beni vawu badila ndefi bawu babole#21.31 Mu ki Ebeleo, Beli-seba yibeki mbangudulu zole: zinga ki tsambudi voti zinga ki nguizani..
32Bavanga nguizani ku Beli-seba. Abimeleki wutelama va kimosi ayi Pikoli, mfumu basoda bandi, wuvutuka ku tsi ba Filisiteya 33Landila diodio, wukuna nti wu Tamaliska ku Beli-Seba, kuna kasambila Yave, Nzambi yi thangu yika yimani mu zina diandi. 34Buna Abalahami wuzungana lumbu biwombo mu tsi yi ba Filisiteya.
Currently Selected:
1 Mose 21: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
