1 Mose 25
25
Lufua lu Abalahami. Bana bandi bankaka
1Abalahami wubuela kuela nketo wunkaka, zina diandi Ketula. 2Wumbutila bana, Zimilani, Yokasani, Medani, Madiani, Yisebaki, ayi Sua. 3Yokasani wuba se di Saba ayi Dedani ayi bana ba Dedani bawu baba: Asulimi, Letusimi ayi Lewumimi. 4Bana ba babakala ba Madiani baba Efa, Efeli, Enoki, Abida ayi Elida. Bawu babo baba bana ba babakala ba Ketula.
5Landila diodio, Abalahami wuvana bibio bikabaka kudi Isaki. 6Vayi kudi bana ba babakala ba bamakangu mandi, Abalami wuvana minkayilu ayi bukakhidi moyo, wubabotula vaba Isaki , muana andi, wubafidisa thama ku tsi yintotukilanga thangu. 7Abalahami wuzinga khama mosi lusambudi ayi mvu ntanu. 8Buna Abalahami wutabuka vumunu ayi wufua bu kaba wununa ngolo ayi wuyukuta luzingu, wubundana ayi bakulu bandi bateka fua. 9Buna bana bandi Isaki ayi Isamayeli banzika mu phaka matadi ma Makapela, mu ntoto Efeloni, muana Sohali, muisi Heti, ditalani ayi Mamele 10Abalahami wusumba tsola beni kudi basi Heti#25.10 Tala 23.3-16.. Muna bazika Abalahami ayi nketo andi Sala. 11Landila lufua lu Abalahami, Nzambi wusakumuna Isaki, muana andi ayi Isaki wuba ku Lahayi-Loyi.
Kanda di Isamayeli, muana Abalami
12Kiaki kikhulu ki nsamu wu kanda ditotukila mu Isamayeli, muana Abalahami wukabuta ayi Hangali, muisi Ngipiti, kisadi ki nketo ki Sala. 13Tala mazina ma bana ba babakala ba Isamayeli boso bulandasene mazina mawu mu makanda mawu: Nebayoti, muana wuthete wu Isamayeli, Kedali, Adibeli, Mibisami, 14Misima, Duma, Masa, 15Hadadi, Tema, Yetuli, Nafisi, Ayi Kedema. 16Bawu baba bana ba babakala ba Isamayeli ayi mama maba mazina mawu, mu mala mawu ayi mu mianzu miawu mi nzo zingoto ayi kumi mfumu zole, boso buididi zimvila ziawu. 17Tala mimvu mi luzingu lu Isamayeli khama mosi makumi matatu ayi tsambudi, buna wutabuka vumunu ayi wufua ayi wubundana ayi bakulu bandi bateka fua. 18Ayi bana ba babakala ba Isamayeli baba tona ku Havila nate ku Suli, ditalane ayi Ngipiti, mu nzila Asilia. Niandi veka Isamayeli wuba va thadisi zikhomba ziandi zizio.
YAKOBI
25.19-36.43
19Tala nsamu dikanda di Isaki, muana Abalahami.
Abalahami weka se di Isaki. 20Isaki wuba makumi maya ma mvu mu thangu kakuela Lebeka, muana wu nketo wu Betueli, muisi Silia, wuba ku Padani-Alami ayi wuba phe busi ki Labani, muisi Silia. 21Isaki wubombidila Yave mu diambu di nketo andi Lebeka, bila wuba sita. Yave wuwa lusambulu luandi, buna Lebeka wubaka buemba. 22Vayi bana banuana mu vumu kiandi, buna wukamba: «Ti bobo buididi, bila mbi mfunu mbi mu baka buemba?» Wuyenda yuvula Yave. 23Buna Yave wunkamba:
«Makanda mole madi mu
Vumu kiaku, mawubuta
Makanda mole maka
Malendi wizana ko. Wumosi
Makaluta mu ngolo viokila
Wunkaka, nkulutu
Makasadila nleki#25.23 Tala Lom 9.12..»
24Thangu buta buyifuana, Lebeka wubuta bitsimba. 25Muana wuthete wubutuka wuba wu mbuaki, ayi wuba mika miphuele mu nitu, bamvana zina Esawu#25.25 Tsi yi Esawu yitedulu Edomi (Tala buku 30) voti Seyili (Tala 32.4), zina diadi di tsuka dimonisa ti nitu andi yiba ayi mika.. 26Khomba andi wubutuka phe, koko kuandi kusimbidila kulu ku Esawu, bamvana zina Yakobi#25.26 Mu ki Ebeleo zina di Yakobi dibangudulu kikhesi, tala phe 27.36 ayi notika.. Isaki wuba makumi ma sambanu ma mvu mu thangu bana bobo babutuka.
Esawu wutekisa kikulutu kiandi kudi Yakobi
27Bana batatamana yonzuka. Esawu wuba muisi nsitu, wuyika mveti bibulu. Vayi Yakobi wuba mutu wukuikama ayi wuzola kala mu nzo yingoto. 28Isaki wuzola Esawu, bila wuzola dia mbizi vayi Lebeka wuzola Yakobi.
29Lumbu kimosi, mu thangu Yakobi kabelamba supu, Esawu wuyiza bu kaba ku nsitu ayi wuba wuvonga. 30Esawu wukamba Yakobi: «Wumbika ndidia supu kimbuaki bila mbevonga.» Diawu bamvanina zina dinkaka Edomi#25.30 Mu ki Ebeleo zina di Edomi dibangudulu supu kimbuaki. . 31Buna Yakobi wukamba: «Wuthekila lumbu kiaki ki kulutu kiaku.» 32Esawu wuvutula: «Tala, ndilembo yendi malembe malembe ku mfuilu, kikulutu beni mbi kiku tsia?» 33Yakobi wukamba: « Mu lumbu kiaki, leva ndefi.» Buna Esawu wudia ndefi ayi wutekisa kikulutu kiandi kudi Yakobi. 34Buna Yakobi wumvana mapa ayi supu ki madezo. Esawu wudia, wunua, landila dio, wuyenda kuandi. Buna Esawu kamonina kikulutu#25.34 Tala Ebe 12.16. banga kima ki phamba.
Currently Selected:
1 Mose 25: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
