1 Mose 34
34
Simeoni ayi Levi bavonda basi Sikemi
1Buba ti Dina muana wunketo Leya kabutila Yakobi, wubatotukanga thangu ka thangu mu tala bana bandumba basi tsi beni. 2Buna Sikemi, muana wubakala wu mfumu tsi, Hamoli, muisi Hivi, wumona, wumbonga, wuleka yandi ayi wuzaba nitu andi mu kingolo. 3Buna muela andi Wukangama ngolo ayi Dina, muana wunketo wu Yakobi. Sikemi wutoma nkunzola beni ayi wumokana yandi mu mbembo yi nlembami. 4Ku zimunina Sikemi wukamba se diandi Hamoli: «Wumbongila ndumba yoyo kaba nketo ami.» 5Yakobi wuwa ti ba bundula muana andi wunketo. Vayi bana bandi ba babakala baba ku nsitu ayi bibulu, Yakobi wuba na sui nate bavutuka. 6Mu thangu yilanda, Hamoli, se di Sikemi wuyenda kudi Yakobi mu solula . 7Bana ba Yakobi bavutuka ku buala. Bu Bawa diambu beni, batu beni bamona nganzi, bafuema beni, bila Sikemi wuvanga diambu di tsoni mu Isaeli bu kazaba nitu muana Yakobi wunketo, nganu diphila yayi dilendi vangama ko. 8Buna Hamoli wumoka yawu banga buabu: «Mu matedi muana ami Sikemi, muela andi wukangimi ayi muana aku wunketo, ndikulubombidila, lumvani kudi yandi muingi kaba nketo andi". 9Ti dilenda zolakana, tuvangeno nguizani: malutuvana nga bana beno ba baketo ayi beno malubonganga bana beto ba babaketo. 10Beno lulenda kala yeto ayi tsi mayiba yizibuka kudi beno: Kaleno yeto, kitileno muna ayi bakeno mvuilu mu tsi beni.»
11Sikemi wukamba se ayi zikhomba zi Dina: «Bika namona nlemvo mu meso meno ayi mandivanga moso ma lukukhamba. 12Buelanu thalu mbongo zi dikuela ayi mioso minkayilu mi lukuthomba, khubamene mu vana boso bulukundombila, luphani kaka muana ndumba muingi kaba nketo ami.» 13Buna Bana ba babakala ba Yakobi bavutudila Sikemi ayi se diandi Hamoli mu bukhita bila Sikemi wubundula busi kiawu Dina. 14Ayi babakamba diaka: «Tulendi vanga diphila yoyo ko mu vana busi kieto kudi bakala dikambu zengo bila madi ba diambu di tsoni kudi beto. 15Tulenda kikinina enati lueka banga beto, bu luzengidi masutu ma babakala beno babo. 16Mu nzila yoyo, matuluvana bana beto ba baketo, matubonga phe beno, matuzinga neno va kimosi ayi matu ba kanda dimosi. 17Vayi ti lumengi kueno kikinina zengo, matubonga busi kieto ayi matuenda kueto.»
18Phova ziawu ziyangidika Hamoli ayi muana andi Sikemi. 19Ditoko wuvanga mu nsualu diodio dikambu, bila wuzola beni muana Yakobi wunketo. Wuba wumosi mu bana babo wuluta zitusu mu nzo se diandi. 20Hamoli ayi muana andi Sikemi bayenda va muelo mbanza awu ayi bakamba banga buabu kudi babakala ba mbanza: 21«Babakala baba badi yeto mu yenge. Bika bakala kuawu mu tsi eto ayi bakita kuawu bila tsi yidi yivombila va ntadisi awu, tulenda kuela bana bawu babaketo ayi tulenda ku bavana bana beto ba ndumba. 22Mu diambu dimosi kaka, babakala baba mabakikinina mu kala yeto ayi ba batu bamosi ayi beto, bika babakala babo bazengo banga bubadidi bazengo. 23Buna bibulu biawu bifioti, mvuilu awu ayi bibulu biawu binene bilendi ba bieto ko? Tukikinineno kaka mabalombidi muingi bakala neto.» 24Batu babo babatotukanga va muelo wu mbanza babawanga Hamoli ayi muana andi Sikemi, bana babo ba babakala bakinina mu zengo.
25Tala mambu mabua: Mu lumbu kintatu, babakala bu bakidi moni phasi zi ziphuta, bana bole ba Yakobi, Simeoni ayi Levi, bakhomba zi Dina, babonga sabala, bakota mu mbanza, mu kinzimbukila, bavonda babakala babo. 26Bavonda Hamoli ayi muana andi Sikemi mu sabala kilengolo mbote, babonga busi kiawu Dina ku nzo Hamoli ayi batotuka. 27Bana bankaka ba babakala ba Yakobi bazoma bobo baba ziphuta ayi batana mbanza bila babundula busi kiawu. 28Baziona mameme, zikhombo, zingombe ayi ziphunda, ayi bima bibio biba mu mbanza ayi ku nsitu. 29Babonga bibio biba lenda zingila, bana babo bafioti bawu babo ayi baketo ayi tana bima bibio biba mu zinzo ziawu .
30Buna Yakobi wukamba Simeoni ayi Levi: «Luphangidi diambu di kiadi mu kuthula mutu wumbi kudi basi tsi, basi kanana ayi basi pelesi. Tuidi kueto bafioti, mabakutakana kithatu kudi minu mu kunduanisa ayi kuphonda, mu kedika mandi fukusua minu ayi nzo ami.» 31Buna Simeoni ayi Levi bavutula: «Tulenda kueto bika busi kieto banga ndumba leta?»
Currently Selected:
1 Mose 34: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
