1 Mose 37
37
YOSEFI
37-50
Zindozi zi Yosefi
1Buna Yakobi wukala mu tsi yi kinzenza yi se diandi, mu tsi yi Kanana. 2Kiaki kikhulu ki Yakobi. Yosefi bu kaba kumi tsambudi di mimvu, wuba vunganga mameme ayi bakhomba ziandi zi babakala va khati bibulu bifioti ayi bu kaba muana ditoko, wuba ayi bana ba babakala ba Bila ayi bana ba babakala ba Zilipa, bakazi ba se diandi. Ayi Yosefi wubakambanga se diawu khadulu awu yimbimbi mu diambu diawu. 3Isaeli wubazolanga Yosefi viokila bana bandi ba babakala babo, bila wuba muana bakala wu bununu buandi, ayi wuntungisila nlele wukula, wu nzila nzila banga simisi. 4Mu thangu bakhomba ziandi zi babakala bamona ti se diawu wuluta kunzola viokila bakhomba ziandi zizio zi babakala, batona kunlenda ayi balembo buekunyolukisa mu nlembami.
5Ku zimunina Yosefi wulota ndozi ayi wukamba yawu bakomba ziandi zi babakala buna babaka diaka diambu ditoma kunlendila. 6Ayi wubakamba:" Ndikulubombidila, wanu ndozi yayi yindilotolo: 7Tala, tubedi kanganga biko bi biti mu khati tsola, ayi tala, ko kiami kivumbuka ayi kitelama, ayi tala, biko bieno bikizungidila ayi bibuongama va thadisi ko kiami ki biti ayi Biko bi witi tulembo kangingi mu tsola, tumbu zimbukulu ko kiami ki witi kivumbukidi ayi kitedimini. 8Vayi khomba ziandi zi babakala bankamba:" Mu kedika mawuba ntinu va beto voti mawuyala mu kedika va beto?" Babaka diaka diambu dinkaka dibuela luta kunlendila mu diambu di zindozi ziandi ayi mu diambu di ziphova ziandi. 9Landila mambu mama Yosefi wubuela loto ndozi yinkaka ayi wuyikamba bakhomba ziandi zi babakala, wutuba: «Ndotolo diaka ndozi yinkaka, ayi tala, thangu, ngonda ayi kumi mbuetete mosi bifukama nate va ntuala ami.»
10Buna wukamba yawu kudi se diandi banga bu kakambila bakhomba ziandi, vayi se diandi wutona kunsemba ayi wunkamba:" Mbangudulu mbi ndozi yoyo yi wulotolo? Bue matuiza mu kedika, minu, maman aku ayi khomba ziaku zi babakala tuiza kufukimina nate zizi va ntoto? 11Khomba ziandi zi babakala bamona khenene mu andi#37.11 Dedikisa Mav 7.9., vayi se diandi wulunda diambu beni mu ntima andi.
Yosefi wusumbusu kudi bakhomba ziandi zi babakala
12Tala khomba ziandi zi babakala bayenda dikila bibulu bifioti bi se diawu ku ndambu Sikemi. 13Ndambu bilumbu bivioka, Isaeli wukamba Yosefi: «Khomba ziaku zi babakala balembo vungi bibulu ku ndambu Sikemi. Yenda kubabumina mu zina diami.» Yosefi wuvutula: «Thidi kuami, tata.» 14Isaeli wubuela kamba: «Ndikubombidila, yenda. Tala ti bakhomba ziaku zi babakala basiemi kuawu ayi ti bibulu bisiemi, buna wundatina zitsangu.»
Tona vana mbata, wumfidisa ku ndimba Hebeloni ayi Yosefi wuyenda ku ndambu Sikemi. 15Thangu yilanda, bakala dimosi wumona wulembo diengidi ku tsola buna bakala wunyuvula: «Mbi lembo tombi?» 16Yosefi wuvutula: «Bakhomba ziami zi babakala ndilembo tombi.» Wutsonga, ndikubombidila, kue balembo vungila bibulu. 17Buna bakala wuvutula: «Babotukidi vava bila ndibawilungu balembo tubi: “Tuendeno ku Dotani.”» Yosefi wutamana kuenda ku mbusa bakhomba ziandi zi babakala ayi wubamona ku Dotani.
18Bawu bamona bu kaba thama mu thatuki. Tekila kafikama va baba, batona kunyendila manenga mu bukhita muingi bamvonda, 19Ayi bakambasana:"Taleno mutu wunlotanga zindozi wulembo yizi! 20Ayi buabu yizeno, tumvondanu ayi tunlozanu mu bulu dimosi dinlangu ayi tufuiti tuba ti kibulu ki nsitu ki nganzi kindidi. Bosi matumona bue bukuiza bedi zindozi ziandi 21Mu thangu Lubeni kawa mambu beni, wutomba mu kumvukisa mu mioko miawu. Ayi wukamba: «Tubikeno kumvonda!» 22Lubeni wubuela kubakamba: «Kadi tenguleno menga, lulonzeno mu bulu diadi dinlangu didi mu tsi yikhatu, ayi kadi kumvangeno diambu!» Lukanu lu Lubeni luba mu kumvukisa mu moko mawu ayi kumvutula kudi se diandi.
23Tala mayiza bua: Thangu Yosefi katula va ba bakhomba ziandi zi babakala, bamvula kikhutu kiandi ki kula ki nzila nzila kikavuata. 24Buna bambonga ayi banloza mu bulu. Mu thangu beni, dibulu beni kadi kiasa muisi ba ko bila muisi ba ko nlangu mu khati. 25Buna bakala muingi badia dipha. Bubavumbula meso mu tala, bamona nkangu wu ba Isamayelita baba ku Ngaladi, ba kamela bawu banata Ladanumi, malasi ayi mila mi nti, baba mu nzila mu kubikulumuna ku Ngipiti. 26Buna Yuda wukamba zikhomba ziandi zi babakala: « Ndandu mbi yidi kudi beto mu vonda khomba eto yibakala ayi matununga mu fuka menga mandi? 27Yizeno tunsumbisa kudi ba Isamaelita ayi koko kueto kubika ba va yandi bila yandi khomba eto yibakala, nsuni eto.» Bawilukila khomba awu yi bakala. 28Mu thangu yoyo, minkiti basi Midiami bavioka, batombula Yosefi ayi bantotula mu bulu ayi bantekisa mu makumi mole ma sekeli ma palata kudi ba Isamaelita, bannata ku Ngipiti#37.28 Minkiti basi Midiani: mbangudulu yinkaka: zikhomba zi Yosefi, dedikisa Mav 7.9.. 29Mu thangu yilanda, Lubeni vutuka ku bulu di nlangu, ayi tala Yosefi kasiedi muna ko. Wukakuna minlele miandi, 30bu kavutuka kudi bakhomba ziandi zi babakala, wuboka: «Muana zimbidi. Buabu minu kue ndieka kuenda?» 31Buna babonga kikhutu kikula ki Yosefi, bavonda khombo mbakala ayi babuika khumbu ziwombo kikhuti kikula mu menga. 32Buna bafidisa kikhutu kudi se diawu ayi bankamba: «Tala matumueni. Fiongunina kani kikhutu ki muana aku evo nana.» 33Wutona kukifiongunina ayi wuboka: «Kiawu kikhuti kikula ki muana ami wubakala. Bulu kitsisi kimvondidi. Kedika Yosefi bankakuni mu bi benzo benzo!» 34Buna Yakobi wukakuna minlele miandi, wuvuata diphiya tsaku mu luketo luandi ayi wudidila muana andi wubakala mu lumbu biwombo. 35Ayi bana bandi babo babakala ayi bana bandi babo ba baketo babatelamanga mu kumbomba vayi wubamanganga mu bombo ayi wubatubanga: Ndiala kulumuka mu kiadi kuyenda muana ami wubakala mu tsi yi bafua! Buna se diandi ditatamana mu kundila.
36Landila dio, basi Midiani banteka ku Ngipiti kudi Potifali, kisadi ki Falao ayi mfumu yi minsungi.
Currently Selected:
1 Mose 37: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
