1 Mose 50
50
Matanga ma Yosefi
1Yosefi wubua va zizi ki se diandi, wudila va ntuala andi ayi wumbumba. 2Buna Yosefi wutuma bisadi biandi, ba minganga bayumisa nitu se diandi. Bayumisa nitu Isaeli, 3Makumi maya ma bilumbu biduka mu diambu diandi, bila yoyo yiba thalu bilumbu mu yumisa nitu, ayi basi ngipiti batotula matsuela mu diambu diandi mu makumi tsambudi di bilumbu.
4Ku tsuka, lumbu bi bandidila bivioka ayi Yosefi wukamba basi nzo yi Falao, wukamba: «Ti ndimonokono nlemvo mu meso meno, kambeno, ndikulubombidila, mu matu ma Falao buabu: 5“Tekila kafua, se diami wundikisa ndefi mu nkuzikila mu tsi Kanana mu biziami bikakubika. Wuphana nsua ndieziki buabu, bosi mandivutuka.”» 6Falao wumvana nsua mu kueziki se diandi boso bukadila dio ndefi. 7Yosefi wukuma ku Kanana muingi kazika se diandi ayi bisadi bi Falao, bakulutu ba nzo andi ayi bakulutu babo ba Ngipiti, 8Ayi nzo yiyo yi Yosefi, bakhomba ziandi zi babakala ayi nzo yi se diandi. Wubika kaka mu tsi Ngoseni batekolo bawu, bibulu biawu bi fioti ayi bibulu biawu binene. 9Va kimosi ayi yandi mukuma phe makalu ayi minati mi kavalu, ayi fulu kiwala batu baphuele.
10Ayi batula va fulu ki Atadi: «“Fulu ki lusende”» kidi mu zunga ki Yodani, vana badila ngolo ayi mu diambu di se diandi bi lumbu tsambudi. 11Buna basi tsi, basi Kanana, bamona ntindu matanga va fulu kintutulungu mbongo ki Atadi, ayi bayamikina: «Matanga manene ma basi Ngipiti! Diawu batedila fulu beni mu zina di Abeli-Mitsilayimi, fulu beni kidi mu zunga ki Yodani.»
12Buna bana bandi babakala bavanga mu diambu diandi banga bukabakambila. 13Bana bandi ba babakala banata mu tsi Kanana ayi banzika mu phaka matadi yi tsola Makapela, tsola Abalahami kasumba kudi Efeloni muisi Heti, banga mvuilu#50.13 Dedikisa ayi Mav 7.16. biziami, fika fika ayi Mamele. 14Bu kamana zika se diandi, Yosefi wuvutuka ku Ngipiti, yandi ayi zikhomba ziandi zi babakala, ayi babo bakuma yandi mu zika se diandi.
Yosefi lemvukidi bakhomba ziandi
15Zikhomba zi babakala zi Yosefi bu bamona ti se diawu fuidi, bakamba: «Bulendakana ti Yosefi wutulundidi nganzi ayi kalendi kambu kutu vutudila ko mambi matumvangila.» 16Buna bafidisa thumu kudi Yosefi banga buabu: «Se diaku wuvana thumunu tekila kafua, wukamba: 17“Tala mama lukamba Yosefi: Ndikubombidila, lemvukila mbimbi yi bakhomba ziaku ayi disumu diawu, bila dimbimbi bakuvangila.” Ndikubombidila, lemvukila buabu disumu di bisielo bi Nzambi yi se diaku.» Yosefi wudila bu kawa bobo. 18Landila dio, zikhomba ziandi zi babakala bayiza phe, babua va ntuala andi ayi bakamba: « Tuidi bavika baku.» 19Vayi Yosefi wubavutudila: «Kadi moneno tsisi, bue, va fulu ki Nzambi ndidi? 20Lukana mu kuphangila mambi vayi Nzambi wusekula mawu mu mambote mu nungisa mambu ma lumbu kiaki, mu tanina mioyo mi kanda diphuele. 21Buabu, kadi moneno tsisi. Manditatamana minu veka mu kuluvana bimvukila beno ayi makanda meno.» Bobo kababombila ayi kubakambila mu mbembo yinlembami.
Tsukulu yi luzingu lu Yosefi
22Ayi Yosefi wutatamana kala ku Ngipiti, yandi ayi nzo yi se diandi, Yosefi wuzinga khama mosi ayi kumi di mimvu. 23Buna Yosefi wumona bana ba Efalayimi yi mbandu yi ntatu ayi bana ba Makila, muana Manase. Babutukila va makuma ma Yosefi.
24Ku zimunina, Yosefi wukamba zikhomba ziandi: «Ndilembo yendi ku lufua, vayi Nzambi kelendi kondo kulubanzila ko, ayi mu kedika, wela kulu tombula tona mu tsi yayi nate mu tsi yikadila Abalahami ndefi, kudi Isaki ayi Yakobi. 25Dieno ndefi mu nata nitu ami, Nzambi bukela kulubambukila moyo#50.25 Bibuku 24-25: dedikisa 2 Mos 13.19, Yos 24.32, Ebe 11.22..»
26Landila dio, Yosefi wufua bu kazinga khama ayi kumi di mimvu, bayumisa nitu andi ayi bantula mu khelo ku Ngipiti.
Currently Selected:
1 Mose 50: YOM-CD
Highlight
Share
Copy
Want to have your highlights saved across all your devices? Sign up or sign in
©2024 Seed Company in coordination with Forum Communautaire des Traducteurs de la Bible et Alphabétisation
