मत्ती 26

ईशु नु मारणे ची चाल

(मरकुस 14:1,2; लूका 22:1,2; यूहन्‍ना 11:45–53)

1जिसे बेले ईशु ये बाता केहती चुकला तां आपणे चैला नु किहुं लाग़ला, 2“तम्ही जाणा कि ङोन ङिहां चे बाद फसह चा तेंहवार छै, ते मैं इन्साना चा पूत क्रूसा उपर चढ़ावणे वास्ते पकड़वाला जई।”

3बल्ति प्रधान याजक ते प्रजा चे बङके काइफा नांवा चे महायाजक चे बेहड़े मां भेले हुले, 4ते आपस मां विचार करु लाग़ले कि ईशु नु धोक्‍के लारे पकड़ती कर मारती नाखु। 5पर वे किही पलते, “तेंहवारा चे समय ना, कङी इसड़े ना हो कि लौका मां बवाल मचती जाओ।”

बैतनिय्याह शहरा मां ईशु

(मरकुस 14:3–9; यूहन्‍ना 12:1–8)

6जिसे बेले ईशु बैतनिय्याह शहरा मां शमौन कोहड़ी चे घरा मां हुता, 7#लूक 7:37,38तां हेक असतरी संगमरमर चे ठांवा मां बेशकीमती इत्र चती कर ओचे गोढु आली, ते जिसे बेले ओ रोटी खाणे वास्ते ब़ेहला हुता तां ओचे ठोङा उपर रेड़ती ङिला। 8ईं ङेखती कर ओचे चैले रिसाती कर ते किहुं लाग़ले, “ऐचा कां सत्यानास करला गेला? 9ऐनू तां आच्छे मोला मां बेचती कर कंगाला मां बांटला जा सग़ेला।”

10ईं जाणती कर ईशु ने वानु केहले, “असतरी नु कां सतावा पले? विणे माये लारे भलाई करली। 11कंगाल तां तम्चे लारे सदा रिही, पर मैं तम्चे लारे सदा नी रिही। 12विणे माये शरीरा उपर जको हा इत्र रेड़ला, ओ माये दफनाले जाणे वास्ते करले। 13मैं तम्हानु सच्‍च किहे पला कि सारे संसारा मां जिठे-किठी सुसमाचार प्रचार करला जई, ओठे विचे ऐ कामा ची चर्चा वी विची यादगिरी मां करली जई।”

यहूदा इस्करियोती चा ईशु लारे विश्‍वासघात

(मरकुस 14:10,11; लूका 22:3–6)

14तब यहूदा इस्करियोती ने, जको ब़ारहा चैला महु हेक हुता, प्रधान याजका चे गोढु जती कर केहले, 15“अगर मैं ओनु तम्चे हाथ पकड़वाती ङिये, तां मनु का ङिया?” वाणे ओनु त्रीस चान्दी चे सिक्‍के तोलती कर ङिती ङिले। 16ते ओ ओही समय कनु ईशु नु पकड़ावणे चा मौका सोधु लाग़ला।

चैला लारे फसह चे आखरी खाणे

(मरकुस 14:12–21; लूका 22:7–13,21–23; यूहन्‍ना 13:21–30)

17अखमीरी रोटी चे तेंहवारा चे पेहले ङिओ, चैले ईशु चे गोढु आती कर पूछु लाग़ले, “तु किठे चाहवी कि अम्ही दुधे वास्ते फसह खाणे ची तियारी करु?”

18ईशु ने केहले, “शहरा मां फलाणे बन्दे चे गोढु जती कर ओनु किहा, ‘गुरु किहे पला कि माया समय गोढु छै, मैं आपणे चैला चे लारे दुधे इठे तेंहवार मनावी।’ ”

19तां चैला ने ईशु ची आज्ञा मनली ते फसह चा भोज़ तियार करला।

20जिसे बेले आथण हुले तां ईशु ब़ारहा चे लारे खाणे खऊं ब़ेहला। 21जिसे बेले वे खई पलते, तां ईशु ने केहले, “मैं तम्हानु सच्‍च किहे पला कि तम्चे महु हेक मनु धोक्‍के लारे पकड़वावी।”

22ऐचे उपर वे ब़ोहत उदास हुले, ते हर हेके ने ओकनु पूछले, “हे गुरु, का ओ मैं छै?”

23ओणे उत्तर ङिला, “जको माये लारे थाली मां हाथ नाखली ब़ेहला, ओही मनु पकड़वावी। 24मैं इन्साना चा पूत जिसड़े माये वास्ते लिखले गेले, जाये ही पला, पर ओ इन्साना उपर हाय! जाये जरिये मैं इन्साना चा पूत पकड़वाला जई। अगर ओ इन्साना चा जनम ही ना हुवीया, तां ओचे वास्ते भले हुते।”

25बल्ति ओचे पकड़ावणे आले यहूदा ने केहले, “हे रब्बी, का ओ मैं छै?”

ओणे ओनु केहले, “तु केहती चुकला!”

प्रभु भोज़

(मरकुस 14:22–26; लूका 22:14–20; 1 कुरिन्थियां 11:23–25)

26जिसे बेले वे खई पलते तां ईशु ने रोटी चली ते आशीष मांगती कर भांली, ते चैला नु ङिती कर केहले, “गिहा, खावा, हा माई देह छै।”

27बल्ति ओणे मुंगर चती कर धन्यवाद करला ते वानु ङिला ते केहले, “तम्ही सारे ऐचे महु पीया। 28कांकि ईं वाचा चे माये ऊं लुहीं छै, जको ब़ोहता चे वास्ते पापा ची माफी चे वास्ते बाहले जाये। 29मैं तम्हानु किहे पला कि अंगूरा चा हा रस ओ ङिओ तक कङी नी पिही, जब तक तम्चे लारे आपणे ब़ा चे राज़ मां नवां ना पीयें।”

30बल्ति वे भज़न गाती कर जैतून चे पहाड़ा उपर चाह्‍ले गेले।

पतरस चे इन्कार ची भविष्यवाणी

(मरकुस 14:27–31; लूका 22:31–34; यूहन्‍ना 13:36–38)

31तब ईशु ने वानु केहले, “तम्ही सारे जणे आज़ ही राती नु माई वजह कनु ठोकर खावा, कांकि पवित्रशास्त्र मां लिखले पले,

“ ‘मैं आजड़ीया नु मारी,

ते झोण्ड चा भेङा इंगे-ऊंगे हुती जाये।’

32 # मत्ती 28:16 “पर मैं आपणे जीते हुवणे चे बाद तम्हा कनु पेहले गलील नु जई।”

33ऐचे उपर पतरस ने ओनु केहले, “अगर सारे दुधे बारे मां ठोकर खाओ तां खाओ, पर मैं कङी वी ठोकर नी खई।”

34ईशु ने ओनु केहले, “मैं तनु सच्‍च किहे पला कि आज़ ही राती नु कूकड़े चे बांग ङेणे कनु पेहले, तु तीन वारी माया इन्कार करती गिहे।” 35पतरस ने ओनु केहले, “अगर मनु दुधे लारे मरणे वी पड़ो, तांवी मैं दुधे कनु कङी नी मुकरी।”

ते इसड़े ही सारा चैला ने वी केहले।

गतसमनी ची बाड़ी मां प्राथना

(मरकुस 14:32–42; लूका 22:39–46)

36तब ईशु आपणे चैला चे लारे गतसमनी नांवा ची हेक जग़हा मां आला ते आपणे चैला नु किहुं लाग़ला, “इठी ब़ेहले रेहजा, जब तक मैं ओठे जती कर प्राथना करे।” 37ईशु पतरस ते जबदी चे ङुंहु पूता नु लारे गेहली गेला, ते उदास ते बैचेन हुं लाग़ला। 38तब ओणे वानु केहले, “माये मन ब़ोहत उदास छै, इठे तक कि मैं मरणे उपर छै। तम्ही इठी रुका, ते माये लारे जाग़ते रिहा।” 39बल्ति ओ थोड़ा नेरा उग़ते बधती कर मुँहा चे भराणे ढेला, ते हा प्राथना करली, “हे माया ब़ा, अगर हो सग़े तां हा मुंगर माये कनु टलती जाओ, तां वी जिसड़े मैं चाहवे उसड़े ना, पर जको तु चाहवी उसड़े ही हो।”

40बल्ति ओ चैला चे गोढु आतीकर वानु नूहले आले ङेखले ते पतरस नु केहले, “का तम्ही माये लारे हेक घड़ी वी ना जाग़ सग़ले? 41जाग़ते रिहा, ते प्राथना करते रिहा कि तम्ही परीक्षा मां ना पड़ा। आत्मा तां तियार छै, पर शरीर कमजोर छै।”

42बल्ति ईशु ने ङुजा वारी जती कर हा प्राथना करली, “हे माया ब़ा, अगर हा माये पिले बिना ना हट सग़ी तां दुधी इच्छा पुरी हो।” 43तब ओणे आती कर वानु बल्ति नूहले आले ङेखले, कांकि वांचीया आंखी नीङे लारे भरलीया पलतीया।

44वानु छोड़ती कर ओ बल्ति चाह्‍ला गेला, ते वा शब्द मां बल्ति तीजी वारी प्राथना करली। 45तब ओणे चैला चे गोढु आती कर वानु केहले, “हमा नूहले रिहा, ते आराम करा, ङेखा, घड़ी आती पुज़ली छै, ते मैं इन्साना चा पूत पापीया चे हाथु पकड़वाला जाणे उपर छै। 46ऊठा, चाह्‍ला, ङेखा, माया पकड़ावणे आला गोढु आती पुज़ला।”

ईशु चे धोक्‍के लारे पकड़ले जाणे

(मरकुस 14:43–50; लूका 22:47–53; यूहन्‍ना 18:3–12)

47ईशु ईं किहे ही पलता कि यहूदा जको ब़ारहा चैला महु हेक हुता आला, ते ओचे लारे प्रधान याजका ते लौका चे बङका चे तरफु हेक बङी भीड़, तलवारा ते ङांगा चली आले। 48ओचे पकड़ावणे आले ने वानु हा इशारा ङिला हुता, “जानु मैं मिठ्ठी ङिही ओही छै, ओनु पकड़ती गेहजा।”

49ते तुरन्त ईशु चे गोढु आती कर केहले, “हे रब्बी, नमस्कार,” ते ओनु ब़ोहत मिठ्ठीया ङिलीया।

50ईशु ने ओनु केहले, “हे मित्र, जिसे कामा वास्ते तु आला, ओनु करती गे।”

बल्ति वाणे गोढु आती कर ईशु चे उपर हाथ नाखती कर ओनु पकड़ती गेले। 51ईशु चे साथीया महु हेके ने हाथ बढ़ाती कर आपणी तलवार छिकती ते महायाजक चे दासा उपर चलाली ते ओचा कान उङारती नाखला। 52बल्ति ईशु ने पतरस नु केहले, “आपणी तलवार मियानी मां नाख, कांकि जको तलवार चलावी, वे सारे तलवारी लारे नाश करले जाये। 53का तु ना समझी कि मैं आपणे ब़ा कनु बिनती कर सग़े, ते ओ स्वर्ग़दूता चा ब़ारहा पलटन कनु ज्यादा माये गोढु हमा हाजिर करती ङिही? 54पर पवित्रशास्त्रा चा वे बाता कि इसड़े ही हुवणे जरुरी छै, किवें पुरीया हुवे?”

55 # लूक 19:47; 21:37 ओ समय ईशु ने भीड़ नु केहले, “का तम्ही तलवारा ते ङांगा चती कर मनु ङाकु जाणती कर पकड़ने वास्ते निकड़ले छिवा ? मैं हर ङिओ मन्दरा मां ब़ेसती कर उपदेश ङिता रेहता, ते तब तम्ही मनु कोनी पकड़ले। 56पर ईं सब ऐवास्ते हुले कि भविष्यवक्‍ता चे वचन पुरे हो।”

बल्ति सारे चैले ईशु नु छोड़ती कर द्रोड़ती गेले।

महासभा चे सामणे ईशु

(मरकुस 14:53–65; लूका 22:54,55,63–71; यूहन्‍ना 18:13,14,19–24)

57तब ईशु चे पकड़ने आले ओनु कैफा नांवा चे महायाजक चे गोढु गेहती गेले, जिठे शास्त्री ते बङके भेले हुले हुते। 58ते पतरस दूर ही दूर ओचे भांसु-भांसु महायाजक चे बेहड़े तक गेला, ते भीतर जती कर अन्त ङेखणे नु पाहरेदारा लारे ब़ेसती रेहला। 59प्रधान याजका ते सारी महासभा ईशु नु मारती नाखणे वास्ते ओचे विरोध मां कूड़ी ग़वाही ची खोज मां हुते। 60पर ब़ोहत सारे कूड़े ग़वाह चे आणे उपर वी कोनी लाभली, आखिर मां ङोन जणे आले, 61#यूह 2:19ते केहले, “ऐणे केहले, ‘मैं नरीकारा चे मन्दरा नु ढा सग़े ते ओनु तीन ङिहां मां बणा सग़े।’ ” 62तब महायाजक ने खड़े हुती कर ईशु नु केहले, “का तु कुई उत्तर ना ङी? ईं लौक दुधे विरोध मां का ग़वाही ङी पले?” 63पर ईशु चोप रेहला।

तब महायाजक ने ओनु केहले, “मैं तनु जीते नरीकारा ची कसम ङिये पला कि अगर तु नरीकारा चा पूत मसीह छी, तां अम्हानु केहती ङे।”

64ईशु ने ओनु केहले, “तु आप ही केहती ङिले, बल्कि मैं तम्हानु ईं वी किहे पला कि हमा कनु तम्ही मैं इन्साना चे पूता नु, सर्वशक्‍तिमान चे सज़्ज़े पासु ब़ेहले, ते आसमाना चे बदला उपर आते ङेखा।” 65ऐचे उपर महायाजक ने आपणी ओढ़णी फाड़ली ते केहले, “ऐणे नरीकारा ची निन्दा करली, हमा अम्हानु ग़वाह ची का जरुरत? ङेखा, तम्ही हमा हा निन्दा सुणली। 66तम्ही का समझा पले?”

वाणे उत्तर ङिला, “हा मरणे चे लायक छै।” 67तब वाणे, ओचे मुँहा उपर थूकले, ते ओनु मुक्‍किया मारलीया, नेरा ने थप्पड़ मारती कर, केहले 68“हे मसीह, भविष्यवाणी कर ते बावड़ तनु केहणे मारले?”

पतरस चा इन्कार

(मरकुस 14:66–72; लूका 22:56–62; यूहन्‍ना 18:15–18,25–27)

69ते पतरस ब़ाहर बेहड़े मां ब़ेहला हुता कि हेक दासी ओचे गोढु आली ते केहले, “तु वी ईशु गलीली चे लारे हुता।”

70ओणे सारा चे सामणे ईं केहते हुले इन्कार करला, “मैं ना जाणी तु का किही पली।”

71जिसे बेले ओ ब़ाहर पोड़ीया मां गेला, तां ङुजी दासी ने ओनु ङेखती कर वानु जको उठे हुते केहले, “हा वी तां ईशु नासरी चे लारे हुता।”

72पतरस ने कसम खाती कर बल्ति इन्कार करती कर केहले, “मैं ओ इन्साना नु ना जाणी।”

73थोड़ी देर बाद लौका ने जको ओठे भिले हुते, वाणे पतरस चे गोढु आती कर ओनु केहले, “सच्‍चमां तु वी वांचे महु हेक छी, कांकि दुधी ब़ोली दुधा भेद खोले पली।”

74तब ओ कोसणे ते कसम खऊं लाग़ला, “मैं ओ इन्साना नु ना जाणी।”

ते तुरन्त कूकड़े ने बांग ङिली। 75तब पतरस नु वा बात जको ईशु ने ओनु केहली हुती याद आली, “कूकड़े चे बांग ङेणे कनु पेहले तु तीन वारी माया इन्कार करे।” ते ओ ब़ाहर जती कर तकड़ा रोला।

Currently Selected:

मत्ती 26: ODR

Highlight

Copy