Maajɨ Bɛtɔ Twamagɨɨ 16
16
Timoti A Bwang Bulus Gǝm Jǝbɔ Sila
1Nǝngɔ Bulus a bɛ a Darba jǝbɔ Listiraɨ. Kaa bwɛ mɛlalɨ wo a Listira dunɔ nǝn Timoti, wʊnɨ nɛnɛ gɔ n bwɛn Yahudiyaɨ, n nǝ nǝtǝm bɨlǝngkɛl. Tɨya gɔ n bwɛ Girika. 2Nǝb bwangtǝm nɨ a Listira jǝbɔ Ikoniyaɨ jǝ bǝlá Timoti lɛ. 3Bulus a swɨ Timoti ya ywa gǝn. N kɛl dul jʊ nɨ a do gǝn, a biyo gǝm mwɛnɨ, jʊ a bwɨɨ, Yahudawagɔ a daagɔ gwamɨ, ja nyǝm tɛtɛ gɔ n Bwɛ Girika.
4Kwama nɨ Bulus jǝbɔ Sila jǝ yɔ yɔm jinɔ lɛɨ, jǝ bwangtǝn nɛ tuulɔ nǝn tuulɔ, jǝ sʊwa nǝbɔ jʊ lɛ bɛtɔ twamagɔ jǝbɔ dʊʊm nǝb bwangtǝmɔ a kiyo a jǝla nǝn a Urushalimaɨ, wʊnɨ jǝ swɨ lɛ nǝb bwangtǝmɔ a kɨlaɨ. 5A dul kɛl nɨɨ, mʊrkalɨ nǝb bwangtǝm Kwaamaɨ ja sʊtǝn kwaan a mʊgɔ nǝtǝm bɨlǝngkɛl, jǝ sʊ ladatǝmɔ lɛ kum jǝbɔ kum.
Dʊgam Nyangnyang Bulusi A Dul Bwɛ Makidoniyaɨ
6Nǝngɔ ja kɛla tǝm Firijiyagɔ jǝbɔ Galatiyaɨ, jʊ a bwɨɨ Yʊwa Kwaamaɨ a kaa ji wo a sʊwatǝm kɛl Tɛlalɔɨ a Asiya. 7Nǝn kwama ja bɛ a yǝga tǝm Misiyaɨ, jǝ swɨ lɛ ja yɔ a tǝm Bitiniyaɨ, Yʊwa Yesui a jǝla jim bɔ. 8Nǝngɔ ja bwangtǝn gwanga tǝm Misiyaɨ, ja shu a Taruwasa. 9Nǝn kum Bulus a dʊga dʊgam nyangnyang, a kuwo kaa nǝ tǝm Makidoniya tɨm kela gǝn nɛ gɔ, “Bɛ a Makidoniya, ba tɨka nǝn.” 10Bulus a kuwo dʊgam nyangnyang nɨɨ, tʌgo a kang nǝngɔ nǝn fɛka nǝn shu a Makidoniyaɨ, jʊ a bwɨɨ nǝn nyǝm nǝn Kwaama a jo nǝn gɔ ya nǝn sʊwa ji fulon kɛl lǝmɨ nɨɨ.
Lidiya A Nǝ Bɨlǝngkɛl
11Nǝngɔ nǝn gun a mʊgɔ tɨyamwɛng a Taruwasa nǝn swa kǝga a Samutarkii, tǝm nɨ a tɨbǝl wɨmaɨ. Nǝn tǝmsɛlɨɨ, nǝn yɔ a Niyabolis. 12A daa gɔ, nǝngɔ nǝn shu a Filibi wʊnɨ a mʊgɔ fɔlɔn Romaɨ, nǝn gɔ n dalɨ tuulɔ gwanga tǝm Makidoniyaɨ. Nǝngɔ nǝn maa kumtɨn woi.
13Nǝn Kum Fǝbtǝm nǝngɔ nǝn jel a nyanga tuulɔ gɨɨ, nǝn yɔ a kʌng tiyo a daa nɨ nǝn nyǝma lɛ nǝn gɔ kɛna daa maatǝm keli. Nǝn yɨ wo, nǝn tǝl sʊwatǝm kɛl jǝbɔ nɔɔtǝm nɨ a mʊrka woi. 14Kaa nɔɔlɨ wo dunɔ nǝn Lidiya, n nǝ bwangtǝm Kwaamaɨ, nyʊwa nǝn nɛ. N bwɛn tuulɔ Tayatiraɨ. Gǝ miyo dwang felʌng wʊnɨ kemʌn gǝnɔ a kwam nyɨɨ. Tɛlalɔ a wum nǝl gǝnɔ, nǝngɔ a ya nǝl gǝnɔ a nyʊwa jʊ Bulus a sʊwaɨ. 15Nǝn kwama a yʊ mwɛ sagsagɔ jǝbɔ nǝbɔ lɔ gɨɨ, nǝngɔ a jo nǝn a lɔ gɨɨ. A sʊwa gɔ, “Na jǝ́ jǝla mǝ nǝ nǝtǝm bɨlǝngkɛl a daagɔ Tɛlalɔ woi, jǝ́ bɛ ba jǝ́ yɨ a lɔ mɨ.” A kela nǝn nyɔ, nǝngɔ nǝn jǝlaɨ.
Ja Kubʌl Bulus Jǝbɔ Sila A Lɔsomi
16Kaa di nǝn shu lɛ a daa maatǝm kelii, nǝngɔ nǝn tǝga kaa bwɛnɔɔlɨ wʊnɨ nǝngǝn nǝn kwaan yʊwa bwɛlaaɨ, n nǝ bʌtʌm sowi. Nǝbɔ lɔ bwɛnɔɔlɨ nɨɨ jǝ nya kemʌn nɛ dangǝn nǝn bʌtʌm sowi gǝnɔ maa lɛɨ. 17Nǝngɔ a tɨtǝn bwangtǝm Bulusi jǝbɔ tangǝn nǝnɔ, gaba kwaalɨ lɛ sʊwa lɛ gɔ, “Nǝb nɨ n bɛtɔ jwaalɛn Kwaamaɨ, Nǝ Dʊʊ. Jǝ sʊwa jen gola nyatǝm bʊʊtǝm.”
18A tɨtǝn maatǝmɔ nyɔ kumtɨnɔ a gǝlala. Nǝngɔ Bulus a nyʊwa nabwɨlɨ, a yǝla a sʊwa bwɛlaa nɨ gɔ, “N sʊwa ń a mʊgɔ dun Yesu Kiristii, bǝla gǝn.” A tʌgo a kang nǝngɔ a bǝla gǝnɨ.
19Nǝbam bwɛnɔɔlɨ nɨ ja kuwo ja mwatɨm gola jǝ nyatǝm kemʌn jini, nǝngɔ ja ta Bulus jǝbɔ Silaɨ, nǝngɔ ja gʊ ji ja yɔ nǝn a mʊgɔ gamdʌbo a daa nǝb maatǝm borangɔ woi. 20Ja yɔ nǝn ji a kǝga nǝb borangɨ, ja sʊwa gɔ, “Nǝb nɨ n Yahudawa, jǝ kom tǝm bǝnɔ lɛ. 21Jǝ mɛla nǝm jǝfʊlǝntɨn nɨ lɛ a bʊm bɨɨ gɔ bǝ yo bǝn nǝbɔ Romaɨ, ya bǝ bwangtǝn nɛ.”
22Nǝngɔ nǝbɔ gwam a mʊrka a dul jii. Nǝb borangɔ a wʊlalam dʊʊl jinɔ. Ja jǝgǝm dʊʊl jinɔ. Ja sʊwa gɔ ja bʊg ji. 23Ja bʊg ji dangǝnɨ, nǝngɔ ja dǝg ji a lɔsomii. Ja sʊwa nǝ dʌngtǝm lɔsomigɔ gɔ a dʌng ji a bʊm bʊmɨ. 24Nǝngɔ a yo jʊ nɨ ja sʊwa gǝnɨ, nǝngɔ a dǝg ji fʌlen a mʊgɔ lɔsomii, a kʊʊ jii.
25Nǝn sangdɨlang, Bulus jǝbɔ Sila jǝ maa keli lɛ, jǝ mala nafɨ bǝlátǝm Kwaamaɨ lɛ, nǝb nɨ a lɔsomii nyʊwa ji lɛ. 26Tʌgo a kang, nǝngɔ a maa kaa gʌleng mǝgatǝm tǝmɨ, fʌlʌm kan lɔsomigɔ a mǝga. Tʌgo a kang nyanga kantɨnɔ a wumola. Golmantɨn nɨ ja bwa ji nǝnɨ a kwɨyalam. 27Nʊ nɨ tɔɔ ji lɛɨ a kǝlaɨ, a kuwo nyanga kantɨnɔ a wumolaɨ, nǝngɔ a jǝg gulʌnɔ sǝ gǝ jʌ dul gǝnɔ nǝnɨ, bʊʊla lɛ gɔ kɛna nǝbɔ a lɔsomii a mwala. 28Bulus a gung diilɔ nǝn kwaan gɔ, “Ka ń jʌ lɛ dul mʊnɔ! Gwam nǝnɔ nǝn fɔ!”
29Nǝngɔ nǝ dʌngtǝm lɔsomigɔ a sʊwa gɔ ja bɛ nǝn kǝlagɔ. A gun dǝbǝr, a dɔ a mʊgɔ, a yɔ a kǝga Bulusi jǝbɔ Silaɨ, bʊtɔgɔ sʊwa mam lɛ nǝn taal. 30Nǝngɔ a jel nǝn ji a yooli a sʊwa gɔ, “Nǝb dʊʊm, n wɛ mǝ maa lɛ sǝ n nya bʊʊtǝmɨ?”
31Nǝngɔ ja sʊwa gɔ, “Nǝ bɨlǝngkɛl nǝn Tɛlalɔ Yesu, mʊ nya nya bʊʊtǝm, mɔ jǝbɔ nǝbɔ lɔ mʊnɔ.” 32Nǝngɔ ja sʊwa gǝn kɛl Tɛlalɔɨ, gǝ jǝbɔ nǝbɔ a lɔ gɨɨ gwam. 33Tʌgo a kang nǝn kum gɔ a wɔɔ ji ya saalǝm jim dɛɛbǝlɔ. Tʌgo a kang nǝngɔ ja yʊ gǝn mwɛ sagsagɔ jǝbɔ nǝbam gǝnɨ. 34Nǝngɔ a bɛ nǝn ji a lɔ gɨɨ, a fɛka jim jǝjalǝnɨ, nǝngɔ a tɨtǝn bǝlátǝmɨ, jʊ a bwɨɨ gǝ jǝbɔ nǝbɔ lɔ gɨɨ ja nǝ bɨlǝngkɛl a daa Kwaama woi.
35Tǝmɔ a sɛlɨ, nǝngɔ nǝb mwatɨtǝm borangɔ a twam bɛtɔ twama jini gɔ, “Jǝ́ dem kang a nǝb nɨ gǝm.” 36Nǝ dʌngtǝm lɔsomigɔ a sʊwa Bulus gɔ, “Nǝb mwatɨtǝm borangɔ gɔ ja dem jem kang. Kǝngkɔ jǝ́ jel, jǝ́ yɔ kwamɨgǝn.”
37Bulus a sʊwa ji gɔ, “Nyangnyang ja bʊg nǝnɨ, ke bɔ borang ja maa nǝmɨ, nǝn tǝnǝn nǝn nǝbɔ Romaɨ, ja mal nǝn a lɔsomi. Jǝ jǝg nǝn nɛ daddad kǝngkɔ? Mɨ nyɔ! Ja bɛ nǝn kang ji ba ja jǝg nǝn.”
38Nǝngɔ bɛtɔ twamagɔ a yǝla ya sʊwa nǝb mwatɨtǝm borangɔ kɛl nɨɨ. Ji ja nyʊwa gɔ Bulus jǝbɔ Sila n nǝbɔ Romaɨ, taalɔ a ta ji. 39Nǝngɔ ba ja jʊng a kǝga Bulusi jǝbɔ Silaɨ, ja kela jii. Ja jǝg ji a lɔsomii. Ja kela ji gɔ ja bǝla tǝm gɨɨ. 40Kwama Bulus jǝbɔ Sila ja jel a lɔsomii, nǝngɔ ja shu a lɔ Lidiyaɨ. Ja kuwo kambɨɨ, nǝngɔ ja kʊʊ jim nǝlɨ. Nǝngɔ ja shui.
Currently Selected:
Maajɨ Bɛtɔ Twamagɨɨ 16: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
