Yohana 12

Ja Kul Yesu Gǝm Nwang Lǝmɨ A Betanya

(Mat 26:6-13; Mar 14:3-9)

1Dikulom Yabtǝmɔ a bǝla kumɔ nukuni, nǝngɔ Yesu a yǝla a Betanya, a daa nɨ Liazaru woi, nʊ nɨ Yesu a gung gǝn a bwaaɨ. 2N daa gɔ ja maa gǝm jǝjalǝn kumɔ woi. Marta nǝn gɔ a tǝga jim jǝjalǝnɨ. Liazaru wo a mʊgɔ nǝbɔ a ja jǝjalǝn dakini jǝbɔ Yesui. 3Nǝngɔ Maryamu a do kwal nwang nɨ sagsag kunʌnɔ a lǝm nyɨɨ, wʊnɨ kemʌnɔ a lada nyɨɨ, ja maa nǝn nardi, a kul a naa Yesui. Nǝngɔ a waam naatɨn gǝnɔ nǝn yitʌn dul gǝnɨ. Kunʌn nwang lǝmɨ nɨ a yii mʊgɔ lɔngɔ.

4Yahuza Iskariyoti, wʊnɨ win a mʊgɔ bɛtɔ mɛlalɨ gǝnɨ, nʊ nɨ lungto gǝn nɛɨ, a sʊwa gɔ, 5“Wɛ bwɨ ja miyo bɔ nwang nɨ kemʌn na ladaɨ, wʊnɨ nǝ jʊngtǝm twamɔ nya lɛ a kumtɨnɔ fʊlkʊb taalɨ, sǝ ja nɨ nǝb bʊnǝnɔ kemʌn nɨɨ?” 6Yahuza a sʊwa kɛl nɨɨ, ke bɔ bʊʊlalɨ nǝb bʊnǝnɔ a maaɨ, jʊ a bwɨɨ n nǝkuu. Nǝn gɔ ta bǝla kemʌn jinɔ lɛɨ. Gǝ kuu kuu kemʌnɔ a mʊgɔ gǝn a tɨka dul gǝnɔ nǝn.

7Nǝngɔ Yesu a sʊwa gɔ, “Jǝ́ bǝla gǝn wo. A kul sǝ a fɛka kɔkɔ fʌltǝm mǝndɨ. 8Nǝb bʊnǝnɔ kwangkwang jǝbɔ jen. Ke bɔ kwangkwang mǝ nǝbɔ jeni.”

Ja Maa Liazaru Gǝm Bwɨlang Fɛkalɨ

9A kwama nɨ Yahudawagɔ a mʊrka a lada nyɨɨ, ja nyʊwa fulonɔ gɔ Yesu wo a Betanyaɨ, nǝngɔ ja yɔ woi, ke bɔ kɛl Yesui kwaagɔ, ja yɔ sǝ jǝ kuwo Liazaru wʊnɨ Yesu a gung gǝn a bwaaɨ. 10Nǝngɔ dʊʊm nǝbkǝlamɔ ja kiyo kanga jǝ jʌm Liazaru lɛ tǝgǝnɨ. 11Jʊ a bwɨɨ, n kɛl dul Liazarui, Yahudawagɔ a lada nyɔ jǝ wʊlaka lɛ jǝbɔ dʊʊm nǝbkǝlamɔ, jǝ nǝ bɨlǝngkɛl lɛ a daa Yesu woi.

Yesu A Dɔ Urushalima

(Mat 21:1-11; Mar 11:1-11; Luk 19:28-40)

12Nǝn tǝmsɛlɨɨ nǝbɔ a lada nyɔ, wʊnɨ ja bɛ dikulomi, ja nyʊwa fulonɔ gɔ Yesu bɛ lɛ a Urushalimaɨ. 13Nǝngɔ ja wɔɔ langǝn kutʌshelʌnɔ, ja jel sǝ jǝ tǝga gǝnɨ, jǝ ma bwaalɨgɔ lɛ gɔ,

“Bǝlátǝmɔ na a Kwaamaɨ!

Bwiligɔ naa a nʊ nɨ bɛ lɛ

a mʊgɔ dun Tɛlalɔɨ,

Bwiligɔ naa a Fɔlɔ Israilaɨ!”

14Yesu a nya kaa bɛ lungsongi, nǝngɔ a gwii, kanga a mʊla mʊlaɨ gɔ,

15“Ka jǝ́ nyʊwa lɛ taal,

jǝ́ nǝbɔ Sihiyonaɨ,

fɔlɔ jenɔ n wɔ bɛ lɛ,

yǝm a dʌbʌl bɛ lungsong!”

16Nǝn tɨkǝga bɛtɔ mɛlalɨ gǝnɔ ja nyǝm bɔ jʊ nɨ. Kwama nɨ Kwaama a gung Yesu a bwaaɨ, nǝngɔ ja bʊʊla gɔ jǝ maa mʊlalɨ nɨ a dul gǝn, ja bʊʊla gɔ nǝbɔ a maa kanjǝl nɨ kanga ja mʊlaɨ.

17Nǝb nɨ jǝ dakini kwama a jom Liazaru a jelʌm a tuui, a gung gǝn a bwaaɨ, nǝngɔ jǝ sʊwa nǝbɔ jʊ nɨ lɛ Yesu a maaɨ. 18Nǝbɔ a lada ja yɔ tǝgatǝm Yesui, jʊ a bwɨɨ, ja nyʊwa fulon jǝ laatǝm kang nɨ a maaɨ. 19Nǝngɔ nǝbɔ Farisaɨ sʊwaka lɛ a bʊtɔ jin gɔ, “Jǝ́ dʌng, mɨ bǝ nya jatǝm kǝga lɛ. N wo yooligɔ gwam bwang gǝm lɛɨ.”

Kaam Nǝbɔ Girikaɨ A Saa Yesu

20A mʊgɔ nǝb nɨ a bɛ dikulomɔ sǝ ba ja bǝlá Kwaamaɨ, kaam nǝbɔ Girikaɨ wo. 21Nǝngɔ ja bɛ a daa Filibus woi, bwɛ Betsaidaɨ nɨ a Galilii, ja sʊwa gǝn gɔ, “Nǝ dʊʊ, nǝn swɨ lɛ nǝn kiyo kɛl jǝbɔ Yesu.” 22Nǝngɔ Filibus a yɔ ya sʊwa Andarawasɨ. Nǝngɔ ja yɔ ji yo ya ja sʊwa Yesui.

23Nǝngɔ Yesu a jǝla ji gɔ, “Kwamagɔ a la, wʊnɨ jǝ nʊng dʊʊlǝn Bʊla Nǝlɨ lɛɨ. 24N bɨlǝngkɛl mǝ sʊwa jen nɛɨ, na ja kwal bɔ jaamɔ a bʊlaɨ, yɨ kwaagɔ win. Na ja kwal a bʊlaɨ, jǝg jǝg nutɨnɔ a lada. 25Nʊ nɨ swɨ kʊlɨ gǝnɔ lɛɨ, jʊ jʊ. Nʊ nɨ a kɔ kʊlɨ gǝnɔ a yooli nɨɨ, nya nya kʊlɨ nɨ mɨ dɨtǝm woi. 26Gwam nʊ nɨ maa mɨ maajɨ lɛɨ, bwang mɨ bwang. Daa mǝ woi, bwɛ jwaalɛ mǝndɨ dakini jǝbɔ mǝ. Tɛtɛ mɨ nǝ nǝ dʊʊn a nʊ nɨ gwam maa mɨ maajɨ lɛɨ.

Yesu A Sʊwa Kɛl A Dul Bwaa Gǝnɔ Gǝm

27“Kǝngkɔ n nya komʌn a nǝl mɨ. Wɛ mǝ sʊwa lɛɨ? Mǝ sʊwa sʊwa mǝʊ, ‘Tɛtɛ, bʊʊ nǝn mǝ a kwama nɨ ka?’ Ɔ ɔ, mǝ bɛ n kɛl kwama nɨɨ. 28Tɛtɛ, dʊʊl dun mʊnɔ.”

Nǝngɔ kaa diilɔ a jel a dʌbʌl sʊwa lɛ gɔ, “N kwɛl n dʊʊl gǝn dʊʊlɨ, mǝ sʊtǝn sʊ dʊʊltǝm gǝnɔ tag.” 29Nǝb nɨ tɨlam wo a daagɨɨ ja nyʊwa diil gɨɨ, nǝngɔ ja sʊwa gɔ, “Kunnyiyogɔ a ga.” Kaamɨ gɔ, “N bwɛ twama Kwaamaɨ a sʊwa gǝn kɛlɨ.”

30Yesu a sʊwa ji gɔ, “Diil nɨ a bɛ kɛl dul jen, ke bɔ a kɛl dul mɨ. 31Kǝngkɔ Kwaama mwatɨ yooli nɨ gǝm borang lɛɨ, n kǝngkɔ jǝ kaam nǝ fɔlɔn yooli nɨ lɛɨ. 32A mǝndɨ na ja gung i a dʌbʌl tɨyaɨ, mǝ gʊ gʊ nǝbɔ gwam a bɛ a daa mɨ woi.” 33Yesu a sʊwa nyɔ sǝ a nʊng kanga gǝ bʊlam lɛɨ.

34Nǝngɔ nǝbɔ a sʊwa Yesu gɔ, “Diilɔ a sʊwa nǝn gɔ Kiristi nǝngǝn nǝn kʊlɨ mɨ dɨtǝm wo. N wɛ bwɨ mʊ sʊwa mɔʊ jǝ gung gung Bʊla Nǝlɨ a dʌbʌl tɨyaɨ? Nuwo nyɨ nǝn Bʊla Nǝlɨ?”

35Nǝngɔ Yesu a sʊwa ji gɔ, “Nyalǝmɔ gǝ na jǝbɔ jen, kumtɨnɔ mɨsɔ lada lɛ. Jǝ́ yɔ yɔmɔ kwama nyalǝmɔ jǝbɔ jeni, kage kumtojiligɔ a nya jen. Nʊ nɨ yɔ yɔm lɛ a kumtojilii, mɨsɔ nyǝm daa nɨ lɛ gǝ shum lɛ woi. 36Jǝ́ nǝ bɨlǝngkɛl a nyalǝmɔ gǝm nǝn kwama jǝ́ dakini jǝbɔ gɨɨ, sǝ jǝ́ yǝlam bɛtɔ lɔ nyalǝmɨ.”

Yahudawagɔ A Kɔ Nǝtǝm Bɨlǝngkɛl A Daa Yesu Woi

Nǝn kwama Yesu a dɨm sʊwatǝm kɛl nɨɨ, nǝngɔ a shu a wuum nǝn dul gǝnɨ.

37Yesu a mɛ maatǝm kanjǝl laatǝm kang a gǝlala a kǝga jin sul, ja nǝ bɔ bɨlǝngkɛl a daa gǝ woi. 38Jʊ nɨ a bwɨ nyɔ, sǝ ja yii jʊ nǝkuwotǝmkǝga Ishaya a sʊwaɨ gɔ,

“Tɛlalɔ, nuwo a nǝ bɨlǝngkɛl nǝn kɛl bǝnɨ?

Tɛlalɔ a nʊng kwaan gǝnɔ

a daa gǝ woi?”

39A dul kɛl nɨ ja dwal bɔ ja nǝ bɨlǝngkɛl, a bwɨ nyɔ kanga Ishaya a sʊwa tag a kaa daa gɔ,

40“A dǝg ji ja yǝlam kululʌm.

A dǝg ji ja yǝlam nǝb kwamǝn dul,

kage ja kuwo nǝn nu jin,

ja nyǝm a nǝl jin,

ja yǝla a daa mɨ woi,

sǝ n gung ji.”

41Ishaya a sʊwa nyɔ, jʊ a bwɨɨ a kuwo dʊʊlǝn Yesui, a sʊwa fulon gǝnɔ.

42A kaa gola, Yahudawagɔ a lada a nǝ bɨlǝngkɛl a daa Yesu woi, nǝb dʊʊm jinɔ wo a mʊgɔ jinɔ gǝm. N nyʊwatǝm taal nǝbɔ Farisaɨ ja sʊwa bɔ gɔ jǝ nǝ bɨlǝngkɛlɨ, kage ja kaa ji yɔtǝmɔ a kan mɛlalɨ. 43Jʊ a bwɨɨ, ja swɨ bǝlátǝmɔ a nyiyo nǝbɨɨ, a laa Kwaamaɨ.

Kɛl Yesui Maa Maa Borang

44Nǝngɔ Yesu a gung diilɔ gɔ, “Gwam nʊ nɨ a nǝ bɨlǝngkɛl a daa mɨ woi, a nǝ bɔ a daa mɨ woi kwaamɨ, a nǝ bɨlǝngkɛlɔ a daa nʊ nɨ woi a twam ɨɨ. 45Gwam nʊ nɨ dʌng ii, gǝ dʌng nʊ nɨ a twam ɨɨ. 46Mǝ bɛ na nyalǝm a mʊgɔ yooli nɨ, sǝ nʊ nɨ gwam nǝ bɨlǝngkɛl lɛ a daa mɨ woi, a yɨ bɔ a mʊgɔ kumtojili.

47“Gwam nʊ nɨ a nyʊwa mɛlalɨ mǝndɨ, a kɨla bɨɨ, ke bɔ mǝ mǝ maa gǝm borang lɛɨ. Jʊ a bwɨɨ, n ke bɔ kɛl borang yooli nɨ a bɛ nǝn mǝɨ. Mǝ bɛ bʊʊtǝm nǝn yooli nɨ. 48Nʊ nɨ a kɔ ɨɨ, a yo bɔ kɛl mǝndɨ tagɨ, nǝngǝn nǝn jʊ nɨ maa gǝm borangɔ lɛɨ. Kɛl nɨ mǝ sʊwa lɛɨ, nǝn gɔ maa gǝm borang lɛ a kɔkɔ dɨltǝmɨ. 49Kanjǝl nɨ mǝ mɛla jem lɛɨ, ke bɔ a daa mǝ woi. Tɛtɛ mɨ nɨ a twam ɨɨ, nǝn gɔ a nɨ ɨ diil nɨ gwam mǝ sʊwa lɛ, mǝ kiyo lɛɨ. 50N nyǝm diil gǝnɔ bɛ bɛ nǝn nyatǝm kʊlɨ nɨ mɨ dɨtǝm woi. Jʊ mǝ sʊwa gwamɨ, n jʊ Tɛtɛ a sʊwa ɨ gɔ n sʊwaɨ.”

Currently Selected:

Yohana 12: DBD

Highlight

Copy