Yohana 4

Yesu Jǝbɔ Kaa Nɔɔlɨ Bwɛn Samariya

1Nǝbɔ Farisaɨ a nyʊwa gɔ Yesu nya nǝb mɛlalɨgɔ lɛ, yʊ nǝbɔ mwɛ sagsagɔ lɛ a laa a Yohanaɨ. 2N ke bɔ Yesu yʊ ji mwɛ sagsagɔ lɛ nǝn kang gǝnɨ, n bɛtɔ mɛlalɨ gǝn. 3Nǝn kwama Yesu a nyʊwa fulon kɛl nɨɨ, nǝngɔ a bǝla Yahudiyagɨɨ, a yǝla a Galilii.

4Yesu a kuwo n dǝngdǝng gǝ bwangtǝn gola nɨ a dɔ a tǝm Samariyaɨ. 5Nǝngɔ a bɛ a kaa tuulɔ a Samariya wʊnɨ jǝ jo lɛ gɔ Saikarɨ. Tuulɔ gɔ a kɔtʌgo a talɨ tǝm nɨ Yakubu a nǝ bʊla gɔ Yusufu galɨgǝnɨ. 6Nǝn gɔ n daagɔ laa mwɛ Yakubu woi. Kwama yɔmɔ a lʊwa Yesui, nǝngɔ a gǝla a yɨ a nyiyo laa mwɛmɔ gǝmɨ. Jʊ nɨ a bwɨ nǝn sɨmang kɔkɔ.

7Nǝngɔ kaa nɔɔlɨ bwɛn Samariya a bɛ tʊwatǝm mwɛmɨ. Nǝngɔ Yesu a bʌ gǝn gɔ, “Nǝ mɨ mwɛmɔ wo, n nɔɔm.” 8(Bɛtɔ mɛlalɨ gǝnɔ a dɔ mʊgɔ tuulɔngɔ a daa tentǝm jǝjalǝn.)

9Nǝngɔ nɔɔlɨ bwɛn Samariya nɨ a bʌ Yesu gɔ, “A bwɨ nyǝn, mɔ nǝn bwɛ Yahudaɨ mʊ kel mwɛ nɔɔtǝm lɛ a daa mǝ woi, mǝ nɨ mǝ bwɛn Samariyaɨ?” (Yahudawagɔ jǝbɔ nǝbɔ Samariyaɨ ja lǝmka bɔ.)

10Nǝngɔ Yesu a jǝla gǝn gɔ. “Na ń nyǝm lǝma Kwaamaɨ, jǝbɔ nʊ nɨ a bʌ ń gɔ, ‘Ń nǝ mɨ mwɛmɔ wo mǝ nɔɔ nɔɔɨ,’ na ń kel gǝn, na nǝ ń nǝ ń mwɛ nɨ nǝ kʊlɨ lɛɨ.” 11Nǝngɔ nɔɔlɨ nɨ a sʊwa Yesu gɔ, “Nǝ dʊʊ, mɨ mɔ nǝn bɛ kʌshi gʊtǝm mwɛ, mʊgɔ laa mwɛ nɨ a tushi. La mʊ nya mwɛ kʊlɨ nɨ fee sǝ ń nǝ nǝbɔ? 12Ń laa tɛtɛ bǝn Yakubu wʊnɨ a bǝla bǝm laa mwɛ nɨɨ ka? Nʊ nɨ jǝbɔ bɛtɔ lɔ gɨɨ, jǝbɔ yʊwaltɨn gǝnɔ ja nɔɔ mwɛmɔ a mʊgɔ gǝnɨ.”

13Nǝngɔ Yesu a jǝla gǝn gɔ, “Nʊ nɨ a nɔɔ mwɛ nɨɨ yǝla nyʊwa nyʊwa diil mwɛ tag. 14Nʊ nɨ a nɔɔ mwɛ nɨ mǝ nǝ gǝn nɛɨ, mɨsɔ nyʊwa kaa diil mwɛ lɛ wo tag. Mwɛmɔ mǝ nǝ gǝn nɛɨ, yǝlam bwili mwɛ a bʊtɔ gǝn, wʊnɨ nǝ gǝn kʊlɨ nɨ mɨ dɨtǝm woi.”

15Nǝngɔ nɔɔlɨ nɨ gɔ, “Nǝ dʊʊ, nɨ ɨ mwɛ gɔ, kage n yǝla n nyʊwa kaa diil mwɛ wo tag, mɨsɔ mǝ yǝla lɛ ba n tʊwa mwɛ fɔ tag.”

16Nǝngɔ Yesu a sʊwa gǝn gɔ, “Yɔ ya ń jo bwɨla mɔ, sǝ jǝ́ bɛ.”

17Nɔɔlɨ nɨ gɔ, “Mɨ mǝ nǝn balɨ.” Nǝngɔ Yesu a sʊwa gǝn gɔ, “Ń sʊwa dǝngdǝng mɔ mɨ mɔ nǝn balɨɨ. 18Bɨlǝngǝnɔ nǝn gɔ, mʊ nǝn batǝmɔ nʊ. Balɨ nɨ mʊ yǝm jǝbɔ gǝ kǝngkɨɨ, ke bɔ bwɨla mɔ. Ń sʊwa dǝngdǝng.”

19Nǝngɔ nɔɔlɨ nɨ a sʊwa gǝn gɔ, “Nǝ dʊʊ, mǝ kuwo lɛ mʊ nǝkuwotǝmkǝga. 20Tʊgalam nǝnɔ ja nǝ Kwaama dʊʊn a dʌbʌl yem nɨ gǝm. Jen jǝ́ Yahudawagɔ jǝ́ sʊwa jengɔ a bʊm nyɔ ja nǝ Kwaama dʊʊn a Urushalima.”

21Yesu a sʊwa gǝn gɔ, “Nɔɔlɨ, nǝ bɨlǝngkɛl nǝn mǝ, kwamagɔ bɛ lɛ wo wʊnɨ mɨsɔ jǝ́ dʊʊl Tɛtɛ lɛ a dʌbʌl yem nɨɨ, mɨsɔ jǝ́ dʊʊl gǝm lɛ a Urushalimaɨ. 22Jǝ́ nǝbɔ Samariyaɨ, jǝ́ nyǝm bɔ jʊ jǝ́ dʊʊl gǝm lɛɨ. Nǝn Yahudawagɔ nǝn nyǝm jʊ nǝn dʊʊl gǝn nɛɨ, jʊ a bwɨɨ bʊʊtǝmɔ a jel a daagɔ Yahudawagɔ woi. 23Kwamagɔ bɛ lɛ wo, a kwɛl a bɛ, wʊnɨ nǝb dʊʊltǝm Kwaamaɨ dǝngdǝngɨɨ jǝ dʊʊl gǝm a mʊgɔ yʊwa jǝbɔ bɨlǝngkɛl. Kwaama a saa nǝbɔ nyɔ sǝ ja dʊʊl gǝm. 24Kwaama n yʊwa. Nǝb nɨ dʊʊl gǝm lɛɨ, bɛ ja dʊʊl gǝm a mʊgɔ yʊwa jǝbɔ mʊgɔ bɨlǝngkɛl.”

25Nǝngɔ nɔɔlɨ nɨ a sʊwa Yesu gɔ, “N nyǝm Nʊ nɨ ja jǝgǝmɨ bɛ lɛ wʊnɨ jǝ jo gǝn nɛ gɔ Kiristii. Na a bɛɨ, nʊng nǝn nʊng kanjǝlɔ gwam.”

26Nǝngɔ Yesu a sʊwa gǝn gɔ, “Mǝ nʊ mǝ sʊwa ń kɛl lɛɨ, mǝ nǝn gɔ.”

27Jǝ dɨ kɛlɔ lɛ nyɨɨ, nǝngɔ bɛtɔ mɛlalɨ gǝnɔ a yǝla a bɛɨ. Ja ta kang a nyiyo kwama ba ja nya gǝn sʊwa kɛl lɛ jǝbɔ nɔɔlɨ nɨɨ. Mɨ nǝn nʊ nɨ a bʌ nɔɔlɨ nɨ gɔ, “N wɛ mʊ swɨ lɛɨ.” Mɨ nʊ nɨ wo a bʌ Yesu gɔ, “N wɛ a bwɨ mʊ sʊwa kɛl lɛ jǝbɔ gɨɨ?”

28Nǝngɔ nɔɔlɨ nɨ a bǝla suul gǝnɔ a daa gɨɨ, nǝngɔ a shu a mʊgɔ tuulɔ ya sʊwa nǝbɔ gɔ, 29“Jǝ́ bɛ ba jǝ́ kuwo nʊ nɨ a sʊwa ɨ kanjǝl nɨ gwam mǝ maa woi! Kɛna nǝn gɔ nǝn Kiristii?” 30Nǝngɔ nǝbɔ a jela a mʊgɔ tuulɔɨ, jǝ bɛ lɛ a daagɔ Yesu woi.

31A mʊgɔ jʊ nɨ gǝm, nǝngɔ bɛtɔ mɛlalɨ gǝnɔ ba ja kela gǝn gɔ, “Feyi, ja jǝjalǝnɔ.”

32Nǝngɔ Yesu a sʊwa ji gɔ, “Mǝ nǝn jǝjalǝn nɨ mǝ ja lɛɨ, wʊnɨ jǝ́ nyǝm bɔ jǝl a dul gǝnɨ.” 33Nǝngɔ bɛtɔ mɛlalɨ gǝnɔ a bʌbko a bʊtɔ jin gɔ, “Na kaa nǝl a bɛ gǝm nǝn jǝjalǝn nɨɨ ka?”

34Yesu gɔ, “Jǝjalǝn mǝndɨ nǝn gɔ sǝ n maa jʊ nɨ nʊ nɨ a twam ɨɨ swɨ lɛ gɔ n maaɨ, sǝ n tagǝm maatǝm maajɨ gǝnɔ. 35Mǝ kɛna jǝ́ sʊwa jengɔ tʊʊlagɔ a bǝla bwaala naal sul ka? N sʊwa jen, bɛ jǝ́ dʌng tɔtwamɔ a bʊm, kanjǝlɔ a bɨ, a la katǝm. 36Nǝ katǝmɔ nya nya ywatǝm, mʊr kanjǝlɔ lɛ wʊnɨ yɔ lɛ nǝn a kʊlɨ nɨ mɨ dɨtǝm woi. N jʊ a bwɨ nǝ kwaltǝmɔ jǝbɔ nǝ katǝmɔ jǝ maa fulotǝm nǝl lɛ dakinii. 37A daa nɨ mʊsǝn kɛl nɨ n bɨlǝngǝn wʊnɨ ja sʊwa gɔ, ‘Kaa kwal kwalagɔ lɛ, kaa ka lɛ.’ 38Mǝ twam jen sǝla jǝ́ ka jʊ nɨ jǝ́ maa bɔ gaalan gǝnɨ. Kaam nǝbɔ a maa gaalanɔ, a jenɔ jǝ́ yo sʊtǝm nyatǝm a gaalan jinɔ gǝm.”

39Nǝbɔ Samariyaɨ a lada a tuulɔ gɔ ja nǝ bɨlǝngkɛl a daagɔ Yesu woi, a dul kɛlɔ nɔɔlɨ a sʊwa ji gɔ, “A sʊwa ɨ kanjǝl nɨ gwam mǝ maa woi.” 40Nǝngɔ nǝbɔ Samariyaɨ ja bɛ a daagɔ Yesu woi, ja kela gǝn gɔ ga yɨ dakini jǝbɔ ji. Nǝngɔ a yɨ jǝbɔ ji kumɔ yoi.

41Nǝbɔ a lada na nǝ bɨlǝngkɛl a daagɔ Yesu woi a dul kɛl gǝnɨ. 42Nǝngɔ nǝbɔ Samariyaɨ a sʊwa nɔɔlɨ nɨ gɔ, “Kǝngkɔ nǝn nǝ bɨlǝngkɛl, ke bɔ a dul jʊ mʊ sʊwa nǝnɨ, nǝn tǝnǝn nǝn nyʊwa nǝn kang nǝn, nǝ nyǝm n bɨlǝngǝn, bwɛ nɨ nǝn gɔ n nǝ Nǝbʊʊlɨ yooligɨɨ.”

Yesu A Gung Bʊla Kaa Nǝ Dʊʊɨ

43Kumɔ yo a shui, nǝngɔ Yesu a gun a tǝm Samariya a shu a tǝm Galilii. 44(Yesu nǝn kang gǝn a sʊwa ji gɔ, “Nǝkuwotǝmkǝga mɨ nya dʊʊn nɛ a tǝm gǝn.”) 45Kwama ba la Galilii, nǝngɔ nǝbɔ Galilii a yo gǝn kanga yo yoi, jʊ a bwɨɨ, ji tʌji ja yɔ a Dikulom Yabtǝmɔ a Urushalimaɨ, ja kuwo kanjǝl nɨ gwam Yesu a maaɨ.

46Nǝngɔ Yesu a yǝla a yɔ a tuulɔ Kana nɨ a tǝm Galilii, daa nɨ a yǝla nǝn mwɛmɔ a yǝlam mwɛ fogfogii. A daagɔ, kaa nǝ dʊʊ maajɨ kan borang wo wʊnɨ bʊla gɔ a Kafarnahum mɨ kwamɨgǝnɨ. 47Nǝn kwama nʊ nɨ a nyʊwa gɔ Yesu a bǝla Yahudiyagɔ a bɛ a Galilii, nǝngɔ a bɛ a daa gǝ woi, ba kela gǝn gɔ ya ga gung bʊla gɔ nɨ mɨ kwamɨgǝnɨ, gǝ na a nyiyo bwaa. 48Nǝngɔ Yesu a sʊwa gǝn gɔ, “Na jǝ́ kuwo bɔ kanjǝl nʊngtǝm jǝbɔ jǝ laatǝm kangɨ, mɨsɔ jǝ́ nǝ bɨlǝngkɛl lɛ.”

49Nǝngɔ nǝ maajɨ kan borang nɨ a sʊwa Yesu gɔ, “Nǝ dʊʊ, bǝ ya, dɨsɔ la bʊla mɨ a bʊla.”

50Nǝngɔ Yesu gɔ, “Ya yilo. Bʊla mɔ bʊʊ bʊʊ.” Nʊ nɨ a jǝla nǝn jʊ Yesu a sʊwa gǝnɨ, nǝngɔ a ta gola gǝnɔ a shui. 51Shu lɛ a lɔɨ, nǝngɔ kaam jwaalɛb gǝnɔ a tǝga gǝn gɔ, “Bʊla mɔ a nyʊwa lǝma.”

52Nǝngɔ a bʌ ji kwama nɨ bwɛ a tǝl nyʊwatǝm lǝmagɨɨ. Nǝngɔ ja sʊwa gǝn gɔ, “Dʊgalǝn kemʌnɔ win nǝn kɔkɔ, bɛsheni ga dem gǝm kangɨ.” 53Nǝngɔ tɛ bwɛ a nyǝm n kwama Yesu a sʊwam gǝn gɔ, “Ya yilo. Bʊla mɔ bʊʊ bʊʊɨ.” Nǝngɔ nʊ nɨ jǝbɔ nǝbɔ lɔ gɨɨ ja nǝ bɨlǝngkɛl a daagɔ Yesu woi.

54Wʊnɨ nǝn gɔ jǝ laatǝm kang na yogɔ Yesu a maaɨ, nǝn kwama a bǝla Yahudiyagɔ, a bɛ a Galilii.

Currently Selected:

Yohana 4: DBD

Highlight

Copy