Luka 2
2
Bʌtʌm Yesui
(Mat 1:18-25)
1A kumtɨn gɔ, Kaisar Augustas a ga diil kiyotǝm dul nǝbɔ gwam yǝm a tǝm gǝnɔ gǝ maam fɔlɔn nɛɨ. 2Kiyotǝm dul nɨ ja tǝl nǝn kwama nɨ Kiriniyas a yǝlam gwamna tǝm Suriyaɨ. 3Nǝbɔ gwam a shu kiyotǝm dul jinɔ a tuulɔ jinɔ nɨ ja jelʌmi.
4Yusufu tǝgǝn a gun a tuulɔ Nazarat a Galili, a shu tuulɔ Daudaɨ nɨ a Yahudiyaɨ wʊnɨ jǝ jo lɛ gɔ Baitalamii, a daa nǝbam gǝnɔ a jelʌmi, 5sǝ ya kiyo dul gǝnɔ wo jǝbɔ Maryamu, bwɛnɔɔlɨ gǝnɔ nɨ a swa yaa jǝbɔ gɨɨ, wʊnɨ nǝn fʌli. 6Kwama nɨ jǝ fʌleni, kumɔ gǝ butom lɛɨ, a yii, 7nǝngɔ a bʌ bwɛ tɨkǝga gǝnɨ, n balɨ, a kwab gǝm tulong dwangɔ, a ya gǝn a mʊgɔ kwangɨ, jʊ a bwɨɨ mɨ daa daalǝng wo a daa nɨ ja shigʌmi.
Nǝb Tɔɔtǝm Kwamɨgɔ Jǝbɔ Bɛtɔ Twama Kwaamaɨ
8Nǝb tɔɔtǝm kwamɨgɔ yǝm a kɔtʌgo a daa nɨ ja bʌm Yesui, jǝ daa wo a kuul, jǝ tɔɔ kwamɨ jinɔ lɛ nǝn kum. 9Nǝngɔ bwɛ twama Kwaamaɨ ba jel a daa ji woi. Dʊʊlǝn Tɛlalɔɨ beta lɛ a kʊm jinɔ gǝm, nǝngɔ taalɔ a ta ji yǝlɨgǝnɨ. 10Nǝngɔ bwɛ twama Kwaamaɨ a sʊwa ji gɔ, “Ka jǝ́ nyʊwa lɛ taal. Mǝ bɛ jem nǝn fulon kɛl lǝmɨ, wʊnɨ dǝg nǝbɔ lɛ a maa fulotǝm nǝl pʌdi. 11Dwiyen a mʊgɔ tuulɔ Daudaɨ ja bʌ jem Nǝbʊʊlɨ, nǝn gǝ nǝn Kiristi, Tɛlalɔ. 12Na jǝ́ dwama tuulɔngɨ, jʊ nʊng jen nɛɨ nǝn gɔ, jǝ́ nya nya bwɛ feli nɨ ja kwab gǝm tulong dwang ja ya a mʊgɔ kwangɔ gǝmɨ.”
13Tʌgo a kang nǝngɔ kaam bɛtɔ twama Kwaamaɨ a dʌbʌl a lada nyɔ ba ja nya bwɛ twama Kwaamaɨ nɨɨ, jǝ bǝlá Kwaama lɛ jǝ sʊwa lɛ gɔ,
14“Dʊʊlǝnɔ na a Kwaama nɨ
a dʌbʌli,
yɨm kwamɨgǝnɔ na a nǝb nɨ
Kwaama a nyʊwa lǝma nǝn ji a yooli nɨɨ.”
15Kwama nɨ bɛtɔ twama Kwaamaɨ a bǝla ji a shu a dʌbʌli, nǝngɔ nǝb tɔɔtǝm kwamɨ nɨ a sʊwaka a bʊtɔ jin gɔ, “Bǝ ya tǝbǝn a Baitalami, ya bǝ kuwo jʊ nɨ a bwɨɨ, wʊnɨ Tɛlalɔ a sʊwa bǝnɨ.”
16Ja ta bɔ bʊtɔ, nǝngɔ ya ja nya Maryamu jǝbɔ Yusufui, jǝbɔ bwɛ feligɔ daam a mʊgɔ kwangɔ gǝmɨ. 17Kwama nɨ ja kuwom gǝnɨ, nǝngɔ ja wa fulon kɛlɔ bwɛ twama Kwaamaɨ a sʊwa ji a dul kǝlɨ bwɛ feli nɨɨ. 18Nǝb nɨ a nyʊwa fulon kɛlɔ nǝb tɔɔtǝm kwamɨ nɨ a sʊwa jii, ja ta kang a nyiyo. 19Maryamu a ya kɛl nɨ gwam ja sʊwaɨ, bʊʊla lɛ nǝn a nǝl gǝn. 20Nǝb tɔɔtǝm kwamɨgɔ a yǝla, jǝ dʊʊl Kwaama lɛ, jǝ bǝlá gǝn nɛ a kɛl nɨ gǝm ja nyʊwaɨ, ja kuwoi, kanga bwɛ twama Kwaamaɨ a sʊwa jii.
Ja Ja Yesu Gǝm Dunɔ
21Kwama nɨ bwɛ a la kumɔ naalǝbɨ, kwama nɨ jǝ biyo gǝm mwɛnɔ lɛɨ, nǝngɔ ja ja gǝm dunɔ gɔ Yesui, kanga bwɛ twama Kwaamaɨ a sʊwa ji kwama na lǝga bɔ ja do fʌl gǝnɨ.
Ja Yɔ Nǝn Yesu A Kan Kwaaman
22Kumɔ a kɛla a bɛ a wʊnɨ jǝ jǝgǝm bɛtɨ lɛɨ kanga diil Musaɨ a sʊwaɨ, ja do gǝn ja gwi ja bɛ nǝn a Urushalima sǝ ja nǝ Tɛlalɔ. 23Kanga ja mʊla a diil Tɛlalɔɨ gɔ, “Bwɛ balɨ nɨ a tǝl wumtǝm fʌli, jǝ jo gǝn gɔ nʊ nɨ sagsag a kǝga Kwaamaɨ.” 24Ja shu wo tag sǝ ja tǝla twama kanga ja sʊwa a mʊgɔ diil Tɛlalɔɨ gɔ, “Kumfiyogɔ yo, na mɨ nyɨɨ baatigɔ yo.”
25Kaa nǝl wo a mʊgɔ Urushalima, dun gǝnɔ nǝn Saminu. N nǝ dǝngdǝng a bwangtǝm kɛl Kwaamaɨ, yam nʊ nɨ lɛ yʌb Israila gǝm nǝl lɛɨ. Yʊwa Kwaamaɨ gǝ na jǝbɔ gɔ. 26Yʊwa Kwaamaɨ a kwɛl a nʊng gǝn gɔ, gǝ kuwo kuwo bʌtʌm Kiristii, a Tɛlalɔɨ, sǝla ga bʊla. 27A dɔ talɨ Kan Kwaamanɔ a mʊgɔ Yʊwa Kwaamaɨ nǝn kwama nɨ tɛtǝlam Yesui a bɛ nǝn gɔ a kǝga Kwaamaɨ kanga diilɔ a nʊng gɔ ja maaɨ. 28Saminu a yo Yesu a kang gǝnɔ gǝmɨ, a buu Kwaama gǝm kang nǝngɔ a sʊwa gɔ,
29“Kǝngkǝnɨ Tɛlalɔ,
bɛ ń ywa bwɛ jwaalɛ mʊnɔ
a shu kwamɨgǝn,
kanga mʊ sʊwaɨ.
30Nu mǝndɨ a kuwo nʊ nɨ mʊ
twam sǝ a bʊʊ nǝn bǝnɨ,
31wʊnɨ mʊ fɛka a kǝga nǝbɨɨ gwamɨ.
32Nyalǝm nɨ a nʊng ń
a daagɔ Bʌtʌbɔ woi,
nyalǝm nɨ a bɛ nǝn dʊʊlǝn
a daagɔ nǝbam mʊnɔ nǝbɔ Israilaɨ.”
33Tɛtɛ gɔ jǝbɔ nɛnɛ gɔ ja ta kang a nyiyo, kwama ja nyʊwa kɛlɔ Saminu a sʊwa a dul gǝnɨ. 34Saminu a ya jim bwiligɔ. Nǝngɔ a sʊwa nyɨya gɔ Maryamu gɔ, “Bwɛ nɨ nǝn gɔ Kwaama a fɛka sǝ a dǝg nǝbɔ Israilaɨ a lada ja yala, sǝ a gung nǝbɔ a lada, sǝ a yǝlam jǝ nʊngtǝm nɨ nǝbɔ kɔ lɛɨ. 35Gulʌnɔ biyo biyo mʊgɔ nǝl mʊnɔ. Bʊʊlalɨgɔ jel jel a mʊgɔ nǝl nǝbɨɨ a lada.”
Hannatu A Sʊwa Kɛl A Dul Yesui
36Kaa nɔɔlɨ wo dunɔ nǝn Hannatu, n nǝkuwotǝmkǝga, nǝn bʊla Fanuyilaɨ, a dʊʊm Ashirui, a gʌlo dangǝn. A maa jolɔ nʌbʌl yǝm jǝbɔ bwɨla gɔ nǝngɔ bwɨla gɔ a bʊlaɨ. 37A yǝlam nɔɔkʊla jolɔ fʊlnaalǝb jeli naal. Mɨ bǝla Kan Kwaamanɔ lɛ, nǝ Kwaama dʊʊn nɛ nǝn dotǝm diil mwɛ, maa keli lɛ kum jǝbɔ kɔkɔ. 38Kwama ja bɛm nǝn Yesui, nǝngɔ Hannatu ba nya jii. Nǝngɔ a buu Kwaama gǝm kangɨ. A sʊwa nǝbɔ gwam yam jǝgtǝm dulɔ lɛ Kwaama maa Urushalimagɔ gǝm lɛɨ a kɛl dul bwɛ nɨɨ.
Ja Yǝla A Nazarat
39Kwama nɨ ja dɨm kanjǝl nɨ jǝ maa gǝm lɛɨ kanga diil Tɛlalɔɨ a nʊng jii, nǝngɔ ja yǝla a lɔ ji a tuulɔ Nazarat nɨ a tǝm Galilii. 40Bwɛ dwalɨ nɨ a dʊʊl, a nya kwaan, a yii nǝn yʊlan, lǝma Kwaamaɨ dakini jǝbɔ gɔ.
Yesu A Mʊgɔ Kan Kwaaman
41Tɛtǝlam Yesui jǝ yɔ yɔ Dikulom Yabtǝmɔ kwangkwang na jolɔ a yii, a Urushalima. 42Kwama nɨ Yesu a yiim jolɔ kʊb jeli yoi, nǝngɔ ja shu jǝbɔ gɔ a Dikulom Yabtǝm kanga jǝ maam lɛɨ. 43Ja dɨ dikulomɔ, ja yǝla jǝ shu lɛɨ, nǝngɔ bwɛ a tɨ a gul a Urushalimaɨ, tɛtǝlam gǝnɔ ja nyǝm bɔ daagɔ Yesu woi. 44Ja ja kǝga nǝn yɔmɔ a la kumɔ win jǝ bʊʊla lɛ gɔ wo a mʊgɔ nǝb yɔmɔ gǝm. Nǝngɔ ja tǝl saatǝm gǝnɔ a kʊm nanǝgam jini jǝbɔ fatǝlam jini, ja nya gǝn bɔ, kumɔ win a shu. 45Ja nya gǝn bɨɨ, nǝngɔ ja yǝla a Urushalima sǝ jǝ saa gǝn woi. 46A kum na taalɔ ja nya gǝn a mʊgɔ talɨ Kan Kwaaman, yǝm a kʊm nǝb mɛlalɨgɨɨ, nyʊwa ji lɛ, bʌbo ji kɛlɔ lɛ. 47Nǝb nɨ gwam a nyʊwa gǝnɨ ja ta kang a nyiyo nǝn nyǝmtǝm gǝnɔ jǝbɔ jǝlatǝm kɛl gǝnɔ. 48Kwama tɛtǝlam gǝnɔ a kuwo gǝnɨ, nǝngɔ ja ta kang a nyiyoi. Nǝngɔ nɛnɛ gɔ a sʊwa gǝn gɔ, “Bʊla mɨ, n wɛ mʊ maa nǝm nyɨɨ? Mǝ nǝbɔ tɛtɛ mɔ nǝn saa ń nɛ, nǝl nǝnɔ a kala.”
49Nǝngɔ a bʌ ji gɔ, “N wɛ a bwɨ jǝ́ saa ɨ lɛɨ? Jǝ́ nyǝm bɔ a yǝlam nyɔ n na a lɔ Tɛtɛ mɨɨ ka?” 50Kɛl nɨ ga sʊwa jii, ja nyǝm bɔ n wɛ nʊng lɛɨ.
Yesu A Sʊtǝn Yʊlanɔ Jǝbɔ Nyǝmtǝmɔ
51A bwanga jǝbɔ ji ja yǝla a Nazarat dakini. Yesu bwangtǝn kɛl jinɔ lɛ. Nɛnɛ gɔ a ya kanjǝl nɨ gwam a nǝl gǝn. 52Yesu sʊ lɛ a mʊgɔ nyǝmtǝm, jǝbɔ yʊlan, nya yotǝm lɛ a kǝga Kwaamaɨ jǝbɔ nǝbɔ.
Currently Selected:
Luka 2: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
Luka 2
2
Bʌtʌm Yesui
(Mat 1:18-25)
1A kumtɨn gɔ, Kaisar Augustas a ga diil kiyotǝm dul nǝbɔ gwam yǝm a tǝm gǝnɔ gǝ maam fɔlɔn nɛɨ. 2Kiyotǝm dul nɨ ja tǝl nǝn kwama nɨ Kiriniyas a yǝlam gwamna tǝm Suriyaɨ. 3Nǝbɔ gwam a shu kiyotǝm dul jinɔ a tuulɔ jinɔ nɨ ja jelʌmi.
4Yusufu tǝgǝn a gun a tuulɔ Nazarat a Galili, a shu tuulɔ Daudaɨ nɨ a Yahudiyaɨ wʊnɨ jǝ jo lɛ gɔ Baitalamii, a daa nǝbam gǝnɔ a jelʌmi, 5sǝ ya kiyo dul gǝnɔ wo jǝbɔ Maryamu, bwɛnɔɔlɨ gǝnɔ nɨ a swa yaa jǝbɔ gɨɨ, wʊnɨ nǝn fʌli. 6Kwama nɨ jǝ fʌleni, kumɔ gǝ butom lɛɨ, a yii, 7nǝngɔ a bʌ bwɛ tɨkǝga gǝnɨ, n balɨ, a kwab gǝm tulong dwangɔ, a ya gǝn a mʊgɔ kwangɨ, jʊ a bwɨɨ mɨ daa daalǝng wo a daa nɨ ja shigʌmi.
Nǝb Tɔɔtǝm Kwamɨgɔ Jǝbɔ Bɛtɔ Twama Kwaamaɨ
8Nǝb tɔɔtǝm kwamɨgɔ yǝm a kɔtʌgo a daa nɨ ja bʌm Yesui, jǝ daa wo a kuul, jǝ tɔɔ kwamɨ jinɔ lɛ nǝn kum. 9Nǝngɔ bwɛ twama Kwaamaɨ ba jel a daa ji woi. Dʊʊlǝn Tɛlalɔɨ beta lɛ a kʊm jinɔ gǝm, nǝngɔ taalɔ a ta ji yǝlɨgǝnɨ. 10Nǝngɔ bwɛ twama Kwaamaɨ a sʊwa ji gɔ, “Ka jǝ́ nyʊwa lɛ taal. Mǝ bɛ jem nǝn fulon kɛl lǝmɨ, wʊnɨ dǝg nǝbɔ lɛ a maa fulotǝm nǝl pʌdi. 11Dwiyen a mʊgɔ tuulɔ Daudaɨ ja bʌ jem Nǝbʊʊlɨ, nǝn gǝ nǝn Kiristi, Tɛlalɔ. 12Na jǝ́ dwama tuulɔngɨ, jʊ nʊng jen nɛɨ nǝn gɔ, jǝ́ nya nya bwɛ feli nɨ ja kwab gǝm tulong dwang ja ya a mʊgɔ kwangɔ gǝmɨ.”
13Tʌgo a kang nǝngɔ kaam bɛtɔ twama Kwaamaɨ a dʌbʌl a lada nyɔ ba ja nya bwɛ twama Kwaamaɨ nɨɨ, jǝ bǝlá Kwaama lɛ jǝ sʊwa lɛ gɔ,
14“Dʊʊlǝnɔ na a Kwaama nɨ
a dʌbʌli,
yɨm kwamɨgǝnɔ na a nǝb nɨ
Kwaama a nyʊwa lǝma nǝn ji a yooli nɨɨ.”
15Kwama nɨ bɛtɔ twama Kwaamaɨ a bǝla ji a shu a dʌbʌli, nǝngɔ nǝb tɔɔtǝm kwamɨ nɨ a sʊwaka a bʊtɔ jin gɔ, “Bǝ ya tǝbǝn a Baitalami, ya bǝ kuwo jʊ nɨ a bwɨɨ, wʊnɨ Tɛlalɔ a sʊwa bǝnɨ.”
16Ja ta bɔ bʊtɔ, nǝngɔ ya ja nya Maryamu jǝbɔ Yusufui, jǝbɔ bwɛ feligɔ daam a mʊgɔ kwangɔ gǝmɨ. 17Kwama nɨ ja kuwom gǝnɨ, nǝngɔ ja wa fulon kɛlɔ bwɛ twama Kwaamaɨ a sʊwa ji a dul kǝlɨ bwɛ feli nɨɨ. 18Nǝb nɨ a nyʊwa fulon kɛlɔ nǝb tɔɔtǝm kwamɨ nɨ a sʊwa jii, ja ta kang a nyiyo. 19Maryamu a ya kɛl nɨ gwam ja sʊwaɨ, bʊʊla lɛ nǝn a nǝl gǝn. 20Nǝb tɔɔtǝm kwamɨgɔ a yǝla, jǝ dʊʊl Kwaama lɛ, jǝ bǝlá gǝn nɛ a kɛl nɨ gǝm ja nyʊwaɨ, ja kuwoi, kanga bwɛ twama Kwaamaɨ a sʊwa jii.
Ja Ja Yesu Gǝm Dunɔ
21Kwama nɨ bwɛ a la kumɔ naalǝbɨ, kwama nɨ jǝ biyo gǝm mwɛnɔ lɛɨ, nǝngɔ ja ja gǝm dunɔ gɔ Yesui, kanga bwɛ twama Kwaamaɨ a sʊwa ji kwama na lǝga bɔ ja do fʌl gǝnɨ.
Ja Yɔ Nǝn Yesu A Kan Kwaaman
22Kumɔ a kɛla a bɛ a wʊnɨ jǝ jǝgǝm bɛtɨ lɛɨ kanga diil Musaɨ a sʊwaɨ, ja do gǝn ja gwi ja bɛ nǝn a Urushalima sǝ ja nǝ Tɛlalɔ. 23Kanga ja mʊla a diil Tɛlalɔɨ gɔ, “Bwɛ balɨ nɨ a tǝl wumtǝm fʌli, jǝ jo gǝn gɔ nʊ nɨ sagsag a kǝga Kwaamaɨ.” 24Ja shu wo tag sǝ ja tǝla twama kanga ja sʊwa a mʊgɔ diil Tɛlalɔɨ gɔ, “Kumfiyogɔ yo, na mɨ nyɨɨ baatigɔ yo.”
25Kaa nǝl wo a mʊgɔ Urushalima, dun gǝnɔ nǝn Saminu. N nǝ dǝngdǝng a bwangtǝm kɛl Kwaamaɨ, yam nʊ nɨ lɛ yʌb Israila gǝm nǝl lɛɨ. Yʊwa Kwaamaɨ gǝ na jǝbɔ gɔ. 26Yʊwa Kwaamaɨ a kwɛl a nʊng gǝn gɔ, gǝ kuwo kuwo bʌtʌm Kiristii, a Tɛlalɔɨ, sǝla ga bʊla. 27A dɔ talɨ Kan Kwaamanɔ a mʊgɔ Yʊwa Kwaamaɨ nǝn kwama nɨ tɛtǝlam Yesui a bɛ nǝn gɔ a kǝga Kwaamaɨ kanga diilɔ a nʊng gɔ ja maaɨ. 28Saminu a yo Yesu a kang gǝnɔ gǝmɨ, a buu Kwaama gǝm kang nǝngɔ a sʊwa gɔ,
29“Kǝngkǝnɨ Tɛlalɔ,
bɛ ń ywa bwɛ jwaalɛ mʊnɔ
a shu kwamɨgǝn,
kanga mʊ sʊwaɨ.
30Nu mǝndɨ a kuwo nʊ nɨ mʊ
twam sǝ a bʊʊ nǝn bǝnɨ,
31wʊnɨ mʊ fɛka a kǝga nǝbɨɨ gwamɨ.
32Nyalǝm nɨ a nʊng ń
a daagɔ Bʌtʌbɔ woi,
nyalǝm nɨ a bɛ nǝn dʊʊlǝn
a daagɔ nǝbam mʊnɔ nǝbɔ Israilaɨ.”
33Tɛtɛ gɔ jǝbɔ nɛnɛ gɔ ja ta kang a nyiyo, kwama ja nyʊwa kɛlɔ Saminu a sʊwa a dul gǝnɨ. 34Saminu a ya jim bwiligɔ. Nǝngɔ a sʊwa nyɨya gɔ Maryamu gɔ, “Bwɛ nɨ nǝn gɔ Kwaama a fɛka sǝ a dǝg nǝbɔ Israilaɨ a lada ja yala, sǝ a gung nǝbɔ a lada, sǝ a yǝlam jǝ nʊngtǝm nɨ nǝbɔ kɔ lɛɨ. 35Gulʌnɔ biyo biyo mʊgɔ nǝl mʊnɔ. Bʊʊlalɨgɔ jel jel a mʊgɔ nǝl nǝbɨɨ a lada.”
Hannatu A Sʊwa Kɛl A Dul Yesui
36Kaa nɔɔlɨ wo dunɔ nǝn Hannatu, n nǝkuwotǝmkǝga, nǝn bʊla Fanuyilaɨ, a dʊʊm Ashirui, a gʌlo dangǝn. A maa jolɔ nʌbʌl yǝm jǝbɔ bwɨla gɔ nǝngɔ bwɨla gɔ a bʊlaɨ. 37A yǝlam nɔɔkʊla jolɔ fʊlnaalǝb jeli naal. Mɨ bǝla Kan Kwaamanɔ lɛ, nǝ Kwaama dʊʊn nɛ nǝn dotǝm diil mwɛ, maa keli lɛ kum jǝbɔ kɔkɔ. 38Kwama ja bɛm nǝn Yesui, nǝngɔ Hannatu ba nya jii. Nǝngɔ a buu Kwaama gǝm kangɨ. A sʊwa nǝbɔ gwam yam jǝgtǝm dulɔ lɛ Kwaama maa Urushalimagɔ gǝm lɛɨ a kɛl dul bwɛ nɨɨ.
Ja Yǝla A Nazarat
39Kwama nɨ ja dɨm kanjǝl nɨ jǝ maa gǝm lɛɨ kanga diil Tɛlalɔɨ a nʊng jii, nǝngɔ ja yǝla a lɔ ji a tuulɔ Nazarat nɨ a tǝm Galilii. 40Bwɛ dwalɨ nɨ a dʊʊl, a nya kwaan, a yii nǝn yʊlan, lǝma Kwaamaɨ dakini jǝbɔ gɔ.
Yesu A Mʊgɔ Kan Kwaaman
41Tɛtǝlam Yesui jǝ yɔ yɔ Dikulom Yabtǝmɔ kwangkwang na jolɔ a yii, a Urushalima. 42Kwama nɨ Yesu a yiim jolɔ kʊb jeli yoi, nǝngɔ ja shu jǝbɔ gɔ a Dikulom Yabtǝm kanga jǝ maam lɛɨ. 43Ja dɨ dikulomɔ, ja yǝla jǝ shu lɛɨ, nǝngɔ bwɛ a tɨ a gul a Urushalimaɨ, tɛtǝlam gǝnɔ ja nyǝm bɔ daagɔ Yesu woi. 44Ja ja kǝga nǝn yɔmɔ a la kumɔ win jǝ bʊʊla lɛ gɔ wo a mʊgɔ nǝb yɔmɔ gǝm. Nǝngɔ ja tǝl saatǝm gǝnɔ a kʊm nanǝgam jini jǝbɔ fatǝlam jini, ja nya gǝn bɔ, kumɔ win a shu. 45Ja nya gǝn bɨɨ, nǝngɔ ja yǝla a Urushalima sǝ jǝ saa gǝn woi. 46A kum na taalɔ ja nya gǝn a mʊgɔ talɨ Kan Kwaaman, yǝm a kʊm nǝb mɛlalɨgɨɨ, nyʊwa ji lɛ, bʌbo ji kɛlɔ lɛ. 47Nǝb nɨ gwam a nyʊwa gǝnɨ ja ta kang a nyiyo nǝn nyǝmtǝm gǝnɔ jǝbɔ jǝlatǝm kɛl gǝnɔ. 48Kwama tɛtǝlam gǝnɔ a kuwo gǝnɨ, nǝngɔ ja ta kang a nyiyoi. Nǝngɔ nɛnɛ gɔ a sʊwa gǝn gɔ, “Bʊla mɨ, n wɛ mʊ maa nǝm nyɨɨ? Mǝ nǝbɔ tɛtɛ mɔ nǝn saa ń nɛ, nǝl nǝnɔ a kala.”
49Nǝngɔ a bʌ ji gɔ, “N wɛ a bwɨ jǝ́ saa ɨ lɛɨ? Jǝ́ nyǝm bɔ a yǝlam nyɔ n na a lɔ Tɛtɛ mɨɨ ka?” 50Kɛl nɨ ga sʊwa jii, ja nyǝm bɔ n wɛ nʊng lɛɨ.
Yesu A Sʊtǝn Yʊlanɔ Jǝbɔ Nyǝmtǝmɔ
51A bwanga jǝbɔ ji ja yǝla a Nazarat dakini. Yesu bwangtǝn kɛl jinɔ lɛ. Nɛnɛ gɔ a ya kanjǝl nɨ gwam a nǝl gǝn. 52Yesu sʊ lɛ a mʊgɔ nyǝmtǝm, jǝbɔ yʊlan, nya yotǝm lɛ a kǝga Kwaamaɨ jǝbɔ nǝbɔ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation