Luka 4

Mammɔ A Tɛl Yesu

(Mat 4:1-11; Mar 1:12,13)

1Yesu a bǝla tiyo Urdunɔ nǝngǝn nǝn Yʊwa Kwaamaɨ a bʊtɔ gǝn, wʊnɨ a jǝg gǝn a mʊgɔ kuuli. 2Mammɔ a tɛl Yesu wo kumɔ fʊltǝnaal. A kumtɨn gɔ a ja bɔ jǝjalǝn, a dɨltǝmɔ gǝmɨ jʊwanɔ a ta gǝn.

3Mammɔ a sʊwa gǝn gɔ, “Na mʊ nǝn Bʊla Kwaamaɨ, sʊwa tɛl nɨ a yǝlam kʊkkʊm.”

4Nǝngɔ Yesu a jǝla gɔ, “A mʊla mʊlaɨ gɔ, ‘Ke bɔ nǝn jǝjalǝn kwaagɔ nǝl bʊʊ lɛɨ.’ ”

5A daagɔ nǝngɔ Mammɔ a gwi nǝn gɔ a daa nɨ a deba debaɨ, nǝngɔ a nʊng gǝn fɔlɔn yooligɔ tʌgo a kang gwamɨ. 6Mammɔ a sʊwa gǝn gɔ, “Mǝ nǝ ń nǝ ń kwaan fɔlɔn a dul jʊtǝb nɨ pʌd jǝbɔ dʊʊn jinɔ. Jʊtǝb nɨ ja nɨ ɨ gwam. Mǝ nǝ nǝ nʊ nɨ mǝ swɨ lɛɨ. 7Gwam jʊ nɨ yǝlam a mɔ, na ń jǝla ń jʊng ń nɨ ɨ dʊʊnɨ.”

8Yesu a jǝla gǝn gɔ, “A mʊla mʊlaɨ gɔ, ‘Maa Tɛlalɔ Kwaama mʊnɔ gǝm bǝlátǝm. Nǝn gɔ kwaagɔ mʊ nǝ gǝn dʊʊn nɛɨ.’ ”

9Nǝngɔ Mammɔ a do gǝn a yɔ nǝn gɔ a Urushalimaɨ, a tɨ nǝn gɔ a dʌbʌl Kan Kwaaman nɨ a deba nyɨɨ. A sʊwa gǝn gɔ, “Na mʊ nǝn Bʊla Kwaamaɨ, gǝla mɔ fɔ. 10A mʊla mʊlaɨ gɔ, ‘Nǝ nǝ bɛtɔ twama gǝnɔ diil a dul mʊn, sǝ ja kʌshi ń.’ 11A mʊla mʊlaɨ tag gɔ, ‘Jǝ kɔ kɔ kang jinɔ ja kʌshi ń, kage ń ga naa a tɛl.’ ”

12Nǝngɔ Yesu a jǝla gɔ, “A mʊla mʊlaɨ gɔ, ‘Ka ń tɛl lɛ Tɛlalɔ mʊnɔ Kwaama.’ ”

13Kwama nɨ Mammɔ a dɨ tɛltǝm gǝnɨ, nǝngɔ a bǝla gǝn dɨnɨ.

Yesu A Tǝl Maajɨgɔ A Galili

(Mat 4:12-17; Mar 1:14,15)

14Nǝngɔ Yesu a yǝla a Galilii, kwaan Yʊwa Kwaamaɨ wo a daa gɔ woi. Kɛl gǝnɔ a kɛla tǝmɔ gwam. 15Mɛla jim lɛ a kantɨn mɛlalɨ. Nǝbɔ gwam bǝlá gǝn nɛ.

Ja Kɔ Yesu A Nazarat

(Mat 13:53-58; Mar 6:1-6)

16Yesu a shu a Nazarat, a daagɔ a dʊʊlǝmɨ. A dɔ kan mɛlalɨ a Kum Fǝbtǝm kanga gǝ maam lɛɨ. Nǝngɔ a gun sǝ a kiyoi. 17Nǝngɔ ja nǝ gǝn langǝn bwangǝn Ishayaɨ, nǝkuwotǝmkǝgagɔ. A kwɨ langǝn bwangǝnɔ, a saa, nǝngɔ a nya daa nɨ ja mʊla gɔ,

18“Yʊwa Kwaamaɨ gǝ na

jǝbɔ mǝ,

nǝn gɔ a jǝg ɨ gɔ ba n kiyo

nǝb bʊnǝnɔ gǝm

fulon kɛl lǝmɨɨ.

Nǝn gɔ a twam ɨ sǝ n ga wulong

jǝgtǝm nǝbɔ a golmanɨ,

sǝ n wum kululʌmɔ gǝm nu,

sǝ n jǝg nǝb nɨ jǝ bǝm ji lɛɨ,

19sǝ n sʊwa nǝbɔ mǝʊ,

jol yotǝm lǝma Tɛlalɔɨ.”

20Nǝngɔ a kʊlʊm langǝn bwangǝnɔ a nǝ nʊ nɨ dʌng kan mɛlalɨgɔ lɛɨ, a gǝla a yɨ sǝ a tǝl mɛlalɨgɨɨ. Gwam nǝbɔ wo a kan mɛlalɨɨ ja tal gǝm nu. 21Nǝngɔ a sʊwa ji gɔ, “Mʊlalɨ kɛl Kwaamaɨ a yii dwiyen a lɔl jen.”

22Gwam jinɔ jǝ woi, jǝ sʊwa kɛl nyan nɛ a dul gǝn. Ja ta kang a nyiyo a kɛl nyantɨn nɨ jela lɛ a nyiyo gǝnɨ. Jǝ bʌbko lɛ gɔ, “Bwɛ nɨ n ke bɔ bʊla Yusufui ka?”

23Yesu a sʊwa gɔ, “N nyǝm jǝ́ sʊwa ɨ sʊwa ɨ mʊsǝn kɛl nɨɨ, ‘Nǝ bʊʊ, gung dul mʊnɔ nǝn kang mʊn. Kanjǝl nɨ nǝn nyʊwa mʊ maa a Kafarnahumi, maa fɔ tag a tuulɔ mɔ.’ ” 24A sʊwa ji gɔ, “N sʊwa jen bɨlǝngkɛlɔ, mɨ nǝn nǝkuwotǝmkǝga nɨ jǝ yo gǝn nɛ a tǝm gǝnɨ. 25N bɨlǝngǝn mǝ sʊwa jen nɛɨ, a kwama Iliyaɨ, mwɛmɔ a kɔ swiyotǝmɔ jolɔ taal jǝbɔ bwaala nukun. A joltɨn gɔ jʊwanɔ a maa tǝmɔ gwam. Nɔɔtǝmkʊlabɔ wo a lada a tǝm Israila. 26Kwaama a twam bɔ Iliya nǝkuwotǝmkǝga a daa kaa wo win a kʊm jin. A yɔ a daagɔ kaa nɔɔkʊla nɨ a Zarifati, a tǝm Sidoni. 27Nǝn kwama nǝkuwotǝmkǝga Elishaɨ, nǝbɔ a mwata mwataɨ a lada a tǝm Israila. Ja gung bɔ nǝl wo win a kʊm jin, na ke bɔ Naaman, bwɛ tǝm Suriyaɨ.”

28Nǝb nɨ wo a mʊgɔ kan mɛlalɨ ja nyʊwa kɛl nɨɨ, nabwɨlɔ a ta ji gwam. 29Ja gun, ja jǝg Yesu a gulen, ja shu nǝn gɔ a nyanga yem nɨ ja mɔ tuulɔngɔ woi. Jǝ swɨ lɛ ja tʊng gǝn a yal a ganga. 30Nǝngɔ a bwɛlam a tɨbǝl jii, a shu a ta gola gǝnɨ.

Nǝ Yʊwa Bwɨla

(Mar 1:21-28)

31Nǝngɔ a shu a tuulɔ Kafarnahum a tǝm Galilii. A dɔ kan mɛlalɨ nǝn Kum Fǝbtǝm mɛla jim lɛ woi. 32Nǝngɔ ja ta kang a nyiyoi, jʊ a bwɨɨ kɛl gǝnɔ nǝn kwaan fɔlɔn.

33A mʊgɔ kan mɛlalɨ kaa nǝl wo nǝn yʊwa bwɨla, nǝngɔ a ga kwaalɨgɔ nǝn kwaan gɔ, 34“Yesu, bwɛ Nazarat, n wɛ a dǝg ń wo jǝbɔ nǝnɨ? Mʊ bɛ sǝ ba ń jʌbo nǝn ka? N nyǝm mʊ nǝn nuwo! Mʊ nǝ Sagsag Kwaamaɨ.”

35Yesu a ga yʊwa bwɨlagɔ gǝm wulong gɔ, “Yɨ shig! Jelʌm a bʊtɔ nʊ nɨ gǝm!” Yʊwa bwɨlagɔ a gung gǝn a ga a tǝm a kǝga jinɔ gǝm. A jel a bǝla nʊ nɨ mɨ twɨla wo.

36Nǝbɔ gwam a ta kang a nyiyo, jǝ sʊwa lɛ gɔ, “Jʊ nɨ n mɛlalɨ wɛ? Nǝn kwaan jǝbɔ fɔlɔn bwɛ nɨ a sʊwa yʊwa bwɨlantɨnɔ kɛl ja jeli!” 37Jʊ nɨ Yesu a maaɨ, a dǝg ji jǝ sʊwa kɛl gǝnɔ lɛ a tǝmɔ gǝm gwam.

Yesu A Gung Yul Bitrusi

(Mat 8:14,15; Mar 1:29-31)

38Yesu a bǝla kan mɛlalɨgɔ, a shu a lɔ Saminui. Yul Saminui mɨ kwamɨgǝn, bɛshenigɔ a ta gǝn a kwam. Nǝngɔ ja sʊwa Yesu kɛl sǝ a tɨka gǝnɨ. 39Nǝngɔ Yesu a yɔ a daa gǝ woi, a sʊwa gɔ, “Bɛsheni, bǝla gǝn.” Tʌgo a kang nǝngɔ bɛshenigɔ a bǝla gǝnɨ, nǝngɔ a gun a nǝ ji jǝjalǝnɨ.

Yesu A Gung Nǝbɔ A Lada Nǝn Kwaamɨ

(Mat 8:16,17; Mar 1:32-34)

40Nǝn kwama lɛtǝm, ja bɛ gǝm nǝn nǝb nɨ mɨ kwamɨgǝnɨ, nǝngɔ a ke jii, nǝngɔ a gung ji gwamɨ. 41Nǝblaamɔ a jel a bʊtɔ nǝbɨɨ a lada nyɔ. Jǝ gaba wulongɔ lɛ gɔ, “Mɔ nǝn Bʊla Kwaamaɨ.” Ja nyǝm gɔ nǝn Kiristii, n jʊ a bwɨ Yesu a ga jim wulongi, nǝngɔ a kaa ji wo a sʊwatǝm kɛlɨ.

Yesu A Shu A Daa Kiyotǝm Fulon Kɛl

(Mar 1:35-39)

42Nǝn tǝmsɛlɨɨ, nǝngɔ Yesu a jel a shu a daa nɨ mɨ nǝb woi. Nǝbɔ saa gǝn nɛ, nǝngɔ ja nya gǝnɨ, nǝngɔ ja kela gǝn gɔ ka ga bǝla ji lɛ ga shu a kaa daa. 43Nǝngɔ a sʊwa gɔ, “A yǝlam nyɔ n kiyo fulon kɛl lǝmɨ fɔlɔn lɔ Kwaamaɨ a kaam tuulɔtɨnɔ gǝm, jʊ a bwɨɨ n dul kɛl nɨ ja twam ɨɨ.” 44A ja kǝga nǝn kiyotǝm kɛl Kwaamaɨ a kantɨn mɛlalɨ nɨ a tǝm Yahudiyaɨ.

Currently Selected:

Luka 4: DBD

Highlight

Copy