Matta 18
18
Nuwo A Laa Dʊʊnɨ?
(Mar 9:33-37; Luk 9:46-48)
1Nǝn kwama bɛtɔ mɛlalɨ nɨ a bɛ a daa Yesu woi, nǝngɔ ja bʌ gǝn gɔ, “Nuwo nyɨ a laa dʊʊn a fɔlɔn lɔ Kwaamaɨ?” 2Nǝngɔ a jo kaa bwɛsǝn ba tɨ a tɨbǝl jini. 3Nǝngɔ a sʊwa gɔ, “N bɨlǝngǝn mǝ sʊwa jen nɛɨ, na jǝ́ fʌto bɔ jǝ́ yǝla nǝn dul jenɔ na bɛtɔ dwalǝnɨ, mɨsɔ jǝ́ dɔ fɔlɔn lɔ Kwaamaɨ lɛ. 4Na nʊ nɨ a shig dul gǝnɔ na bwɛ nɨɨ, n nʊ nya dʊʊn nɛ a fɔlɔn lɔ Kwaamaɨ. 5Na nʊ nɨ a yo bwɛ dwalɨ win na nʊ nɨ nǝn dun mɨɨ, nǝmǝ ga yo i. 6Na nʊ nɨ a dǝg kaa win a kʊm bɛtɔ dwalǝn nɨ a nǝ bɨlǝngkɛl a daa mɨ woi a maa bwɨlangkɛlɨ, a laa jǝl ja kwa gǝm nɛl kʊwalɨ a kwɨl, ja mal gǝn a mʊgɔ wɨma tushi, sǝ a bʊla.
Bɛ Ka Ń Dǝg Lɛ Nǝl A Maa Bwɨlangkɛl
(Mar 9:42-48; Luk 17:1,2)
7“N mwɛ yooli nɨɨ a dǝg nǝfitʌmɔ a maa bwɨlangkɛlɨ. Kanjǝl nɨ gǝ dǝg maatǝm bwɨlangkɛl lɛɨ bɛ bɛ. A dul kɛl nɨ, n mwɛ nʊ nɨ dǝg jʊ nɨ lɛ a bwɨɨ. 8Na kang mʊnɔ, na naa mʊnɔ dǝg ń dǝg ń maatǝm bwɨlangkɛlɨ, mwatɨm gǝn mam fʌlen. A laa jǝl ń nya kʊlɨ nɨ mɨ dɨtǝm woi nǝn tanglɨ jinʌn, na jǝ mal ń mal ń a kǝla nɨ mɨsɔ dumo lɛ woi, nǝn kangtɨnɔ yo jǝbɔ naatɨnɔ yoi. 9Na nu mʊnɔ dǝg ń dǝg ń maatǝm bwɨlangkɛlɨ, kʊʊtam gǝn mam fʌlen. A laa jǝl ń nya kʊlɨ nɨ mɨsɔ dɨ lɛ woi nǝn nugɔ win, na jǝ mal ń mal ń a mʊgɔ lɔ kǝla nǝn nugɔ yoi.
Mʊsǝn Kɛl A Dul Kwamɨ Nɨ A Lɛlaɨ
(Luk 15:3-7)
10“Bɛ jǝ́ nyǝm, ka jǝ́ soga lɛ kaa win a mʊgɔ bɛtɔ dwalǝn nɨ, jʊ a bwɨ mǝ sʊwa jen jʊ nɨ lɛɨ, bɛtɔ twama jinɔ a dʌbʌl kwamaɨ, kwangkwang jǝ dʌng kǝga Tɛtɛ mɨɨ nɨ lɛ a dʌbʌl kwamaɨ. [11Bʊla Nǝlɨ a bɛ sǝ ba bʊʊ nǝn nǝb nɨ a lɛlaɨ.]#18:11 Kaam bɛl mʊlalɨ galɨgɔ mɨ nǝn bɛ gola nɨ. 12N wɛ jǝ́ kuwoi? Na kaa nǝl nǝn kwamɨgɔ fʊlkʊb, nǝngɔ win a lɛlaɨ, mɨsɔ bǝla fʊltʊlkʊb jeli tʊlkʊb nɨ lɛ a naa yem a yɔ ya saa nʊ nɨ win a lɛlaɨ ka? 13N bɨlǝngǝn mǝ sʊwa jen nɛɨ, na a nyaɨ, nyʊwa nyʊwa fulotǝm nǝl a dul kwamɨ nɨ win ga nyaɨ, a dul kwamɨtɨn nɨ fʊltʊlkʊb jeli tʊlkʊb a lɛla bɨɨ. 14A na nyɔ, ke bɔ swɨtǝm Tɨya jen nɨ a dʌbʌl kwamaɨ nǝl win a mʊgɔ bɛtɔ dwalǝn nɨɨ a lɛla.
Nʊ Nɨ A Maa Bwɨlangkɛlɨ
(Luk 17:3)
15“Na kɨla mɔ a maa mʊn bwɨlangkɛlɨ, bɛ ń yɔ ya ń sʊwa gǝn mɔʊ ga maa mʊn bwɨlangkɛl jǝ́ kwaajen. Na a jǝla nǝn mʊɨ, ń yǝla nǝn kɨla mɔ. 16Na a nyʊwa ń bɨɨ, bɛ ń yǝla ń yɔ a daa gǝ woi nǝn nǝ nǝtǝm nyiyogɔ win a yɔ nǝn a yo, sǝ nǝbɔ yo a yɔ nǝn a taal a jǝla nǝn jʊ mʊ sʊwaɨ. 17Na a kɔ a nyʊwa ji bɨɨ, sʊwa mʊrkalɨ nǝb bwangtǝm Kwaamaɨ. Na a kɔ a nyʊwa ji bɨɨ, bɛ ń do gǝn na nʊ nɨ a nyǝm bɔ Kwaamaɨ, do gǝn na nǝ yotǝm kemʌn tǝm.
Bwatǝm Jǝbɔ Kwɨtǝm
18“N bɨlǝngǝn mǝ sʊwa jen nɛɨ, jʊ nɨ jǝ́ bwa a tǝm nɨɨ, jǝ bwa bwa nyɔ a dʌbʌl kwama. Jʊ nɨ jǝ́ kwɨ a tǝm nɨɨ, jǝ kwɨ kwɨ nyɔ a dʌbʌl kwama. 19Mǝ sʊwa jen nɛ tag, na nǝbɔ yo a kʊm jen a tǝm nɨ ja jǝla nǝn jʊ win ja keli, Tɛtɛ mɨ nɨ a dʌbʌl kwamaɨ maa jim maa. 20A daa nɨ nǝbɔ yo, a yɔ nǝn a taal, a mʊrka nǝn dun mɨɨ, mǝ tǝmɨ mǝ na a tɨbǝl jin.”
Mʊsǝn Kɛl A Dul Bwɛ Jwaalɛ Nɨ Mɨ Maa Kǝlǝmtǝm Lɛɨ
21Nǝngɔ Bitrus a kʌl a bɛ a daa Yesu woi a bʌ gɔ, “Tɛlalɔ, naa nyǝn kɨla mɨ maa mɨ bwɨlangkɛl lɛ sǝ n kǝlǝm gǝmɨ? Naa nʌbʌl ka?”
22Nǝngɔ Yesu a jǝla gǝn gɔ, “Ke bɔ naa nʌbʌl. Bɛ a yǝlam nʌbʌl naagɔ fʊltǝnʌbʌl.
23“Fɔlɔn lɔ Kwaamaɨ jǝ mʊrka gǝn nǝn fɔlɔ nɨ swɨ lɛ a mʊr naan gǝnɔ a kang jwaalɛb gǝnɨ. 24Nǝn kwama fɔlɔ nɨ a tǝl mʊrtǝmɨ, nǝngɔ ja bɛ gǝm nǝn bwɛ jwaalɛ nɨ gǝ bwang gǝm kemʌnɔ lɛ milanɔ a lada nyɨɨ wʊnɨ mɨsɔ dwal lɛ a ywa gǝnɨ. 25A dwal bɔ a ywaɨ, nǝngɔ tɛlalɔ gǝnɔ a dǝg ji gɔ ja miyo gǝn jǝbɔ nwala gɔ, jǝbɔ bɛtɔ lɔ gɨɨ, jǝbɔ kanjǝl nɨ gǝ nǝn gwamɨ, sǝ a ywa gǝn kemʌn nɨɨ.
26“Nǝngɔ bwɛ jwaalɛ nɨ a gǝla a jʊng yagɨ yagɨ nǝn keli a kǝga tɛlalɔ gɨɨ gɔ, ‘Tɛlalɔ, bǝm nǝl mʊnɔ, mǝ ywa ń ywa ń pʌd kanjǝl nɨ mʊ bwang mɨ lɛɨ.’ 27Nǝngɔ tɛlalɔ bwɛ jwaalɛ nɨ a ji bʊnǝn gǝnɔ a dem gǝm kangɨ, a kǝlǝm gǝm naanɨ.
28“Kwama nɨ bwɛ jwaalɛ nɨ a jelʌmi, ya nya kaa fwal gɔ bwɛ jwaalɛ nɨ gǝ bwang gǝm naan kemʌn sǝlǝnɔ lɛ fʊlkʊbɨ. Nǝngɔ a ta kwɨl fwal gɨɨ, a sʊwa gɔ, ‘Ywa ɨ jʊ nɨ mǝ bwang mʊn nɛɨ.’
29“Nǝngɔ fwal gɔ bwɛ jwaalɛ nɨ a jʊng yagɨ yagɨ a kela gǝn gɔ, ‘Bǝm nǝl mʊnɔ, mǝ ywa ń ywa ń.’
30“Nǝngɔ a kɔɨ. A yɔ ya dǝg balɨ nɨ a lɔsomii, gɔ mɨsɔ gǝ jǝg gǝn nɛ na ga ywa gǝn bɔ naan kemʌn nɨ gǝ bwang gǝm lɛɨ. 31Nǝn kwama tangǝn bɛtɔ jwaalɛn nɨ a kuwo jʊ nɨɨ, ja nyʊwa bɔ lǝma dangǝn. Nǝngɔ ja yɔ ya ja sʊwa tɛlalɔ jinɔ kanga kanjǝl nɨ a bwɨɨ.
32“Nǝngɔ tɛlalɔ gǝnɔ a jo gǝn, a sʊwa gǝn gɔ, ‘Mɔ, mʊ bwɨlang bwɛ jwaalɛ! N kǝlǝm mʊn naan mʊnɔ jʊ a bwɨɨ ń kela ɨ. 33A bʊm bɔ nyɔ ń ji bʊnǝn fwal mɔ bwɛ jwaalɛ nɨ kanga mǝ maa mʊnɨ ka?’ 34Tɛlalɔ gǝnɔ a nyʊwa nabwɨl dangǝn, nǝngɔ a dǝg gɔ ja nǝ gǝn gaalan, ka ja dem gǝm lɛ kang na ga ywa bɔ naan nɨ gǝ bwang gǝm lɛ gwamɨ.
35“A na nyɔ Tɨya mɨ nɨ a dʌbʌl kwamaɨ maa jem nyɔ gwam, na jǝ́ kǝlǝm bɔ kɨla jen gǝm nǝlɔ wini.”
Currently Selected:
Matta 18: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
