Matta 25
25
Mʊsǝn Kɛl A Dul Bɛtǝnɔɔtǝnɔ Kʊb
1“Fɔlɔn lɔ Kwaamaɨ jǝ mʊrka gǝn na bɛtǝnɔɔtǝn nɨ kʊbɨ, wʊnɨ ja wɔɔ fitila jinɔ gɔ ya jǝ tǝga balɨ nɨ a naa nɔɔlɨɨ. 2Nʊ a kʊm jin ja fʌm fʌmi. Nʊ n nǝb yʊlan. 3Nǝn kwama nɨ nǝb nɨ nʊ a wɔɔ fitila jini, ja do bɔ nwang nɨ jǝ tal lɛ a fitila jinɔ gǝmɨ, na nʊ nɨ a mʊgɔ gǝnɨ a dɨmɨ. 4Nǝb nɨ nǝn yʊlanɨ, ja wɔɔ kwal nwangɔ jǝbɔ fitila jinɔ. 5Balɨgɔ a bɛ bɔ dǝbǝr, nǝngɔ ja tǝl nyʊwatǝm dumi, nǝngɔ dumɔ a wɔɔ ji gwamɨ.
6“Nǝn sangdɨlang, nǝngɔ ja nyʊwa jǝ jo jangajǝngɔ lɛ gɔ, ‘Balɨgɔ n wɔ! Jǝ́ jel jǝ́ tǝga gǝn!’ 7Nǝngɔ bɛtǝnɔɔtǝn nɨ kʊbɨ, ja gun ja fɛka fitila jini. 8Nǝngɔ nǝb nɨ mɨ nǝn yʊlanɨ, ja sʊwa nǝb yʊlanɔ gɔ, ‘Jǝ́ nǝ nǝm nwang jenɔ wo dǝm, fitila nǝnɔ dumo lɛ.’ 9Nǝngɔ nǝb nɨ nǝn yʊlanɨ a sʊwa ji gɔ, ‘A nǝnɔ mɨsɔ la nǝm lɛ jǝbɔ jen. Jǝ́ yɔ a daa nǝb miyotǝmɔ woi, ya jǝ́ ten a jenɔ wo.’ 10Jǝ yǝlagɔ a daa tentǝm nwangɨ, balɨgɔ a bɛ. Nǝb nɨ a maa fɛkalɨɨ, nǝngɔ ja dɔ kangwaalɔ jǝbɔ gɨɨ, nǝngɔ ja nʊngǝm nyanga kanɨ.
11“Nǝn gul nǝngɔ tangǝn bɛtǝnɔɔtǝn nɨ a bɛɨ. Nǝngɔ ji gɔ, ‘Nǝ dʊʊ, nǝ dʊʊ! Wum nǝm nyanga kanɔ!’ 12Nǝngɔ balɨgɔ a sʊwa ji gɔ, ‘N bɨlǝngkɛl mǝ sʊwa jen nɛɨ, mǝ nyǝm jen bɔ.’
13“Gǝ na nyɔ bɛ jǝ́ yɨ nǝn fɛkalɨ, jʊ a bwɨɨ jǝ́ nyǝm bɔ kɔkɔgɔ jǝbɔ kemʌnɔ mǝ yǝla mǝ bɛm lɛɨ.
Mɛlalɨ A Dul Dʌngtǝm Kanjǝl
(Luk 19:11-27)
14“Fɔlɔn lɔ Kwaamaɨ gǝ na na kaa nǝl yilo a yɔmɨ, nǝngɔ a jo jwaalɛb gǝnɔ a nǝ ji dʌngtǝm kanjǝl lɔ gǝnɔ gwamɨ. 15A nǝ kaa win kemʌnɔ sʊwagɔ nʊ, a wini sʊwagɔ yo, kaa a nǝ gǝn sʊwagɔ win. A tǝga ji a kwaan nyatǝm jinɔ gǝm. Nǝngɔ a shu yɔm gǝnɨ. 16Nʊ nɨ a yo kemʌnɔ sʊwagɔ nʊɨ, a ta bɔ bʊtɔ, nǝngɔ ya maa dʌbo nǝn a gǝnɨ, nǝngɔ a nya bwiligɔ sʊwagɔ nʊɨ. 17Nʊ nɨ a yo sʊwagɔ yo tǝgǝnɨ, ya nya bwiligɔ sʊwagɔ yo. 18Nʊ nɨ a yo sʊwagɔ wini, nǝngɔ ya wʊ tǝmɔ a yʊ kemʌn tɛlalɔ gǝnɔ woi.
19“Jǝ daamɨ, nǝngɔ tɛlalɔ jwaalɛb nɨ a yǝla a bɛ sǝ ja kiyo gǝm jʊ ja maam nǝn kemʌni. 20Nǝngɔ nʊ nɨ a yo kemʌnɔ sʊwagɔ nʊɨ, a bɛ nǝn kaa sʊwagɔ nʊ ba ya tʌgoi, nǝngɔ gɔ, ‘Tɛlalɔ, mʊ nɨ ɨ sʊwagɔ nʊ. Nǝngɔ mǝ nya bwiligɔ sʊwagɔ nʊ tʌgoi.’ 21Nǝngɔ tɛlalɔ gǝnɔ a sʊwa gǝn gɔ, ‘A bʊmbʊr, mʊ nǝ tatǝm swatǝm yaa, bwɛ jwaalɛ nyan! Ń ta swatǝm yaa a kǝlɨ jǝl, mǝ nǝ ń nǝ ń maajɨ nɨ a laa a wʊnɨɨ. Ba maa bǝlátǝm jǝbɔ mǝ.’
22“Nǝngɔ nʊ nɨ a yo kemʌnɔ sʊwagɔ yoi, a bɛ a kǝgaɨ, a sʊwa gɔ, ‘Tɛlalɔ, mʊ nɨ ɨ sʊwagɔ yo. N nya bwiligɔ a dul gǝn sʊwagɔ yo.’ 23Nǝngɔ tɛlalɔ gǝnɔ a sʊwa gǝn gɔ, ‘A bʊmbʊr, mʊ nǝ tatǝm swatǝm yaa, bwɛ jwaalɛ nyan! Ń ta swatǝm yaa a kǝlɨ jǝl, mǝ nǝ ń nǝ ń maajɨ nɨ a laa a wʊnɨɨ. Ba maa bǝlátǝm jǝbɔ mǝ.’
24“Nǝngɔ nʊ nɨ a yo kemʌnɔ sʊwagɔ wini, ba jʊng a kǝga gǝn gɔ, ‘Tɛlalɔ, n nyǝm kɛl mʊnɔ a bwa a shu, mʊ kʌso kʌso a daa nɨ mʊ kwal bɔ jǝl woi, ń mʊr a daa nɨ mʊ wa bɔ dʊʊm woi. 25N jʊ a bwɨ mǝ nyʊwa taal, nǝngɔ mǝ shu ya mǝ wʊ tǝmɔ mǝ yʊ kemʌn mʊnɔ woi. Yo jǝ mʊnɔ wɔ.’ 26Nǝngɔ tɛlalɔ gǝnɔ a jǝla gǝn gɔ, ‘Mʊ bwɨlang bwɛ jwaalɛ, nǝ fiyel! Ń nyǝm nyɔ mǝ kʌso kʌso a daa nɨ mǝ kwal bɔ jǝl woi, mǝ mʊr kanjǝlɔ a daa nɨ mǝ kwal bɨɨ. 27Na a bʊm nyɔ ń ya mɨ kemʌn mǝndɨ a kan kemʌn, na n yǝla n bɛɨ, sǝ n yo jǝ mǝndɨ nǝn bwili! 28Jǝ́ yem kemʌn nɨ win a kang gǝnɨ, jǝ́ nǝ nʊ nɨ nǝn kʊbɨ. 29Nʊ nɨ nǝn jǝlɨ, jǝ sʊ gǝm sʊ a lada. Nʊ nɨ mɨ nǝnɨ, kǝlɨ jʊ nɨ gǝ nǝnɨ, jǝ yem gǝm yem. 30Jǝ́ mal bwɨlang bwɛ jwaalɛ nɨ a yooli a mʊgɔ kumtojili. N daagɔ jim wi lɛ wo nǝn kʊʊtǝm nungʌni.’
Bʊla Nǝlɨ Nǝn Gɔ Maa Nǝbɔ Gǝm Borang Lɛɨ
31“Nǝn kwama Bʊla Nǝlɨ bɛm lɛ a mʊgɔ dʊʊn gǝnɔ gǝm jǝbɔ bɛtɔ twama Kwaamaɨ gwamɨ, yɨ yɨ a kotere dʊʊlǝn fɔlɔn gǝnɔ gǝm. 32Jǝ mʊr nǝbɔ gwam a kǝga gǝn, jǝgam ji nǝn dʌmʌn, kanga nǝ tɔɔtǝm kwamɨgɔ gǝ jǝgam kwamɨgɔ lɛ a mʊgɔ bɨntɨnɨ. 33Ya kwamɨtɨnɔ a kang jajǝng gǝnɔ gǝm, ya bɨntɨnɔ a kang fɔlɔng gǝn.
34“Fɔlɔgɔ sʊwa sʊwa nǝb nɨ a kang jajǝng gǝnɨ gɔ, ‘Jǝ́ bɛ, nǝb nɨ Tɛtɛ mɨ a nǝ jen bwilii. Jǝ́ yo kʊla fɔlɔn lɔ nɨ ja fɛka jem nǝn tǝltǝm yooligɨɨ. 35Jǝ́ nya nya jʊ nɨ, jʊ a bwɨɨ nǝn kwama gɔ mǝ nyʊwa jʊwan nɛ, jǝ́ nɨ ɨ jǝjalǝn. Nǝn kwama gɔ mǝ nyʊwa diil mwɛ lɛ, jǝ́ nɨ ɨ n nɔɔ. Nǝn kwama gɔ mǝ maam faabǝnɨ, jǝ́ shig i. 36Nǝn kwama gɔ mǝ sǝlɨgǝn, jǝ́ dʊʊ mɨ dwang a bʊtɔ. Nǝn kwama gɔ mɨ mǝ kwamɨgǝn, jǝ́ tɔɔ ɨ. Nǝn kwama gɔ ja mal ɨ a lɔsomi, jǝ́ kǝsa ɨ.’
37“Nǝb dǝngdǝngɔ a jǝla gǝn gɔ, ‘Tɛlalɔ, fɨyang nǝn kuwo ń mʊ nyʊwa jʊwan nɛ, nǝn nǝ ń jǝjalǝnɨ? N fɨyang mʊ nyʊwa diil mwɛ lɛ, nǝn nǝ ń mwɛɨ? 38N fɨyang nǝn kuwo ń mʊ faabɨ, nǝ shig ńi? Fɨyang mʊ sǝlɨgǝn, nǝn dʊʊ mʊn dwangɨ? 39N fɨyang mɨ mʊ kwamɨgǝn nǝn tɔɔ ńɨ, ja mal ń a mʊgɔ lɔsomi nǝn kǝsa ńɨ?’ 40Fɔlɔgɔ jǝla ji gɔ, ‘Bɨlǝngǝn mǝ sʊwa jen nɛ, jʊ nɨ win a mʊgɔ kanjǝl nɨ jǝ́ maa kɛtǝlam mǝndɨ gǝmɨ, jǝ́ maam mǝ.’
41“Bwangtǝn nɛɨ, sʊwa nǝb nɨ a kang fɔlɔng gǝnɔ gǝmɨ gɔ, ‘Jǝ́ kʌlʌm fɔ, nǝb nɨ ja lag jen lagɨ, jǝ́ dɔ mʊgɔ kǝla nɨ mɨsɔ dumo lɛ woi, wʊnɨ ja fɛ Mammɔ gǝm jǝbɔ bɛtɔ twama gǝnɨ. 42Jʊ a bwɨɨ, nǝn kwama gɔ n nyʊwa jʊwan, jǝ́ nɨ ɨ bɔ jǝjalǝn. Nǝn kwama gɔ mǝ nyʊwa diil mwɛ lɛ, jǝ́ nɨ ɨ bɔ mwɛ nɔɔtǝm. 43Nǝn kwama gɔ n shig jem faabǝn, jǝ́ shig i bɔ. Nǝn kwama gɔ mǝ sǝlɨgǝn, jǝ́ dʊʊ mɨ bɔ dwang a bʊtɔ. Nǝn kwama gɔ mɨ mǝ kwamɨgǝn, jǝ́ tɔɔ ɨ bɔ. Nǝn kwama gɔ ja mal ɨ a lɔsomi, jǝ́ kǝsa ɨ bɔ.’
44“Jǝ jǝla gǝn tag gɔ, ‘Tɛlalɔ, n fɨyang nǝ kuwo ń mʊ nyʊwa jʊwan nɛ, mʊ nyʊwa laatǝm mwɛ lɛ, mʊ shig faabǝn, mʊ sǝlɨgǝn, twɨla a ta ń, ja mal ń a lɔsomi, nǝn tɨka ń bɨɨ?’ 45Sǝla a gar jim gɔ, ‘Bɨlǝngǝn mǝ sʊwa jen nɛɨ, kanjǝl nɨ jǝ́ maa bɔ wo win a mʊgɔ nǝb nɨ ja ya ji bɔ a nyiyo jǝlɨ, jǝ́ maa mɨ bɔ.’ 46Jǝ yɔ nǝn ji a daa mwɛtǝm nɨ mɨsɔ dɨ lɛ woi. Nǝb dǝngdǝngɔ jǝ yɔ nǝn ji a daa kʊlɨ nɨ mɨ dɨtǝm woi.”
Currently Selected:
Matta 25: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
