Be Mochi 4
4
Bitru ngge Yohana a chafya mo be Atkwentì mo be ya a Yahuda
1Atan a be Bitru ngge Yohana è jan be nobǝ fwa anga, be ekǝ́n ngge chu mo be edgonzǝn a Àtá mo Ehwya ngge be Sadosi ya ehwyà è bwa a zǝn. 2Bè fku tsuruku àywá adia Bitru ngge Yohana è tú be nobǝ mò anga jan, Ehwya a du be nobǝ ya e fǝ ara a zǝ a bwa efwe abu Yeso è zǝbwa angǝ ángá. 3Enona, bè fu Bitru ngge Yohana, adia nò è tén ara ga kpo ángá, bè kpu be ken kenpe a àtá ehwyatu, ti kengga zǝngga re mo nó. 4Tea embo a engga mo be nobǝ ya è fo moetum hon ángá è tsǝ́ekǝ̀n. Enona, efim mo be ndedon ya è tsǝ́ ara ekǝ̀n ángá, è kengga echo chwen (5,000). Bè ká be be ndegwa ngge mbǝgya ra.
5Zǝngga re, binbin mo be Atkwentì (atkwen nobǝ ngge be etumo mo edon) è fǝnchu a Urishelima. 6Ana Chu mo ekǝ́n è no a zǝn ngge be Kayafa, Yohana, Alezanda tangge be nobǝ efki ya mbwe Chu mo ekǝ́n hon. 7Bè du be e kpu Bitru ngge Yohana e bwa be, nè kwa ara be eka ekam jan, “Ara no nye emwentì nye e ti e bwe mò a nye bwe anga, eno e ra adi ti mo ara a nye bwe ye anga?”
8Ekǝnggwa Engǝ́ mo Ehwya è shwa Bitru a ju, gè jan be, “Be chutì ngge be nwenfi mo be yamuje, 9ano nòmo nye ká je eka anga adi be mò esese a be bwe ngge nobǝ engǝfǝfù ena ngge abu be matswa ye anga, 10binbin mo nye, nye e yi e seshi fwa ena, a nye be ya a Esǝrela. Ge no adi ti mo Yeso Kristi ya a Nazarati nwene a nyè ti kenfu a chu eswafǝ tea Ehwya è ti ye nyi etkyen a dì ángá, nobǝ ena ben ematswam n ywano a chafya mo nye ngge echafǝju mbwe na. 11A Yeso hon ena a bè jan fwa a chu ye no a tswa Fwaebam jan,
“‘Ten hon nwone a nye ya mo mbwe m,
nyè segwa ángá
twanga no ten e cha ti ara
kpo adi àtá hon ángá.’
12Ba ben be ega a zǝn nobǝ efki ra; adia ti efki fwa ye chá a se mo kpe, a be no ara be nobǝ jan, adi efka mbwe, ja ben nya e no a fwa efwam ángá ra.”
13Atan a be Atkwentì è di ekǝ̀n-ebonm mo Bitru ngge Yohana nè yi jan, ba be ndedon kukwa ya è kwa be makanta ra ángá, bè tàn ebwikpe. Bè kaben jan be ya ena è no ngge Yeso. 14Tea adia bè di nobǝ engǝfǝfù hon a bè matswa ángá ywano a tswa engga mo be ángá, be jan ti be fwa akan ra. 15Enona, bè du be vǝ́ a je mo be Atkwentì mo be ya a Yahuda hon, kǝnggwa bè chu a sen nè pa pyoro e sojube. 16Be ká sojube eka jan, “Ano a ja bwe ngge be ndedon ena? Egwa egwa a Urishelima yi ara jan be bwe ara moeditanm echakpokpo nwone a je tson a ti je etson mo ebi mo nó ra. 17Tea evǝa je e fu e ndya etkyen ekpom mo mò ena a tswa engga mo be nobǝ, je e twa be echa jan ge no kenm, be e jan be ende akan fwa adi ti mo ende ena efwe ra.”
18Ekǝnggwa bè fǝ́ be etsonchi hon dwa twanga shi chafya mo be efwe nè twa be echa jan be e jan e didi be be nobǝ fwa eno e ra moetum adi ti mo Yeso efwe ra. 19Tea Bitru ngge Yohana è janfwe be, “A zǝn Ehwya, ani e setkyan, je e fo nye nè a je fo ye? Nye e kpèn ye e chu nye. 20Adi ḿ mo je, je gwa a ti je fwa ejanm a chu binbin mo be mò a jè di ngge fǝzǝn mo je ngge mò a jè fo ngge tón mo je anga ra.”
21Chashin, a be Atkwentì hon è twa bi ara be echa echakpokpo ángá, be twagwa be be e nya. Bè bwe enò adia bè yi be abu ba kǝn be tén, be nobǝ a tke be etkekàn ra ra. Adia be nobǝ binbin è no tàn Ehwya anga a chu mò è bwe na. 22Je mo ndedon hon a bè matswa ye a tswa moeditanm ángá, e twafǝ̀ je gwi ndwe.
Be ya ekǝ̀n-etsǝ́m bgó ebgo evǝa Ehwya e no be ekǝ̀n-ebonm
23Abu bè twagwa Bitru ngge Yohana ángá, bè twabǝ ken a zǝn be ya ekǝ̀n-etsǝ́m ya ehwyà nè jantu be binbin mo be mò a be Ekǝ́n echa ngge be atkwen nobǝ mo ya a Yahuda è jan be ángá. 24Atan a bè fo fwa ena ángá, bè tandwa a tswa ebgo ebgom kè akan. Be bgó Ehwya jan, “Etsodwe, o no Enokan, a bo nwene e bwe be zǝn a kpe ngge zǝnchaje hon ngge be sǝn, tangge mogwa mogwa e dwa a tswa mo be ángá. 25A bo nwene è jan fwa, adi echakpo mo Engǝ́ Echanwenwen chá kpevǝ mo fí mbo Dawuda, ebǝ ata mo je jan,
“ ‘Ano bwe a ge be ya e fwa be ya
a Esǝrela ra fku tsuruku
anga ngge be ya a Esǝrela
té fuchin esera anga a kukwa?
26Be chutì mo zǝnchaje
té fuchin mo kàn enyom,
be atkwen nobǝ mo be fǝnchu
be e twa ese ngge Ehwya Etsodwe,
ngge ende Akan a gè swa ara jan
ge e ti e vǝ́ be nobǝ ángá.’
27Eshwen, Tì Hiridu ngge Gomna Buntu Bilatu è fǝnchu tangge be ya e fwa be ya a Esǝrela ra, ngge be ya a Esǝrela a tswa eten efifi ena evǝa be e pa pyoro e sojube jan be e se e gwa Yeso, fí mbo echanwenwen nwene a o tsǝ̀pe ara ángá. 28Bè bwe mò a o panyi ara ekpe ekpe jan ga bwe adi echakpo mbo ngge fwa ekam mbo ángá. 29Asuswana, di abu be nda anga be e dòn je mochi mbo hon. No je echakpo abu je e jan fwa mbo ngge ekǝ̀n-ebonm. 30Efwe, ywa bu mbo we ma e tswa be nobǝ. No je echakpo je e bwe be moeditanm ngge be mò ezǝzǝju adi ti mo Yeso, fí mbo ebitete.”
31Atan a be bgó fwa ara ebgo ángá, zǝn a bè fǝnchu anga è chìju. Binbin mo be è mbo ngge Engǝ́ mo Ehwya hon nè du be bè jan fwa mo Ehwya ngge ekǝ̀n-ebonm.
Be ya ekǝ̀n-etsǝ́m è fo etkwa mo mobenben mo be, abibi
32Binbin mo be ya ekǝ̀n-etsǝ́m hon è no ngge tsuruku akan, fwa ekam mo be è no akan. Ende akan è tú di ye jan mobenben mbwe nè no ḿ mbwe jujuye efwe ra. Tea bè no kpwà adi etkwa efom mo egwa egwa mo mobenben mo be abibi. 33Be etsonchi hon è no kpwà adi fwa e jan a tswa echakpo echa a chu etkyen enyim mo Yeso Etsodwe. Esese mo Ehwya è no ngge binbin mo be. 34Ende akan e nda ni ye mò a engga mo be ra. Ekpengga ngge ekpengga be ya è no ngge be etebwa sǝnsen eno e ra be mu ángá è jwade be, nè ti tse mo nó, 35bwa a zǝn be etsonchi. Bè tankwa tse hon ken abu mò a egwa egwa è nda anga.
36Enò gaten, Esufu nobǝ akan adi efi mo Lawi, ya a Sayifuru, ende a be etsonchi è fǝ́ anga Banaba (engà mo nó tú anga Ya ekǝ̀n ejanbonm), 37è jwade etebwa sǝnsen mbwe nè ti tse mo nó bwa a zǝn be etsonchi.
Currently Selected:
Be Mochi 4: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
