Yohana 1

Yeso Kristi, a Fwa e no nobǝ nya anga

1Ekwafya mo zǝnchaje, ende akan è no a bè fǝ́ ye anga Fwa. Fwa hon ena è no ngge Ehwya, Fwa hon, è no Ehwya. 2Gè no anga ngge Ehwya ekwafya. 3Bè mmò be mò binbin adi efka mbwe, bè mmò didi be mò akan a bè mmò, éè fwa ye ngge ge ra ra. 4Fwa hon è no echin mo nya, a nya hon ena e no enggasansan, e tú be nobǝ efǝ anga. 5Enggasansan hon nggazǝ anga a tswa etwafǝfǝ, tea etwafǝfǝ hon din ti ye nó ra.

6Ehwya è tson nobǝ akan bwa, bè fǝ́ ye anga Yohana. 7Gè bwa evǝa ge e jan be nobǝ fwa a chu ende hon nwene e bwe zǝn no enggasansan ángá, abu binbin mo be, be e fo, be e nyishwa a chu nobǝ hon. 8Yohana e chu ye è fwa ye enggasansan hon ra, tea gè bwa abu eyifwa a chu mo enggasansan hon.

9Ena a enggasansan ebi hon e nyabwa a tswa zǝnchaje. A ge ga ende a du egwa egwa e yi Ehwya ángá. 10Gè bwa a tswa zǝnchaje a gè mmò a ge ángá, tea be nobǝ a tswa zǝnchaje hon è diyi be ye ra. 11Gè bwa a zǝn be ya mbwe ye. Tea be ya mbwe ye hon è cha be ye ra. 12Tea be ya è cha ye nè tsǝ́ ara ekǝ̀n a chu ye ángá, gè no be echakpo be e no mbǝgya mo Ehwya. 13Ena a be nobǝ embwam mo Ehwya, fwa ye be nobǝ adi amngo ra, eno e ra be mbwa be be abu be mbwa nobǝ anga ra, n fwa ye adi epam mo nobǝ ra.

14Fwa hon è nga nobǝ nè no zǝno mbwe a tswa engga mo je. Jè di egǝ̀n mbwe, egǝ̀n nwone Àtà hon è ti no nwen akan tete, nwene è vǝ a zǝn ye bwa, ge mbo adi esese ebwem ngge ebi.

15Yohana jan fwa anga a chu ye. Gè tandwa jan, “Ena a ge ende hon a m̀ jan, ‘Ende e nyabwa chashin mam, ge twafǝ̀ m àywá adia atan a bè chà mbwa m ra, gè no enom.’ ” 16Adi esese àywá a Ehwya no ara je ángá, jè cha ara esese hon akan chashin mo akan. 17Abu be edon hon è bwa adi efka mo Mosa ángá, esese ngge ebi è bwa adi efka mo Yeso Kristi. 18Nobǝ akan chà didi ye Ehwya ra. Tea Nwen Akan hon, e no Ehwya e chu ye gaten ángá, n no anga a buetkwa mo Ehwya ángá, fi ye tú ara je.

Yohana è jan, ge fwa ye Yeso Kristi ra

(Matiyu 3:1-12; Marku 1:18; Luka 3:1-18)

19Ena a fwa a Yohana è jan atan a be Atkwen nobǝ mo ya a Yahuda a Urishelima, è tson be ekǝ́n ngge efi mo Lawi jan, be e ká Yohana eka jan, “A bo wa ara?” 20Ge jan be nó enggasansan jan, “M fwa m Kristi hon ra.”

21Bè ká ye eka jan, “Kǝnggwa a bo wa ara? A bo wa Eliya?”

Gè jan, “É yé.”

Bè ká ye eka efwe, “A bo wa Efojan hon a je nobà anga?”

Gè janfwe be “É yé.”

22Ekǝn-etkyen be ká ye eka jan, “A bo wa ara ekǝnggwa? Je nda anga mò a je ti ken a jan be ya e tson je ángá. Mò a wa jan a chu o anga, a ano?”

23Yohana è janfwe be a chu fwa a kpevǝ mo efojan Eshaya, “A me ma nobǝ nwene e fǝ́dwa anga a ehwen, ‘Bwe ywa efǝ nwone a Etsodwe hon kpo a bwa ángá.’ ”

24Kǝnggwa be Farisi hon ya a bè tson bwa ángá, 25è ká ye eka jan, “Bwe engǝ ekǝnggwa, o bwe batisǝma anga ano o fwa mbo Kristi hon, eno e ra Eliya, eno e ra Efojan hon ra?”

26Yohana è janfwe be, “M bwe be nobǝ batisǝma anga ngge mbǝ. Tea a tswa engga mo nye, ende akan a nye yi nye ye ra ywano ana. 27Bi adia ga ende a m jan, ge nyabwa chashin mam ángá, m kǝn m a me fken dgomo mo kpumo a tkyafù mbwe ra.”

28Binbin mo be mò ena è bwe gu a eten a Betani, è no chá notà mo Kǝn a Joda, zǝn a Yohana è bwe Batisǝma anga.

Yeso a Nwen Son mo Ehwya hon

29Zǝngga re mo nó, Yohana è di chàkǝn Yeso nyabwa a zǝn ye. Gè jan, “Di, Nwen Son mo Ehwya, nwene e tivǝ́ ebgen mo be nobǝ a tswa zǝnchaje anga. 30A ge ga nwene a m jan, ‘Nobǝ akan nyabwa chashin mam, nwene e twafǝ̀ m àywá, adia bè chà mbwa m ra, gè no enom.’ 31A me e chu m, m̀ diyi m ye jan ge no Etsǝpepe hon ra, tea m bwa bwe batisǝma anga ngge mbǝ evǝa be ya a Esǝrela e yi ende a ge no ángá.”

32Kǝnggwa Yohana è jantu be jan, “M̀ di Engǝ́ Echanwenwen shwa chá kpe abu eba shwa pe ye a ju. 33M̀ yi m ye ra, tea ende e tson m bwa me e bwe batisǝma ngge mbǝ ángá, è jan m a ge jan, ‘Ende a nye di Engǝ́ shwa chá kpe shwa pe a chu ye ángá, a a ge. Ga ende nwene a bwe batisǝma ngge Engǝ́ Echanwenwen ángá.’ 34M di tén mò hon ena ezǝ ngge m jan anga jan, ena a Nwen mo Ehwya hon.”

Be etsonchi mo Yeso ekwafya

35Zǝngga re mo nó Yohana è bwa ywano a zǝn a ba á no andǝgya ángá efwe, ngge be ye è ba ye ángá fà. 36Atan a gè di Yeso twafǝ̀ ye nyaken ángá, gè jan, “Nye di, Nwen Son mo Ehwya hon.”

37Atan a be ya è ba Yohana anga fà, è fo enò ángá, bè gwa ye nè ba Yeso. 38Yeso è fǝ̀n shwa, nè di bè no ba ye anga, gè ká be eka jan, “Mò a nye nda anga a ano?”

Be jan, “Rabi” (Engà mo nó jan Etumo), “O no anga a che?”

39Ge janfwe be, “Nye bwa abu nye e di.”

Kǝnggwa, bè ken di zǝn a gè no anga nè no kpo nò ngge ge. Atan enò, è no tse ndwe mo ekakenò, edgo. 40Andoro, nwenjin Sima Bitru, è no akan mo be fà hon, è fo ara fwa a Yohana è jan a chu Yeso ángá, nè ba Yeso. 41Kǝnggwa Andoro è kwafya ken tkunda nwenjin ye Sima nè jan nó jan, “Je ben ara Etsǝpepe hon” (Engà mo nó a Kristi hon.) 42Gè ti Bitru bwa a zǝn Yeso.

Atan a Yeso è di Sima ángá, gè diseshi nó, nè jan, “A bo wa Sima nwen mo Yohana. Ba fǝ́ o Kefasǝ.” (Engà mo Kefasǝ, a Ten.)

Yeso è fǝ́ Filibu ngge Nataniye dwa

43Zǝngga re mo nó, Yeso è dgyan jan ge e ken a Galili, gè ben Filibu nè jan, “Bwa, ba m.”

44Filibu e no ya Betseda, eten mo Andoro ngge Bitru. 45Filibu è ken ben Nataniye nè jan ye jan, “Je di ara ende a Mosa è bá mò a chu ye a tswa edon ngge a be efojan è bá mò a chu ye gaten ángá. Ende hon ena a Yeso ya a Nazarati, nwen mo Esufu.”

46Nataniye ká ye eka jan, “Nazarati nè! Mò akan esese gwa a ti a je a Nazarati?”

Filibu è janfwe ye, “Bwa, je e ken we di ye a bo e chu o.”

47Atan a Yeso è di Nataniye nyabwa a zǝn ye ángá, gè jan fwa a chu ye jan, “Ena a ya a Esǝrela adi ebi, echi mo mò esera fwa ye a tsuruku mbwe ra.”

48Nataniye è ká Yeso eka jan, “O bwe engǝ, o chà yi m?”

Yeso è janfwe ye jan, “Ḿ di o atan a ó ywano a ta mo tu engǝtsǝn, sangǝ́ Filibu é chà fǝ́ o dwa ángá.”

49Kǝnggwa Nataniye jan, “Etumo, wa Nwen mo Ehwya hon, ngge wa tì mo be ya a Esǝrela hon.”

50Yeso è jan ye jan, “O tsǝ́ekǝ̀n adia m jan o jan, ḿ di o atan a ó ywano a ta mo tu engǝtsǝn hon ángá. Wa di be mò echuvǝ e twafǝ̀ ya ena ángá.” 51Ge jan bishi, “Me e jan nye ebi, nya di kpe no efkigwam, ngge be maleka mo Ehwya no vǝ́ anga n no a shwa anga a chu mo Nwen Nobǝ hon. A ge ga ende e no abu endnyà mo evǝ́m a kpe ngge eshwam a sen.”

Currently Selected:

Yohana 1: ICH

Highlight

Copy