Yohana 18

Etsǝdum ngge efum mo Yeso

(Matiyu 26:47-56; Marku 14:43-50; Luka 22:47-53)

1Atan a gè bgó fwa ara ebgo ángá, Yeso ngge be etsonchi mbwe è penyi èbgà a Kidoron, vǝ́ jengǝ̀ mo nó, zǝn a wá ehwyazǝmo akan è no ángá. Yeso è kwashi a zǝn ngge be etsonchi mbwe.

2Yahuda nwene e tsǝ du ye ángá è yi ara zǝn hon, adia Yeso ngge be etsonchi mbwe è ken bwi anga a zǝn. 3Enona, Yahuda è bwa a zǝn ngge be etso mo be yakàn mo Roma ngge be edgonzǝn mo Àtá mo Ehwya, ngge etso mo be ya mochi mo be Ekǝ́n echa ngge be Farisi, a bè tson ángá. Bè kpwá be ejwèn, petila ngge be mochán no a bu mo be.

4Yeso è yi ara be mò a bwe ngge ge ángá, gè vǝ bwa chafya nè ká be eka jan, “Nye nda anga ara?”

5Bè janfwe ye, “Je nda anga Yeso ya a Nazarati.” Yeso è jan be jan, “A me hon ena.” (Yahuda nwene e tsǝ du ye ángá è ywano ngge be ya è bwa ángá.) 6Abu Yeso è jan, “A me hon ena,” ángá, bè vǝ́ eshin nè kpo gu a sen.

7Yeso è ká be eka efwe jan, “Nye nda anga ara?” Bè janfwe ye, “Je nda anga Yeso ya a Nazarati.”

8Yeso è jan, “Ḿ jan nye jan, ‘A me hon ena.’ Ano nye nda anga a me, nye gwa be ya ena be e nya.” 9Mò hon ena bwe tén abu gè jan ekwafya ángá. Gè jan ara jan, “A tswa engga mo be ya ò kpu no m ángá, m̀ twagwa didi m akan ra.”

10Kǝnggwa Sima Bitru, è no ngge hwen efǝ. Gè vǝ gan nó, nè ti kpecho ti ara tón chá budgo mo ya mochi mo Chu mo ekǝ́n, (Be fǝ́ ya mochi hon anga, Malku).

11Yeso è jan Bitru, “Ti hwen efǝ mbo wa shi adi fya mo nó. Ge no ye kenm a ma ngǝ ekan a Àtà m è panyi ara m ángá ra?”

Bè ti Yeso ken a zǝn Ana

12Kǝnggwa etso mo be yakàn hon ngge chu mo be ya a Yahuda tangge be edgonzǝn mo Àtá mo Ehwya è fu Yeso, nè tèfu ye. 13Bè kwafya ti ye ken a zǝn Ana, nwene è no ate mo gwa Kayafa è no Chu mo ekǝ́n adi je hon ángá. 14Kayafa ena a ende éè jan be Atkwentì mo ya a Yahuda atan a bè no adi chuefǝnm jan, ge setkyan a ge ano nobǝ akan e fǝ fǝ a chu mo be nobǝ ángá.

Etson ekwafya a Bitru è tson a chu Yeso ángá

(Matiyu 26:69-70; Marku 14:66-68; Luka 22:55-57)

15Sima Bitru ngge etsonchi efki akan è no ba Yeso anga chashin. Adia Chu mo ekǝ́n hon è yi ara etsonchi efki hon ángá, bè gwa ye gè ba Yeso shi tén a tem̀ mo Chu mo ekǝ́n hon. 16Tea bè gwa be Bitru ge e kwa e shi ra, gè ndnya a fǝtsǝmo. Etsonchi hon éè yi Chu mo ekǝ́n ángá è twabǝ bwa jan fwa ngge ndegwa éè dgon fǝtsǝmo anga jan, ge e gwa Bitru ge e kwa e shi. Kǝnggwa ndegwa hon è gwa Bitru kwashi. 17Nwen ndegwa hon éè no a fǝtsǝmo ángá, è ká Bitru eka jan, “O fwa mbo akan a tswa mo be etsonchi mo nobǝ ena ra?”

Bitru è janfwe ye, “M fwa m akan mo be ra.”

18Gè no adi ekpengga mo viejwa, enona, be ya mochi ngge be edgonzǝn e tso fǝ̀ adi ká nè no ge nó anga. Bitru è ywano ge fǝ̀ hon anga ngge be gaten.

Chu mo ekǝ́n ká Yeso eka

(Matiyu 26:59-66; Marku 14:55-64; Luka 22:66-71)

19Abu mò ena è no bwe anga, Chu mo ekǝ́n è kwa ara Yeso eka ekam a chu be ya è ba ye anga ngge be moetum mbwe.

20Yeso è janfwe ye jan, “M̀ jan ara zǝnchaje fwa a tswa enggasansan. M̀ tú kpwà mò a tswa be àtá chuefǝnm ngge a Àtá mo Ehwya zǝn a be ya a Yahuda fǝn bwi anga. M̀ chà jan didi m fwa engǝ̀tonton ra. 21Ano bwe a ge o ká m eka anga? Bi be ya è fo mò a m̀ tú ángá. Be yi mò ya m̀ jan ángá.”

22Atan a Yeso è jan fwa ena ángá, edgonzǝn akan éè ywano tenten a zǝn Yeso ángá, è bu ye efya a hwi nè ká ye eka jan, “Ena abu o jan a fwe Chu mo ekǝ́n ángá?”

23Yeso è janfwe ye jan, “Ano m jan mò e fwa ye ebi ra, jan m mò hon a m jan e no ye ebi ra ángá. Tea ano m jan ebi, ano bwe a ge o bu m efya?” 24Enona, Ana è du Yeso, éè no etefum ángá, ken a zǝn Kayafa Chu mo ekǝ́n.

Etson etsonm mo Bitru adi e fà ngge adi e ta a chu Yeso

(Matiyu 26:71-75; Marku 14:69-72; Luka 22:58-62)

25Atan enò, abu Sima Bitru è ywano ge fǝ̀ anga, bè ká ye eka jan, “A bo o fwa mbo akan a tswa mo be etsonchi mbwe ra?”

Gè tson etson jan, “É yé, m fwa m a engga mo be ra.”

26Tea akan a tswa engga mo be ya mochi mo Chu mo ekǝ́n, nwene éè no ya mbwe ende a Bitru è kpecho ye tón ángá, è ká ye eka jan, “A me m̀ di mbo ngge Yeso a kpwa mo tu zetu hon ra?” 27Efwe, Bitru è tson etson, atan enò, kǝndon è to dwa.

Bè ti Yeso bwa chafya mo Bilatu

(Matiyu 27:1-2,11-14; Marku 15:1-5; Luka 23:1-5)

28Kǝnggwa be ya a Yahuda è ti Yeso a zǝn Kayafa ti ken a tem̀ mo Gomna mo Roma evǝa be e kpèn ye kǝ́n. Asuswana, zǝn è ngga ara, enona be ya a Yahuda è se be e kwa e shi a tem̀ mo Gomna afwa ba no be echanwenwen ra. Bè bwe enò adia bè nda anga be e de Esǝ mo Epenyim hon. 29Enona, Bilatu è gwa a je a zǝn a bè no ángá, nè ká be eka jan, “Mò ebgen a ende ena bwe ángá a ano?”

30Bè janfwe ye, “Ano ge e chà bwe ye ebgen ra, je e ti ye e bwa je a zǝn o ra.” 31Bilatu è jan be jan, “Ano eni a fwa hon, nye e ti ye e nya, nye e kpèn ye kǝ́n a nye abu edon mo nye jan anga.”

Be atkwen mo ya a Yahuda hon è jan, “Je fwa je ngge emwentì je e kpèn nobǝ akan kǝ́nfǝ ra, kpwà be ya a Roma.” 32Mò ena bwe tén abu Yeso è jan ángá. Gè jan ara be yishwa fǝ a ga fǝ ángá.

33Kǝnggwa, Bilatu è twabǝ shi a tswa tem̀ efwe nè jan be e ti Yeso e bwa a zǝn ye. Gè ká Yeso eka jan, “A bo wa Tì mo be ya a Yahuda hon?”

34Yeso è ká ye eka jan, “Ena a fwa ekam mbo nè, eno e ra, be nobǝ ya ehwyà jantu o a be a chu m?”

35Bilatu è janfwe ye jan, “A me ma ya a Yahuda? Be ya mbwe o ngge be Ekǝ́n echa mo be ti o bwa a be evǝa me e kpèn o kǝ́n. Mò a ò bwe ángá, a ano?”

36Yeso è jan, “Zǝnotì mam fwa ye ḿ mo zǝnchaje ena ra. Be è jan zǝnotì mam no ḿ mo zǝnchaje ena, be ya mochi mam àa nyo kàn a chu m evǝa be nobǝ àa ti m, a du be a bu mo be ya a Yahuda ra. Tea me e jan o, zǝnotì mam fwa ye ḿ mo zǝnchaje ena ra.”

37Bilatu è ká ye eka jan, “Enona, wa tì?”

Yeso è cha ye dwa jan, “O jan eshwen jan ma tì. Me e jan o, a a chu fwa ena a bè mbwa m ngge m̀ bwa a tswa zǝnchaje ena, a chu mo nó, abu me e fi e tú be nobǝ ebi. Egwa egwa e dgyan ebi hon anga buton fo m anga.”

38Bilatu ká ye eka jan, “Ebi hon a ano?” Atan a gè ká fwa ra ye eka ena ángá, gè twabǝ vǝ́ a je a zǝn be ya a Yahuda nè jan, “M ben m ye ngge edan akan ra. 39Tea ge no adi moefì mo nye nwone e jan, m fki a gwa a no nye nobǝ akan a tswa a àtá ehwyatu nò mo Esǝ mo Epenyim ena. Nye nda anga me e fki e gwa e no nye tì mo be ya a Yahuda hon?”

40Be tàn ye dwa a chu jan, “É yé, fwa ye a ge ra. Fkigwa Baraba no je.” Tea Baraba è no a tswa mo be ya è tke etkekàn, enona bè twa ye no a tswa àtá ehwyatu hon.

Currently Selected:

Yohana 18: ICH

Highlight

Copy