Luka 10
10
Yeso è tson be nobǝ gwi chwen a fà chu fà chí vǝ́ a je
1Beti bishi, Etsodwe è swa a tswa engga mo be nobǝ ya è ba ye anga, gwi chwen a fà chu fà. Gè tson be fà fà vǝ́ a je, be e kwafya mbwe, e ken a egwa egwa mo be eten ngge be zǝn a gè nda anga ga ken ángá. 2Gè jan be jan, “Moebǝm hon no àywá, tea be ya mochi hon fí be ra. No enona, nye e bgó e ngǝshi yagwamo moebǝm, ge e tson be ya mochi embo be e bwa e bǝ ye mowa hon a kpèn mbwe. 3Nye nya, di, m tson nye nyavǝ́ a je abu be mbǝgya mo son a engga mo be kwàkpan. 4Nye e ti nye tse, echo kèn ngge kpumo a tkyafù efki ra. Nye e bi nye ende akan fwa a efǝ ra.
5“Ano nye kwashi a mu akan, nye e kwafya e jan, ‘Adgye mo Ehwya ge no ngge nye a mu ana.’ 6Ano ende akan a zǝn, no ngge adgye, adgye hon a no ngge be. Tea, ano ben ye ende e no ngge nò ra, adgye hon twabǝ a bwa a zǝn nye. 7Nye e no a mu a zǝn, nye e ken nye a mu efki efki ra. Nye e de nye e ngǝ mò a be no nye ángá, adia ge no ara jan ya mochi ge e ben buhwen mbwe.
8“Atan a nye kwa ara a tswa eten ngge be cha ara nye, nye de mode a be no nye ángá. 9Nye e ma e tswa be ya modwa ya e no a zǝn ángá, nye e jan be binbin jan, ‘Ekpengga a Ehwya a dwatì a chu be nobǝ bwa tén ara.’ 10Eten egwa egwa e segwa nye ángá, nye e ba be efǝku a tswa eten hon nye e jan, 11‘Je bukǝ́n ara èé abubwi a eten mo nye, e banfu no a kpwafu mo je ángá, tú anga jan, fù èé bu mo je dwa a je a chu mò a ben nye ángá. Tea nye e yi mò ena, engga a Ehwya shwa a dwatì ángá bwa tén ara.’ 12Me e jan nye, nò kǝ́n ekpènm, Ehwya a di ti ara ashi mo Sodoma chà a shín eten eni.
13“Ebwe no a chu mo nye ya Korazon. Ebwe no a chu mo nye ya Betseda. Adia be mò ebwikpe a bè bwe a engga mo nye ángá, be è ma bwe be a Taya ngge Sidon, bà a twa ara etwa mo ebgen mo be ekpe ekpe, bà a no ngge tsen ebenm a tswa esa mokàn ngge ton enggwam a chu mo be. 14Nò kǝ́n ekpènm, Ehwya a di ti ara ashi mo ya Taya ngge Sidon chà a shín nye. 15A nye gaten, be ya a Kapanahum, nye ka anga jan, ba ti nye a vǝ́ a kpe? É yé, ba ti nye a shi a sen, ken a shi a ndikpǝ.”
16Ekǝnggwa, Yeso è jan be ya è ba ye anga jan, “Ende e fo ara fwa mo nye, fo ara m, ende e segwa ara nye, segwa ara m. Tea ende e segwa m, segwa anga nwene è tson m bwa ángá.”
Be gwi chwen a fà chu fà hon è twabǝ bwa
17Atan a be gwi chwen a fà chu fà hon è twabǝ bwa ángá, bè bwa a tswa ju eshanm nè jan, “Etsodwe, èé be engǝ́ esera è tse je atan a jè kpón be dgyén adi ti mbo ángá.”
18Gè janfwe be jan, “M̀ di Shetan kpo shwa abu chù mbǝgezǝ anga chá kpe. 19Nye e fo, m no ara nye, emwentì a nya cha be mokan kwà ngge be nyo, fù, ba dì be nye ju ra. Efwe, nye de a vǝ́ a chu echakpo mo Shetan, mò akan a chì ye nye ra. 20Èé enò, nye e shàn nye ju adia engǝ́ esera è dwa a sen no nye ángá ra, tea nye e shánju adia be bá ti mo nye no a kpe ángá.”
Yeso è tàn Ehwya
(Matiyu 11:25-27; 13:16-17)
21Atan a enò, Yeso è mbo ngge vǝtsen adi efka mo Engǝ́ mo Ehwya, gè jan, “M tan o Àtà, Etsodwe mo kpe ngge zǝnchaje, adia ò kpu be mò ena nyino engǝ̀tonton a zǝn be ya enggaton, ya e ká ara mò àywá. Kǝnggwa, o fkigwa be no ara be mbǝgyashan. Ee, Àtà adia ena a mò a o fo etkwa we bwe ángá.”
22Yeso è jan be ya è no a zǝn ángá jan, “Àtà m no gu ara m emwentì a chu mo be mò binbin. Nobǝ akan e yi ende a Nwen hon no ángá fwa ye ra kpwà Àtà hon. Nobǝ akan e yi ende a Àtà hon no ángá fwa ye ra kpwà Nwen hon. Ngge be ya Nwen hon swa a ge, ge fi Àtà hon tú be.”
23Ekǝnggwa, Yeso è twanga ken chá be etsonchi mbwe nè jan be engǝ̀tonton jan, “Esese no ḿ mo be fǝzǝn e di mò a nye di ángá. 24M jan nye anga, be efojan ngge be tì embo è nda be e di mò a nye di, tea bè di be nó ra. Bè nda be e fo fwa a nye fo, tea bè fo be nó ra.”
Hufwa a chu esese ebwem mo ya a Samariya akan
25Nò kè akan ende akan éè yise ara edon mo be ya a Yahuda ángá, è nyi etkyen abu ge e mbwà e di Yeso. Gè ká Yeso eka jan, “Etumo, mò a ma bwe evǝa me e ben nya e no a fwa efwam ángá a ano?”
26Yeso è ká ye eka jan, “Mò a edon hon jan anga a ano? O hwà yi ye engǝ?”
27Gè janfwe ye jan, “Edon jan, ‘We dgyan Ehwya Etsodwe mbo ngge tsuruku mbo binbin, ngge nya mbo binbin, ngge echafǝju mbo binbin, ngge engà mbo binbin. Efwe, we dgyan needwe mbo abu o dgyan chu o anga.’ ”
28Yeso jan, “O jan eshwen, bwe enò wa ben nya e no a fwa efwam.”
29Nobǝ hon è nda anga ge e tú jan eka a gè ká ángá no esese, nè ká Yeso eka jan, “Needwe m hon a ara?”
30Yeso è janfwe ye adi hufwa jan, “Ende akan è vǝ ti re a eten a Urishelima nyashi a eten Jeriko nè shi kpo a bu mo ya moebufkwam. Bè fkwacha gu mokàn mbwe ngge be atkimo mbwe, bè bu ye mò, nè twagwa ye a kpevǝ fǝ.
31“A gè chà dwano a zǝn ángá, ekǝ́n akan è kpo efǝ hon nyaken, atan a gè di nó ángá, gè ken buetkwa, nè nya m̀ mbwe. 32Dgyen ye fon ra, ende akan adia efi mo Lawi è bwa di ye èé ge, abu ende hon è dwano a zǝn ángá, gè ken buetkwa, nè nya m̀ mbwe gaten.
33“Tea ya a Samariya akan è ti ḿ mbwe nyaken efǝ hon. Atan a gè bwangga a zǝn a ende hon è dwano ángá, gè di ashi mo nó. 34Gè ken a zǝn nó, gè na ende hon kpan è no ye ju ángá. Gè nggwa byi ngge mbǝ enabi a chu kpan hon nè tè pe be. Kǝnggwa gè kan nobǝ hon twà a chu jaki mbwe nè ti nó ken a zǝn a be ya echan dwa ángá, nè dgon nó a zǝn. 35Zǝngga re, gè ti tse a bè fǝ́ anga dinari fà, ti no edgonzǝn hon, nè jan, ‘Dgon ye. Ano m twabǝ bwa ara, ma kpwa o mò nwone o gu tu a chu mo nó ángá.’ ”
36Yeso è ká ye eka jan, “Adi ekam mbo, be nobǝ ta ena, ende e tú jan ga needwe mo nwene è kpo a bu mo ya moebufkwam ángá a ara?”
37Etumo mo edon hon è jan, “Nwene è di ashi mbwe ángá.”
Yeso è jan ye, “Ken, we bwe enò.”
Yeso è ken bandi Mata ngge Meri
38Abu Yeso ngge be etsonchi mbwe è nyaken a Urishelima ángá, bè kengga a eten akan, ndegwa a bè fǝ́ anga Mata, è no a zǝn. Gè sha ye, nè ti ye shi a mu be. 39Gè no ngge nwenjin ye ndegwa, a bè fǝ́ ye anga Meri. Meri è chuno a zǝn kpwafu mo Etsodwe, nè no fo moetum mbwe anga. 40Tea, Mata è no ye adi mochi mo mode ebwem. Gè ken a zǝn Yeso nè jan, “Etsodwe, o ká mbo jan nwenjin m gwa m, m no bwe mochi anga a me jujum ra? Jan ye ge e bwa e bwe e jwa m.”
41Etsodwe è janfwe ye, “Mata, Mata, o tsen tsuruku anga ngge o ti shwa mbo nyino a chu be mò embo. 42Kpwà mò akan a be nda anga. Meri swati ara mò esese hon, be cha a ti be nó a zǝn ye ra.”
Currently Selected:
Luka 10: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
