Luka 22
22
Yahuda Eskariyoti è senvǝ nè tsǝdu Yeso
(Matiyu 26:1-5; Marku 14:1-2; Yohana 11:45-53)
1Engga mo Esǝ mo Borodi e ben ye yisti ra, a be fǝ́ anga Esǝ mo Epenyim ángá è bwa tén ara. 2Be Ekǝ́n echa ngge be etumo mo edon è nda efwa anga, evǝa be e gu Yeso. Tea bè tsen etsentsen mo be nobǝ anga. No enona, bè nda efwa evǝa be e gu ye engǝ̀tonton. 3Kǝnggwa Shetan è kwa a tsuruku mo Yahuda, a bè fǝ́ Eskariyoti, éè no akan a tswa engga mo be etsonchi mo Yeso ángá. 4Enona, Yahuda è ken a zǝn be Ekǝ́n echa ngge be chu mo be edgonzǝn mo Àtá mo Ehwya, nè pa pyoro ngge be abu ga tsǝ Yeso a du be a bu, be e fu ye. 5Bè fo etkwa àywá, nè chadwa jan ba no ye tse. 6A ge Yahuda è chadwa, nè nda efwa a ga du, be e fu Yeso a di zǝn a be nobǝ fwa be ra. 7Kǝnggwa, nò a ba ya a gu be son adi Esǝ mo Epenyim ángá, a engga mo nó Esǝ mo Borodi e ben ye yisti ra ángá, è bwangga ara. 8Yeso è tson Bitru ngge Yohana chí jan, “Nye shi té fuchin mo Esǝ mo Epenyim a ja de ángá.” 9Bè ká ye eka jan, “Zǝn a o dgyan anga je e té fuchin mo mode mo esǝ hon ángá no a che?”
10Yeso è jan be jan, “Abu nye kwa nyashi a tswa eten efifi hon, ende akan e tso hwa mbǝ nyaken ángá, a ben nye. Nye e ba ye e ken a mu a ge kwa ángá. 11Nye e jan yagwamo mu hon jan, ‘Etumo hon ká eka anga jan, tswa àtá mo ya echan a a me ngge be etsonchi mam a de mode mo Esǝ mo Epenyim ángá, no a che?’ 12Ga tu nye àtá akpe efifi akan e no ebwetsam ngge be atkimo a tswa mo nó. Nye e té fuchin hon a zǝn.”
13Bè ken di mò hon no gu tén abu Yeso è jan ángá, nè bwe mode Esǝ mo Epenyim hon a zǝn.
Yeso è de mode Esǝ mo Epenyim
(Matiyu 26:26-30; Marku 14:22-26; 1 Be ya a Korinti 11:23-25)
14Atan a engga hon è kan ara ángá, Yeso è shi chu a zǝn mo mode, be etsonchi mbwe è ken ben ye. 15Gè jan be jan, “Dgyen ara fon, m̀ no dgyan anga me e de mode Esǝ mo Epenyim ena ngge nye sangǝ́, me e chà e ngǝ ekan. 16M jan nye anga na, ma de m mode mo esǝ ena efwe ra, kpwà tén atan a engà mo nó defǝ ara a tswa zǝnotì mo Ehwya ángá.”
17Yeso è ti kǝnggwe mbǝ enabi a kpwabu mbwe nè chwano Ehwya, nè jan, “Nye cha, nye e ngǝ e ken e sojunye. 18M jan nye anga na, ti asuswana ken chafya, ma ngǝ m mbǝ mo ga mo enabi ena efwe ra, kpwà tén atan zǝnotì mo Ehwya a bwa ángá.” 19Kǝnggwa, gè ti borodi nè chwano Ehwya a chu mo nó. Ge bwìkwa nó nè ti no be. Gè jan, “Borodi ena a gwe a ju m nwone a bè ti no a chu nye ángá. Nye bwe enò, nye e ti e ka e ben anga ngge me.”
20Atan a bè de fwa ara mode hon ángá, enò gaten gè ti kǝnggwe hon nè jan, “Kǝnggwe ena nwone a be ti a nggwa a sen a chu nye na, a Dwavǝ Esenm Efwe hon, adi ngǝ mam. 21Di, ende hon e tsǝ a du m ángá de anga ngge me asuswana adi ekemo akan. 22Nwen Nobǝ hon a fǝ abu bè panyi ara nó ángá, tea ebwe no a chu mo ende e tsǝ a du ye ángá.” 23Bè kwa ara sojube eka ekam jan ne, ara hon a bwe mò ena a ge.
Efyan etwam a chu ende e gǝ̀n ti ara
24Efyan etwam è nyi etkyen a engga mo be etsonchi hon, a chu mo ende e gǝ̀n ti ara. 25Kǝnggwa Yeso è jan be jan, “Be tì mo be ya e yi be Ehwya ra, dwa emwentì anga a chu be nobǝ mo be, ngge be chu mo be fǝ́ chu be anga, ‘Be ya e bwejwa be nobǝ.’ 26Tea ge e no ye enò ngge nye ra, nwenfi mo nye, ga no nwenbwa mo nye. Ende e no chu mo nye ángá, ge e no ende a bwe nye mochi ángá. 27Ende nwene e tkyan anga, a ani? Ende nwene e chuno de mode anga a chu teboro nè, a ende nwene e ti mode bwa ye anga? Fwa ye ende e chuno de mode anga ra? Tea a me, m no a engga mo nye abu ende e kwa nye mode anga. 28Nya be ya è no ngge me a tswa embwadi mam ángá. 29Enona, abu Àtà m no ara m emwen me e ti e dwatì ángá, enò gaten, m no ara nye emwen nye e ti e dwatì a chu be nobǝ. 30Abu nya de nya ngǝ ngge me adi zǝnotì mam, nya chu a chu be botì, abu nya kpèn be efi gwi chu fà mo Esǝrela kǝ́n.
Yeso è jan abu Bitru a tson etson mbwe ángá
(Matiyu 26:31-35; Marku 14:27-31; Yohana 13:36-38)
31“Sima, Sima, bgeshi fǝzǝn, Shetan nda ara efwa, evǝa ge e dgya binbin mo nye abu be dgya kwa fwenfonmo ngge wimo anga. 32Tea m bgó ara ebgo a chu o, Sima, afwa chaebi mbo a vǝ́ eshin. Atan a o twabǝ bwa ara a zǝn m ángá, we jan e bon be nwenjwa o ekǝ̀n.”
33Kǝnggwa Bitru è jan, “Etsodwe, m notsa ara, a ma kwa a àtá ewhyatu ngge bo, ma fǝ ngge bo.”
34Yeso jan, “Bitru, me e jan o, etsǝ ena, kǝndon chà a to ye dwa ra, wa tson etson mam kè ta jan, o yi m ra.”
Yeso è twa be etsonchi mbwe echa
35Yeso è ká be etsonchi mbwe eka jan, “Atan a m̀ tson nye, nye e ken e du edgon a chu Fwa Esese ángá, m̀ jan nye e kpwa nye echo tse, mode, ngge kpumo a tkyafù ra, mò a nyè ndani ángá, a ano?”
Bè jan, “Fwa ye ra.”
36Gè jan be jan, “Tea asuswana, ende e no ngge echo tse, echo kèn, ge e kpu be. Ende e ben ye hwen efǝ ra, ge e jwa e de adanmo bwi a ju mbwe ge e jwa akan. 37Ge no ebam jan, ‘Bè ká ye fǝn ngge be ya ebgen,’ m jan nye anga jan, ge no kenm be fwa ena a bwe a kǝ̀n a chu m. Eshwen, mò a bè bá a chu m ángá, bwekǝ̀n anga.”
38Be etsonchi mbwe è jan, “Di Etsodwe, je no ngge hwen efǝ fà ana.”
Yeso è jan, “Nye gwa fwa ena.”
Yeso è bgó Ehwya a Hwì mo Zetu
(Matiyu 26:36-46; Marku 14:32-42)
39Yeso è vǝ́ a je, nè ken tonvǝ́ a chu Hwì mo Zetu, abu gè bwe bwi anga, be etsonchi mbwe è ba ye. 40A gè vǝ́ngga ara a zǝn ángá, gè jan be, “Nye bgó Ehwya, afwa nya kwa a tswa embwadi.” 41Gè gwa be, nè ken chàkǝn chafya, nè nggwa ekpanvǝ mbwe a sen nè bgó ebgo jan, 42“Àtà, ano o cha ara dwa, tivǝ́ ara m ekan ena. Tea, fwa ye adi edgyan mam ra, ge e no adi edgyan mbo.” 43Kǝnggwa maleka è mbwibwa a zǝn ye chá kpe, nè janbon ye ekǝ̀n. 44Adia tsuruku è bgen ye anga àywá ángá, gè chungǝ́shi adi ebgo ebgom ngge engǝfen a ju ye è no twashwa anga a sen ángá, è no abu ngǝ.
45Atan a Yeso è bgó fwa ara ebgo ángá, gè nyi etkyen, nè ken a zǝn be ya è ba ye anga. Gè ben be adi dan, bè nì ara adi nya ebgenm. 46Gè ká be eka jan, “Ano bwe nye no dwa dan anga? Nye nyi etkyen nye e bgó ebgo, afwa nya kpo a tswa embwadi.”
Bè fu Yeso
(Matiyu 26:47-56; Marku 14:43-50; Yohana 18:3-11)
47A ge chà jan fwa ena anga, Yahuda, akan a engga mo be etsonchi mbwe, è kpu be nobǝ embo bwa a zǝn Yeso. Gè ken tenten a zǝn ye evǝa ge e kan e fu ye. 48Tea Yeso è ká ye eka jan, “Yahuda, o tsǝdu Nwen Nobǝ anga ngge ekǝ̀n ekanfum?” 49Atan a be ya è no ngge ge, è yi ara mò a be nda a ba a bwe ángá, bè ká Yeso eka jan, “Etsodwe, je engga be a ju ngge be hwen efǝ mo je?” 50Kǝnggwa, akan a engga mo be etsonchi hon, è kpefwa ti ara tón chá budgo mo fí mo Chu mo ekǝ́n mo be. 51Tea, Yeso è jan, “Nye e bwe nye enò efwe ra.” Gè yi bu mbwe a tón mo fí hon nè matswa ye.
52Kǝnggwa Yeso è ká be Ekǝ́n echa hon ngge be chu mo ya e dgon Àtá mo Ehwya anga ngge be atkwen nobǝ ya e bwa evǝa be e fu ye ángá, eka jan, “M du be nobǝ tke etkekàn anga a me, a nye gwa a je ngge be hwen efǝ ngge be tuetsǝ́n evǝa nye e fu m ángá? 53Nogwa nogwa m̀ no anga ngge nye a chuukwa mo Àtá mo Ehwya, nyè fu m ra. Asuswana, a ekpengga mo nye ngge be ya e no a tswafǝ ángá.”
Bitru tson etson mo Yeso
(Matiyu 26:57-58,69-75; Marku 14:53-54,66-72; Yohana 18:12-18,25-27)
54Kǝnggwa bè fu Yeso nè ti ye ken a mbwe Chu mo ekǝ́n. Bitru è no chàkǝn chashin nè no ba be anga. 55Be ya è no a zǝn è tso ara fǝ̀ a tswa chuukwa mo mu hon nè no ge nó anga, bè chu ngàhwya gu fǝ̀ hon no, Bitru è bwa chu a engga mo be gaten. 56Nwen ndegwa fí akan è di Bitru chuno a engga mo be, nè nggwa ye fǝzǝn no a ju a tswa enggasansan mo fǝ, nè jan, “Ende ena è no ngge ge.”
57Tea Bitru è tson etson jan, “Ndegwa, m yi m ye ra.”
58Beti bishi nwofyan, ende akan è diyi ara Bitru, nè jan, “Eshwen, a bo o no akan a engga mo be.”
Tea Bitru è jan, “Ndedon, fwa ye a me ra.”
59Beti bishi etsǝ hon, abu awa akan è twafǝ̀ ara, ende akan è jan, “Ebi, nobǝ ena è no ngge ge, adia ga nobǝ ya a Galili.”
60Kǝnggwa Bitru è jan, “Ndedon, m yi m mò a o jan fwa anga a chu mo nó ra.” Gè chà pe ye vǝ ra, kǝndon è todwa.
61Etsodwe è twanga nè nggwa Bitru fǝzǝn a ju. Kǝnggwa Bitru è kaben ara fwa Etsodwe è jan ye ángá. Etsodwe hon è jan ara ye jan, “Kǝndon chà a to ye dwa etsǝ nòmo ra, wa tson etson mam kè ta, jan o yi m ra.” 62Gè vǝ́ a je nè kpedwa ngge engǝ a fǝzǝn àywá.
Be yakàn è fke Yeso nè bu ye mò
(Matiyu 26:67-68; Marku 14:65)
63Be ya è dgon Yeso anga è kwa ara ye efkem ngge ebum. 64Bè tè pe ye fǝzǝn, nè no bu ye mò anga, nè no ká ye eka anga jan, “We fi e tu je, ara bu o mò a ge?” 65Bè tsu wi ye tutu áywá.
Bè ti Yeso ken chafya mo be Atkwentì mo ya a Yahuda
(Matiyu 26:59-66; Marku 14:55-64; Yohana 18:19-24)
66Atan a zǝn è ngga ara ángá, be atkwen nobǝ, be Ekǝ́n echa ngge be etumo mo edon è bwa fǝn gu a tem̀. Bè ti Yeso bwa chafya mo be. 67Bè jan ye jan, “Jan je, a bo wa Kristi hon?”
Gè janfwe be jan, “Ano m jan nye, nya tsǝ́ nye ekǝ̀n a chu mo nó ra. 68Ano m ká nye eka akan, nye jan a fwe m ra. 69Ti asuswana ken chafya, a me Nwen Nobǝ, ma chu chá budgo mo Ehwya Emwenbin.”
70Enona, bè ká ye eka jan, “Kǝnggwa, a bo wa nwen mo Ehwya?”
Gè janfwe be, “Eshwen, a a me hon abu nye jan anga.”
71Kǝnggwa bè jan, “Fwa ejantum a je nda anga a zǝn ye efwe anga, ani? A je e chu je, je fo ara a vǝ mbwe.”
Currently Selected:
Luka 22: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
