Luka 6

Yeso no Etsodwe mo Nò nya Etkem

(Matiyu 12:1-8; Marku 2:23-28)

1Nò nya Etkem mo ya a Yahuda, Yeso è twafǝ̀ nyaken ngge be etsonchi mbwe a tswa wa alkama, be etsonchi mbwe hon è no bǝ chu mo alkama hon ti chin a bu mo be nè ti be fwen mo nó kǝ́n anga. 2Be ya Farisi ya è no a zǝn ángá è ká be eka jan, “Ano bwe a ge nye bwe mò nwone a edon cha ye je dwa je e bwe Nò nya Etkem ra anga?” 3Yeso è janfwe be jan, “Nye chà ká nye mò a Dawuda è bwe, atan a a ge ngge ya a bè no abibi è bwe, atan a mbe è fu be ángá ra? 4Gè kwashi a Àtá mo Ehwya nè ti borodi a bè tsǝ̀pe nyi ara, kpwà be ekǝ́n a de nó a be, nè ti de. Gè no èé be ya a bè no abibi ángá borodi hon.” 5Efwe ge twanga jan be jan, “A me Nwen Nobǝ, m no Etsodwe mo Nò nya Etkem.”

Yeso è matswa ya bu engǝfǝfǝ

(Matiyu 12:9-14; Marku 3:1-6)

6Nò nya Etkem efki, Yeso è kwashi a àtá chuefǝnm mo ya a Yahuda, nè no tú mò anga. Ende akan a budgo mbwe è ngǝfǝ ara, è no a zǝn. 7Be Farisi ngge be etumo mo edon ya ehwyà éè no a zǝn ángá, è nda anga be e fu Yeso ngge edan, nè no dise ye anga. Bè nda be e di ti ara, ano ge ma a tswa ya modwa hon Nò nya Etkem evǝa be e jan ge dan ara adia ge bwe mochi Nò nya Etkem ángá. 8Tea Yeso è yi ara mò a bè ka anga, gè jan ya bu engfǝfǝ hon jan, “Nyi etkyen bwa ywa ana.” Gè nyi etkyen nè ken ywa a zǝn. 9Yeso è jan be, “Me e ká nye eka, mò nwone edon chadwa be e bwe Nò nya Etkem ángá a ano, be e bwe mò esese nè, be e bwe mò esera, be e dgon nya nè, be e bwe e tkò nó?” 10Gè fǝ̀n shwa di gu re be, kǝnggwa, gè jan nobǝ hon jan, “Ywa bu mbo.” Ende hon è ywa bu mbwe, bu hon è twafwe bwa gu ngge echafǝju. 11Adi enò, be Farisi ngge be etumo mo edon, è fku ara tsuruku, bè kwa ara ejanm e sojube mò a ba bwe ngge Yeso ángá.

Yeso è swa be etsonchi gwi chu fà

(Matiyu 10:1-4; Marku 3:13-19)

12Adi be tsǝnò eni, Yeso è tonvǝ́ a hwì evǝa ge e bgó ebgo a zǝn Ehwya. Gè no ngga tén zǝn, nè no bgó ebgo anga a zǝn Ehwya. 13Anofon tàtà enó, gè fǝ́ fǝn gu be ya è ba ye anga dwa, nè swa vǝ́ ti ara gwi chu fà a engga mo be, nè tso be ti, “Be etsonchi.” 14Ena a be ti mo be, Sima nwene a Yeso è tso ye ti jan Bitru ángá, ngge nwenjin ye Andoro, Yakubo, Yohana, Filibu, Batolomi, 15Matiyu, Toma, Yakubo nwen Alfiyu, ngge Sima nwene a bè fǝ́ anga achifǝ eten ángá, 16Yahuda nwen Yakubo, ngge Yahuda Eskariyoti nwene è bwa tsǝdu ye ángá.

Be esese ngge be ebwe

(Matiyu 4:23-25)

17Atan a è Yeso shwa ara sen mo hwì ngge be ángá, gè ndnya ngge be a tswa etebwa sǝnsen akan. Be nobǝ embo è no a zǝn. Efwe, be nobǝ embo è vǝ bwa chá sǝnsen mo Yahudiya, eten a Urishelima ngge be efa mo ebgà a Taya ngge Sidon, 18Bè bwa evǝa be e fo moetum mbwe ngge ge e ma e tswa be modwa mo be. Gè matswa èé ngge be ya engǝ́ esera è tswa be ekan anga. 19Binbin be nobǝ hon è tkon etkon evǝa be e yi ye a ju, adia echakpo è gwa anga a je a ju ye nè no matswa gu be modwa mo be anga.

20Ekǝnggwa, Yeso è di be ya è ba ye anga, nè jan,

“Esese a ḿ mo nye,

a nye ya ekan,

adia zǝnotì mo Ehwya no ḿ mo nye.

21Esese a ḿ mo nye ya a mbe fu

nye anga asuswana

adia dgyèn mo nye a mbo.

Esese a ḿ mo nye ya

e kǝndwafǝ anga asuswana

adia nya a tson tsen.

22Esese a ḿ mo nye

atan a be nobǝ ze nye,

atan a be segwa nye,

n tsu nye,

n janpin nye,

adi fwa a nye cha ara

dwa ngge Nwen Nobǝ ángá.

23“Adi ekpengga eni nye e shánju. Nye e fǝ efǝ ngge vǝtsen adia mò a Ehwya nyi nye no a kpe ángá no àywá. Adia eni, abu be ebǝ ata mo be è bwe ngge be efojan mo Ehwya ekpe ekpe ángá.

24“Tea ebwe no a chu mo nye,

ya e no ngge mò asuswana

adia nye fo fwa ara etkwa mo nye.

25Ebwe no a chu mo nye,

ya e no ngge mode àywá asuswana,

adia mbe a fu nye.

Ebwe no a chu mo nye,

ya e tson tsen anga asuswana,

adia nya bgen nya,

nya kǝndwafǝ ngge engǝ a fǝzǝn.

26Ebwe no a chu mo nye,

ya nobǝ egwa egwa tàn nye anga

adia eni a abu be ate be è bwe ngge

be efojan ame ángá.

Dgyan ya eze mo nye

(Matiyu 5:38-48; 7:1)

27“Adi ḿ mo nye ya e fo m anga, me e jan nye, nye e dgyan be ya eze mo nye, bwe esese ngge be ya e ze nye anga. 28Bwe be ya e janbgen nye anga esese. Bgó Ehwya mò esese a chu mo ya e bwe nye mò esera anga. 29Ano ende akan bu o efya a hwi, twanga chá akan no ye efwe. Ano ende akan fkwacha ara mokàn efifi mbo, gwano ye mokàn nwofyan mo nó gaten. 30Egwa egwa e bgó o mò anga, no ye. Ano ende akan fkwacha ara m̀ mbo, we ká mbo eka mo nó efwe ra. 31Bwe mò ngge be nobǝ abu wa dgyan be e bwe ngge bo ángá.

32“Ano nye dgyan kpwà be ya e dgyan nye anga, mò esese a nya ben ángá a ano? Èé be ya ebgen dgyan be ya e dgyan be anga. 33Ano nye bwe kpwà mò esese ngge ya e bwe nye mò esese anga, mò esese a nya ben ángá a ano? Èé be ya ebgen bwe anga enò. 34Ano nya no be nobǝ kpo, nye e no e kpwà nye be ya a nye yi ara jan ba kpwa nye kpo hon ángá ra, mò esese a nya ben ángá a ano? Èé ya ebgen no kpo n ka anga jan be e kpwa e gu be nó. 35Nye e dgyan ya eze mo nye, nye e bwe be mò esese. Nye e no nye be kpo ngge shwa ekam jan be e kpwa nye kpo hon ra. Eno, nya tú jan nye no tén mbǝgya mo Ehwya e twafǝ̀ gu ángá. Kǝnggwa buhwen mo nye a kpe a no àywá. Adia ge bwe mò esese anga ngge ya e chwano be ye anga ra, tangge ya e bwe mofǝ̀ anga. 36Nye e di ashi mo be nobǝ abu ate nye no ende e di ashi anga.

Nye e kpèn nye nobǝ kǝ́n ra

(Matiyu 7:1-5)

37“Nye e kpèn nye be nobǝ kǝ́n ra, abu Ehwya a kpèn ye nye kǝ́n ra. Nye e kpèn nye be nobǝ kǝ́nfǝ ra, abu Ehwya a kpèn ye nye kǝ́nfǝ ra. Nye gwano be nobǝ ebgen abu Ehwya gwa a no nye ebgen mo nye. 38Nye e no be nobǝ mò, Ehwya a no nye. Mò nwone Ehwya a no nye ángá a mbo àywá, ba se nó, ba chin nó, ge no a nggwa anga, o no jwa a cha ye anga. Yishwa mombwamo a nye ti mbwà nobǝ anga, a gè hon nwone a Ehwya ti a mbwà nye.”

39Yeso è tso be hufwa ena jan, “Ende a fǝzǝn bwi ara ye vǝ a yi ya fǝzǝn ebwibwi efki etsǝ́n mbwe? A be fà hon ba kpo a shi be a ahwya ra? 40Ende e kǝ́n moetum anga twafǝ̀ ye etumo mbwe anga ra. Ano be ma tú yi ara ye, ga no abu etumo mbwe.

41“Ano bwe a ge o diben abubwi e no a fǝzǝn mo nwenjin o, tea o diben mbo ekǝntumo e no a fǝzǝn mbo ángá ra? 42Bwe engǝ wa jan nwenjin o, ‘Nwenjwa, me e ti e vǝ́ o abubwi e no a fǝzǝn mbo.’ Kǝnggwa a bo e chu o, o di mbo ekǝntumo e no a fǝzǝn mbo ángá ra? Gbegbe! A bo ya ayibangǝ̀, kwafya tivǝ́ ekǝntumo e no a fǝzǝn mbo ángá sangǝ́ o chà diben a se zǝn, o ti ti a vǝ́ abubwi e no a fǝzǝn mo nwenjin o ángá.

Be diyi tumo anga adi ga mbwe

(Matiyu 7:16-20; 12:3-35)

43“Tumo esese e gwa ga esera anga fwa ye ra, èé no tumo esera gwa ye ga esese anga ra. 44No enona, be diyi tumo anga adi ga mbwe. Nobǝ bga be ga mo tu ngǝtsǝn anga a ju tu evi ra, ga mo tu enabi be bga be nó anga a ju tu san-ekǝn ra. 45Nobǝ esese ti mò esese gwa anga a je adi be mò esese e no a tsuruku mbwe ángá, nobǝ esera hon ti mò esera gwa anga a je adi be mò esera e no a tsuruku mbwe ángá. Mò e gwa anga a je a kpevǝ ángá, a mò e mbo no tsuruku ángá.

Be nobǝ fà ya éè mbwe be àtá ángá

(Matiyu 7:24-27)

46“Ano bwe a ge nye fǝ́ m, ‘Etsodwe, Etsodwe,’ tea nye bwe nye mò a m jan nye anga ra? 47Me e tú nye abu nobǝ hon no ángá. Ende nwene e bwa a zǝn m, n fo fwa m anga, n bwe mochi ngge be, 48ge no abu ende è mbwe àtá, gè gu vǝn shi a sǝnsen nè tke fù mo àtá embwem hon a chu ten. Atan a chu è bwa fí ara, mbǝ è mbo embobin ngge echakpo, bwa bu a ju àtá hon, nè chì ti ye nó ju ra, adia bè mbwe yi ara nó. 49Tea ende e fo fwa mam n bwe ye mochi ngge nó ra, no abu ende è mbwe àtá a chu akwabǝ. Atan a chu è bwa fí ara, mbǝ è mbo embobin ngge echakpo, bwa bu a ju ata hon, nè kǝnbwí gu nó, ebwim mo àtá hon è bgen twafǝ̀ chu.”

Currently Selected:

Luka 6: ICH

Highlight

Copy