Matiyu 27

Yahuda è du chu ye dgó

(Marku 15:1; Luka 23:1-2; Yohana 18:28-32)

1Zǝngga re anofon tàtà, binbin mo be Ekǝ́n echa ngge be atkwen nobǝ (Be Atkwentì mo be ya a Yahuda) è pa pyoro abu ba du be e gu Yeso. 2Bè tè ye, nè ti ye vǝ́ a je, ken du Gomna Bilatu a bu.

3Atan a Yahuda nwene è tsǝ du ye, è di jan be kpèn ara Yeso kǝ́nfǝ, jan ba gu ye ángá, ayinó è fu ye, gè ti fwentse azufa gwi ta (30) hon twabǝ bwa no be Ekǝ́n echa ngge be atkwen nobǝ hon. 4Gè jan, “M bwe ara ebgen adia m̀ tsǝ du ara nobǝ e bwe ye edan ra ángá.”

Bè janfwe ye jan, “Eni fwa ye fwa mo je ra. A fwa mbo.”

5Enona, Yahuda è kpu fwentse hon nggwa be a zǝn a tswa Àtá mo Ehwya hon nè nya m̀ mbwe, ken du chu ye dgó.

6Be Ekǝ́n echa hon è tefǝn tse hon, nè jan, “Ge tse-etsem adi edon je e kpu tse ena e nggwa a tswa ebentse. Adia a tse a bè ti kpwa no ende éè chadwa nè tsǝdu nobǝ akan be e gu ye ángá.” 7Enona, bè pa pyoro nè ti tse hon jwa etebwa sǝnsen mo ya hwa embwem, evǝa ge e no afkudì mo be ya echan. 8Eni a mò e bwe ti bwangga nòmo, be fǝ́ zǝn hon anga Etebwa sǝnsen mo Ngǝ ángá. 9Mò hon ena è bwe ángá, è tú ebwedefǝm mo fwa a Eremiya, efojan mo Ehwya è jan ekpe ekpe jan, “Bè ti fwentse azufa gwi ta, a be ya a Esǝrela è cha ara dwa be e kpwa a chu ye, 10n ti jwa etebwa sǝnsen mo ya hwa embwem, abu Ehwya Etsodwe è jan m ángá.”

Yeso a chafya mo Gomna Bilatu

(Marku 15:2-5; Luka 23:3-5; Yohana 18:33-38)

11Atan a bè ti Yeso bwa ara chafya mo Gomna Bilatu ángá, gomna hon è ká ye eka jan, “A bo wa tì mo be ya a Yahuda hon?”

Yeso è janfwe ye, “Ee, ge no abu o jan ángá.”

12Atan a be Ekǝ́n echa ngge be atkwen nobǝ è tso ye efya ángá, gè janfwe ye be fwa akan ra. 13Kǝnggwa Bilatu è ká ye eka jan, “O fo mbo be mò a be tso o efya anga a chu mo be ángá ra?” 14Tea ge jan didi ye fwa èé a chu akan mo be efya a be tso ye anga ra. Mò hon ena è zǝ̀ gomna ju àywá.

15Abu gè bwe bwi anga, adi ekpengga mo Esǝ mo Epenyim, gomna fki a gwa ende akan a be nobǝ è dgyan anga a tswa àtá ehwyatu a no be. 16Atan enò, ya mofǝ̀ akan a bè yi ye àywá, è no a àtá ehwyatu, bè fǝ́ ye anga Baraba. 17Enona, atan a be nobǝ è fǝn ara ángá, Bilatu è ká be eka jan, “A ara a nye dgyan anga me e fkigwa e no nye, Baraba nè, eno e ra Yeso a bè fǝ́ anga Kristi?” 18Bilatu è yi jan a eze a chu Yeso bwe a ge, bè fu Yeso ti bwa a zǝn ye.

19A Bilatu è chuno a chu bo mo kǝ́n ekpènm mbwe hon ángá, gwa ye è tson chí ena jan, “We bwe mbo nobǝ eni, e chà bwe ye edan akan ra mò akan ra, adia m ngǝ ekan a chu ye àywá etsǝ nòmo adi dá.”

20Tea be Ekǝ́n echa ngge be atkwen nobǝ è tú be nobǝ etsǝn jan be e jan be nda anga be e fkigwa e no be Baraba, ngge be e ken e fu Yeso a chu eswafǝ.

21Gomna Bilatu è ká nobǝ embo hon eka jan, “A engga mo be nobǝ fà hon, nwene a nye dgyan me e fkigwa e no nye ángá a ara?”

Bè janfwe ye, “Baraba.”

22Bilatu è ká be eka jan, “Kǝnggwa mò a ma bwe ngge Yeso a bè fǝ́ anga Kristi ángá, a no?”

Binbin mo be è janfwe ye jan, “Kenfu ye a chu eswafǝ.”

23Bilatu è ká be eka jan, “Adi ano? Edan a ge bwe ángá a ano?”

Tea be tangǝ́shi dwa jan, “Kenfu ye a chu eswafǝ.”

24Atan a Bilatu è di jan ge jan a ngga a ti ye be nobǝ hon ra ángá, ngge dwa etànm mo be è no tubi anga, gè ti mbǝ nè na be bu mbwe chafya mo be nobǝ embo hon. Gè jan, “Fu èé bu mam dwa a je a chu ngǝ mo ende ena. A fwa mo nye.”

25Be nobǝ hon binbin è jan, “Gwa ngǝ mbwe e no a chu je ngge mbǝgya mo je.”

26Kǝnggwa gè fkigwa Baraba no be. Tea gè du, bè bu Yeso akpan sangǝ́, gè chà ti ye no be evǝa be e ken, e ken e fu ye a chu eswafǝ.

Be yakàn fke Yeso

(Marku 15:16-20; Yohana 19:2-3)

27Kǝnggwa be yakàn mo gomna è ti Yeso kwashi a tswa tem̀ mo gomna, nè fǝ́ fǝn gu be yakàn ngàhwya ye. 28Bè kpenvǝ́ ye mokàn mbwe a ju, nè ti mokàntì ebenben ti nggwa ye a ju, 29Bè fya mitere mo evi nè ti kpén ye a chu. Bè ti etsǝ́ntì ti du ye chá budgo, nè nggwa ekpanvǝ mo be chafya mbwe nè fke ye jan, “We fo etkwa, a bo tì mo ya a Yahuda.” 30Bè tsǝ́ ye afǝtkwa a ju nè cha etsǝ́ntì hon ti no bu ye anga a chu. 31Atan a bè fke fwa ara ye mo ekpengga àywá ángá, bè kpenvǝ́ ye mokàntì hon, nè nggwa ye mokàn mbwe a ju. Kǝnggwa bè ti ye ken adi zǝn a bè ken a fu ye a chu eswafǝ ángá.

Bè kenfu Yeso a chu eswafǝ

(Marku 15:21-32; Luka 23:26-43; Yohana 19:17-27)

32Abu bè vǝ́ a je nè nyaken a zǝn hon ángá, bè ben nobǝ akan ya a Sirini, a bè fǝ́ anga Sima, nè fa ye gè tso eswafǝ hon. 33Bè bwangga adi zǝn a be fǝ́ anga Golgota (engà mo nó, a zǝn mo Fǝchu). 34Bè no Yeso mbǝ mo enabi, a bè ti nòtan no ngge mò ejojo, ge e ngǝ. Tea atan a gè mbwadi ara nó ángá, gè se ge e ngǝ nó. 35Atan a bè kenfu fwa ara ye ángá, bè ti mokàn mbwe tankwa sojube adi etwadem. 36Kǝnggwa bè chu a sen nè no dgon ye anga. 37Cha a jwa mo chu mbwe, bè bá mò a bè jan na edan mbwe ángá no adi afkaba, ti ban no a chu eswafǝ hon jan: ena a yeso, tì mo ya a yahuda hon.

38Bè kenfu be ya moebufkwam fà ngge ge, akan chá budgo mbwe, akan chá buhwyá mbwe. 39Be ya è bwa twafǝ̀ ken anga, è no jan fwa esera anga a chu ye nè no tson ye tsen anga tangge chu mo be emim, tú anga jan be cha be dwa ngge ge ra. 40Be jan, “A bo, ende e kǝnbwi a ti Àtá mo Ehwya, n twabǝ a mbwe nó adi tsǝ ta ángá, tivǝ́ chu o. Shwa a sen a chu eswafǝ hon, ano o no Nwen mo Ehwya hon.”

41Ba anona, be Ekǝ́n echa tangge be etumo mo edon ngge be atkwen nobǝ e no fke ye anga, jan, 42“Gè tivǝ́ be nobǝ ya ehwyà, tea ge tivǝ́ ti ye chu ye ra. Ge fwa ye Tì mo be ya a Esǝrela hon ra? Ge e shwa a sen mo eswafǝ hon, evǝa je e tsǝ́ekǝ̀n a chu ye. 43Gè nyishwa mbwe no a chu Ehwya. Ano Ehwya dgyan ye anga, ge e bwa e ti e vǝ́ ye adia gè jan, ‘A me ma Nwen mo Ehwya hon.’ ” 44Ba anona, be ya moebufkwam hon, a bè kenfu be no abibi ángá è nggwa ye tutu àywá a ju gaten.

Abu Yeso è fǝ́ ángá

(Marku 15:33-41; Luka 23:44-49; Yohana 19:28-30)

45Kǝnggwa, tke atan a nò è sen ara kpe, ti ken tse ta a nò è hwya ara ángá, etwafǝfǝ è bwipe gu sǝnsen hon. 46A tse ta è bwe ara ángá, Yeso è tandwa echakpokpo jan, “Eloyi, Eloyi, Lama sabatani?” Engà mo nó jan, “Ehwya mam, Ehwya mam, ano bwe a ge o twagwa m?”

47Atan a be ya ehwyà ya è ywano a zǝn fo enò ángá, bè jan, “Ge fǝ Eliya dwa anga.”

48Kè akan, ende akan mo be è tse ken ti soso ti shì adi mbǝ enabi ebonbon, nè ti kpén adi tuetsǝ́n ebgonbgon nè ti no Yeso ge e ngǝ. 49Be ya è dan ángá è jan, “Gwa ye, je e di ano Eliya bwa ti a vǝ́ ye.”

50Kǝnggwa Yeso è tangǝ́shi dwa efwe, gè kposhi tsǝ̀n, nè twagwa nya mbwe.

51Atan enò, ejenpe éè no a tafǝmo mo àtá Echanwenwen, a tswa Àtá mo Ehwya ángá, è nggakwa fà chá a jwa shwa chá a se. Sǝnsen è chìju ngge be ten è tankwa. 52Be dì è fkigwa. Be nobǝ echanwenwen mo Ehwya embo, ya è fǝ ara ekpe ekpe ángá, è twanga zǝbwa angǝ. 53Bè gwa a je mo be dì hon, kǝnggwa chashin a Yeso è zǝbwa angǝ ángá, bè kwashi a tswa Urishelima eten efifi echanwenwen nè mbwibwa a zǝn be nobǝ embo.

54Atan chu mo be yakàn ngge be yakàn efki ya éè no dgon Yeso anga, è di sǝnsen è chìju ngge binbin mo be mò è bwe ángá, bè tsen etsentsen àywá. Bè jan, “Eshwen, nobǝ ena è no Nwen mo Ehwya.”

55Be ndegwa embo ya è vǝ ngge Yeso a Galili bwa evǝa be e bwe ye mochi ángá, è no zǝn. Bè ywano nè no di zǝn bwa anga adgya. 56A engga mo be, a Meri ya a Magadala, Meri ayi Yakubo ngge Yose (a bè fǝ ye anga Esufu gaten ángá), ngge ayi mo mbǝgya ndedon mo Zabadi.

Abu bè di Yeso ángá

(Marku 15:42-47; Luka 23:50-56; Yohana 19:38-42)

57Abu nò è tén ara a ga kpo ángá, ya mobenben akan, Esufu ya Arimatiya, nwene è nga ara ende è ba Yeso ángá, è bwa a zǝn. 58Gè ken a zǝn Bilatu nè bgó jan be e no ye kǝn mo Yeso. Bilatu è du jan be e ti e no ye. 59Esufu è ti kǝn hon nè binpe nó ngge adanmo enachacha, etenten, 60nè ti nó ti twà a tswa dì a gè gu ara mo chu ye, a ju ten ángá. Gè dgyén ten ekeke bwa twape kpevǝ mo dì hon, nè nya m̀ mbwe. 61Meri ya a Magadala ngge Meri efki è chuno, ngge chafya mo be è jwa ken no chá dì hon.

Be edgonzǝn a tón dì

62Nò nya Etkem hon, be Ekǝ́n echa ngge be Farisi è ken a zǝn Bilatu. 63Bè jan, “Yagwamo mu, je kaben jan atan a gè chà no angǝ ángá, ya dgyén e nokǝ̀n, è jan, ‘Tsǝnò ta chashin mo fǝ mam, ma zǝ a bwa angǝ efwe.’ 64No enona, du be edgonzǝn be e dgon e seshi dì hon ti e ken e ngga tsǝnò adi e ta hon. Efki ra, be ye è ba ye anga bwa a zǝ́ kǝn mbwe, na jan be nobǝ jan, ‘Ge zǝbwa ara a dì angǝ.’ Enggadem ekǝn-etkyen ena a bgen twa a fǝ̀ nwone è no ekwafya ángá.”

65Bilatu è jan be jan, “Nye kpu be edgonzǝn be e ken e dgon e seshi dì hon, abu nye bwe a ti ángá.” 66Enona, bè ti echitentì ti fyantan tón mo dì hon ngge ten a bè dgyen bwa twape kpevǝ mo nó no ángá. Bè bwe enò evǝa ge e tú jan Bilatu e twa ara edon jan ende akan e fki ye dì hon ra. Bè ti be yakàn nyi a zǝn evǝa be e dgon dì hon.

Currently Selected:

Matiyu 27: ICH

Highlight

Copy