Matiyu 5

Yeso è tú be nobǝ mò a chu hwì

1Nò kè akan, abu gè di be nobǝ embo è fǝn ngàhwya ye no ángá, gè tonvǝ́ a buetkwa mo hwì akan. Atan a gè chu a ara sen ángá, be etsonchi mbwe è bwa a zǝn ye. 2Ekǝnggwa Yeso è fki kpevǝ mbwe nè kwa ara be moetum jan,

3“Esese a ḿ mo be ya e yi jan,

adi eyim mo be

mò e no ḿ mo

Engǝ́ mo Ehwya ángá,

be cha be kpo ra,

adia zǝnotì a kpe no ḿ mo be

yishwa mo be nobǝ ena.

4Esese a ḿ mo be ya e kǝndwafǝ anga,

adia Ehwya bwe

a bon be ekǝ̀n.

5Esese a ḿ mo be ya e ngǝchu

mo be anga a sen,

adia Ehwya a no be mò a gè senvǝ ángá.

6Esese a ḿ mo be ya e no ngge

edgyan a tswa binbin mo tsuruku mo be,

jan be e bwe mò a Ehwya dgyan anga,

Ehwya a no be echakpo mo ebwetim mo nó.

7Esese a ḿ mo be ya e dwafǝ

be nobǝ efki anga,

Ehwya a dwafǝ be.

8Esese a ḿ mo be ya e ba Ehwya

anga ngge tsuruku enachacha,

adia ba di Ehwya.

9Esese a ḿ mo be ya e vǝ zǝno a

tswa adgye bwa anga a engga

mo be nobǝ efki,

adia ba fǝ́ be,

mbǝgya mo Ehwya.

10Esese a ḿ mo be ya be tswa be fí anga,

adia be bwe mò a Ehwya dgyan anga,

zǝnotì mo Ehwya hon no ḿ mo

be nobǝ yishwa mo be.

11“Esese a ḿ mo nye,

ano be nobǝ tsú nye,

n tswa nye fí,

n fefwa nggwa nye a chu, a chu m.

12“Nye e shánju ngge vǝtsen, adia Ehwya nyi nye buhwen echa no a kpe. Nye e ka e ben jan, eni abu bè bwe ngge be efojan, ya è kwafya mo nye ángá.

Nga ngge enggasansan mo zǝnchaje

(Marku 9:50; Luka 14:34-35)

13“A nye, nya nga mo zǝnchaje, tea ano nga ben ye enyonyo mbwe efwe ra, be bwe a nyòn nó engǝ? Ga se ye be e bwe mò akan ngge nó efwe ra, kpwà ba ti nó a nggwa a fwa, be nobǝ ti a cha kpwafu mo be a chu mo nó.

14“A nye nya enggasansan mo zǝnchaje. Eten efifi a be mbwe no a chu mo hwì, be ngǝ̀ton a ti be nó ra. 15Nobǝ a ton ye petila na ti hwa ekeke bwi a pe nó ra, tea ba ti nó a tu adi echizǝno mo nó, evǝa ga du egwa egwa e no a tswa àtá hon ángá, a di zǝn no enggasansan. 16Ba anona, nye e gwa be nobǝ binbin be e di enggasansan e no a ju nye ángá, evǝa be e di be mochi esese a nye bwe anga. Kǝnggwa, be e no Ate nye Ehwya e no a kpe ángá edgwa.

Mò a Yeso è tú mò a chu edon mo Mosa ángá

17“Nye e ka nye jan m̀ bwa evǝa me e bwe e tkò edon, eno e ra be mò ebam mo be efojan ra. É yé, m̀ bwa evǝa me e bwe e kǝ̀n fwa a be fà hon, è jan ángá. 18M jan nye ebi anga, kenm binbin mo be mò a Mosa è jan na bwe ángá, bwa twa a fǝ̀ sangǝ́, kpe ngge zǝnchaje chà bwa a kǝn-etkyen. 19Enona, ano ende akan digǝ̀n ye akan mo be edon e no ti ara nwofyan na ra, n tú be nobǝ efki be e bwe enò gaten, ba fǝ́ ye ende e no ti ara nwofyan engga be nobǝ a tswa zǝnotì e no a kpe ángá. Tea ende e bwe mochi ngge nó, n tú nó anga, ba fǝ́ ye ende e no nobǝ echa a tswa zǝnotì hon e no a kpe ángá. 20M jan nye anga, kpwà tén ano ebitete mo nye twafǝ̀ ara m̀ mo be Farisi ngge be etumo mo edon sangǝ́, nye chà kwashi a ti a tswa zǝnotì a kpe.

Mò a Yeso è tú a chu engo evǝ́m ángá

(Luka 12:57-59)

21“Nyè fo bè jan ara be ebǝ ata mo je ekpe ekpe jan, ‘Wa gu mbo nobǝ ra, ngge egwa egwa e gu nobǝ, ba kpèn ye kǝ́n.’ 22Tea asuswana, m jan nye anga, egwa egwa e vǝ́ engo ngge nwenjin ye, ba kpèn ye kǝ́n, egwa egwa e fǝ́ nwenjin ye ‘Nobǝ kukwa,’ ba ti ye a ken chafya mo be ya a kpèn ye kǝ́n ángá. Ende e jan nwenjin ye jan, ‘A bo hwen,’ ba ti ye a twa a tswa fǝ̀ a sen-ehwa.

23“Enona, ano o nda anga wa no Ehwya mò etinom a zǝn ten-ebgó, kǝnggwa atan enò, o kaben jan nwenjin o vǝ́ engo anga ngge bo, 24nyigwa mò etinom mbo hon a zǝn, chafya mo ten-ebgó hon. Kwafya ken kpentswa fwa mbo ngge nwenjin o hon, sangǝ́ we chà bwa e no Ehwya mò etinom mbo.

25“Kpèntswa myashi ebwedwavǝ mbo ngge ya eze mbo atan a nye no efǝ nyaken a àtá kǝ́n ekpènm ángá, efki ra, ya eze mbo a ti o a du a bu mo ekpenkǝ́n. Ekpenkǝ́n hon a ti o a du a bu mo edgonzǝn nwene a ti o a twa a shi a tswa àtá ehwyatu ángá. 26Ebi m jan nye anga, ba gwa a didi mbo ra, kpwà a tén ano o kpwa gu ara tse a be jan wa kpwa ángá sangǝ́, be chà twa a gwa o.

Yeso è tú mo a chu sen-eten

27“Nyè fo bè jan ara jan, ‘Ge no kenm, nye e bwe nye sen-eten ra.’ 28Tea m jan nye, egwa egwa e di ndegwa fǝzǝn edgyan mo edwa-ngo, bwe fwa ara sen-eten ngge ndegwa hon a tsuruku mbwe. 29Ano fǝzǝn chá budgo mbo du o bwe ebgen, chawya ti ara ye ti twafwa. Adia ge setkyan a ge, we ben mbo buetkwa mo ju o chá akan ra, chàshín a be e kan o ebin ti e twa e shi a tswa fǝ̀ a sen-ehwa. 30Ano kpwabu chá budgo mbo du o bwe ebgen, kpecho ye ti twafwa. Adia ge setkyan a ge, we ben mbo buetkwa mo ju o chá akan ra, chàshín a be e kan o ebin ti e twa e shi a tswa fǝ̀ a sen-ehwa.

Moetum a chu ben egum

(Matiyu 19:9; Marku 10:11-12; Luka 16:18)

31“Efwe nyè fo bè jan ara jan, ‘Egwa egwa e gu ben mbwe ngge gwa ye, ge no kenm, ge e bá afketa mo ben egum e no nó.’ 32Tea m jan nye anga jan, egwa egwa e gu ben mbwe ngge gwa ye, e ma no ye a chu sen-eten ebwem tete ra, du ara nó a tswa sen-eten ebwem. Ende e fǝ́ ndegwa a bè gu ara ye ben ángá, bwe anga sen-eten.

Mò a Yeso è tú a chu efan efanm ángá

33“Efwe, nyè fo ara mò a bè jan be ebǝ ata mo je ekpe ekpe è jan, ‘We gwa mbo ebwem mo mò a o fan ara efan jan wa bwe ángá ra, tea ge no kenm, wa bwe a kǝ̀n mò a ò fan efan a zǝn Ehwya jan wa bwe ángá.’ 34Tea m jan nye, nye e fan e didi nye efan ra: Nye e fan nye efan ngge kpe ra, adia kpe a botì mo Ehwya. 35Nye e fan nye efan ngge zǝnchaje ena ra, adia zǝnchaje hon no zǝn fù echam mo Ehwya, efki ra, efan ngge Urishelima, adia ge no eten efifi mo Ehwya, Tì Echa. 36We fan mbo efan ngge, chu mbo ra, adia o bwe a ti mbo èé akan mo zan-a-chu mbo ra, etenten efki ra, ebǝbǝ. 37Nye e gwa ‘Ee’ mo nye ge e no ‘Ee’, ngge ‘É yé’ mo nye ge e no ‘É yé’. Egwa egwa mo mò e twafǝ̀ ena, vǝ a zǝn Shetan n chà bwa anga.

Mò a Yeso è tú a chu mò ebwekpwam ángá

(Luka 6:29-30)

38“Nyè fo ara mò a Ehwya è jan be nobǝ ekpe ekpe ángá. Gè jan, ‘Egwa egwa e chawya fǝzǝn mo nobǝ efki, ba cha a wya fǝzǝn mbwe gaten. Egwa egwa e bubga san mo nobǝ efki, be bu a bga san mbwe a kpwakpo.’ 39Tea m jan nye anga, nye e kpwa nye kpo mo mò ebgen akan ngge mò ebgen ra. Ano ende akan bu o efya a hwi chá budgo, twanga no ye chá buhwyá gaten. 40Efwe ano ende akan nda anga ge e dwakǝ́n mbo evǝa ge e ti mokàn ebaba mbo chá tswa, gwano ye mokàn echuvǝ mbo gaten. 41Ano ende akan fa o, we kenkèn ngge ge lamba akan, kenkèn hon ngge ge mo lamba fà. 42Ende e bgó o mò, we no ye. We jan e ngga mbo ende e nda kpo anga a zǝn o ra.

Yeso tú je abu ja dgyan be ya eze mo je ángá

(Luka 6:27-28,32-36)

43“Nyè fo bè jan ara be nobǝ ekpe ekpe jan, ‘Nye e dgyan be needwe mo nye, nye e ze be ya eze mo nye anga.’ 44Tea m jan nye anga, nye e dgyan be ya eze mo nye, nye e bgó ebgo a chu ya e tswa nye fí anga. 45Adi ebwem enò, nya no mbǝgya mo Ate nye e no a kpe ángá. Ge du nò nggazǝ anga a chu be ya mofǝ̀ ngge be ya mò esese. Ge du chù bwa a zǝn be ya e bwe mò a ge dgyan anga ngge a zǝn be ya e bwe be nó anga ra gaten. 46Adia ano nye dgyan kpwà be ya e dgyan nye anga, buhwen hon a nya ben a chu mo nó a zǝn Ehwya ángá, no a che? Be ya tse-eten echam bwe be enò anga gaten ra? 47Ano nye bi kpwà be nwenjwa nye fwa, mò e twafwe nye ngge be ya e dan ángá a ano? Èé be ya sen ekpwam, bwe be enò anga gaten ra? 48No enona, ge no kenm nye e no be nobǝ ya e bwe be mò edefǝfǝ ngge mò esese abu Ate nye e no a kpe, bwe mò e no edefǝfǝ ngge esese anga.

Currently Selected:

Matiyu 5: ICH

Highlight

Copy