Marku 15

Bè ti Yeso ken chafya mo Gomna Bilatu

(Matiyu 27:1-2,11-14; Luka 23:1-5; Yohana 18:28-38)

1Anofon tàtà enó, be Ekǝ́n echa hon, be atkwen nobǝ, be etumo mo edon (Be Atkwentì) hon è pafu mò a ba bwe ngge Yeso ángá. Kǝnggwa bè tè Yeso nè du ye ken a zǝn Bilatu, gomna mo ya a Roma.

2Bilatu è ká ye eka jan, “A bo wa tì mo ya a Yahuda hon?”

Yeso è janfwe ye jan, “Ge no abu o jan ángá.”

3Be Ekǝ́n echa è fefwa àywá nggwa ye chu. 4Enona, Bilatu è ká ye eka efwe jan, “O jan a fwe mbo fwa ra? Di be fwa embo a be jan anga a chu o na.”

5Tea Yeso è jan ye fwa ra, enona mò hon è kǝn Bilatu nya.

Bilatu è sen Yeso kǝ́nfǝ

(Matiyu 27:15-26; Luka 23:13-25; Yohana 18:39—19:16)

6Adi ekpengga mo Esǝ mo Epenyim ena, gè no moefì mo be, a gomna fki a gwa ende akan, a àtá ehwyatu, a be nobǝ dgyan anga, a no be. 7Nobǝ akan bè fǝ́ ye anga Baraba, gè no ekenpem ngge be ya chu echam ya éè tke etkekàn twa a sǝnsen, nè gu nobǝ ángá. 8Be nobǝ embo è bwa a zǝn Bilatu nè jan ye jan, ne bwe be mò abu gè bwe bwi anga.

9Bilatu è ká be eka jan, “Nye dgyan anga me e fkigwa e no nye Tì mo ya a Yahuda?” 10Bilatu è bwe enò adia gè yi jan, a adi engǝbgen a chu Yeso a be Ekǝ́n echa è du bè ti Yeso bwa a zǝn ye ángá. 11Be Ekǝ́n echa è tú be nobǝ embo etsǝn jan be e jan Bilatu ne fki e gwa Baraba e no be fwa ye Yeso ra.

12Bilatu è ká be eka jan, “Mò a ma bwe ekǝnggwa ngge ende a nye fǝ́ anga Tì mo ya a Yahuda ángá a ano?”

13Be tandwa jan, “Ken fu ye.”

14Bilatu ká be eka jan, “Adi ano? Mò ebgen a ge bwe ángá, a ano?”

Tea bè tàngǝ́shi dwa jan, “Ken fu ye.”

15Tea adia ge dgyan anga ge e bwe etswa be nobǝ embo hon tsuruku ángá, Bilatu è fkigwa Baraba no be. Gè du be ya mochi mbwe bu Yeso akpan nè jan be yakàn mo ya a Roma be e vǝ́ e ken e fu ye a chu eswafǝ.

Be yakàn hon è jan Yeso akenchi

(Matiyu 27:27-31; Yohana 19:2-3)

16Be yakàn hon è ti Yeso ken a tem̀ mo gomna (tú anga, Firetoriyo) nè fǝ́ fǝn gu be yakàn ya è dan ángá, dwa. 17Be nggwa ye mokàn ejubebe mo Tì a ju, nè fya evi abu mitere ti kpén ye a chu. 18Bè kwa ara ye akenchi ejanm jan, “Nya mbo ge e dgyenfon, a bo Tì mo be ya a Yahuda hon.” 19Kè fà kè ta, bè no bu ye etsǝ́n anga a chu nè tsǝ́ ye afǝtkwa. Bè hò shi a sen a chu ekpanvǝ mo be a chafya mbwe, nè no jan ye akenchi anga jan be no ye anga edgwa abu tì. 20Atan a bè jan fwa ara ye akenchi ángá, bè kpenvǝ́ mokàntì ejubebe hon nè nggwa ye mokàn mbwe. Kǝnggwa bè du ye vǝ́ a je, evǝa be e ken e fu ye.

Bè kenfu Yeso a chu eswafǝ

(Matiyu 27:32-44; Luka 23:26-43; Yohana 19:17-27)

21Abu bè ti Yeso nyaken ángá, ya a Sirini akan, Sima, ate mo Alezanda ngge Rufu è vǝ a eten nwofyan nè nyaken a tswa eten efifi. Gè bwa kpwà ngge be yakàn hon, bè fa ye, ge è tso eswafǝ hon. 22Bè ti Yeso bwa a zǝn a bè fǝ́ anga Golgota (tú anga, zǝn mo fǝchu). 23Kǝnggwa, bè no ye mbǝ enabi embonbon a be nòtan no ngge muru, tea gè ngǝ ye nó ra. 24Bè kenfu ye a chu eswafǝ. Be bu enywen a chu mokàn mbwe, be e di ti ara mò a egwa egwa a ben ángá.

25Èkakenò è no adi awa e chwen a ndwe anofon, atan a bè kenfu ye ángá. 26A chu mo eswafǝ hon, chá chu mbwe, bè bá efya a bè tso ye ángá jan, tì mo be ya a yahuda hon. 27Bè kenfu be ya moebufkwam fà a chu be eswafǝ mo be a zǝn gaten. Akan chá budgo, akan chá buhwyá mbwe. [ 28Mò ena è bwe abu efojan mo Ehwya ekpe ekpe è jan, “Bè kenfu ye a engga mo be ya moebufkwam.”] 29Be ya è bwa twafǝ̀ ken anga, è tsu ye tutu àywá, nè mi chu mo be nè jan, “Oowá! A bo ende e jan o kǝn a bwi Àtá mo Ehwya, o twanga a mbwe ye adi tsǝ ta. 30Tivǝ́ chu o, we shwa a sen a chu eswafǝ hon.” 31Be Ekǝ́n echa ngge be etumo mo edon èé be, è jan ye akenchi e sojube jan, “Ge tivǝ́ ya ehwyà, tea ge tivǝ́ a ti ye chu ye ra. 32Kristi hon ena, Tì mo be Esǝrela hon ena, ge e shwa a sen a chu eswafǝ evǝa je e di je e tsǝ́ekǝ̀n.” Be ya moebufkwam a bè kenfu be no abibi ángá è tsu ye tutu àywá gaten.

Abu Yeso è fǝ ángá

(Matiyu 27:45-56; Luka 23:44-49; Yohana 19:28-30)

33Atan a nò è sen ara kpe ángá, etwafǝfǝ è bwipe gu sǝnsen kengga tse ta, a nò è whya ara ángá. 34Adi tse ta, a nò è hwya ara ángá, Yeso è tandwa echakpokpo jan, “Eloyi, Eloyi Lama Sabatani?” Engà mo nó jan, “Ehwya mam, Ehwya mam, ano bwe a ge, o twagwa m?” 35Atan a be ya è ywano a zǝn, è fo fwa a gè jan anga ángá, bè jan, “Nye buton, ge fǝ́ efojan Eliya dwa anga.”

36Ende akan mo be è tse ken ti soso nè ti shì adi mbǝ enabi ebonbon nè ti fa adi tuetsǝ́n ebgonbgon nè ti ywa vǝ́ Yeso evǝa ge e ngǝ. Ende akan è jan, “Nye gwa ye, je e di ano efojan Eliya bwa a ti ye a shwa a sen.”

37Kǝnggwa, ngge dwa etànm echakpokpo, Yeso kposhi tsǝ̀n evǝnvǝn, nè fǝ ara.

38Ejenpe è no a tswa Àtá mo Ehwya ángá è nggakwa fà, ti chá a jwa shwa chà a se. 39Atan a chu mo yakàn éè ywano di Yeso anga a chu eswafǝ, è fo dwa etànm mbwe ngge abu gè fǝ ángá, gè jan, “Eshwen, nobǝ ena è no Nwen Ehwya hon.”

40Be ndegwa ya ehwyà, è no chàkǝn adgya, nè no di mò è bwe ángá. Engga mo be a Meri ya a Magadala, Meri ayi mo Yakubo nwenbwa mo Yose ngge Salomi. 41Ena a be ndegwa ya è ba Yeso anga, nè bwejwa ye anga tke a Galili. Be ndegwa ehwyà embo ya è vǝ a Galili gwa a Urishelima ngge ge ángá, è no a zǝn gaten.

Abu bè di Yeso ángá

(Matiyu 27:57-61; Luka 23:50-56; Yohana 19:38-42)

42Nò eni, è no nòmo fuchin etem mo Nò nya Etkem mo be ya a Yahuda, (tú anga, nò Jumaa.) Adia nò è kpo nyashi anga, 43Esufu ya Arimatiya, nobǝ akan a bè yi ye àywá a engga mo be Atkwentì mo be ya a Yahuda, è ken a zǝn Bilatu nè bgó jan be e no ye kǝn mo Yeso. A ge e chu ye, gè nobà zǝnotì mo Ehwya anga. 44Atan a Bilatu è fo jan ne Yeso nè fǝ fwa ara ángá, mo hon è zǝ̀ ye ju àywá. Gè tson bè fǝ́ chu mo yakàn dwa, nè ká nó eka ge yi jan, eshwen Yeso è fǝ fwa ara ne. 45Atan a gè fo a vǝ mo chu mo yakàn jan ne, Yeso nè fǝ ara ángá, gè jan Esufu nè ken e ti kǝn mo Yeso hon. 46Enona, Esufu è jwa eta adanmo a be fǝ́ anga linin, gè ken ti kǝn hon shwa a sen, nè binpe nó ngge eta adanmo hon. Gè ti no ti ken twà a tswa dì a bè gu no a ju hwì ángá. Kǝnggwa gè dgyén ten ekeke bwa bwipe kpevǝ mo dì hon. 47Meri ya a Magadala ngge Meri ayi Yose è di zǝn a bè di kǝn mo Yeso no ángá.

Currently Selected:

Marku 15: ICH

Highlight

Copy