Marku 7
7
Be mò e bwebgen be nobǝ chafya mo Ehwya anga
(Matiyu 15:1-9)
1Nò kè akan, be Farisi ya ehwyà ngge be etumo mo be edon ya éè vǝ chá Urishelima bwa ángá, è fǝn ngàhwya Yeso, 2nè di be etsonchi mbwe ya ehwyà no de mode anga bu “didi”, tú anga, bè na be bu mo be abu moefì mo be tú be anga ra. 3(Be Farisi ngge binbin mo be ya a Yahuda, è na bwi bu mo be anga abu moefì mo be tú be anga sangǝ́ be chà a de mode. 4Atan a be vǝ afyan twabǝ bwa ara a mu ángá, be de be mode anga ra, kpwà tén ano be na ara be bu mo be. Be ba se be moefì mo be embo efki, abu be ekponm mo be gwé, be hwa ngge be etsǝn.)
5No enona, be Farisi ngge be etumo mo be edon è ká Yeso eka jan, “Ano bwe a ge be etsonchi mbo ba be moefì a be e bǝ ata mo je è ti no je ángá ra? Be na be bu mo be sangǝ́, be e chà e de mode, abu moefì mo je jan anga ra.”
6Gè janfwe be, “Efojan Eshaya è bwe ebi atan a gè jan fwa a Ehwya è jan a chu nye, a nye be ya ayibangǝ̀. Eshaya è jan,
“ ‘Be nobǝ ena no m egǝ̀n anga
ngge abevǝ mo be,
tea tsuruku mo be
dgyen ara zǝn ngge me.
7Be fen m anga a kukwa,
be tú kpwà be edon mo be nobǝ.’
8Nye twagwa ara be edon mo Ehwya, nye no fuse be edon mo be nobǝ anga.”
9Kǝnggwa gè jan bishi be jan, “Nye no ngge efwa esese a nye ti nyi edon mo Ehwya anga a buetkwa evǝa nye e ba be edon mo nye. 10Adia Mosa è jan, ‘No ate o ngge ayi o egǝ̀n,’ ngge, ‘Ende e janbgen ate ye eno e ra ayi ye, ge no ara kenm ba gu ye.’ 11Tea nye jan ano ende akan jan ate ye ngge ayi ye jan, ‘Mò a mà a ti bwe a jwa o ángá, a Koban’ (tú anga be ti no ara Ehwya.) 12Adi ebwem enò, nye gwa nye be be e bwe e jwa ate be ngge ayi be ra. 13Enona, nye dipin be edon mo Ehwya a chu be moefì mo nye a nye ti tú be mbǝgya mo nye ngge be ebi nye anga. Nye bwe be mò àywá yishwa ena gaten.”
14Efwe, Yeso è fǝ́ be nobǝ embo hon dwa bwa a zǝn ye nè jan, “Nye buton fo m, egwa egwa, e fo e yi fwa a ma jan ángá. 15Mò akan nwone e no chá je, e shi anga a ju mo nobǝ ángá, bwe a mbǝgo a didi ye ye chafya mo Ehwya ra. Tea a mò nwone e gwa anga a je a ju nobǝ ángá, bwe a mbǝgo ye a ge a chafya mo Ehwya. [ 16Ende e no ngge tón mo fwa efom, ge e fo.”]
17Chashin, a Yeso è gwa be nobǝ embo hon gwa ara a je, nè kwashi ara a àtá ángá, be etsonchi mbwe è ká ye eka a chu hufwa hon. 18Gè ká fwe be eka jan, “A nye gaten, nye foyi nye ra? Nye yi nye jan mò akan e vǝ́ a je kwashi a ju nobǝ ángá, bwe mbǝgo ye ye anga a ge chafya mo Ehwya ra ra? 19Adia ge kwashi ye anga a tsuruku ra, tea ge shi anga a dgyèn n ken vǝ anga a je mo ju ye.” (A chu fwa ena, Yeso jan anga jan binbin mo mode no enachacha.)
20Ge jan efwe, “Mò e gwa anga a je mo nobǝ ángá bwebgen ye anga a ge chafya mo Ehwya. 21Adia a chá tswa tsuruku mo be nobǝ, a be tashwa ekam esera gwa anga a je; be mò abu: twashwa ekacha, jú, nobǝ egum, 22sen-eten, efǝ́m, mofǝ̀, enggadem, edgyan mo ekǝnjuju, eze, ejanbwe, efinm ngge mò hwen. 23Be mò esera ena binbin vǝ chá tswa gwa anga a je, n bwe mbǝgo nobǝ anga chafya mo Ehwya.”
Chaebi mo ndegwa éè fwa ye ya a Yahuda ra ángá
(Matiyu 15:21-28)
24Yeso è nyagwa zǝn hon nè ken a efa mo eten a Taya. Gè ngǝ̀ kwashi a àtá akan, nè dgyan ye ende akan e yi jan ge no a zǝn ra, tea gè dòn ti ye be nobǝ be e yi jan ge no a zǝn hon ra. 25Kè akan abu ndegwa akan, a nwen ye ndegwa nweshan, è no ngge engǝ́ esera a ju, è fo ara fwa a chu zǝn a Yeso è no ángá, gè bwa nggwa ekpanvǝ mbwe a sen chafya mbwe. 26Ndegwa hon è no ya Heleni (Girka), bè mbwa ye a Foni a sǝnsen mo Siriya. Gè bgó Yeso nè nyo e vǝ́ engǝ́ esera hon a je a ju nwen ndegwa nweshan mbwe hon.
27Yeso è jan ye jan, “Gwa be mbǝgya be e kwafya e de e mbo sangǝ́, adia ge se ye be e ti mode e no ḿ mo be mbǝgya be e ti e nggwa be bge ra.”
28Ndegwa hon è janfwe ye jan, “Eshwen Etsodwe, tea be bge ya e dwa a ta mo teboro ángá, de mode mo mbǝgya e bgan nggwashwa anga a sen a chu mo teboro hon ángá.”
29Kǝnggwa Yeso è jan ye, “Adi e ejanfwem a o jan na, nya ḿ mbo a mu, engǝ́ esera hon, twagwa ara nwen o ndegwa.”
30Gè twabǝ nya m̀ mbwe a mu, nè ken ben nwen ye dwano adi zǝndwa, engǝ́ esera hon è twagwa ara ye.
Yeso è matswa ekeketon ngge hwen
31Kǝnggwa Yeso è nyagwa efa mo Taya nè ken chá Sidon ti ken a edan mo Galili, ti ken sǝnsen mo Dekapoli (Be eten gwi). 32A zǝn hon, be ya ehwyà è ti nobǝ è no ekeketon nè jan yi ye aken ra, bwa a zǝn ye. Bè bgó ye ge e tu ye bu a ju evǝa ge e ma e tswa ye.
33Atan a gè vǝ nobǝ hon ken ara a buetkwa mo be nobǝ embo ángá, Yeso è du be sen-e-bu mbwe a tón mo ya modwa hon, gè tsǝ́ afǝtkwa nè ti yi ndedon hon a dgyén. 34Gè takpa vǝ́ chá kpe, nè kpo tsǝ̀n echakpokpo, kǝnggwa gè jan nobǝ hon jan, “Efǝfata” (Engà mo nó tú anga, “Fkigwa”). 35Kè akan, tón mo ndedon hon è fkigwa, dgyén mbwe è fken-gwa, gè kwa ara fwa ejanm esese.
36Yeso è twa be ya è no a zǝn ángá echa jan ne, be e jan e tú be ende akan ra. Tea abu gè twa bi be echa anga, bè jan bi be nobǝ fwa hon anga. 37Ematswam mo ndedon hon è zǝ̀ gu be nobǝ ju. Bè jan, “Binbin be mò a gè bwe anga no gu esese. Ge bwe ekeketon fo fwa ngge hwen jan fwa.”
Currently Selected:
Marku 7: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
