Iwinna 12
12
Ukpokpo Dọlegbe Tua
1Vbe odẹ ẹghẹ na ọre Hẹrọd ne Ọba na suẹn gha kpokpo eso vbe uwu emwa esọsi. 2Rẹn keghi ruẹe wẹ ne iran ya umozo gbe ẹe rua ighẹ Jems ne ọtiẹn Jọn. 3Ọ ghi miẹn ighẹ emwi na rhiẹnrhiẹn avbe ju, ọ na vbe ya mu Pita. (Ẹghẹ Emwiukpo ebrẹd Ne ọ ma hue ọre emwi na na sunu.) 4Iran ghi mu Pita nẹ, iran keghi mu ẹn fi uwu ẹwẹdọ, iran keghi zẹ oka enẹ ọghe ivbiyokuo, arhin enenẹ kevbe rre oka ọkpọkpa. Hẹrọd keghi te mwamwaẹn wẹ emwiukpo Alagberra ghẹ ghi fo nẹ, rẹn ghi do muẹn bu avbe Ju. 5Iran keghi rhunmwuda ọnii khui e Pita ye uwu ẹwẹdọ sokpan ivbi e esọsi keghi wa kakabọ gha na erhunmwu ghe Osanobua nẹẹn.
A Zẹ Pita Hin Ẹwẹdọ Rre
6Asọn ne ọ lele ẹdẹ ne Hẹrọd te ra rhie Pita gie avbe emwa, Pita kegha vbiẹ vbe adesẹneva ivbiyokuo eva. A keghi ya eghan eva rro ẹre, emwa eso keghi vbe gha khẹ odẹ vbe onurho ẹwẹdọ nii. 7Vbe udomwurri, odibo e Nọyaẹnmwa ọkpa keghi mudia vbe evba, uwanmwẹ keghi wan ladian vbe uwu eghan nii. Odibosa nii keghi rueghe Pita izabọ, ọ na huẹn ọnrẹn, ọ tama rẹn wẹẹ, “Zẹgiẹgiẹ! Kpaegbe!” vbe ọwarọkpa nii, eghan ni keghi kuọ kua vbe obọ ẹre. 8Odibosa nii keghi kha wẹẹ, “Tua ugbẹkun ruẹn ne u vbe gbalọ ibata ruẹ.” Pita keghi ru vberriọ, odibosa nii keghi kha wẹẹ, “Mu agbada ẹwu ruẹ yọ ne u lele mwẹ.” 9Pita keghi lele ẹe ladian vbe uwu ẹwẹdọ sokpan ọ ma gi ẹe rẹn deghẹ ẹmwata ọre emwi ne odibosa ru khin, ọ keghi te gha ro ighẹ te irẹn miẹn umian. 10Iran keghi gberra ehe ne iran ni khẹ odẹ ne okaro kevbe ne ogieva ye, iran keghi do sẹ onurho ematọn ne a bi la adesẹ ore. Ẹkhu ni keghi tobọ ẹre kie ye otọ ne iran, iran keghi ladian. Iran ghi khian la uwu idunmwu ọkpa, odibo Osa ni keghi wa sẹ Pita rae vbe udomwurri.
11Ẹghẹ nii Pita na do rẹn emwi ne ọ sunu vbe egbe irẹn, ọ na wẹẹ, “Banbanna nian, I rẹnrẹn ighẹ ẹmwata gele nọ, Nọyaẹnmwa gie odibo ẹre ne ọ do miẹn mwẹ fan vbe obọ Hẹrọd kevbe hin obọ emwi ne avbe emwa e Ju te rhie aro yi ne iran ru.”
12Rẹn ghi ghe vbene emwi hia ye hẹ. ọ kegha rrie owa Meri ne iye Jọn Mak, Emwa ni bun keghi si koko ye evba gha na erhunmwu. 13Pita sobọ vbe ẹkhu ne a la fi ore, ọvbokhan okhuo ọkpa ne a tie ẹre Roda kegha dee do kie ẹre. 14Ugbẹn vbe ọ ghi mu urhu e Pita, ẹko keghi rhiẹnrhiẹn ọẹn sẹrriọ wẹ ọ na rhulẹ werriegbe vbe ne ọ ma na kie urho, Ọ keghi ya kha ma iran wẹ, “Pita mudia vbe ore.” 15Iran wanniẹn tama rẹn wẹẹ, “Te u mwẹmwẹ.” Sokpan rẹn keghi tua unu muẹn wẹ ẹmwata nọ. Iran na ghi kha wẹ, “Ẹhi ẹre nọ.”
16Vbe ẹghẹ ne a kha na, Pita keghi ye gha sobọ. Iran keghi do kie urho vbe okiekie, iran ghi miẹn ọẹn, ọ keghi yan iran hia unu uan. 17Ọ keghi ye obọ gbe iran ekhakha wẹ ne iran gie a họn ẹmwẹ ọ keghi do rhan otọ vbene Nọyaẹnmwa ya rhie irẹn ke uwu ẹwẹdọ ladian hẹ ma iran. Ọ keghi tama iran we wa ghi na iyẹn ma Jems kevbe iran ne etẹn nekpa. Rẹn keghi kpao gha rrie ehe ọvbehe.
18Ẹdẹ ghi gbe, ẹmwẹ vbene Pita ru hẹ keghi wa si ohawa ye iran ni khẹ odẹ egbe ẹsẹse. 19Hẹrọd keghi yi iyi wẹ ne a gualọe, sokpan iran ma miẹn ọẹn, ọ ghi nọ iran ni khẹ odẹ ọta nẹ, ọ na wẹ ne a gbele iran uan. Vbe iyeke ọna Hẹrọd keghi kpao vbe Judia rre ọ na vbe ya gbe ẹghẹ eso vbe Sisaria.
Uwu E Hẹrọd
20Ohu emwa Saidọn kevbe Taia keghi gha mu Hẹrọd, iran keghi si egbe koko ya miẹn ọẹn. Iran keghi ka de Blastọs ne ọka ẹguae ba egbe. Iran keghi bu Hẹrọd gha khian ya rinmwian ne ọ mu ẹzọ fua rhunmwuda, ẹvbo Ọba na ọre a ke hẹ evbare ne avbe ẹvbo na re rre.
21Vbe ẹdẹ ne iran mwamwaẹn yi, e Hẹrọd keghi hẹ ukpọn ọba ẹre ye egbe, ọ keghi tota ye ẹkete ẹre, ọ na ke evba gha gu emwa rẹn guan. 22Iran keghi gha kha wẹẹ, “Ẹ i re ọmwa kẹkan ọre ọ guan ẹbọ ọkpa nọ.” 23Vbe ọwarọkpa nii, odibo Nọyaẹnmwa keghi wa gbe Hẹrọd fi otọ rhunmwuda ọ ma rhie uyi ne Osanobua, ọkhọe keghi rriọ rua, ọ na wu.
24Ẹmwẹ Osanobua kegha vẹ yọ, ọ na gha wan yọ.
25Banabas kevbe Sọl ghi winna iwinna ne a gie iran ẹre fo nẹ, iran keghi werriegbe ke Jerusalẹm gha dee, iran keghi rhie Jọn Mak ba egbe gha dee.
Currently Selected:
Iwinna 12: EDO96
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
@ The Bible Society of Nigeria, 1996