Gẹnẹsis 24
24
Okhuo Ne A Rhie Ne Aizik
1Te Ebraham ghi wa khian ọmaẹn ẹsẹse, Osanobua keghi wa vbe fiangbẹe vbe emwi ne ọ ru hia. 2Ọ keghi tama ne ọ ghi re ọdiọn vbe avbe eguọmwadia ẹre hia, ne ọ vbe gbearoghe emwi ne ọ mwẹ hia wẹẹ, “Do viọ obọ yọ mwẹ akharha ne u vẹn ihẹn. 3I ho ne u vẹn ihẹn ya yan ma mwẹ vbe odaro Nọyaẹnmwa ne ọre Osanobua ọghe ẹrinmwi kevbe agbọn wẹẹ, u i ra rhie okhuo ne ovbi mwẹ vbe Kenan ẹvbo ne I ye na. 4U ghi gha rrie ẹvbo mwẹ ne u ya rhie okhuo gie Aizik ne ovbi mwẹ vbe usun ivbi etẹn mwẹ.” 5Sokpan ọguọmwadia nii wanniẹn wẹẹ, “A deghẹ okhuo nii ma ghi kpao vbe owa ne ọ lele mwẹ gha die ẹvbo na vbo? Te I gha ghi rhie ovbuẹ werriegbe gha rrie ẹvbo ne u ke rre ra?” 6Ebraham keghi wanniẹn wẹẹ, “Ghẹ gia miẹn wẹẹ u dọlegbe rhie ovbi mwẹ gha rrie odọ! 7Nọyaẹnmwa, Osanobua ẹrinmwi kevbe agbọn ọre ọ rhie mwẹ ke owa erha mwẹ ladian hin otọ avbe etẹn mwẹ rre, ọ na vbe yan ma mwẹ ighẹ rẹn gha mu otọ na ne imẹ kevbe uniẹn mwẹ, ọ gha gie odibo ẹre ke odaro nuẹn ne u miẹn ehe na miẹn okhuo rhie ne ovbi mwẹ vbe evba. 8Sokpan deghẹ nene okhuo ghi wẹẹ rẹn i leluẹ dee, ihẹn ne u vẹn mẹ na ghi lahin ruẹn uhunmwu rre, sokpan, vbene ọ rhirhi a gha ye hẹ, ghẹ dọlegbe rhie ovbi mwẹ gha rrie odọ.” 9Ẹre ọguọmwadia nii na viọ obọ ẹre ye akharha Ebraham ne arowa ẹre, ọ na yan wẹẹ rẹn gha ru zẹ vbene Ebraham nọ rẹn.
10Ọguọmwadia nii ne ọ gbearoghe emwi Ebraham hia keghi viọ igbe vbe uwe ekẹtẹkẹtẹ arowa ẹre, ọ na gha rrie ẹvbo ne Nahọ ye vbe Mẹsopotamia. 11Ọ ghi sẹ evba, ọ viọ avbe ekẹtẹkẹtẹ nii ye iguẹ vbe ọkpẹn uhae ne ọ rre vbe a ra ladian vbe ẹvbo nii, ọ keghi re ẹdogbota, ẹghẹ ne ikhuo do ya gha sa amẹ. 12Rẹn ka na erhunmwu wẹẹ, “Nọyaẹnmwa, Osanobua ọghe Ebraham ne arowa mwẹ, rhie arudinodẹ mẹ ẹre na ne u mu eyan ne u yan ma arowa mwẹ sẹ. 13I mudia ye ọkpẹn uhae na ẹghẹ ne emọ ikhuo ni rre ẹvbo na gha na do sa amẹ. 14I gha khama ọmọ okhuo ọkpa wẹẹ, ‘Ya uru ruẹ sa amẹ mẹ wọn.’ Adeghẹ ọ khare wẹẹ, ‘Miẹn ne u wọn, I gha vbe sa ne avbe ekẹtẹkẹtẹ ruẹ.’ Gie ẹe gha re okhuo ne u zẹe ne Aizik ne ọguọmwadia ruẹ. Ọ gha sunu vbe nian, I ghi rẹn wẹ u mu eyan, ne u yan ma arowa mwẹ sẹ.”
15Vbe ọ ghi te na erhunmwu fo, Ribẹka keghi rre kẹe kevbe esago ẹre vbe izabọ, ovbi e Bẹtuẹl nokhuo nọ ne ovbi ọtẹn e Ebraham nokpia ighẹ Nahọ kevbe amwẹ ọnrẹn Milka. 16Uvbi ọre nọ, ọ keghi mose ẹsẹse, ọ ma he rẹn okpia. Ọ keghi rrie uhae, ọ ke ya sa amẹ vuọn esago ẹre, ọ na dọlegbe gha dee. 17Ọguọmwadia nii keghi rhulẹ bu ẹre, ọ tama rẹn wẹẹ, “Lahọ sa amẹ mẹ wọn vbe esago ruẹ na.” 18Rẹn wanniẹn, “Miẹn ne u wọn enọwanrẹn,” ọ na sie esago nii vbe izabọ ẹre, ọ na dae yi nẹẹn wọn. Ọ ghi wọn nẹ, ọ tama rẹn wẹẹ, 19“I gha vbe sa gie avbe ekẹtẹkẹtẹ ruẹ ne iran wọn vbene iran ho.” 20Ọ re ọ na tue esago ẹre ye ọkpan ne avbe aranmwẹ, iran na wọn amẹ, ọ na dọlegbe gha rrie uhae ya sa ọvbehe ọ te do sa gba avbe ekẹtẹkẹtẹ nii obọ. 21Okpia nii keghi hẹko mudia gha ghe ẹre ne ọ miẹn ehe na rẹn a deghẹ te Nọyaẹnmwa rhie arudinodẹ ne irẹn vberriọ.
22Ugbẹn vbe ọ ghi sa amẹ ne avbe ekẹtẹkẹtẹ nii wọn fo nẹ, okpia nii keghi rhie oroka ihue ọghe igoru ighobioye ye ọre ihue, ọ keghi viọ emwiobọ eva ọghe igoru nekhua ye ọre obọ. 23Ọ keghi nọ rẹn wẹẹ, “Gha ọre erhaa? Lahọ, tama mwẹ. Otọe rre owa erhaa ne ọ gha gua mwẹ gua emwa mwẹ vbe asọn na ra?” 24Rẹn wanniẹn tama rẹn wẹẹ, “Ovbi Bẹtuẹl ne ovbi Nahọ kevbe Milka, ọre I khin; 25irunmwu kevbe evbare aranmwẹ wa bun vbe owa ima, u gha vbe miẹn ehe dia.”
26Okpia nii keghi diguẹ, ọ na ya uhunmwu rhanmwẹ otọ ne Nọyaẹnmwa. 27Rẹn keghi kha wẹẹ, “Urhomwẹ nọ ne Nọyaẹnmwa, Osanobua Ebraham arowa mwẹ ne ọ wa rhie ekhọe yọ ne ọ mu eyan ne ọ yan ma arowa mwẹ sẹ. E Nọyaẹnmwa wa ma mwẹ odẹ gha die owa ọtẹn arowa mwẹ zẹẹ.”
28Ọmọ okhuo nii keghi rhulẹ gha rrie owa iyẹe, ọ keghi ya na iyẹn na hia ma rẹn. 29Leban ne ọtẹn Ribẹka keghi rhulẹ ladian gha rrie uhae ne nene okpia ye. 30Rẹn keghi miẹn oroka ihue kevbe emwiobọ nii vbe obọ ọtiọnrẹn ne okhuo, ọ keghi vbe họn vbe ọ ta ẹmwẹ ne okpia nii tama rẹn, ọ na gha rrie ehe ne ọguọmwadia Ebraham na mudia ke avbe kẹtẹkẹtẹ ọre vbe ọkpẹn uhae. 31Rẹn keghi tama rẹn wẹẹ, “Lele mwẹ gha die owa, ọmwa ne Nọyaẹnmwa fiangbe ọre u khin, vbua na mudia ye ore hẹ yi vbe I dọlọ ihe eso ye otọ khẹ ruẹ nẹ vbe uwe owa, otọ vbe rrọ ne avbe kẹtẹkẹtẹ ruẹ.”
32Ẹre okpia nii na la owa, e Leban keghi bannọ ihẹ hin egbe avbe ekẹtẹkẹtẹ rre, ọ keghi viọ irunmwu kevbe evbare ne iran, ọ kevbe sa amẹ gie ọguọmwadia Ebraham kevbe emwa rẹn ya kpe owẹ. 33Ugbẹn vbe iran ghi mu evbare rre, okpia nii na kha wẹẹ, “Mẹ i he rri evbare I te guan ẹmwẹ nọ rrọ mwẹ unu.” E Leban wanniẹn wẹẹ, “Khianmwu, gha guan.” 34Rẹn keghi suẹn, ọ wẹẹ, “Ọguọmwadia Ebraham ọre I khin. 35E Nọyaẹnmwa fiangbe arowa mwẹ ẹsẹse, ọ keghi yae khian okpọmwa. Ọ viọ oghẹn ohuan kevbe ọghe ẹwe nẹẹn, ẹmila, esiliva, igoru, eviẹn ikpia kevbe ikhuo, ekẹtẹkẹtẹ kevbe ẹsin. 36E Sera ne amwẹ arowa mwẹ keghi biẹ ọmọ okpia ọkpa nẹẹn vbe ẹghẹ ọmaẹn ọnrẹn. Arowa mwẹ viọ emwi hia ne ọ mwẹ nẹẹn. 37Rẹn keghi ya mwẹ vẹn ihẹn ne I yan wẹẹ, ‘I gha ru vbene irẹn khare wẹẹ, ghẹ rhie okhuo ne ovbi mwẹ vbe uwe ivbie Kenan ehe ne I ye na. 38Sokpan u ghi gha rrie odẹ ọghe emwa erha mwẹ, avbe etẹn mwẹ ne u ya rhie okhuo ne ovbi mwẹ.’ 39Mẹ keghi tama arowa mwẹ wẹẹ, ‘A deghẹ nene okhuo ma lele mwẹ kpao vbo?’ 40Rẹn keghi wanniẹn wẹẹ, ‘Nọyaẹnmwa, ọmwa ne I mẹ gha họn ẹmwẹ na vbe ẹghẹ hia gha gie odibo ẹre leluẹ, ne ọ rhie arudinodẹ nuẹn. Uwe emwa mwẹ ọre u gha na rhie okhuo ne ovbi mwẹ, kevbe uwe ẹgbẹe erha mwẹ. 41U gha ru ọna, u gha miẹn uhunmwu vbe obọ ihẹn mwẹ. U gha vbe gha rrie ẹbu emwa mwẹ ighẹ iran ma rhan obọ miẹn ruẹn, u gha vbe miẹn uhunmwu vbe obọ ihẹn mwẹ.’”
42“Mẹ ghi sẹ uhae na ẹrẹna, I keghi na erhunmwu wẹẹ, ‘E Nọyaẹnmwa, Osanobua Ebraham ne arowa mwẹ, lahọ rhie arudinodẹ mẹ vbe emwi ne I ru vbobọ na. 43Ọkpẹn uhae ọre I ye na, ọvbokhan okhuo gha rre do sa amẹ, I gha tama rẹn wẹẹ, “Lahọ sa amẹ mẹ wọn vbe esago ruẹ.” 44A deghẹ ọ khare wẹẹ, “Miẹn ne u wọn, I gha vbe sa ne ekẹtẹkẹtẹ ruẹ,” gie ọnii gha re ọmwa ne u zẹe ne ọ gha re amwẹ ovbi arowa mwẹ.’ 45Vbe I ghi te na erhunmwu uwe ekhọe mwẹ fo, e Ribẹka keghi rre, kẹe kevbe esago amẹ ọnrẹn vbe izabọ, ọ na gha rrie uhae ya sa amẹ. Mẹ keghi tama rẹn wẹẹ, ‘Lahọ sa amẹ mẹ wọn.’ 46Rẹn keghi zẹgiẹ sie esago ẹre vbe izabọ, ọ wẹẹ, ‘Miẹn ne u wọn, I gha vbe sa ne avbe ekẹtẹkẹtẹ ruẹ wọn.’ Ọre I na wọn, ọ kevbe sa ne avbe ekẹtẹkẹtẹ wọn. 47I keghi nọ rẹn wẹẹ, ‘Gha ọ re erha a?’ Rẹn keghi wanniẹn wẹẹ, ‘Ovbi e Bẹtuẹl nokhuo ọre I khin, ovbi Milka kevbe Nahọ.’ Ọre I na rhie oroka nii ye ọre ihue, kevbe emwiobọ ye ọre obọ. 48I keghi diguẹ ya uhunmwu rhanmwẹ otọ ne Nọyaẹnmwa, I keghi rho Nọyaẹnmwa, Osanobua Ebraham ne arowa mwẹ, ne ọ ma mwẹ odẹ ẹsẹse vbe nian. Rẹn keghi rhie mwẹ bu ọtẹn arowa mwẹ nokpia, ehe ne I na miẹn ovbi ẹre nokhuo rhie ne ovbi arowa mwẹ. 49Banbanna na nian, a deghẹ te u ra ru zẹ vbene ọ khẹkuẹ ne arowa mwẹ, tama mwẹ, a deghẹ ẹ i re vberriọ vbe tama mwẹ ne I miẹn ehe na rẹn emwi ne I gha ru.” 50E Leban kevbe Bẹtuẹl keghi wanniẹn wẹẹ, “Ugbẹn vbe a miẹn wẹẹ obọ e Nọyaẹnmwa ọre emwi na la rre, ẹ i re ima ọ gha ta emwi ne a gha ru. 51Ghe Ribẹka ne u rhie gha khian, giẹe gha re amwẹ ovbi arowa a zẹ vbene Nọyaẹnmwa tobọ ẹre tae.” 52Ọguọmwadia Ebraham ghi họn vbene iran kha hẹẹ, ọ keghi vbokho rriotọ ye uhunmwu rhanmwẹ otọ ne Nọyaẹnmwa. 53Ọ viọ esiliva kevbe igoru ladian kevbe ikpẹrọnmwọ kevbe ukpọn ọ na viọ ne Ribẹka, ọ kevbe ya emwi ighobioye ne ọtiọnrẹn nokpia kevbe iye ẹe.
54Ọguọmwadia Ebraham kevbe emwa rẹn keghi re, iran na da, iran keghi gbe asọn nii vbe evba. Ugbẹn vbe iran ghi kpaegbe vbe owiẹ, ọ keghi wẹẹ, “Gun mwẹ werriegbe bu arowa mwẹ.” 55Sokpan iye e Ribẹka kevbe ọtiọnrẹn nokpia keghi kha wẹẹ, “Gie ọmọ okhuo na gu ima gbe uzọla ọkpa ra ikpẹdẹ igbe nẹ, vbe iyeke ọnii, ọ sẹtin gha khian.” 56Sokpan, rẹn wanniẹn wẹẹ, “Wa ghẹ vbe da mwẹ yi, e Nọyaẹnmwa rhie arudinodẹ mẹ nẹ, wa gunmwẹ dọlegbe bu arowa mwẹ gha khian.” 57Iran keghi wanniẹn wẹẹ, “Wa gia tie ọmọ na ne a nọ rẹn vbe ne ọ kha hẹ.” 58Rhunmwuda ọnii, iran keghi tie Ribẹka, iran nọ rẹn wẹẹ, “U ho ne u lele okpia na gha khian ra?” Rẹn wanniẹn wẹẹ, “I gha yo.” 59Rhunmwuda ọnii, iran keghi gie Ribẹka kevbe ọmwa ne ọ gbearoghe ẹre lele ọguọmwadia Ebraham kevbe emwa rẹn gha khian. 60Iran kevbe na erhunmwu ne Ribẹka vbe nian wẹẹ, “Ọtẹn mwa, iye arriaisẹn arriaisẹn u gha khian! Te uniẹn ruẹn gha khọn ẹvbo eghian iran muotọ!” 61Ribẹka kẹe kevbe ne ọ gbearoghe ẹre keghi mu egbe, iran na hin ekẹtẹkẹtẹ ne iran lele okpia nii gha khian, ọguọmwadia nii keghi rhie ẹre, ọ na kpao. 62Aizik kegha die ato ọghe “Uhae-ọmwa-nọrrọọ ne ọ bẹghe mwẹ” ne ọ rre odẹ ekẹn e Kenan. 63Ọ keghi ladian vbe ẹdogbota ne ọ ya rhie ẹhoho vbe ore, ọ na miẹn avbe ekẹtẹkẹtẹ vbe iran dee. 64Ribẹka keghi bẹghe Aizik, ọ na ghi tuorre vbe ekẹtẹkẹtẹ. 65Ọ na nọ ọguọmwadia nii wẹẹ, “Gha ọna khin ne ore ne ọ bu ima de na?” Ọguọmwadia nii keghi wanniẹn wẹẹ, “Arowa mwẹ nọ.” Rẹn keghi rhie ugbaleto, ọna rhie gue aro ẹre. 66Ọguọmwadia nii keghi talọ emwi ne irẹn ru hia ma Aizik. 67Aizik keghi rhie Ribẹka la uwe owa ukpọn, ọ na rhie ẹre rọnmwẹ. Aizik ho ẹmwẹ Ribẹka, ọnii ọre ọ ghi fu ẹre ẹko rre vbe iye ẹe ghi wu nẹ.
Currently Selected:
Gẹnẹsis 24: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
