Gẹnẹsis 5
5
Uniẹn Adam
(I Krọnikol 1:1-4)
1Eni uniẹn Adam ọre ena khin. (Ẹghẹ ne Osanobua na yi emwa nagbọn, ọ keghi yi iran zẹ vbe ama egbe irẹn. 2Ọ keghi yi iran okpia kevbe okhuo. Rẹn keghi fiangbe iran, ọ keghi tie iran “Emwa.”) 3Ugbẹn vbe Adam ghi rre ukpo igbe yan iyehan (130), Ọ keghi biẹ ọmọ okpia ọkpa ne ọ ye vbe irẹn, ọ keghi he ẹre Sẹt. 4Vbe iyeke ọnii Adam gbe ukpo arria enẹ (800) vbe agbọn, ọ keghi biẹlẹ emọ ọvbehe. 5Ọ keghi wu vbe ọmọ ukpo igbe yan iyehan yan arriaenẹ (930). 6Ugbẹn vbe Sẹt ghi rre ọmọ ukpo isẹn-yan iyisẹn (105), ọ keghi biẹ ọmọ okpia ọkpa ne a tie ẹre Inọsi. 7Ọ keghi yevbe ya ukpo ihinrọn yan iyienẹ (87) vbe agbọn ọ keghi biẹlẹ emọ ọvbehe, 8ọ keghi wu vbe ọ rre ukpo iweva yan iyisẹn yan arriaenẹ (912).
9Inọsi ghi rre ukpo ekigbe siyisẹn (90), ọ keghi biẹ ọmọ okpia ne a tie ẹre Kenan. 10Vbe iyeke ọnii, ọ ke yevbe ya ukpo ekesugie yan arriaenẹ (815). Ọ keghi yevbe biẹlẹ emọ ọvbehe. 11Ọ keghi wu vbe ọ rre ukpo isẹn yan iyisẹn yan arriaenẹ (905).
12Ugbẹn vbe Kenan ghi rre ukpo ekigbesiyenẹ (70), ọ keghi biẹ ọmọ okpia ọkpa ne a tie ẹre Mahalalẹ. 13Ọ na yevbe gbe ukpo iyeva yan arriaenẹ (840). Ọ keghi yevbe biẹlẹ emọ ọvbehe. 14Ọ keghi wu vbe ọ rre ukpo igbe yan iyisẹn yan arriaenẹ (910).
15Mahalalẹ ghi rre ukpo isẹn yan iyeha (65), ọ keghi biẹ ọmọ okpia ọkpa ne a tie ẹre Jarẹd, 16ọ na yevbe gbe ukpo ọgban yan arriaenẹ (830). Ọ yevbe biẹlẹ emọ ọvbehe. 17Ọ keghi wu vbe ọ rre ukpo isẹn yan ekigbe siyisẹn yan arriaenẹ (895). 18Ugbẹn vbe Jarẹd ghi rre ukpo eva yan iyerẹnrẹn (162), ọ keghi biẹ ọmọ okpia ọkpa ne a tie ẹre Inọk, 19ọ keghi yevbe gbe ukpo arriaenẹ (800), ọ yevbe biẹlẹ emọ ọvbehe, 20ọ keghi wu vbe ọ rre ukpo eva yan iyerẹnrẹn yan arriaenẹ (962).
21Inọk ghi rre ukpo isẹn yan iyeha (65), ọ keghi biẹ ọmọ okpia ọkpa ne a tie ẹre Mẹtusẹla. 22Inọk keghi ye gu Osanobua gha yin vbe ukpo iyisẹn yan uri (300), ọ na yevbe biẹlẹ emọ ọvbehe 23ọ te do sẹ ukpo iyisẹn yan ọgban irrọ vbe uri eva (365). 24Ẹdagbọn rẹn hia ọre ọ wa ya gu Osanobua yin, ọ keghi ru gbẹnnẹ rhunmwuda Osanobua rhie ẹre kpao.
25E Mẹtusẹla ghi rre ukpo iwera-irrọ-vburi (187), ọ keghi biẹ ọmọ okpia ọkpa ne a tie ẹre Lamẹk, 26ọ ke ye vbe gbe ukpo evairrọvbugie irrọ vbe arriaenẹ (782), ọ keghi biẹlẹ, 27ọ keghi wu vbe ọ rre ukpo ihinrin yan iyerẹnrẹn yan arriaenẹ (969).
28Lamẹk ghi rre ukpo eva yan iyihinrin (182), ọ keghi biẹ ọmọ okpia ọkpa, 29ọ na kha wẹẹ, “Ọmọ na gha do fan mwa vbe obọ ẹsọn vbe otọe nii ne Nọyaẹnmwa ye amunu na.” Ọ keghi he ẹre Noa, 30E Lamẹk keghi ye vbe gbe ukpo isẹn irrọ vbe uri eha (595), ọ ye vbe biẹlẹ emọ ọvbehe, 31ọ keghi wu vbe ọ rre ukpo eha yan ugie irrọ vbe iyerẹnrẹn (777). 32Ugbẹn vbe Noa ghi rre ukpo iyisẹn yan uri eva (500), ọ keghi biẹlẹ emọ eha Siẹm Ham kevbe Jafẹt.
Currently Selected:
Gẹnẹsis 5: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
