Jọn 7
7
Jesu Kevbe Etiọnrẹn Ne Ikpia
1Vbe iyeke ọnọna, Jesu kegha lele Galili khian, ọ ma ho ne ọ khian lele otọ Judia rhunmwuda avbe Ju ni rre evba gualọ odẹ vbene iran gha ya gbe ẹe rua hẹẹ. 2Emwiukpo Ibu agọ ọghe avbe Ju keghi sikẹ otọ. 3Rhunmwuda ọnii etẹn Jesu ne ikpia keghi do tama rẹn wẹẹ, “Kpao vbe emwa ne u gha rrie Judia ne aro avbe erhuanegbe ruẹ miẹn ehe na sẹ iwinna ne u winna. 4Ọmwa ne ọ ho ne a rẹn ọnrẹn, ẹ i mu iwinna rẹn lẹrre. Vbene a ghi na miẹn ighe u winna avbe iwinna na, rhie ẹre ma agbọn hia!” 5(Etiọnrẹn tobọ iran ma vbe yae yi.)
6Jesu tama iran wẹẹ, “Ẹghẹ mwẹ ma he sẹ. Ẹdẹ hia ọre ọ wa re ọ ghe uwa. 7Agbọn i sẹtin gha khuiwu uwa, sokpan mẹ ọre ọ khuiwu ẹre rhunmwuda ne I na tama rẹn wẹ iwinna rẹn ẹ i ma. 8Wa gha rrie nene emwiukpo, mẹ i rrie emwiukpo na rhunmwuda ẹghẹ mwẹ ma he sẹ.” 9Ọ ghi guan ẹmwẹ na ma iran nẹ, rẹn keghi ye tota vbe Galili.
Jesu Vbe Emwiukpo Ibu Agọ
10Ugbẹn vbe avbe etiọnrẹn ghi kpao gha rrie emwiukpo nẹ, Jesu keghi vbe gha khian sokpan ọ ma la azagba, ọ keghi la ẹkhokho gha khian. 11Avbe Ju kegha gualọ ẹe vbe uwu emwiukpo ni, iran wẹẹ, “Rẹn vbo o?”
12Ẹbu ni hia kegha talọ ivbi ọta vbe ekpa ẹre. Emwa eso wẹ, “Ọmwa esi nọ,” eso kevbe wẹẹ, “Ohoghe nọ, te ọ hiẹ agbọn mu ru.” 13Sokpan a ma miẹn ne ohan gi ẹe gbe ẹmwẹ ẹho rhunmwuda ohan avbe Ju mu iran.
14Te emwiukpo ghi ra wa egbe eva vbe Jesu la uwu Ọgua Osa ya gha ma emwa emwi. 15Unu keghi kakabọ yan avbe Ju, iran wẹẹ, “Vbe okona na rẹn emwi sẹ rriọ hẹ yi ugbẹn vbe ọ ma yo esuku?”
16Jesu wanniẹn wẹẹ, “Emwi ne I ma emwa re ẹ i re ọghe obọ mwẹ sokpan obọ Osanobua ne ọ gie mwẹ ọre ọ ke rre. 17Ọmwaikọmwa ne ọ ho ne irẹn ru vbene Osanobua ho gha rẹn deghẹ emwi ne I ma emwa ẹre obọ Osanobua ọre ọ ke rre ra ẹmwẹ obọ mwẹ ọre I zẹ ta. 18Ọmwa ne ọ zẹ ẹmwẹ obọ ẹre ta, uyi egbe ẹre ọ gualọ. Sokpan ọmwa ne ọ ho uyi ọmwa ne ọ gie ẹe ghi gha yin uyinmwẹ ne ọ diae, ẹ i ru ero. 19Mosis gbẹnnẹ Uhi ne uwa, sokpan ọkpa i rrọọ vbe uwu uwa ne ọ ye nene Uhi ru emwi. Vbọzẹ ne uwa na ho ne uwa gbe mwẹ uan?”
20Emwa ni gbe ẹbu ye evba tama rẹn wẹẹ, “U mwẹ Orhiọn esu, de ọmwa ne ọ ho ne ọ gbe uẹ ua yi?”
21Jesu wanniẹn wẹẹ, “Iwinna iwinna ọyunnuan ọkpa kẹkan, unu yan uwa hia. 22Rhunmwuda ighe Mosis wẹ ne uwa gha rhuẹ ivbi uwa ne ikpia (a rẹnrẹn ighe ẹ i re Mosis, ighe avbe erha uwa odede ọre ọ suẹn ọnrẹn), te uwa ghi rhuẹ ọmọ okpia vbe Ẹdẹ Ikẹtin. 23Adeghẹ wa rhunmwuda na ghẹ rra Uhi Mosis, rhuẹ ọmọ okpia vbe Ẹdẹ Ikẹtin, vbọzẹ ne uwa na mu ohu mwẹ rhunmwuda ighe I mu ọmwa egbe rran giẹnrẹn vbe Ẹdẹ Ikẹtin? 24Wa ghẹ gha lele erriọ I họn bu ohiẹn, wa gha lele odẹ ẹmwata bu ohiẹn.”
Rẹn Ọrọre Mẹzaia Ra?
25Emwa eso vbe Jerusalẹm keghi kha wẹẹ, “Ọna i re ọmwa ne iran ho ne iran gbe ua? 26Ghe vbe ọ wa guan vbe azagba, a ma miẹn ne ọ rri ọre unu! Wẹ wẹ i re te avbe olotu ghi rẹn vbe ẹmwata ighe rẹn ọrọre Mẹzaia? 27Sokpan, Mẹzaia gha re ọmwa ọkpa ne ọ gha rẹn ehe ne ọ ke rre ẹ i rriọ. Sokpan ma hia rẹn ehe ne okpia na ke rre.”
28Ugbẹn vbe Jesu ghi ma emwa emwi vbe Ọgua Osa, ọ keghi tọn urhu mu kha wẹẹ, “Wa gele rẹn mwẹ, rẹn ehe ne I ke re ra? Sokpan mẹ ma ya ẹtin obọ mwẹ rre. Sokpan ọmwata ọre ọmwa ne ọ gie mwẹ khin. wa ma rẹn ọnrẹn. 29Sokpan mẹ rẹn ọnrẹn, rhunmwuda ehe ne ọ ye mẹ ke gha dee, rẹn ọre ọ gie mwẹ.”
30Iran keghi te gha ho ne iran mu ẹn sokpan, ọmwa ne ọ ye obọ kan rẹn ẹ i rrọọ rhunmwuda ẹghẹ ọre ma he sẹ. 31Sokpan emwa ni bun vbe uwu ẹbu nii keghi ya ẹe yi, iran wẹẹ, “Mẹzaia gha gele re, ọ gha winna iwinna ne ọ vbe kpọlọ sẹ ne okpia na winnaẹn ra?”
Iran Gie Avbe Ọgbalegbe Ne Iran Ya Mu Jesu
32Avbe Farisi keghi họn wẹ emwa do ta ẹmwẹ na vbe ẹkhokho vbe ekpa ẹre, rhunmwuda ọnii, iran, deba avbe igie ohẹn keghi gie avbe ọgbalegbe eso ne iran ya mu Jesu. 33Jesu keghi kha wẹẹ, “I gha ye gu uwa gha rre emwa vbe ovbi ẹghẹ kherhe, vbe iyeke ọnii, I ghi werriegbe bu ọmwa ne ọ gie mwẹ. 34Wa gha gualọ mwẹ sokpan wa i ra miẹn mwẹ, rhunmwuda wa i ra sẹtin rrie ehe ne I ye.”
35Avbe Ju kegha gu egbe guan wẹẹ, “De ehe ne ọ khian gha rrie ne ima i ra na miẹn ọẹn yi? Te ọ khian bu avbe Ju ni rre ẹvbo avbe Grik ra ne ọ ya gha ma iran ne Grik emwi? 36Ọ wọ wẹ, ‘Wa gha gualọ mwẹ sokpan wa i ra miẹn mwẹ,’ kevbe wẹẹ, ‘Wa i sẹtin rrie ehe ne I khian gha ye,’ vbọ yae kha?”
Ẹzẹ Amẹ Ẹfe
37Ikpẹdẹ ne okiekie ọghe emwiukpo ọrọre ogiete ehia. Vbe ẹdẹ ni zẹẹ, Jesu keghi kpaegbe mudia, ọ na davan wẹẹ, “Ọmwaikọmwa ne ohanmwẹ amẹ gbe, wẹ ne ọ bu mwẹ gha dee ne ọ do wọn. ( 38Zẹ vbene ebe ne ọ huanrẹn khare, ‘Ọmwaikọmwa ne ọ ya mwẹ yi, ẹzẹ amẹ ẹfe gha kpe ke uwu orhiọn rẹn ladian.’ ” 39Jesu ta ẹmwẹ na rhunmwuda Orhiọn ne a gha rherhe rhie ne iran ni ya ẹe yi. Ẹghẹ na, a ma he rhie Orhiọn ne ọmwarhọkpa rhunmwuda a ma he tọn Jesu mu la uwu uyi.)
Iwannegbe La Ẹkpo Iran Ne Ju Ni Rre Asẹ
40Emwa ni bun vbe uwu ẹbu nii keghi họn vbe ọ guan ẹmwẹ na, iran wẹẹ, “Vbe ẹmwata, okpia na ọrọre nene Akhasẹ!”
41Emwa ọvbehe vbe kha wẹẹ, “Rọẹn ọrọre nene Mẹzaia!” Sokpan emwa ọvbehe keghi vbe wẹẹ, “Ẹ i re Galili ọre nene Mẹzaia gha kere! 42Ebe khare wẹ uniẹn Devid ọre nene Mẹzaia ra gha khin, kevbe wẹ Bẹtlẹhẹm ne ẹvbo Devid ọre a ra na biẹ ọe.” 43Rhunmwuda ọnii, Iwannegbe keghi la ẹkpo iran rhunmwuda ẹre. 44Eso keghi te ho ne iran mu ẹn, sokpan a ma miẹn ne ọ dobọ muẹn.
A Ma Yayi Avbe Olotu Avbe Ju
45Avbe Olakpa ke dọlegbe bu ogiohẹn ke avbe Farisi gha khian. Iran ghi nọ iran wẹ, “Vbọzẹ ne uwa ma na mu ẹẹn rre?” 46Avbe ọgbalegbe wanniẹn wẹẹ, “A ma he miẹn ọmwa ne ọ guan vbe okpia na ẹdẹ!”
47Avbe Farisi keghi nọ iran wẹẹ, “Te ọ ghi vbe hiẹ uwa mu ru nẹ ra? 48Wa he họn ọkpa vbe uwu avbe olotu ra avbe Farisi ne ọ ya ẹe yi ra? 49Avbe emwa ni gbe ẹbu ye evba na ma rẹn Uhi Mosis rhunmwuda ọnii emwa ne Osanobua fi ẹre unu iran khin!”
50Nikodimọs, ọmwa ne ọ ka ya miẹn Jesu vbe ẹghẹ ọkpa keghi vbe gu iran rre evba, ọ keghi tama iran wẹẹ, 51“Zẹ vbene Uhi ima khare, vbe ẹ i re te a họn ne unu ọmwa nẹ ne avbe rẹn otọ emwi ne ọ ru a i sẹtin bu abe gbe ẹe.”
52Iran wanniẹn tama rẹn wẹẹ, “E Galili wẹ vbe ke rre ra? Ya tie Ebe ne u ghe ẹre, u gha miẹn wẹ akhasẹ ma he ke Galili rre ẹdẹ.”
Currently Selected:
Jọn 7: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
