Luk 15
15
Ohuan Ne Ọ Wiri
(Matiu 18:12-14)
1Ẹghẹ ọkpa, avbe iran ni koko igho uhunmwu kevbe avbe ẹwobi emwa keghi do gha danmwehọ Jesu. 2Avbe Farisi kevbe iran ni ma emwa Uhi kegha gui ẹzọ uwu unu wẹ, “Ọkpia na ghi wa gha miẹn ẹwobi emwa yi, iran ghi gha gba rri evbare.” 3Rhunmwuda ọnii, Jesu keghi kpa itan na ma iran wẹẹ: 4“Gie a kha ighe ọkpa vbe uwu uwa mwẹ ohuan iyisẹn, ọkpa vbọ na wii, de emwi ne ọ gha ru? Ọ ghi sẹ ọkpairrọvbiyisẹn ni dekẹe rae ye ehe ne iran na rria, ọ ghi ya gualọ ohuan ne ọ wiri ni rhinrin ọ te do miẹn ọẹn. 5Ọ gha ghi miẹn ọẹn nẹ, ọ ghi ghọghọ ua, ọ ghi mu ẹn yan izabọ. 6Ọ ghi mu ẹn gha die owa, ọ ghi tie avbe ọse kevbe ẹdogbo ẹre si koko, ọ ghi tama iran wẹẹ, ‘Wa ghọghọ mẹ, I miẹn ohuan mwẹ ne ọ wiri!’ 7Ne I tama uwa, erriọ ọ wa vbe ye zẹ, ọmwa orukhọ ọkpa ne ọ fi ekhọe werriẹ, ọ re a rhunmwuda ẹre ghọghọ vbe ẹrinmwi sẹ ọkpairrọvbiyisẹn ni ma fi owẹ dọn.
Igho Ne Ọ Wiri
8“Ra deghẹ okhuo ne ọ mwẹ ikọbọ igbe mu ọkpa fua vbọ, vbe ọ gha ru hẹ? Ọ ghi rhu ukpa, ọ ghi kpolo owa ẹre hia, ọ ghi gbe aro ke otọ zanzan ehe hia ọ te miẹn ọẹn. 9Ọ gha ghi miẹn ọẹn nẹ, ọ ghi tie avbe ọse kevbe ẹdogbo si koko, ọ ghi tama iran wẹẹ, ‘Wa ghọghọ mẹ, I miẹn igho mwẹ ne ọ te wii.’ 10Ne I tama uwa, erriọ ọre ọyẹnmwẹ sẹ avbe odibo Osanobua ye ọmwa orukhọ ọkpa ne ọ fi werriẹ.”
Ọmọ Ne Ọ Wiri
11Jesu keghi ye gha gu iran guan, ọ wẹẹ, “Okpia ọkpa ne ọ mwẹ emọ eva kegha rrọọ. 12Ne kherhe ne ọ rrọọ keghi tama erha ẹe wẹẹ, ‘Evbavba, viọ avbe emwi ne ọ sẹ mwẹ egbe mẹ.’ Erha ẹe keghi rhunmwuda ọnii ghae emwi ne emọ eva nii. 13Vbe iyeke ikpẹdẹ eso, nekherhe ne ọ rrọọ keghi khiẹn emwi ne ọ se ọre obọ, ọ na mu igho ẹre, ọ na kpao vbe owa. Ọ na gha rrie ẹvbo ne ọ rrei ẹsẹse, ọ na ya ye uyinmwẹ ọpakharha lo ehia rhia. 14Ọ ghi lo ehia fo nẹ, ukhunmwu nọkhua keghi do fi la otọe ni hia, ọ keghi gha rre ivbabọ. 15Ọ keghi ya gha winna ne ovbi ẹvbo nii ọkpa. Ọ nii na wẹ ne ọ ya gha gbe aro ghe avbe esiebo. 16Ọ te khọn rẹn ne ọ gha rri ikpakpalọ ne a ya koko avbe esiebo nii ne ẹko vuọn sokpan ọ ma miẹn ne ọ rhie nẹẹn. 17Vbe okiekie, aro keghi do ru ẹe gboo, ọ na kha wẹẹ, ‘Avbe emwa ni winna ne erha mwẹ hia miẹn gha zẹre zẹ kọ, ghe mwẹ, ohanmwẹ ra gbe mwẹ uan vbe emwa na. 18I ra do bu erha mwẹ gha khian ne I ya tama rẹn wẹẹ, Evbavba, I rukhọ ghe Osanobua kevbe uwẹ nẹ. 19I ma ghi kei ne a gha tie ẹre ovbi uẹ, ka mwẹ ba emwa ni winna nuẹn.’ 20Ọ keghi kpao bu erha ẹe gha khian.
“Urria gbaan ọre ọ he ye vbe erha ẹe dẹghe ẹre, ekhọe nọẹn ruan, ọ na rhulẹ bu ẹre, ọ gba ẹe ginna egbe, ọ na mu ẹre unu hiẹnhien. 21Ovbi ẹre keghi tama rẹn wẹẹ, ‘Evbavba, I rukhọ ghe Osanobua kevbe uwẹ nẹ, I ma kei ne a gha ye gha tie ẹre ovbi uẹ ọvbehe.’ 22Sokpan erha ẹe keghi datie avbe eguọmwadia ẹre, ọ keghi tama iran wẹẹ, ‘Wa zẹgiẹ viọ avbe ẹwu ne ọ maa sẹ rre ne a viọ ye ọe, wa rhie oroka ye ẹre obọ, wa viọ ibata ye ẹre owẹ. 23Wa mu ẹmila abẹgbe nii, wa gbe ẹe ne ima ya dugie ọyẹnmwẹ. 24Rhunmwuda, ovbi mwẹ na te wu, ghe ighẹ ọ ye rre agbọn, ọ te wii, a miẹn ọẹn nian.’ Iran keghi gele suẹn gha rrie evbare.
25“Vbe ẹghẹ ne a kha na, ovbi ẹre ne ọdiọn ye rre ugbo. Ugbẹn vbe ọ ghi die owa, ọ ghi sẹ ọkpẹn owa, ọ keghi họn urhu ema kevbe iku. 26Ọ keghi tie ọkpa vbe uwu avbe ọkpọmwa, ọ nọ rẹn wẹẹ, ‘Vbe iran ru yi?’ 27Ọkpọmwa ni tama rẹn wẹẹ, ‘Ọtuẹn werriegbe rre, ọre erha a na gbe ẹmila abẹgbe rhunmwuda ighẹ ọ he ghi miẹn ọẹn, kevbe wẹ, egbe rran rẹn.’ 28Ohu keghi mu ọtiọnrẹn ne ọdiọn sẹrriọ wẹ ọ ma ghi la owa, erha ẹe keghi bu ẹre gha dee, ọ na do rinmwiaẹn ne ọ la owa. 29Rẹn keghi wanniẹn tama erha ẹe wẹẹ, ‘Ghe ẹghẹ ni kegha winna lele uẹ zẹ vbe ọviẹn, I ma he he uhunmwu ye uẹ obọ ẹdẹ. De emwi ne u he rhie mẹ? U ma he mu ẹwe ọkpa mẹ ya le evbare ne ihomwa. 30Sokpan ovbi uẹ na ne ọ ya duẹ igho ẹre ua ne avbe ebabotu ghi rre nian, u gbe ẹmila abẹgbe nẹẹn!’ 31Erha ẹe wanniẹn tama rẹn wẹẹ, ‘Ovbi mwẹ, owa ọre u gunmwẹ ye ẹghẹ hia, emwi hia ne I mwẹ, ọ wuẹ nọ. 32Sokpan ọ kere ne ima gha re ne a gha ghọghọ, rhunmwuda ọtuẹn na te wu, sokpan, ọ rre agbọn nian, ọ te wii, sokpan a dọlọ miẹn ọẹn.’ ”
Currently Selected:
Luk 15: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
