Luk 20

Ẹmwẹ Deghẹ Jesu Mwẹ Asẹ

(Matiu 21:23-27; Mak 11:27-33)

1Ẹdẹ ọkpa, Jesu kegha rre uwu Ọgua Osa, ọ na gha ma emwa emwi, ọ kegha kpe orhu Arriọba Osanobua, iran ne igie ohẹn, iran ni ma emwa Uhi kevbe avbe ediọn keghi bu ẹre gha dee. 2Iran tama rẹn wẹẹ, “Tama ima, de asẹ ne u mwẹ ne u ya ru avbe emwi na? Gha ọ rhie asẹ nuẹn ya gha ru ẹe?”

3Jesu wanniẹn tama iran wẹẹ, “Mẹ gha vbe nọ uwa ọta ọkpa, wa tama mwẹ, 4Asẹ ne Jọn ya samẹ ne emwa, ọmwa ne agbọn ọre ọ rhie ẹre nẹẹn ra Osanobua?”

5Iran na gha gbe ẹmwẹ na yo gbe ẹe rre wẹẹ, “Vbe a gha tae hẹ yi? Ma gha kha wẹẹ, ‘Osanobua ọ rhie nẹ’ rẹn gha tama ima wẹẹ, ‘Vbọzẹ ne uwa ma ghi na ya Jọn yi?’ 6Sokpan ma gha kha wẹẹ, ‘Ọmwa ne agbọn ọre ọ rhie ẹre nẹẹn,’ te iran ni bima ye emwa na filo okuta gbele ima uan, rhunmwuda ekhọe iran hia muẹn ighẹ akhasẹ ọre Jọn khin.” 7Rhunmwuda ọnii iran wanniẹn tama rẹn wẹẹ, “Ma ma rẹn ọmwa ne ọ rhie asẹ nẹẹn.”

8Jesu keghi khama iran wẹẹ, “Mẹ i vbe tama uwa ọmwa ne ọ rhie asẹ mẹ ya gha ru avbe emwi na khekherriọ.”

Itan Iran Ni Gbe Aro Ghe Ugbo

(Matiu 21:33-46; Mak 12:1-12)

9Jesu keghi kpa itan na ma iran wẹẹ, “Okpia ọkpa keghi do mu ugbo emwiokọ, ọ keghi mu ne emwa gha gbe aro ghe nẹẹn. Ọ kegha rrie owa, ọ kpẹe vbọ ẹsẹse. 10Ọ ghi sẹ ẹghẹ ne a ya rhọ emwiokọ, ọ keghi gie ọviẹn ọnrẹn ọkpa ne ọ ya miẹn iran emwiorhọ ne ọ sẹ irẹn egbe viọ rre. Sokpan iran ni gbe aro ghe ugbo nii keghi gbe ọviẹn ni, iran na khu ẹe, ọ na fiabọ gha rrie. 11Rẹn keghi vbe gie ọviẹn ọvbehe, sokpan iran ni gbe aro ghe ugbo nii keghi vbe gbe ẹe, iran ru ẹre emwi oya, iran keghi khu ẹe, ọ na vbe fiabọ gha rrie. 12Ọ keghi vbe gie ọviẹn ukpogieha, iran ni gbe aro ghe ugbo nii keghi kuan rẹn, iran na ya mu fua. 13Ne ọ yan ugbo keghi kha wẹẹ, ‘Vbe i a gha ru emwi na hẹẹ? I gha do gie ovbi mwẹ ne ọ ghan bu iran, ẹ i mwẹ iran ma daa nẹ.’ 14Sokpan ugbẹn vbe iran ni gbe aro ghe ugbo ghi wa bẹghe ẹre, iran keghi gba tae wẹẹ, ‘Ghe ovbi e ne ọ yan ugbo. Wa gia gbe ẹe rua, ne ugbo khian ọghomwa.’ 15Iran keghi si ẹe hin uwu ugbo rre, iran na gbe ẹe rua.”

Jesu keghi nọ iran wẹẹ, “Vbe uwa yayi ighẹ ne ọ yan ugbo gha ru iran hẹ? 16Ọ gha re, ọ ghi do gbele iran uan, ọ ghi mu ugbo ni ne emwa ọvbehe gha gbearoghe.” Avbe emwa nii ghi họn ẹmwẹ na, iran wẹẹ, “Awua ne Osanobua.”

17Jesu keghi ghe iran, ọ nọ iran wẹẹ, “De emwi ne a ya itan na kha yi i?

“ ‘Okuta ne iran ni bọ owa wẹ ẹ i maa

Ọre ọ ghi do khian okuta ama miẹn a i ru.’

18Ọmwa gha dekun okuta nii, ọ ghi vbiolo ua sokpan okuta ni gha deyan ọmwa, ọ ghi rẹn khẹn ọẹn ruan.”

Ẹmwẹ Igho Uhunmwu Ne A Zẹ

(Matiu 22:15-22; Mak 12:13-17)

19Iran ni ma emwa Uhi, kevbe avbe igie ohẹn keghi te ra wa mu Jesu vbe evba rhunmwuda iran rẹnrẹn ighe rhunmwuda iran ọre ọ na kpa itan ni, sokpan ohan avbe emwa ni rre evba kegha mu iran. 20Iran keghi rhunmwuda ọnii gha khẹ ẹghẹ ne ọ kere. Iran keghi rhie igho ne emwa eso ne iran mu akpa ọmwata yọ bu Jesu gha khian ya gualọ ẹre ẹmwẹ ne unu ne iran miẹn ehe na rhie ẹre yan asẹ kevbe ẹtin Ne ọ khaemwisẹ obọ. 21Avbe ọrhẹ ni keghi khama Jesu wẹẹ, “Ọmamwaemwi, ma rẹnrẹn ighẹ emwi ẹmwata ne ọ gbae ọre u ma emwa ẹre. Ma rẹnrẹn ighẹ osi ẹrrẹ i siọ, sokpan ẹmwata ne ọ rre vbene Osanobua mwamwa ẹmwẹ emwa ne agbọn yi ọre u ma emwa re. 22Tama ima, vbene Uhi ima khare, a i ghẹ ru nọ vbe a gha zẹ igho uhunmwu gie Nọgbaisi e Rom ra ẹ i rọre?”

23Sokpan Jesu rẹn ehe ne iran ghae yi, ọ keghi tama iran wẹẹ, “Wa rhie ikọbọ ọkpa mẹ vba. 24Gha ọ yan ugbaro kevbe eni ne a sa yọ na yi?”

Iran wanniẹn tama rẹn wẹẹ, “Ọghe Nọgbaisi nọ.” 25Rhunmwuda ọnii, Jesu tama iran wẹẹ, “Wa rhie emwi ne ọre ọghe Nọgbaisi nẹẹn ne uwa vbe rhie ne ọre ọghe Osanobua naẹn.”

26Iran ma miẹn ẹmwẹ ọkpa kẹkan de obọ mu vbe ẹmwẹ ọnrẹn sirra emwa ni ne evba, iran ghi na rhie unu re, ewanniẹn ne ọ rhie ne iran keghi kpan iran odin.

Ẹmwẹ Arhiọkpaegbe Vbe Orinmwi

(Matiu 22:23-33; Mak 12:18-27)

27Avbe Sadusi eso keghi bu Jesu gha dee. (Iran na ọre ọ tae ighẹ a i rhiọkpaegbe vbe orinmwi.) Iran nọ rẹn wẹẹ, 28“Ọmamwaemwi. Mosis ọre ọ gbẹn ọẹn ye otọ ne ima wẹẹ, ‘Adeghẹ okpia wu sẹ amwẹ rae vbe ọ ma he kẹ ọre biẹ, ne ọtiọnrẹn si okhuo ni ẹgbẹ ne iran miẹn ehe na biẹ ne ne ọ wu ni.’ 29Ẹghẹ ọkpa, etẹn ikpia ihinrọn kegha rrọọ. Ne ọdiọn ne ọ rrọọ rhie okhuo, ọma he ke ọre biẹ, ọ na wu. 30Ne ogieva keghi rhie okhuo nii. 31Kevbe ne ọ gieha, emwi ọkpa ni ọre ọ rruan iran ihinrọn nii, ọma he kẹ iran biẹlẹ vbe iran wulo, 32vbe okiekie ehia, nene okhuo keghi vbe wu. 33Ẹn hẹn, ọ gha sẹ ẹdẹ ne iran ni wulo gha dọlegbe rhiọrre, de amwẹ ọmwa ne ọ ghẹ ghi gha khin? Iran ihinrọn nii ka rọnmwẹ ọẹn gba obọ nẹ!”

34Jesu wanniẹn tama iran wẹẹ, “Ikpia kevbe ikhuo ni rrọ ẹghẹ na ọre ọ ru orọnmwẹ. 35Sokpan avbe ikpia kevbe ikhuo ne ọ kere ne a huẹn kpaegbe vbe agbọn ne ọ dee, iran i ru orọnmwẹ. 36Iran ye vbe avbe odibosa, iran i wulo. Ivbi Osanobua iran khin, rhunmwuda a huẹn iran kpaegbe vbe orinmwi nẹ. 37Mosis tobọ ẹre wa zẹ ẹmwẹ na uke ighe a gha huẹn avbe orinmwi kapegbe. Vbehe ne ọ na guan kan oha ne ọ mu vẹn, ọ tie Nọyaẹnmwa ‘Osanobua Ebraham, Osanobua Aizik kevbe Osanobua Jekọb.’ 38Ọna rhie maa ighe Osanobua eni rre agbọn nọ, ẹ i re ọghe eni wulo, rhunmwuda emwa ni rre agbọn ọre ehia khin vbe obọ ẹre.”

39Eso vbe uwu iran ni ma emwa Uhi keghi kha wẹ, “Ọmamwaemwi, ẹmwata u tae.” 40Ohan ma ghi gie iran dọlegbe nọ Jesu ọta ọvbehe.

Ẹmwẹ Mẹzaia

(Matiu 22:41-46; Mak 12:35-37)

41Jesu keghi khama iran wẹẹ, “Vbe iran na tae hẹ yi ighe ovbi uniẹn Devid ọre Mẹzaia ra gha khin? 42Rhunmwuda Devid tobọ ẹre tae vbe ebe Psalm wẹẹ,

“ ‘Nọyaẹnmwa tama Nọyaẹnmwẹ wẹẹ:

Tota yọ mwẹ obọ erha ọmwa vbe emwa na

43I te do ye avbe eghian an ru

ukhuerhe ne u viọ owẹ yan.’

44Devid tie ẹre Nọyaẹnmwa, vbe ne ne Mẹzaia ghẹ ghi na vbe gha re ovbi uniẹn Devid hẹẹ?”

Jesu Wẹ Ne A Gha Ba Egbe Vbe Egbe Enimaemwa Uhi

(Matiu 23:1-36; Mak 12:38-40)

45Ugbẹn vbe emwa hia ghi ma ye evba gha danmwehọ ẹre, Jesu tama avbe erhuanegbe ẹre wẹẹ, 46“Wa gha ba egbe vbe egbe iran ni ma emwa Uhi ni hẹ yo hẹ rre, ke iran kevbe agbada ne gurọọ, iran ghi vbe gha ho ne a gha kpe tuẹ iran vbe ẹki, aga iran ni gbakhia ọre iran ho ne iran gha tota yi vbe Ọgua ediọn kevbe ehe ne a na gbe ẹbu evbare. 47Iran ni miẹn ehe na la avbe ẹgbẹ egbe, iran keghi gbe iran miẹn iran owa iran, iran ghi gha na erhunmwu ne ọ taẹn ọghe ne a ba bẹghe mwẹ. Iran ọre a ra rri ọre oya ne ọ sẹ re vbe ehia.”

Currently Selected:

Luk 20: EDO96

Highlight

Copy