Luk 23

Jesu Vbe Odaro Pailet

(Matiu 27:1-2, 11-14; Mak 15:1-5; Jọn 18:28-38)

1Vbene iran wa ya rre evba hia keghi kpaegbe, iran na mu Jesu bu Pailet gha khian. 2Iran keghi ba ẹre ifi ẹzọ wẹ, “Ma mu okpia na vbe uwu ehe ne ọ na ruẹn ẹmwẹ ye emwa ima ẹko, ọ wẹ ne iran ghẹ ghi ha igho uhunmwu gie Nọgbaisi, ọ wẹ rẹn tobọ irẹn ọrọre Kristi ne Ọba.”

3Pailet nọ rẹn wẹẹ, “Wẹ ọrọre ọba avbe Ju ra?”

Jesu wanniẹn wẹẹ, “Wẹ ọre ọ tae.”

4Pailet keghi tama avbe igie ohẹn kevbe emwa ni gbe ẹbu ye evba wẹẹ, “I ma miẹn emwi ne I gha gu bu ohiẹn gbe ọmwa na.”

5Sokpan iran dọlegbe tua unu muẹn wẹẹ, “Ọ ra ya emwi ne ọ ma emwa re si olighi ye ẹvbo. Galili ọre ọ na suẹn, ọ gbe Judia dunmwu nẹ, ọre ọ na vbe gha die edinran na.”

Jesu Vbe Odaro Hẹrọd

6Pailet ghi họn ẹmwẹ na, ọ keghi nọ iran wẹẹ, “Ovbi e Galili ọre okpia na khin ra?” 7Ugbẹn vbe ọ ghi họn ighẹ ovbi ọkpa vbe uwu avbe ẹvbo ne Hẹrọd gbe aro ghe ọre Jesu khin, ọ keghi rhie ẹre bu Hẹrọd rhunmwuda rẹn keghi wa vbe rre Jerusalẹm vbe ẹghẹ na. 8Ugbẹn vbe Hẹrọd miẹn Jesu, ẹko keghi rhiẹnrhiẹn ọẹn ẹsẹse, rhunmwuda ọkpẹre ne ọ kegha ho ne iran miẹn Jesu. Ọ keghi te rhie aro yọ ighẹ Jesu gha winna iwinna ọyunnuan ne irẹn ghe. 9Rhunmwuda ọnii Hẹrọd keghi nọ Jesu ọta ni bun sokpan Jesu ma zẹ ẹmwẹ ọkpa wanniẹn ọẹn. 10Avbe igie ohẹn kevbe iran ni ma emwa Uhi keghi ladian, iran keghi ba Jesu ifi ẹzọ. 11Hẹrọd ke ẹe kevbe ivbiyokuo ẹre keghi ya Jesu gbe ogiẹ, iran keghi ru ẹre emwi oya. Iran mu ẹwu ne mose mose ye ọe, iran keghi dọlegbe rhie ẹre bu Pailet. 12Ẹdẹ ne ẹdẹrriọ Pailet kevbe Hẹrọd keghi khian ọse vberriọ oghian egbe ọre iran te ka khin de yi.

Iran Bu Ohiẹn Uwu Gbe Jesu

(Matiu 27:15-26; Mak 15:6-15; Jọn 18:39—19:16)

13Pailet keghi tie avbe igie ohẹn, avbe olotu kevbe avbe emwa ni si koko. 14Ọ tama iran wẹẹ, “Wa mu okpia na bu mwẹ rre wẹ ọ ruẹn ẹmwẹ ye emwa ẹko. Sirra uwa hia ọre I na gualọ otọ ẹmwẹ na, I ma miẹn ne ọ ginna ẹn vbe ẹzọ dan hia ne uwa gu ẹe gui. 15E Hẹrọd tobọ ẹre ma vbe miẹn abe bu gbe ẹe rhunmwuda, ọ rhie ẹre dọlegbe bu ima gha dee. Emwi ọkpa ne okpia na ru ne a gha rhunmwuda ẹre bu ohiẹn uwu gbe ẹe ẹ i rrọọ. 16Rhunmwuda ọnii, I ra gbe ẹre asan ne I zẹ ọre obọ.”

[ 17Ẹghẹ emwiukpo Alagberra hia ọre Pailet ya fan oleghan ọkpọkpa fua ne iran.] 18Emwa ni gbe ẹbu ye evba hia keghi wa datu wẹẹ, “Gbe ẹe rua ne u fan Barabbas fua ne ima!” ( 19Barabbas na, te a muẹn ye eghan ba ẹmwẹ otighi isọtẹ vbe ore ẹvbo, kevbe ba izigha ne ọ de.)

20Pailet keghi te ho ne ọ fan Jesu fua, ọ keghi dọlegbe gu emwa ni gbe ẹbu ni guan. 21Sokpan iran keghi van muẹn wẹẹ, “Kan rẹn mu ugbugbe, kan rẹn mu ugbugbe.”

22Pailet keghi tama iran ukpogieha wẹẹ, “Sokpan de emwi dan ne ọ ru? Mẹ ma miẹn emwi ne ọ ru ne a gha gu gbe ẹe rua. I gha gbe ẹre asan ne I fan ẹn fua.”

23Sokpan iran hia keghi wa gha go gboo wẹ ne ọ kan Jesu mu erhan ugbugbe. Vbe okiekie obọ ugomwẹ ne iran go keghi ke okhunmwu. 24Rhunmwuda ọnii Pailet keghi bu ohiẹn Jesu zẹ vbene iran ho. 25Ọ keghi fan ọmwa ne iran ho fua ne iran, ọmwa ne a mu ye eghan rhunmwuda otighi kevbe izigha, ọ keghi rhie Jesu ye iran obọ ne iran ya ruẹe vbene iran ho.

A Kan Jesu Mu Ugbugbe

(Matiu 27:32-44; Mak 15:21-32; Jọn 19:17-27)

26Iran keghi mu Jesu kpao, iran ghi sẹ odẹ, iran keghi khian vba okpia ọkpa ne a tie ẹre Saimọn, ovbi e Sairin, ne ọ ke igue die adesẹ ore ẹvbo. Iran keghi dekun ẹnrẹn mu, iran mu ugbugbe nii yan rẹn ne ọ gha muẹn lele Jesu odieke dee.

27Emwa ni bun keghi wa bi lele ẹre iyeke, ikhuo eso keghi rrọọ, iran kegha viẹ, iran kegha go lele ẹe khian. 28Jesu keghi fi akhọe ghe iran, ọ wẹẹ, “Ikhuo Jerusalẹm! Wa ghẹ viẹ mwẹ, wa gha viẹ egbe uwa kevbe ivbi uwa. 29Rhunmwuda, ẹdẹ dee ne emwa gha kha wẹẹ, ‘I ma kan iran ne ikhuo ne ẹ i mwẹ emọ, iran ni ma biẹ hiehie kevbe iran ni ma koko emọ!’ 30Ẹdẹ ne ẹdẹrriọ ọre emwa gha khama oke nekhua wẹẹ, ‘De rhu ima!’ kevbe avbe oke negiẹrẹ wẹẹ, ‘Gue ima muotọ.’ 31Rhunmwuda a ghi ru emwi vbe nian vbe egbe erhan ọgbọn, vbe ọ gha ye hẹ ne erhan ne ọ kae?”

32Iran keghi viọ arhin eva ọvbehe ni re izigan, ne a ya gbele iran ba Jesu. 33Iran ghi sẹ ihe ọkpa ne a tie ẹre “Ugboloko Uhunmwu,” iran keghi kan Jesu mu ugbugbe, kevbe izigan eva nii, ọkpa vbe obọ erha ọmwa kevbe nọkpa vbe obọ iye ọmwa. 34Jesu keghi kha wẹẹ, “Evbavba yabọ iran rhunmwuda iran ma rẹn emwi ne iran ru.”

Iran keghi yan uta ye ukpọn rẹn, iran na gha ẹre ne egbe. 35Emwa mudia gha ghe ẹre vbe avbe eniwanrẹn e Ju yae gbe ogie wẹẹ, “Ọ sẹtin miẹn emwa ọvbehe fan, giee miẹn egbe ẹre fan nian deghẹ rẹn ọre ọ gele re Mẹzaia ne Osanobua zẹ!”

36Avbe ivbiyokuo keghi vbe yae gbe ogiẹ, iran bu ẹre gha dee, iran keghi mu ayọn ne ọ kaẹn nẹ. 37Iran keghi khama rẹn wẹẹ, “Deghẹ wẹ ọrọre ọba avbe Ju miẹn egbe ruẹ fan!”

38Iran keghi gbẹn emwi mu ye odukhunmwu ẹnrẹn, “Ọna ọrọre Ọba avbe Ju.”

39Ọkpa vbe avbe oyi ne a kaẹn ye evba keghi vbe gha zan rẹn wẹẹ, “Ẹ i re uwẹ ọrọre Mẹzaia? Miẹn egbe ruẹ fan ne u vbe miẹn ima fan.”

40Sokpan nọkpa keghi guẹe gui wẹẹ, “Wẹ i mu ohan Osanobua? Ghe, oya ọkpa ọre a rri ima hia re. 41Ọ ghe ima wa kei rhunmwuda emwi ne ọ kei ne emwi ne ima ru ọre iran rhie ne ima, sokpan rẹn ma ru emwi rhọkpa khọọ.” 42Rẹn keghi khama Jesu wẹẹ, “Jesu, ẹghẹ ne u gha na rre zẹ vbe Ọba, u ghi ye mwẹ rre.”

43Jesu keghi tama rẹn wẹẹ, “I tama ruẹ nian, ẹrẹna, u gha gun mwẹ gha rre Paradais.”

Uwu Jesu

(Matiu 27:45-56; Mak 15:33-41; Jọn 19:28-30)

44Ọ ghi sẹ odẹ ẹgogo iweva, ovẹn ma ghi yunmwu, ebiebi keghi so gba ẹvbo hia rhinrin ya sẹ ẹgogo eha. 45Ukpọn ne a ya fian Ọgua Osa ye ihe eva keghi wa va eva. 46Jesu keghi ya urhu ne ọ la datu wẹẹ, “Evbavba, obọ ruẹ ọre I rhie orhiọn mwẹ yi!” Ọ ghi tae vberriọ nẹ, ọ keghi kpan udu.

47Ọkaokuo ghi miẹn emwi ne ọ sunu, ọ rho Osanobua vbe uyi wẹẹ, “Vbe ẹmwata ọmwa esiesi te nọ.”

48Iran ni mudia vbe evba gha ghe ughe ghi miẹn emwi ne ọ sunu, iran keghi ye obọ gbe ẹwẹe gha rrie. 49Iran ni rẹn Jesu ẹse, kevbe avbe ikhuo eso ni lele ẹe ke Galili gha dee keghi mudia vbe urria gha ghe emwi na hia.

Irorinmwi Jesu

(Matiu 27:57-61; Mak 15:42-47; Jọn 19:38-42)

50-51Okpia ọkpa keghi rrọọ ne a tie ẹre Josẹf, ovbi ẹvbo ne a tie ẹre Arimatia adazẹ ne ekhọe esi ọre nọ, ọ kevbe, diakhẹ ẹghẹ ne Arriọba Osanobua gha ya rre. A gha rhe miẹn ighe ọkpa vbe uwu Iko iran ni bu ohiẹn nọ, ọma ye egbe ba iran vbe ẹmwẹ ne iran tae kevbe emwi ne iran ru. 52Rẹn keghi bu e Pailet gha khian, ọ na wẹ ne a mu ikun Jesu ne irẹn. 53Rẹn keghi mu ikun ẹnrẹn tuorre, ọ keghi ya ukpọn eto ovbiohuẹ nọfua gbalọ ẹe, ọ keghi wa ẹre ye idin ne a fian ye uwu okuta, idin na keghi re ne a ma he mu orinmwi yi ẹdẹ. 54Ọ keghi re ẹdẹ ẹdẹ imuegbeyotọ, ẹdẹ ne ọ karo ne Ẹdẹ Ikẹtin ẹdẹ ne ọ lele ẹdẹ Uzọla nekherhe, te Ẹdẹ Ikẹtin ghi ra suẹn.

55Avbe ikhuo ni lele Jesu ke Galili rre keghi lele Josẹf gha khian, iran miẹn idin nii kevbe vbene a wa Jesu yọ hẹẹ. 56Iran na dọlegbe gha rrie owa, iran keghi ya le ori ne ọ winhin kevbe emwi ne ọ winhin ọvbehe ne a ra ya wo egbe Jesu, ọ ghi sẹ Ẹdẹ Ikẹtin, iran keghi kẹtin zẹ vbe ne Uhi khare.

Currently Selected:

Luk 23: EDO96

Highlight

Copy