Jọn 13

Jizọs Ori Ọḅụduaapụ Ḅụọ Sịrịm

1Éné ḅa anịị Sáḅáḅọ́rọ́ Álálị ma. Jizọs nimim ḅẹ́ sáá ma láamam ọ mịị tuminikiri ma wáriso sị Daḅọ ma dámámuu. Ori ọrẹ a túminị́, tuminikiri fịnịapụ ma ḅẹ́lẹ́mamaá ḅara ma, ori n ḅẹlẹma muu kunema lam.

2Jizọs na ori ọḅụduaapụ ḅupiri fị́nyẹ kiri ḅụ imi, ẹ́kpẹ́dua ma pịghị Judas, Saimọn Isịkarọtị tụwọ timi saghịmam ḅẹ́ ọ Jizọs dẹrịfị. 3Jizọs nimim ḅẹ́ Daḅọ ma nyẹ gonyẹ́ gonyẹ́ saghị ọ ḅarabie suamam, ḅẹ́ ọ Tamuno ma ḅara saghịḅom ọ pịghị so Tamuno ma dámámụarị; 4ọ warị saghị sẹ́ fị́nyẹ kiri ma ḅụ, ọgọ́nọ́ ọ suabịtẹ ma síi, mingi biri bịtẹ pa o kundu kpọ. 5Anịma ḅọ́rọ́ sáá, o mingi sara ọkọ bie suam sị ori ọḅụduaapụ ḅụọ sịrị, wárị ọ pa kundu kpọ mingi biri bịtẹ ma pa anị síi.

6O ḅo Saimọn Pita láa sáá, Pita ọ ḅẹm, <<Kị́nị́nyánáḅọ, í i ḅụọ siri bẹ?>>

7Jizọs pagharam, <<A mịẹarịnyẹ ị akanyaḅogha mị́sa, kụ́ma sa ma láa sa ịrị anị akanyaḅobẹm.>>

8Pita pagharam, <<Enrrh enrrh, jẹ́ éné jẹ́ éné ịrị i ḅụọ sịrịbịgha.>>

Jizọs pagharam, <<A ị ḅụọ sịrịgha nḅẹḅẹ́ ịrị na ị nana wa mịẹgbólóma nyẹ nyánágha.>>

9Saimọn Pita warị pagharaa, <<Anịsáa Kị́nị́nyánáḅọ, i ḅụọ ngéréghaa kụ́ma i ḅara na i sịbị na!>>

10Jizọs pagharam, <<Mingi birimaa ḅo gonyẹ́ gonyẹ́ oju fiafiam, n ḅọ ḅụọ ngéré anịị n ḅọ sịịrị bẹnyẹ. Ọ fiafiam, kụ́ma ọ mịnị kị́nị́mamgbagha.>> 11Tegó Jizọs nimisomam ọ dẹrịfị bẹḅọ, anị ọ go dughonyẹ ḅẹ́ kị́nị́mamgba fiafiagha. 12Ori nna ḅụọ ma sịrịfama sáá, ori ọrẹ bịtẹ suam sị pịghịma ori ịkasị fịnị angaá ḅom nyẹ́fị kiri ma ḅụ. Ọ warị n gbíla, <<Ọmịnị akanyaḅo mị́sa a ọ ḅụ mịẹnyẹ?>> 13<<Ọmịnị Nyẹ́dieḅọ anịgha Kị́nị́nyánáḅọ pa i sim,>> ọ karakáram, anịị a fịnị ḅara. 14Mị́sa ịrị ọmịna Nyánáḅọ na ọmịna Nyẹ́dieḅọ, ọmịna ḅụọ sịrịmam, ọmịnị sọ jụghọ jụghọ ḅụọ sịrị. 15A anị kịkamanyẹ mịẹ pa ọ diemam, ọmịnị sọ a mịẹ ọ pịrịmaá ḅara ma mịẹbẹ ḅara. 16A karakárányẹ ma dugho ọ pịrịm, ómóniḅọ ma dụḅa ọ nyanaḅọ ma nẹngịgha, anịgha oku muḅọ ma dụḅa oku ma fịrịma ḅọ nẹ́ngị. 17Mị́sa ọ mịnanyẹ ma nimimáa sáá, nnị ọ karịibimabẹm, ọ ḅọ́rọ́ anị mịẹmịẹ.

Jizọs Ori Dẹrịfị Gbolomanyẹ Dughom

18<<A ọmịnị kị́nị́mamgba ḅẹgha; a nimim a sẹlẹakịmaapụ. Kụ́ma mịma anị pa mịẹsị tọ́ndiri ma ḅoo kiriakị bẹ ḅara: dughonyẹ ḅẹẹ, <Ịrị na nyẹ́fị fị ḅọ ma pịghị ị́yẹ́ iruonaḅọ sọmam.>

19<<A dugho ọ pịrịarị mị́sa na anị kiriakịgha sáá, anị kiriakị sáá, o mininibẹm ḅẹẹ, Ịrị Anịị Ịrị Ma. 20A karakárányẹ ma dugho ọ pịrịarị, a fịrịmaḅọ ma dakóróma ḅọ gonyẹ́ gonyẹ́ i dakórómam pịghị i dakóróma ḅọ gonyẹ́ gonyẹ́ i fịrịmaḅọ ma dakórómam.>>

Jizọs Dughom Bẹ́ Nnị Ọ Dẹrịfị́bẹm

(Mat 26.20-25; Mak 14.17-21; Luk 22.21-23)

21Jizọs mịma dugho fama sáá, ọ tẹ́mẹ́ ḅụḅáláḅálá pa ọ pịrịm ọ wárị dugho pághámá ḅẹẹ, <<A karakárányẹ ma dugho ọ pịrịm, ọmịna ḅụ gbẹ́rẹ́ḅọ i Dẹrịfị́bẹm.>>

22Ori ọḅụduaapụ tọ́rụ pịghị jụghọ jụghọ dighim, kórómaarị ọ ḅẹ́arịḅọ. 23Ọḅụduaapụ ḅụ gbẹ́rẹ́ḅọ Jizọs ḅẹlẹma ḅọ ma, kpọrọfịnịarị Jizọs angásá. 24Saimọn Pita warị ḅara pa mịị ọḅụduaḅọ ma mịẹ ḅẹẹ, <<O gbíla ọ ḅẹ́arịḅọ.>>

25Ori Jizọs ḅụ sẹrẹrẹm sị o gbíla, <<Kị́nị́nyánáḅọ, ọ tụọ i ḅẹ́arịḅọ?>>

26Jizọs pagharam, <<A mịị fịtúrú ma pa pịrịbẹḅọ a anị suu sa bọlị bie.>> O fịtúrú ma suu sa, ori anị pa Judas Isịkarọtị, Saimọn tụ́wọ pịrịm. 27Judas fịtúrú ma daakị gbẹ́rẹ́kiri, Satanị ori oju bie sọm.

Jizọs warị ọ ḅẹẹ, <<Ị mịẹ dọghụnyẹ ma álála anị mịẹ.>> 28Kụ́ma nyẹ́fị kiri ma ḅụ fịnịapụ gbẹ́rẹ́ḅọ sọ akanyaḅogha Jizọs go mịị ẹ́gẹ́rẹ́ ma pa ọ bẹnyẹ. 29Judas ori igbii koko ḅọ gosi, jẹ́apụ kórómam ḅẹẹ Jizọs ọ ḅẹarị ḅẹ́ o muu fị na ḅụ na ma ḅụ n binyẹ fẹ, anịgha nyẹ pa igonyiapụ pịrị. 30Judas fịtúrú ma akị gbẹ́rẹ́kiri, ọ nụ́ngọ pághám. Anịsáa ma ḅụ éné dimam.

Jizọs Dughom Ḅẹ́ Pita O Pighibẹm

31Judas so fama sáá, Jizọs dughom, <<Mị́sa anịị Tumḅọ yii Tụwọ ma ipine anị ḅụ diepágháma nyẹ, mị́sa Tamuno ipine ma so anị ḅụ diem ọ ḅụ ḅọ́rọ́. 32Ḅọ́rọ́ Tamuno ipine ma ọ ḅụ anị ḅụ diem, anịsáa Tamun ọ ḅara na Tumḅọ yii Tụwọ ma ipine diebẹm ori Tamuno ma ḅụ, ọ pịghị anị mịẹbẹm anị gbẹ́rẹ́kiri.

33<<Ị́yẹ́ awọ kálá sáá tụwọ anịị a pa ọmịnị na fịnị bẹnyẹ. Ọmịnị ị dọghụbẹm, kụ́ma mị́sa a dugho ọ pịrịarị a dugho Juu sịbịdaapụ ma pịrịnyẹ, <A muarị angaá ọmịnị ine ḅobịgha.>

34<<Ịwọ ologho anịị a pa ọ pịrịnyẹ: ọ jụghọ jụghọ ḅẹlẹma. A ọ ḅẹlẹma maá ḅara ma, ọmịnị sọ pịghị ọkọ pa jụghọ jụghọ ḅẹlẹma. 35Ọ ḅọ́rọ́ ḅẹlẹma nyáná jụghọ jụghọ pịrị, kị́nị́mamgba nimibẹm ḅẹ́ ọmịnị anịị ị́yẹ́ ọḅụduaapụ.>>

Jizọs Dughom Ḅẹ́ Pita O Pighibẹm

(Mat 26.31-35; Mak 14.27-31; Luk 22.31-34)

36Anịsa Saimọn Pita warị o gbíla, <<Kị́nị́nyánáḅọ ị tẹ́ angaá muarị?>>

Jizọs pagharam, <<A muarị angaá ịné ị duabịgha mị́sa, kụ́ma ọḅụkụ́nọma ị́ i duabẹm.>>

37Pita gbilam, <<Kị́nị́nyánáḅọ, a tegó sị mị́sa ine ị duabịgha? A tẹ́lẹ́mamam sị ị́yẹ́ duma kóróma ị sịbị gosi.>>

38Anịsáa Jizọs pagharam, <<Ị ibima tẹ́lẹ́mama sị ị́yẹ́ duma kóróma bẹ i sịbị gosi?>> A karakárányẹ ma dugho ị pịrịm, ọbịọ ma na pághá sá ị tẹ́rẹ́ a sa pa i pighibẹm!

Currently Selected:

Jọn 13: IBY

Highlight

Copy