Jọn 17

Jizọs Tẹ́ghẹ̄ Ọḅụ Pịrịm

1Jizọs mịnanyẹ ma dugho fama sáá, ọ tọ́rụ saghị so dam sị tẹ́ghẹ̄: <<Daa, sáá ma lámam. I Tụ́wọ ma ipine diepágháma, Tụwọ ma sọ ị́yẹ́ ipine diepágháma bẹ ḅara. 2I tuminikiri fịnịapụ mamgba pa o sughubie suam sị ọ gbámásó duma pa ị pa ọ pịrịapụ mamgba pịrị. 3Gbámásó duma ma nyáná bẹ ḅara, anịị ịnimii, ịrị ngéré karakárá Tamuno ma, na Jizọs Krais ị fịrịmaḅọ ma nimi. 4A tuminikiri ị́yẹ́ ipine diepághámamam a ị pa i pịrị fịrị ma nwángị sị nwángị kárámá ḅara. 5Anịgo mị́sa Daa, kuu pa i sọma ị tórúku, wa nyáná gboloma kuu ma tuminikiri ma na saghịgha sáá.

Jizọs Tẹ́ghẹ̄ Ori Ọḅụduaapụ Pịrịm

6<<Tuminikiri bie ị pa i pịrịapụ ma a mịẹmam sị nnị ị nimi. Nnị ịnyee; ịrị nnị pa i pịrịm nnị pịghị ị́yẹ́ ẹ́gẹ́rẹ́ ma dughonyẹ mịẹm. 7Mị́sa n nimim ḅẹ́ i pa i pịrịnyẹ mamgba dada ị ḅarabie saghịḅom. 8I pa i pịrị ẹ́gẹ́rẹ ma a pa n pịrịm nnị pịghị anị daákịm. Nnị ibiḅara pa nimim ḅẹ́ a ị ḅara saghịḅom nnị pịghị mininim ḅẹẹ ịrị i fịrịmam. 9A tẹ́ghẹ̄ nnị pịrịm. A tẹ́ghẹ̄ tuminikiri ma pịrịgha kụ́ma a tẹ́ghẹ̄ ị pa i pịrịmáapụ ma pịrịm, nnị ma ịnyee gosi. 10A nyánáapụ ma gonyẹ́ gonyẹ́ ịnyee, ị pịghị nyánáapụ ma gonyẹ́ gonyẹ́ inyee. Nna ḅụ ḅọ́rọ́ ị́yẹ́ ipine anị ḅụ diepághámam. 11A mịnị tuminikiri ma ḅụ fịnịbịgha, kụ́ma nnị tuminikiri ma ḅụ imi. A ị damaḅoarị Tọ́ntọ́ Daa, ị́yẹ́ ẹrẹ ḅụ fịnị kụ́rọ ma pa nnị koko, ị pa i pịrị ẹrẹ ma nnị ma gbẹ́rẹ́nyẹ ḅụ fịnị, wamịnị ma sọ gbẹ́rẹ́nyẹ ḅụ fịnị ḅara. 12A nnị na fịnị sáá, a n koko wárim ị pa pịrị ị́yẹ́ ẹrẹ ma ḅụ. Gbẹ́rẹ́ḅọ sọ nna bie faghaa, nnị guluguluma tọ́ọ pịrịḅọ ma sima sị Tọ́ndiri ma dughonyẹ ḅoo kiriakịnyẹ sọ bẹ ḅara.

13<<Mị́sa a ị damaḅoarị, kụ́ma a mịná nyẹ ma dughom a pa tuminikiri ma ḅụ fịnịarị sáá, nnị ị́yẹ́ bieḅẹlẹ nyánáakị bẹ ḅara bifụfụụ́ ḅara ḅụ nna bie. 14A ị́yẹ́ ẹ́gẹ́rẹ́ ma pa nnị pịrịmam tuminikiri ma warị n pa tarịgháapụ sọmam tegó nnị mịnị mịị tuminikiri bẹapugha, irịsọ mịnị mịị tuminikiri bẹ ḅọgha ḅara. 15Ị́yẹ́ tẹ́ghẹ̄ a bigha ḅẹ́ ị́ n sịịakị tuminikiri ma ḅụ, kụ́ma ịrị nnị kokowarị sii tumḅọ ma ḅarabie. 16Nnị mịị tuminikiri bẹapugha, irịsọ mịị tuminikiri bẹ ḅọgha ḅara. 17Nnị fófóoma ị́yẹ́ fịrị ma pịrị karakáráma ḅụ ḅọ́rọ́; ị́yẹ́ ẹ́gẹ́rẹ́ ma anịị karakárá. 18Ịrị i fịrịma tuminikiri ma ḅo ḅara anịị a n fịrịma tuminikiri ma ḅoo ḅara. 19Nna sịbị go a ịḅụ fófóoma ị́yẹ́ fịrịma pịrịmam, nnị sọ ibiḅara pa nna ḅụ fófóoma ị́yẹ́ fịrị pịrịbẹ ḅara.

Jizọs Tẹ́ghẹ̄ Mininiapụ Mamgba Pịrịm

20<<A tẹ́ghẹ̄ nnị ngéré pịrịgha. Kụ́ma a tẹ́ghẹ̄ nna oku ma ḅụ ḅọ́rọ́ ịḅụ minini bẹapụ ma sọ pịrịm. 21Daa mịẹsị nnị kị́nị́mamgba gbẹ́rẹ́ ḅụ ḅụ fịnị, ịrị ibie fịnị ḅara, ịrị ma sọ ibie fịnị ḅara. Mịẹsị nnị wa bie fịnị, sị tuminikiri ma minini bẹ ḅara ḅẹ́ ịrị i fịrịmam. 22Ị pa i pịrị ipine ma anịị a pa n pịrịnyẹ, ḅẹ́ n gbẹ́rẹ́ ḅụ ḅụ fịnị, wamịnị ma gbẹ́rẹ́ ḅụ ḅụ fịnị ḅara. 23Ịrị ibie fịnị ḅara ịrị ma sọ nna bie fịnịbẹm. Mịẹsị nnị ḅoo káara ḅara ḅụ gbẹ́rẹ́ ḅụ ḅụ fịnị bẹ ḅara sị tuminikiri ma nimi bẹ ḅara bẹ ịrị i fịrịmam pịghị n ḅẹlẹmamam ịrị i ḅẹlẹmamaa ḅara.

24<<Daa, a bim ḅẹ́ ị pa i pịrịmáapụ ma nnị i nana fịnị a fịnịngaa, sị pịghị ị́yẹ́ ipine árị, i pa i pịrị ipine ma tegó tuminikiri ma na saghịgha sa ene ene ịrị i ḅẹlẹmamam.

25<<Karakárá ibiamịẹnyẹ Daḅọ, tuminikiri ma inimigha n ḅẹ́sọ, ịrị ị́ nimim nnị pịghị nimim ḅẹẹ ịrị i fịrịmam. 26A i pa n diemam, a pịghị pa n diema diema mubẹm sị ị nyáná i pịrị ḅẹlẹma ma nna bie fịnị bẹ ḅara, ịrị ma sọ nna bie fịnị bẹ ḅara.>>

Currently Selected:

Jọn 17: IBY

Highlight

Copy