Jọn 20

Jizọs Fịị Ḅụ Saghịm

(Mat 28.1-8; Mak 16.1-8; Luk 24.1-12)

1Dedefụfụ wiki ma ḅụ tarị éné, éné ma na ḅafịndigha sáá, Meri Magdala ḅụ saghị ḅoḅọ dupu yọ ma múm sị arị ḅo ḅẹ́ nnị pa dupu ma gbẹ́ẹ̄ dapịrị ma nnị anị dighisimam. 2A warị mangị Saimọn Pita na isi ngá ọḅụduaḅọ ma damamum, anịị Jizọs ḅẹlẹma ḅọ ma, sị dugho ḅẹẹ, <<Kị́nị́nyánáḅọ ma nnị o si ákịmam dupu ma bie, wa pịghị nimigha nnị ọ kóróma angaá!>>

3Pita na isi ọḅụduaḅọ wárị dupu yọ ma muu. 4Nnị mmẹapụ mangịarị kụ́ma isi ngaḅọ mangị Pita ḅọ́rọ́m sị muu tarị anị ngá láa. 5O tughu sị dupu bie ma dighim, warị alo ma arị ḅụlọlọ fịnịarị, kụ́ma anị bie sọ mugha. 6Anịsáa Saimọn Pita ori ọḅụju fịnịḅọ wárị ḅo láa sị dupu ma somuu. Ọ dua fịna alo ma arịm anị ngá ḅụlọlọ fịnịarị, 7na pịghị n pa Jizọs sịbị fịna dụadipi bịtẹ ma sọ arịị. Dụadipi bịtẹ ma nnị anị iko simam nnị pa ọ fịna alo ma ḅụ. 8Kunema, tarị dupu ma láa maá ọḅụduaḅọ ma sọ dupu ma bie sọmum. Ori sọ arịm sị mininim. 9Nnị pa ine tọ́ndiri ma akanyaḅogha dughonyẹ ḅẹẹ, ọ fịị ḅụ saghị nyánam.

Jizọs Ọ Ḅụ Pa Meri Magdala Ḅụ Saghị Ḅoḅọ Diem

(Mat 28.9,10; Mak 16.9-11)

10Anịsáa ọḅụduaapụ ma wárị so nnị ama muu. 11Kụ́ma Meri Magdala ḅụ saghị ḅooḅọ dupu angaá ma ḅụ sẹm sị owuarị. A pa owuarị sáá a tụ́ghụ́ dupu bie ma dighim 12sị mmẹẹ́ sookumuapụ arịị pị́na bịtẹ suapụ Jizọs dua ma warị angaá kpọrọfịnịapụ, gbẹ́rẹ́ḅọ sịbị angaá isiḅọ ḅụọ angaá.

13Nnị wárị a gbíla, <<Ọ́rụ́ḅọ, ị tegó sị owuarị?>>

Meri pagharam, <<Nnị Inyanaḅọ ma dighiakịmam, a pịghị nimigha nnị o kóróma angaá.>> 14A mịma dugho fama sáá, a pịghịm sị Jizọs arị anị ngá sẹ́fịnịarị kụ́ma árị ine nimiḅogha ḅẹ́ ori anịị Jizọs. 15Ọ wárị a ḅẹ́, <<Ọ́rụ́ḅọ, ị tegó sị owuarị? Tụọ ị dọghụarị ḅọ?>>

Árị kóróma ḅụ ori anịị dua ma tẹ́lẹ́maarịḅọ, <<A wárị ḅẹẹ, Nyẹ́dieḅọ, ḅọ́rọ́ ịrị o dighisim dugho i pịrị ịrị o kóróma angaá, a pịghị muu ori ákịbẹm.>>

16Jizọs wárị árị ẹrẹ pa a sịị, <<Meri.>>

A wárị tọ́rụ pịghị ọ daá sị hiburu bịpị ḅụ ilúghú, <<Raboni!>> (mịma dughoarị, Nyẹ́dieḅọ).

17Jizọs a ḅẹm, <<Ị́yẹ́ ọlọsẹma ma, na a ị Daa fịnị angaá laagha. Anịmanakaragha muu dugho ị́yẹ́ amịna owiapụ pịrị ḅẹẹ, <A pịghịma i Daa pịghị ọmịna Daa, i Tamuno pịghị ọmịna Tamuno ma dámámụarị.> >>

18Meri Magdala ḅụ saghị ḅoḅọ wárị mú oku ma dugho pa ori ọḅụduaapụ pịrị ḅẹẹ: <<A Kị́nị́nyánáḅọ ma árịmam!>> A warị dugho n pịrị o dugho a pịrịnyẹẹ.

Jizọs Ọ Ḅụ Pa Ori Ọḅụduaapụ Diem

(Mat 28.16-20; Mak 16.14-18; Luk 24.36-49)

19Tárị éné ma wiki ma bie, anị ḅupiri, ọḅụduaapụ ma kobiri sáá, ḅụ́pọ́ ma pịghị ikasim Juuapụ ma ḅáláfa gosi, Jizọs ḅoo nna ogboku bie sẹm sị dugho, <<Diin ọmịnị na fịnịị.>> 20Ọ mịma dugho fama sáá ori ọ ḅara na ori angásá pa nnị diem. Ọḅụduaapụ ma opuma bieḅẹlẹm nnị Kị́nị́nyánáḅọ ma árị sáá.

21Jizọs sima n ḅẹm, <<Diin ọmịnị na fịnịị! Daḅọ ma i fịrị mamaá ḅara anịị, a ọ fịrịmaarị ḅara.>> 22Ọ mịma dugho fama sáá, ọ warị ọwụ ofuro nna ḅụ warị ḅẹẹ, <<Ọ Tọ́ntọ́ Tẹ́mẹ́ ma daakị. 23Ọ sii wáriso pịrịḅọ, nnị n ḅọ sii wáriso n ḅọ pịrịbẹm, o sii wáriso pịrịghaḅọ n sii wáriso n ḅo pịrịbịgha.>>

Jizọs Ḅụ Pa Tọmọs Diem

24Mị́sa Tọmọs (n Didimọs pa sịḅọ) oyi mmẹapụ findi ma ḅụ gbẹ́rẹ́ḅọ ori ọḅụduaapụ ma na ofori Jizọs ḅo sáá. 25Isi angaá ọḅụduaapụ ma wárị dugho ọ pịrị ḅẹẹ, <<Wa Kị́nị́nyánáḅọ ma árịmam!>> Kụ́ma o dugho n pịrịm ḅẹẹ, <<A tulu ma ilíghíma ma arịgha ẹrẹ́sị ọ ḅara pịghị i ḅara tụ́mgbọlụ pa tulu ma tulu ngá ma ḅụ suagha ẹrẹ́sị pịghị ị ḅara pa ori angásá bie suagha, a mininibịgha.>> 26Gbẹ́rẹ́ wiki ḅo ḅọ́rọ́ sáá Jizọs ọḅụduaapụ pịghị sima warị bie imi. Tọmọs sọ nnị na imim. Ḅụ́pọ́ ma ikasim n ḅẹ́sọ, Jizọs ḅo nnị ogboku bie sẹm sị dugho ḅẹẹ, <<Diin ọmịnị na fịnị!>> 27Anịsáa ọ wárị Tọmọs ḅẹẹ, <<Ị ḅara tụ́mgbọlụ pa mịnga sua; sị i ḅara dighi. Ị ḅara sụghụma ị́yẹ́ angaá sáá bie sua. Mịnị tẹ́mẹ́ mmẹẹ́ mmẹẹ́ nyáná ma, kụ́ma minini.>>

28Tọmọs warị ọ ḅẹẹ, <<Inyanaḅọ pịghị i Tamuno.>> 29Anịsáa Jizọs warị dugho ọ pịrị, <<Ị́ árịmam gosi i minimam. Karịiḅi fịnị arịgha, si mininiapụ ma pịrịm.>> 30Jizọs tọgha tọgha jẹ́ ḅụ́gbérépuma fịrị nwángịm ori ọḅụduaapụ ma tórúku mịị diri ma bie n gịẹ kórómagha nyẹ. 31Kụ́ma mịná angaá nyẹ nnị anị gịẹm o minini bẹ ḅara ḅẹẹ, Jizọs ori anịị Krais ma Tamuno Tụwọ ḅẹ́ i minini minini ine duma nyánábẹm ori ẹ́rẹ́ ḅụ.

Currently Selected:

Jọn 20: IBY

Highlight

Copy