Luk 9

Jizọs Oyi Mmẹẹ́ Ọḅụduaapụ Ma Fịrịma Pághámam

(Mat 10.5-15; Mak 6.7-13)

1Jizọs ọrẹ oyi mmẹẹ́ ọḅụduaapụ ma sị kubirim sị ịnyọ na kụrọ pa n pịrị sị n pa sitẹ́mẹ́ deesi, sị pịghị obi gwọọ. 2Ọ warị n fịrịma ḅẹẹ, n muu Tamuno Ásẹ́mẹ́kiri ma gbólómanyẹ dugho wásámáa, sị pịghị obiapụ gwọọ. 3O dugho n pịrịm, <<Nnị ḅẹnyẹ ḅẹnyẹ akịma nnị muarịnyẹ ma, agbara akịma, nyẹ mú akpa akịma, fị́nyẹ akịma, igbii akịma, ḅụdima bịtẹ sọ akịma. 4Nnị ọ dakóróma wárị gonyẹ́ gonyẹ́ ọmịnị anị ngá fịnị sị ọmịnị ama ma wáriso bẹ sa láa. 5Nnị ọ daákịgha ama gonyẹ́ gonyẹ́, ọmịnị ámá ma wáriso, sị ọmịna ḅụọ sughu onwo gugu sara n pịrị, pa die ḅẹẹ, anị ḅụḅáláḅálá ma nna sịbị gbánam. Tamuno igani n kuruarị.>> 6Ọrẹ ọḅụduaapụ ma warị kálá ámá ámá muu ikéléma, ibi ọkụ́ ma dugho wásámaarị pịghị obiapụ gwọarị ngá mamgba ḅụ.

Hẹrọd Sịbị Galagala

(Mat 14.1-12; Mak 6.14-29)

7Hẹrọd Galili táarịḅọ pághárịnyẹ mamgba náa sáá, ọ sịbị ḅo opuma galagalam, tegó jẹ́apụ dughoarị ḅẹẹ Jọn Mingi Saraḅọ fị ḅụ saghịmam. 8Jẹ́apụ ḅẹẹarị ḅẹẹ Elaija pịghịma ḅomam, jẹ́apụ ḅẹarị ḅẹ olom sáá ikiakoroapụ ḅụ bẹ gbẹ́rẹ́ḅọ pịghị saghịmam. 9Hẹrọd ḅẹẹm ḅẹẹ, <<A Jọn sịbị pẹ́lẹ́mam, mịị tụọ mọ, a ọ ḅẹ́rẹ́ naarịḅọ?>> Ọ warị saghị asọ dọghụ ọ Jizọs árị bẹ ḅara.

Jizọs Fị́nyẹ Pa Túminị́ Oyi Mmẹẹ́ a Ndẹ́ẹ Oyia si Findi Sibẹm

(Mat 14.13-21; Mak 6.30-44; Jọn 6.1-14)

10Nfịrịmaapụ ma pịghịma ḅom sị dugho Jizọs pịrị n mịẹmáa nyẹ mamgba. Ori nnị akịm, nnị ngéré warị nwángị so Bẹtịsaida pa sị ama muu. 11Túminị́ ogbo ma anị gbólómanyẹ náa sáá, nnị o duam ọ warị n dakóróma warị Tamuno Ásẹ́mẹ́kiri gbolomanyẹ dugho n pịrị pịghị obiapụ gwọọ.

12Ịrụa ma terearị sáá, oyi mmẹẹ́ a ọḅụduaapụ ma ọ damaḅom warị ḅẹẹ, <<Túminị́ ma fịrịma sị nnị soo, sị nnị ine káláama ámá ámá muu ikéléma sị fị́nyẹ na múno ngaa dọghụ n ḅụ pịrị, tegó mịnga ma anịị túminị́ ngagha ngá.>>

13Kụ́ma Jizọs n ḅẹm ḅẹẹ, <<Ọ mịnị ọ ḅara na, fị́nyẹ dọghụ nnị pịrị.>>

Nnị warị ọ pagharaa ḅẹẹ, <<Mịnga wa nyánányẹ mamgba anịị sọ́nọ́ a fịtúrú kpo na mmẹẹ́ a nji mgbọ́lụ. I dọghụ ḅẹ́ wa mú fị́nyẹ fẹ mị túminị́ kpo ma pịrị?>> 14(Aningáa fịnị owiapụ anịị túminị́ oyi mmẹẹ́ a ndẹ́ẹ oyia si findi.) Jizọs ori ọḅụduaapụ ḅẹm, <<Túminị́ ma mịẹsị n kpọrọfịnị túminị́ a mmẹẹ́ si oyi findi, túminị́ mmẹsi oyi findi, gbẹ́rẹ́ ngaa.>> 15Ori ọḅụduaapụ ma ọkọ miẹfamam, kị́nị́mamgba warị kpọrọfịnị. 16Jizọs sọ́nọ́ a fịtúrú kpo ma na mmẹẹ́ nji ma saghị akịm, tọ́rụ́ pa so daa, ịmịẹḅam pa Tamuno ḅẹẹ warị anị puu sị pa ori ọḅụduaapụ ma pịrị ḅẹẹ n die ikelema túminị́ ma pịrị. 17Nnị kị́nị́mamgba fịịfama sị pịghị kọọ nyẹ nyáná, ori ọḅụduaapụ ma warị oyi mmẹẹ́ nkana findi taa ḅo nnị fịkọma nyẹ.

Pita Jizọs Gboloma Dugho Pághámá Nyẹ

(Mat 16.13-19; Mak 8.27-29)

18Gbẹ́rẹ́ éné Jizọs ngéré fịnị tẹ́ghẹ̄arị sáá, ori ọḅụduaapụ sọ ori na imi, ọ warị n gbíla ḅẹẹ, <<Túminị́ ḅẹẹ mọ ḅẹẹ, Ịrị tụọ?>>

19Nnị ọ pagharam, <<Jẹ́apụ ḅẹm ḅẹ́, ịrị Jọn Mingi Saraḅọ, jẹ́apụ ḅẹm ḅẹ, ịrị Elaija, jẹ́apụ pịghị ḅẹm ḅẹ́ gbẹ́rẹ́ olom sáá ikiakoroḅọ pịghịma ḅomam.>> 20Ọ warị n gbíla, <<Ọmịnị ọ tẹ́ dugho? Ọ ḅẹẹ Irị tụọ?>> Pita warị pagharaa ḅẹ́, <<Ịrị anị Tamuno Pulo pa Sịbị Saraḅọ sị fịrịma ḅoo.>>

21Jizọs warị ḅoo birinụ́nụ́ ḅara pa dugho n pịrị ḅẹ́ n dugho gbẹ́rẹ́ḅọ sọ pịrịma.

Jizọs Ori Tọ́rụ́siarị Na Ori Fịị Gbolomanyẹ Dughom

(Mat 16.20-28; Mak 8.30--9.1)

22Ọ pịghị dugho n pịrịm, ḅẹẹ, <<Tumḅọ yii Tụwọ ma tọgha tọ́rụ́siarị árịbẹm, sẹ́nịapụ ma, na pịghị igwagwaalaapụ ma, na pịghị ólóghó nyẹ́dieapụ ma ḅarabie, n pịghị ọ sịghịbẹm. Nnị ọ ḅaabẹm, kụ́ma tẹ́rẹ́ a dii kárámá bẹ éné o fịị ḅụ saghịbẹm.>>

23Ọ warị nnị kị́nị́mamgba ḅẹẹ, <<I dua bẹḅọ fịnịfịnị n ḅọ amịna ḅụ pa bieḅárámá, n ḅo mgbẹsẹ sị́ dighi akị sị ị dua éné gonyẹ́ gonyẹ́ bie. 24Amịna duma dua bẹḅọ gonyẹ́ gonyẹ́ anị ḅuumabẹm, kụ́ma amịna duma ḅuumaḅọ i sịbị gosi anị dụapághámaḅobẹm. 25Tumḅọ tẹ́ sọnyẹ nyáná ḅo bẹ, ḅọ́rọ́ n ḅọ tuminikiri gbọrụ nyánaḅom, kụ́ma n ḅo ḅụgbọrụ fama? 26Tumḅọ ḅọ́rọ́ ị dighi ḅụ́gịrịrị pịghị ị́yẹ́ dienyẹ ma dighi ḅụ́gịrịrị, anịsáa, irị Tumḅọ yii Tụwọ ma so n ḅo dighi ḅụgịrịrịbẹm, ọ ḅo sáá ori ipine ḅụ, na pịghị Daḅọ ma ipine, pịghị tọ́ntọ́ sookumuapụ ma ipine ḅụ. 27A karakárányẹ ma dugho ọ pịrịarị ḅẹ́ ọmịna bie mịnga sẹ́fịnịarị jẹ́apụ imi fịịbịghaapụ sị mú Tamuno Ásẹ́mẹ́kiri ma árị sa láa.>>

Jizọs Oju Dimam

(Mat 17.1-8; Mak 9.2-8)

28Inine a dii ḅọ́rọ́fáma sáá ọ mịị nyẹ ma dughonyẹ, Jizọs warị Pita na Jọn na pịghị Jems si akị pa gbẹ́rẹ́ tụ́ndụ́ tándị sị ọ tẹ́ghẹ̄ bẹ ḅara. 29O tẹ́ghẹ̄ ma kọarị sáá, ọ tórúku warị ḅo dima anị fịnị ḅara ḅụ, o suabịtẹ anị pị́na, tọ́rụ́pụma ḅara anịị anị pa biarị ḅara. 30Anị gbẹ́rẹ́kirikiri mmẹẹ́ owiapụ warị saghị ọ nana ẹ́gẹ́rẹ, mịnaapụ ma ọ́ Mosis na Elaija. 31Nnị sobie ipine na ḅom sị Jizọs na ẹ́gẹ́rẹ ori fịị gbolomanyẹ kiriakị bẹnyẹ Jerusalem ḅụ. 32Pita na ọ nana fịnịapụ opu múnobie imi, kụ́ma n múno ḅụ saghị sị Jizọs ipine arịm na mmẹẹ́ owiapụ ọ nana sẹ́fịnịapụ. 33Owiapụ ma Jizọs warịsoarị sáá, Pita warị ọ ḅẹẹ, <<Inyanaḅọ anị ibim wa mịnga fịnị, wa tẹ́rẹ́ ákáinyi wárị namabẹm ịrị gbẹ́rẹ́nyẹ nyáná, Mosis gbẹ́rẹ́nyẹ na Elaija gbẹ́rẹ́nyẹ.>> (Ori ibima nimigha o dughoarị nyẹ.)

34O pa ẹ́gẹ́rẹ́ma kọarị sáá, gbẹ́rẹ́ oḅuto warị ḅo mgbẹẹ; ḅáláfa warị ori ọḅụduaapụ ma bie soo, oḅuto ma ḅo mgbẹẹ ḅara ma. 35Ẹ́gẹ́rẹ pụghọ warị oḅuto ma bie koro, ḅẹẹ, <<Mịị i Tụwọ, a sẹlẹakị máaḅọ ọmịnị ọ bịpị pughu.>> 36Ẹ́gẹ́rẹ pụghọ ma ḅo kunema, sáá, Jizọs ngéré anịị anị ngaa sẹ́fịnịarịḅọ. Ọḅụduaapụ ma ikpurusua mịnanyẹ mamgba pịrịm, sị pịghị mịnị dugho gbẹ́rẹ́ḅọ so pịrịgha anịsáa ma ḅụ.

Jizọs Sitẹ́mẹ́ Ḅụ Fịnị Tụwọ Gwọm

(Mat 17.14-18; Mak 9.14-27)

37Éné ḅáa Jizọs na ori tẹ́rẹ́ ọḅụduaapụ ma warị koro ḅo tụ́ndụ ma ọgọnọ tọgha túminị́ warị ḅo ọ nana dona. 38Gbẹ́rẹ́ owitụ́wọ warị ilúghú túminị́ ogbo ma bie, ḅẹẹ, <<Nyẹ́dieḅọ a i tẹ́ghẹ̄m, i tụwọ dighi, ị́yẹ́ kpọ́kpọ́ gbẹ́rẹ́ tụwọ. 39Gbẹ́rẹ́ sitẹ́mẹ́ o dighi nwángị ikélekélem, mịẹsị anị gbẹ́rẹ́kiri ori ilúghuarịnyẹ, anị ọ nụ́nụ́bẹm sị o dighi kiri gbi ọ bịpị warị saghị ọkọ́kọ́ pághámaḅo, anịị anị nyẹ pa ọ lama bẹ ḅara sị pịghị minigha sị ori ịnyọ́sárá. 40A ị́yẹ́ ọḅụduaapụ tẹ́ghẹ̄m ḅẹẹ nnị anị dee sị kụ́ma nnị inegha.>>

41Jizọs ọ pagharam, <<Yei ọmịnị mị ḅụọsaa irima, irimapụ a ngịrịma nyáná ọ pịrị muu tẹ́ sa láa bẹ? I tụ́wọ pa mịnga ḅoo.>> 42Tụwọ ma ḅoarị sáá sitẹ́mẹ́ ma o fom kiri gbim sị ọ nụ́nụ́obi koro. Kụ́ma Jizọs igani sitẹ́mẹ́ ma pịrịm, sị tụwọ ma gwọọ, sị ọ saghị daḅọ pịrị. 43Tamuno ma opu kụrọ warị túminị́ mamgba ḅụ ḅụ́gbérépuma.

Kị́nị́mamgba sịbịbie kịẹ Jizọs nwángị ḅụ́gbérépuma fịrị ma pịrịarị sáá, ori ọrẹ ọḅụduaapụ ḅẹm, 44<<O birifama a dugho ọ pịrị dọghụnyẹ ma pịrị: Tumḅọ yii Tụwọ ma nnị ọ Dẹrịfị́bẹm túminị́ ḅarabie.>> 45Kụ́ma mịma dughoarị nyẹ nnị akanyaḅogha. Nnị anị pa n ḅọghumam anịgo nnị anị akanyaḅogha, ḅáláfa go n pịghị ine anị gbolomanyẹ pa o gbilagha.

Dụḅaḅá Ḅọ Tamuno Ásẹ́mẹ́kiri Ma Ḅụ

(Mat 18.1-5; Mak 9.33-37)

46Nụna nụ́ná warị nna ogbobie saghị nna ḅụ géléḅa bẹḅọ. 47Jizọs nna kóróma nimitẹ́lẹ́mam warị gbẹ́rẹ́ kálátụwọ akuoo ḅo ori angásá sẹ ma warị. 48Ọ warị n ḅẹẹ, <<Mịná Káláawọ ma dakóróma ḅo gonyẹ́ gonyẹ́ ị́yẹ́ ẹrẹ ḅụ i daa kórómam pịghị i dakóróma ḅọ gonyẹ́ gonyẹ́ i fịrịma ḅọ ma dakórómam. Ḅẹẹ ọmịna ḅụ ịrụḅaḅọ anịị géléḅa ḅọ.>>

Ḅẹ́rẹ́ Pa O Dọghụghaapụ Gonyẹ́ Gonyẹ́ Ọmịna Ju Imi

(Mak 9.38-40)

49Jọn warị ḅẹẹ, <<Wányánáḅọ, wa gbẹ́rẹ́ owitụ́wọ arịm sitẹ́mẹ́ deesiarị ḅọ ị́yẹ́ ẹ́rẹ ḅụ, wa warị asọ dọghụ sị okiki, ori wámịna ḅụ gbẹrẹḅọgha gosi.>>

50Jizọs pagharam, <<O kikima, ḅụọ mgbẹsẹ ọ pịrịghaḅọ gonyẹ́ gonyẹ́ ọmịna ju imi.>>

Samariapụ Mini Jizọs Daákịgha

51Sáá ḅo kikia sa ḅẹẹ, n Jizọs akị sobie muu, ori ọ Tẹ́mẹ́ miẹkụ́rọ́mam sị Jerusalem muu. 52Ọ warị parị túminị́ fịrịma Sameriya káláama muu, sị n nyẹ tẹ́lẹ́ma ọ pịrịbẹ ḅara; 53kụ́ma aningáa fịnịapụ ma mini ọ dakórómagha, tegó ọ tọ́ọ pẹ́lẹ́mam ḅẹẹ o Jerusalem muarị. 54Ọḅụdua Jems na Jọn mịma árị sáá, n gbilam, Kị́nị́nyánáḅọ, i dọghụ ḅẹẹ wa sobie fịnị fọngụma ḅoo n dọ́ghụ́ma? 55Kụ́ma Jizọs tọ́rụ́ pighim sị igani n pịrị, 56n warị so jẹ́ káláama muu.

Jizọs Duaa Ma Láa Nyẹ

(Mat 8.19-22)

57Nnị nwángị ḅọ́rọ́arị sáá asọogbo, gbẹ́rẹ́ owitụ́wọ ọ ḅẹm, <<A ị duabẹm i mú angaá gonyẹ́ gonyẹ́.>>

58Jizọs pagharam, <<Pụnụ nna olulu nyánam, fọ́rụ bie fiigharị fíní wárị nyánam, kụ́ma Tumḅọ yii Tụwọ ma sịbị kọ́rọ́ma bẹ angaá nyanagha.>>

59Ọ warị dugho jụghọ pịrị, <<I dua.>>

Kụ́ma owitụ́wọ ma pagharam, <<Kị́nị́nyánáḅọ i wáriso sị a mú parị i daa dipi.>>

60Jizọs ọ ḅẹm, <<Wáriso sị fịịapụ nna fịịapụ dipi, kụ́ma ịrị muu Tamuno Ásẹ́mẹ́kiri ma gbólómanyẹ dugho págháma.>> 61Jụghọ warị pịghị ḅẹẹ, <<Kị́nị́nyánáḅọ, a i duabẹm, kụ́ma parị i wáriso sị a mú ibima fịnị pa ị wárịapụ ḅẹẹ.>> 62Jizọs warị ọ ḅẹẹ, <<Duakiri sughupịghị ḅala ma ọ́lọ́máa ḅọ gonyẹ́ gonyẹ́ sị pịghị ọḅụ dighi, anị ḅụgbẹ́gha ọkọfịnịḅọ́ fịrịnwangị Tamuno Ásẹ́mẹ́kiri ma pịrị.>>

Currently Selected:

Luk 9: IBY

Highlight

Copy