Matiu 21

Jizọs Sọ́ḅa Ḅara Ḅụ Jerusalem Sọm

(Mak 11.1-11; Luk 19.28-40; Jọn 12.12-19)

1Nnị Jerusalem na kikia sị ḅo Bẹtịfegi láa sáá Olivu Tụ́ndụ ọgọnọ ḅụ Jizọs nyẹ pa ori oyi mmẹẹ́ a ọḅụduaapụ fịrịmam. 2Dugho n pịrịarị ḅẹẹ, <<O tórúku fịnị káláma ma muu, anị gbẹ́rẹ́kiri ọ nyẹ dighi dighi ásụ árịbẹm n kpọwarị nyẹ, anị tụwọ anị ngaa sa, n fiima sị nna akuoo i pịrị. 3Ḅọ́rọ́ kị́nị́ o gbíla gbíla, dugho n ḅo pịrị ḅẹẹ Kị́nị́nyánáḅọ ma nna bim, ọ pịghị anị gbẹ́rẹ́kiri anị fịrịmabẹm.>> 4Mịma kiriakịm ikiakoroḅọ ma dughonyẹ karakárányẹ sọ bẹ ḅara ḅẹẹ,

5<<Dugho Jerusalemapụ pịrị,

<Dighi ọmịna ámányánáḅọ ọ dámáḅoarị,

ḅụ́sitéréma ḅara ḅụ pịghị

nyẹ dighi dighi ásụ dọghụarị,

owi nyẹ́ dighi dighi ásụ tụ́wọ ọgọnọ.> >>

6Ọḅụduaapụ ma sọm sị muu Jizọs dugho n pịrị ḅara mịẹ. 7Nnị nyẹ́ dighi dighi ásụ akuom na anị tụwọ na, sị nna opu suabịtẹ pa anị ọgọnọ isé, Jizọs warị nna ọgọnọ kpọrọfịnị. 8Tọgha tọgha túminị́ kpo nna opu suabịtẹ pa asọogbo ma ḅụ isém, jẹapụ warị sị ḅara anyịma pa asọogbo ma ḅụ isé. 9Tórúku sọ ọ pịrị túminị́ kpo ma na pịghị ọ duarịapụ ma bieḅẹlẹ ḅụ ilúghuarị,

<<Hozana fịnị Deviti Tụwọ pịrị!

Nnị karịibimaḅọ anịị ori,

Gbámásóḅọ ma ẹ́rẹ́ ḅụ ḅoarịḅọ!

Sóghólóḅa so ma bie

fịnị Tamuno túmíní!>>

10Jizọs Jerusalem sọ sáá, ámá gbọrụ ma warị jighe sị gbíla, <<Mị tụọ mọ?>>

11Túminị́ kpo ma pagharam, <<Mịị anịị Jizọs Nazarẹtị ikiakoroḅọ, Galili sẹ bie fịnị ama.>>

Jizọs Tamunoopuwarị Ma Bie

(Mak 11.15-19; Luk 19.45-48; Jọn 2.13-22)

12Jizọs Tamunoopuwarị ma angaá sọm sị fẹ́tuḅoarịapụ mamgba deesi, igbii dimaarịapụ ma opuịkasị ọ sághị iḅomam na elesia dẹrịarịapụ nangwọ ịkasị. 13Ọ warị nnị ḅẹẹ, <<Nnị gịẹkórómámam, tẹ́ghẹ̄ warị anị n pa i warị ma sị bẹnyẹ kụ́ma ọmịnị fúrúapụ ḅoghuḅoghu ngaa pa anị mịẹarị!>> 14Tọ́rụ́pụ́apụ na ikúléapụ ọ damaḅom Tamunoopuwarị ma ḅụ, ọ pịghị nnị gwọm. 15Kụ́ma igwagwaalaapụ na ólóghó nyẹ́dieapụ ma árị sáá ọ nwángị ḅụ́gbérépuma fịrị na pịghị ilúghuarị awọ ma Tamunoopuwarị ma párángáa ḅẹẹ, <<Hozana fịnị Deviti Tụwọ ma pịrịị.>> Anị n bieoḅumam.

16Nnị warị ọ gbíla, <<I náa mịị awọ ma dughoarị nyẹ?>>

Jizọs pagharam, <<Innh, jẹ́ sáá na ọ gogha ḅẹẹ,

<< <Awọamaapụ na dọghụdọghụ awọ bịpịbie

i diemam sị n kpain túmíní pa ị pịrị>?>>

17Ori n warịsom sị opu ama ma bie pághá Bẹtani muu, ọ múno énéḅama ngaa.

Jizọs Fịgị Sị Ma Gbom

(Mak 11.12-14,20-24)

18Dedefụfụ ọ pịghịma sọ opu ama ma muarị sáá, fị́nyẹ ḅo ọ tárịm. 19O fịgị sị árị ḅara ma asọogbo ma ḅụ, ori anị fịnịngaa múm, kụ́ma gbẹ́rẹ́ sịmgbọlụ sọ arịgha anị ḅụ ányị́nyá sima. Anịsáa ọ warị anị ḅẹẹ, <<Mịnị jẹ́ pa sịmgbọlụ suama!>> Anị gbẹ́rẹ́kirikiri sị ma sámụ́nọm. 20Ori ọḅụduaapụ mịma árị sáá anị n ḅụ ḅụ́gbérépumam. Nnị warị gbíla, <<Fịgị sị ma anị tegósi álála sámụ́nọ.>> 21Jizọs pagharam, <<A karakárányẹ ma dugho ọ pịrịm, ọ ḅọ́rọ́ minini nyáná sị tẹ́mẹ́ mmẹẹ́ mmẹẹ́ mịẹgha, mị fịgị sị ma la nyẹ ngéréghaa ọmịnị ine mịẹbẹnyẹ, kụ́ma ọ pịghị ine mị tụ́ndụ ma ḅẹbẹm, <So, ịḅụ pa tọ́rụ́ ma bie gbi anị pịghị ọkọ mịẹbẹm.> 22Ọ ḅọ́rọ́ minini minini ọ binyẹ gonyẹ́ gonyẹ́ tẹ́ghẹ̄ ḅụ ọ nyánáḅobẹm.>>

Jizọs Kụrọ Gboloma, Gbíla Nyẹ

(Mak 11.27-33; Luk 20.1-8)

23Jizọs Tamunoopuwarị ma bie sọm, ọ pịghị nyẹ́diearị sáá, igwagwaalaapụ ma na túminị́ ma sẹ́nịapụ ọ damaḅom sị gbíla ḅẹẹ, <<I tẹ́ kụrọ nyána sị mịnanyẹ ma mịẹarị? Tụọ pịghị mị kụ́rọ ma pa ị pịrị?>> 24Jizọs pagharam, <<Irịsọ pịghị gbẹ́rẹ́nyẹ pa ọ gbilabẹm. Ọ ḅọ́rọ́ ị págháraa págháraa, a dugho ọ pịrịbẹm a pa mịnanyẹ ma mịẹarị kụ́rọ. 25Jọn pa mingi saraarị kụ́rọ ma, anị tẹ́ ngaa sághị ḅo? Sobie saghị ḅo múno sị anị túminị́ ḅara saghị ḅo?>>

Nnị warị nna bie anị ḅẹlẹma sị ḅẹẹ, <<Wa ḅọ́rọ́ ḅẹẹ sobie saghịḅom, o gbilabẹm ḅẹẹ, <Anịsáa ọ tegó ọ mininigha?> 26Kụ́ma wa ḅọ́rọ́ ḅẹ́ ḅẹẹ, <Túminị́ ḅara.> Anịma karakáragha tegó wa túminị́ ma dighi ḅáláfaarị, nnị kị́nị́mamgba mininim ḅẹẹ Jọn ori ikiakoroḅọ.>> 27Anịgosi nnị Jizọs pagharam, <<Wa nimigha.>> Anịsáa ọ warị ḅẹẹ, <<Irịsọ a dugho ọ pịrịbịgha a pa mịnanyẹ ma mịẹarị kụ́rọ.

Mmẹẹ́ Owiapụ Awọ Ma Kaḅụ

28<<Ọ tọ́rọ́pa anị arịị? Gbẹ́rẹ́ owitụ́wọ imi mmẹẹ́ owiapụ awọ nyánáḅọ. Ọ párịḅọ ma dámámum ḅẹẹ, <I tụ́wọ muu ị́yẹ́ vainị duakiri ḅụ fịrịnwangị.>

29<<Ọ pagharam ḅẹẹ, <A muubịgha,> kụ́ma sáá muu sa ori ọ tẹ́mẹ́ diman sị muu.

30<<Anịsáa daḅọ ma warị isi tụ́wọ ma dámámuu sị gbẹ́rẹ́nyẹ ma dugho. O pagharam ḅẹẹ, <A muubẹm, i daa,> kụ́ma ọ mugha.

31<<Nna ḅụ mmẹapụ ma ḅụ tụọ daḅọ ma binyẹ mịẹ?>>

Nnị pagharam, <<Párịḅọ ma,>> Jizọs warị dugho n pịrị ḅẹẹ, <<A karakárányẹ ma dugho ọ pịrịm, ásẹ́mẹ́kiri ósó igbii daapụ na sẹfịapụ parị ọmịna ḅụ Tamuno Ásẹ́mẹ́kiri ma sọarị. 32Ḅẹẹ Jọn ọ damaḅom ḅẹẹ ọ karakárá ibiamịẹnyẹ asọ ma pa o die, ọ pighi o mininigha, kụ́ma ásẹ́mẹ́kiri ósó igbii daapụ na sẹfịapụ o mininim. Ọ mịma árị fama sáá sọ ọ mini sii ḅụ pịghịgha sị ọ minini.

Grepụ Duakiri Ọkọ Sii Túminị́ Kaḅụ

(Mak 12.1-12; Luk 20.9-19)

33<<Ọ jẹ́ kaḅụ pughu: gbẹ́rẹ́kiri nyánáḅọ imi grepụ dipiḅọ. Ori anị gbiri ikélekélem, iru inwima ngaa sughu anị ḅụ sị kúrúapụ ọgọnọ wárị nama. Ọ warị vainị duakiri ma pa ọkọ ḅụ pa duadipiapụ pịrị sị so nyẹ muu. 34Duasughu sáá ma kikia sáá, ori ọrẹ fịrịnwangịapụ fịrịmam ḅẹẹ n muu ọkọapụ ma ḅara ori sịmgbọlụ daa ḅoo.

35<<Ọkọapụ ori fịrịnwangịapụ kukórómam gbẹ́rẹ́ḅọ fom, isiḅọ ḅáa, mgbọ́lụ pa tẹ́rẹ́ kárámáḅọ gbi. 36Anịsáa ọ warị jẹ́ fịrịnwangịapụ fịrịma, parị sáá ma nẹ́ngịapụ, ọkọapụ anị gbẹ́rẹ́ ḅara ma pa nna mịẹm. 37Kunema ori ọ tụ́wọ pa n fịrịmam ḅẹẹ, <Nnị i tụwọ osibẹm.> 38Kụ́ma ọkọapụ ma tụ́wọ ma árị sáá, n dugho jụghọ jụghọ pịrịm, <Mị ori ngọ ma nyánáakị bẹḅọ ma. O ḅoo wamịnị ọ ḅá sị ọ nyánákị bẹ ngọ ma akịị.> 39Nnị warị ori akịị ọ gbi págháma vainị duakiri ma ḅụ sị ọ ḅá.

40<<Anị fịnị ḅara ma, duakiri ma nyánáḅọ ma ḅoo sáá, ọ tẹ́ pa mịị ọkọapụ ma mịẹbẹ?>> 41Nnị pagharam, <<Ọ gbarịgha ḅara ḅụ anị sii túminị́ ma ḅabẹm, sị vainị duakiri ma pa jẹ́ ọkọapụ pịrị ori diekiri pa ọ pịrịbẹapụ duasughu sáá ma ḅụ.>> 42Jizọs dugho n pịrịm, <<Jẹ́ sáá na ọ gogha Tọ́ndiri ma bie:

<< <Wárị námáapụ ma sịghị dapịrị ma

anịị mị́sa wárị ma dighi sẹ́ma dapịrị;

Gbámásóḅọ ma anịị mịma mịẹnyẹ,

anị pịghị ḅụ́gbérépumam wámịna tọ́rụ́ ḅụ.>

43<<Anịgosi a dugho ọ pịrịm ḅẹẹ Tamuno Ásẹ́mẹ́kiri ma nnị ọmịna ḅárabie anị ákịbẹm sị pa karakárá sịmgbọlụ sua bẹ túminị́ pịrịbẹm. 44Mị dapịrị ma ḅụ sóghóró kóróḅọ gonyẹ́ gonyẹ́ n ḅọ puu kọ́sịbẹm, anị pịghị ḅụ kóróḅọ gonyẹ́ gonyẹ́ anị n ḅọ gbẹkọsimabẹm.>> 45Igwagwaapụ ma na Farisiiapụ ma Jizọs kaḅụ náa sáá, n nimiḅom ḅẹẹ nnị anịị ọ ḅẹarịapụ. 46Nnị asọ dọ́ghụm nnị oku bẹ ḅara, kụ́ma n túminị́ kpo ma dighi ḅáláfam tegó túminị́ ma mininim ḅẹẹ Jizọs ori ikiakoroḅọ.

Currently Selected:

Matiu 21: IBY

Highlight

Copy