1Akabambu Akolongu 16
16
1Lilobi laka Bambu Sapanga luhikila Yehu mwana waka Hanani kunndongale Baasha lapwaga, 2“Wa Baasha wabia wamundu wanga kumanyikana, nuguhenga gubiya ukilongosi wa bandu bangu Aizilaeli. Wehapa gunzigiki Yelobuamu, waahengiki bandu bangu ahenga mahakau nukunhenga mia ni inyela kwa ndaba ja mahakau gabu. 3Linga! Ngangabaki kugukoma wa Bahasha na bandu bumunnyumba jaku, ngati enaakoma bandu bu mu nyumba jaka Yelobuamu mwana waka Nabati. 4Mundu jokapi ju lukolu waku Baasha jojiwelila ku musi, jimbwa yiitenda kwa akula, na jokapi jojiwelila ku migonda ijuni yukunani itenda kunhonyo.”
5Mahengu gangi gaka Baasha nukuwesa kwaki, goti gaandikwi mu Kitabu sa Ngombuke yaka Bambu Akolongu buku Izilaeli. 6Ndienu Baasha jwatenda kuwa, buntaga ku Tiliza, mwanamundu jobunkema Ela jwalongusa pandu paki.
7Kabee lilobi laka Bambu Sapanga lunhikila Baasha nu lukolu lwaki, kupete kuku nndota Yehu mwana waka Anani kwa ndaba ja mabaja gajahengiki palongi jaka Bambu Sapanga. Hela ndi Baasha anhenga Bambu Sapanga jubiya ni inyela kwa mahengu gaki, anziga Yelobuabu nu lukolu lwaki na kwaahenga bandu baki akomika boka tipitipi.
Bambu nkolongu Ela juku Izilaeli
8Mu saka si ishilini na sita su ulongosi waka Asa bambu nkolongu juku Yuda, Ela mwana waka Baasha, jatumbulia kulongosa ku Izalaeli koni jubii ku Tiliza. Jwalongusa kwa yaka ibeli. 9Zimuli jojabiya ntumisi waka Asa jojabia jujemale nusu ju nsambi wa magali gukuhutwa, ampangila kunhenge majambu mabaja. Lisoba limu, bambu nkolongu Ela ejabiya ku Tiliza kunyumba jaka Alisa jojabiya jujemale nyumba jaka bambu nkolongu, jakunywa nu kulobela. 10Ndienu Zimuli jajingala nkati nu kunkoma. Ndienu jalongusa pandu paki. Hoku kwahengika saka si ishilini na saba su ulongosi waka Asa jojabii bambu nkolongu juku Yuda.
11Ejatumbulia pe kulongosa, Zimuli jaakoma bandu boti bu lukolu lwaka Baasha, ngaseandekiki hata mwanalomi jumu ju lukolu lwaka Baasha, wala lukolu lwa akosi baki, 12Ndienu Zimuli jaakoma tipitipi bandu boti ba nyumba jaka Baasha kulengana ni lilobi laka Bambu Sapanga lelunhikila kupete nndota Yehu. 13Majambu haga gahengika kwa ndaba ja mahakau gajahengiki Baasha na mwanamundu Ela. Haba baahenga bandu buku Izilaeli ahenga mahakau su kuilumbali isapanga yabu, lihengu heli lunhenga Bambu Sapanga Sapanga jwa Izalaeli juyoma ngani. 14Mahengu gangi gaka Ela gajahenga mu ulongosi waki, goti gaandikwi mu Kitabu sa Ngombuke yaka Bambu Akolongu buku Izilaeli.
Bambu nkolongu Zimuli juku Izalaeli
15Zimuli jatumbulia kulongosa ku Izalaeli, najwombi jalongusa masoba pee koni jubii ku Tiliza. Akomana ngondu babeka kambi musi uku Gibetoni gwa Afilisiti. 16Akomana ngondu buku Izalaeli ebajowana kubanga bambu nkolongu Zimuli jupangiki majambu mabaja gukunkoma bambu nkolongu Ela, buntangasa Omili, jojabii nkolongu wa alonda babu, ili jubia bambu nkolongu jwa Izilaeli lisoba lelale pababii kukambi. 17Bambu nkolongu Omili na akomana ngondu baki baboka ku musi uku Gibetoni, bajenda kugulapu musi uku Tiliza. 18Zimuli pajwabona kubanga musi woti atei kugukamu, jajingala nkati ja nyumba jiki bambu ukolongu, nu kujijosa mwotu, najwombi jawelila homu. 19Lihengu heli lahengika kwa ndaba ja mahakau gajahengiki bambu nkolongu Zimuli, palongi jaka Bambu Sapanga, nukunziga Yelobuamu jojahenga mahakau na kwaahenga bandu buku Izilaeli atenda mahakau. 20Mahengu gangi gu ulongosi waka bambu nkolongu Zimuli ni mipangu jaki jukuhenga mabaja, goti gaandikwi mu Kitabu sa Ngombuke ya aka Bambu Akolongu buku Izalaeli.
Bambu nkolongu Omili juku Izilaeli
21Bandu buku Izilaeli, ndi babaganika makundi mabeli. Likundi limu lummanya Tibuni mwana waka Ginati kuba bambu nkolongu, ni likundi la pili lummanya Omili kuba bambu nkolongu wabu. 22Lakini bandu babumpwata Omili baapeta makili bandu babumpwata Tibuni mwana waka Ginati, Tibuni jwatenda kuwa na Omili jabia bambu nkolongu. 23Omili jwatumbulia kulongosa mu saka sa selasini na moja su ulongosi waka Asa jojabii bambu nkolongu juku Yuda. Jwalongusa kwa yaka komi ni ibeli, yaka sita jalongosa koni jubii ku Tiliza. 24Egapeta haga bambu nkolongu Omili jwikilomba kitombi sa Samalia kwiipandi elupu sita ya madini ga feza kuhuma kuka mundu jumu jobukema Shemeli, na jasenga musi panani jikitombi hesi. Musi hogu jugukema lihina Samalia kwa ndaba jaka Shemeli jojabiya mwinikitombi hoju pa mwandi.
25Lakini bambu nkolongu Omili jahenga majambu mabaja palongi jaka Bambu Sapanga, jwahenga mabaja ngani kupeta akabambu akolongu boti babundonguli. 26Ndienu bambu nkolongu Omili jahenga mahakau makolongu ngati ejahenga Yelobuamu mwana waka Nabati, joanhenga Bambu Sapanga, Sapanga jwa Aizilaeli, jubiya ni inyela sakwaahenga bandu buku Izalaeli ahenga mahakau sukuigungamali imong'umong'u yi isapanga yengi. 27Mahengu gangi gaka Omili nukugangamala kwaki, goti gaandikwi mu Kitabu sa Ngombuke ya aka Bambu Akolongu buku Izilaeli. 28Ndienu Omili jatenda kuwa, buntaga ku musi guku Samalia, mwanamundu joankema Ahabu jwabia bambu nkolongu pandu paki.
Bambu nkolongu Ahabu juku Izalaeli
29Mu saka sa selasini na nani su ulongosi waka Asa jojabii bambu nkolongu juku Yuda, Ahabu mwana waka Omili, jwatumbulia kulongosa ku Izilaeli. Jwalongusa ku musi uku Samalia kwa yaka ishilini ni mibeli. 30Ahabu mwana waka Omili jwahenga majambu mabaja palongi jaka Bambu Sapanga kupeta aka bambu akolongu boti babundonguli. 31Ngasekwatosiki pe kunnziga Yelobuamu mwana waka Nabati, kabee Ahabu anzukuwa Yezebeli kamwali waka Etibaali, jojabii bambu nkolongu jwa Asidoni, jatumbulia kutumaki nu kundumbali Baali. 32Akisengila kisapanga Baali nyumba jukukilumbali ku Samalia, nu nkati jaki jalenganakia mesa jukupiiki matambiku. 33Kabee bambu nkolongu Ahabu jalenganakia kimong'umong'u si kisapanga sa mbomba sebikikema Ashela, nukwaahenga bandu buku Izalaeli ahenga mahakau nu kunhenga Bambu Sapanga, Sapanga jwa Azilaeli jubiya ni inyela ngani. Ahabu jahenga majambu mabaja ngani kupeta aka bambu akolongu boti buku Izalaeli babundonguli. 34Kipindi sukulongosa kwaki, Hieli jukuhuma ku musi uku Beseli jugusenga kabee musi uku Yeliku. Lakini pajwasenga pe nsingi wa musi uku Yeliku mwanawaki jukutumbuli joankema Abilamu jwatenda kuwa, kabee pajwalenganakia milyangu ja musi mwanawaki jwamwisu jobunkema jwatenda kuwa, haga gapitila kulengana ni lilobi laka Bambu Sapanga kupete Joshua.
Currently Selected:
1Akabambu Akolongu 16: MaBV
Highlight
Share
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.