1Akabambu Akolongu 17
17
Eliya jupwaga nga jikuni iyula
1Ndienu Eliya mundu juku kijiji suku Tishibi gowabi ku Gileadi, ampwagila bambu nkolongu Ahabu, “Napa kwaka Bambu Sapanga, Sapanga jwa Izilaeli jojubii mwomi na ndi nepani ndenda kuntumaki, kubanga ngakwiikubi nu ulumi wala ngajikuni iyula mbaka panipwaga kabee.”
2Ndienu, lilobi laka Bambu Sapanga lunhikila Elia kupwaga, 3“Guboka pamba gujenda upandi golipiti lyoba, ukilihiya pa kalosi ka Kelisi kakabi upandi golipiti lyoba wa losi lwa Yoludani. 4Hoku wikunywa masi ga mu kalosi haka nakabee nagalagalaki makongoo guguletila posu.”
5Ndienu, Eliya jajetakia lilagalaki laka Bambu Sapanga, jajenda kutama kukalosi ka Keliti kakabi upandi golipiti lyoba wa losi lwa Yolodani. 6Makongoo gabia gundete mikati ni inyama, pulukela na pakamii, na jakunywa masi ga mu kalosi homu. 7Lakini baada ja masoba masokopi kalosi kala katenda kujomale kwa ndaba ngasejakuniki iyula mu nndema.
Elia anhyoa mwana juku mmbomba joawii alomi juku Seleputa
8Ndienu, lilobi laka Bambu Sapanga lunhikila Eliya kupwaga, 9“Boka gujenda kumusi uku Seleputa, gogubii pambipi na musi uku Sidoni, gukatama koku. Nunndagalaki mmbomba jumu jojaweliwi nu ndomi waki jugupekia posu.” 10Ndienu, Eliya jatenda kuboka nukujenda ku Seleputa. Ejahika pilitanga la musi anketania mmbomba jumu jojakuwiki ndomi waki jutondo nhanzu. Elia ankema mmbomba jola nukumpwagi, “Nanuguloba gunetila masi ngunywaje.” 11Mmbomba jola pajwabiya jutenda kuboka, Eliya ankema kabee nukumpwagi, “Gupepa koku gunetila ni kipandi si libumunda.”
12Mmbomba jola ampwagila, “Nugulapi kwilihina laka Bambu Sapanga, Sapanga waku jojubii mwomi, ngasemii ni libumunda hatalisikipi. Mii pe na mbunda jimu ju uwembi mu kibega na mahuta masikipi mu lisupa. Nhikiki pamba kutondo nhanzu, na nyenda kunyumba kujosa libumunda heli, ili tukula, kijomuka na tukuwa.”
13Eliya ampwagila, “Wiijogopa. Jenda kahenga ngati egulongi. Lakini gunyosila nepani hoti kabumunda kasokopi gunetila, nahewijomula walijosila wa mweti na mwana waku. 14Kwa ndaba, Bambu Sapanga, Sapanga jwa Aizilaeli jupwaga ana, ‘Uwembi goubii mu kibega saku nga gupungusike, wala mahuta gagabii mu lisupa ngagajomoki mbaka nepani Bambu Sapanga panajikunisa iyula mu nndema.’”
15Ndienu, mmbomba jola jajenda kuhenga ngati Eliya ejabiya anndagalaki, ndi mmomba jola na akalongu baki na Eliya bapata posu kwa masoba gingi. 16Uwembi mu kibega ngasewajomwiki, wala mahuta mu lisupa ngasegajomwiki ngati lilobi laka Bambu Sapanga leampwagila Eliya.
17Egabiya gapetiki majambu haga, mwana jukumbomba jola jatenda kulwala, na jaendalia kulwala ngani, na mwisu we jatenda kuwa. 18Mmbomba jola ampwagila Eliya, “Wamundu waka Sapanga ndaba jaki gunhengi hela? Boo, guhikiki pamba kungombuke mahakau gangu nukunhenga mwana wangu jukuwaje?”
19Eliya ampwagila, “Netila mwana waku.” Ndienu Eliya anzukua mwana jola pikigamba sa anyongo baki, anzelula nukujenda naku mbaka ku nani ku sumba saki, angonika pi kitanda saki. 20Ndienu anndelila Bambu Sapanga koni jupwaga, “Mwaa Bambu Sapanga, Sapanga wangu, boo guletiki le ling'ai kuku mbomba jondama kwake, na jojundunza, gunndeti ling'ai sukunkoma mwanamundo?” 21Ndienu Eliya jiligonika panani jaka mwana hoju mala pa tatu nukunndele Bambu Sapanga, “Mwaa Bambu Sapanga, Sapanga wangu, nuguloba gunkelubukia mwana jonzo womi waki!” 22Bambu Sapanga anzowania Eliya kulela kwaki, na mwana jola jatumbulia kupomo kabee.
23Eliya anhulua pai mwana jola na kwaapeke anyongo baki kuhuma kusumba sukunani, ampwagila, “Linga! Mwana waku jubii mwomi.”
24Mmbomba hoju ampwagila Eliya, “Sajenu henu manyiki kubanga wehapa ndi wamundu waka Sapanga, na malobi gaka Bambu Sapanga gagahuma munndomu waku ga sakaka.”
Currently Selected:
1Akabambu Akolongu 17: MaBV
Highlight
Share
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.