1Akabambu Akolongu 19
19
Eliya jutili ku kitombi sa Sinai
1Bambu nkolongu Ahabu ansimulia nhwanu waki, Yezebeli, majambu goti gajahengiki Eliya namuna ejaakoma alota bikisapanga Baali ku upanga. 2Ndienu, Yezebeli antuma mundu kuka Eliya ampwagila ana, “Nugulapi ana, kilabu kipindi ngati senze nibiya nugukomiki ngati wehapa ewaakoma alota haba, ana ngasenhengiki hela isapanga ingomila kutali.” 3Eliya jajogopa ngamaa na jatila ili kulamisa womi waki, anzukua ntumisi waki nukujenda naku ku musi uku Beli Sheba ku Yuda.
Najombi andeka ntumisi waki kokuje.
4Najombi jajenda kwa sapwali ji lisoba limu kujingi kulungwenza. Ndienu jwahika, nukutama pu nkongu gumu, gobugukema nletemu. Hapa ndi jaloba kubanga jukuwa, koni jupwaga, “Kutosike! Nganhwesi kabeti. Mwaa Bambu Sapanga, nuguloba sajenu ugubowa womi wangu. Nepani nganamboni kupeta akahoku bangu.”
5Ndienu, Eliya jagonila pai ju nkongu hogu, lunkamula lugonu. Kipindi aselase ntumisi waka Sapanga jukunani, jatenda kungusa nu kumpwagi, “Jumuka gukula.” 6Eliya ejajumuka jalinga koni na koni, pambipi ni kimutu saki kwabii ni libumunda leajosiki kwa makalakala, na supa sa masi pambipi ni kimutu saki. Ndienu jakula, nakunywa, jwagonila kabee. 7Ntumisi waka Sapanga jukunani anhikila kabee mala ja pili, angusa nukumpwagi, “Jumuka gukula anangahela sapwali jaku jitenda kunonopa ngani.” 8Eliya jajumuka, jakula na kunywa. Ndienu jajenda kwa makili ga posu heji sapwali ja masoba alubaini, muwi ni ikilu, mbaka ku Holebu yani Sinai, kitombi saka Bambu Sapanga. 9Hoku, jahika pandu palabi likolu jatama homu.
Ndi lilobi laka Bambu Sapanga lunhikila kupwaga, “Eliya guhenga kii pambane?”
10Najombi japwaaga, “Moniki wipu, mwaa Bambu Sapanga, Sapanga jwa akomana ngondu. Aizilaeli bilikaniki lilaganu laku, bapabombulini mesa yaka yukupiiki matambiku na kwaakoma alota baku ku upanga. Ndi nepani pe nenhigali, nakabee andaputa ili angoma!”
11Bambu Sapanga ampwagila, “Pita kunza wakajema panani ji kitombi palongi jangu Bambu Sapanga.” Ndienu hapa kimbonga kikolongu sahika nukukajulana itombi palongi jaka Bambu Sapanga. Lakini Bambu Sapanga ngase jabii mu kimbonga hesi. Pasapeta kimbonga hesi, sahika kililima, lakini Bambu Sapanga ngase jwabii mu kililima hesi. 12Esapeta kililima wahika mwotu kabee. Lakini Bambu Sapanga ngase jwabii mu mwotu hogu. Ewapeta mwotu hogu, ndi kahika kasauti kasoku kukubole.
13Ndienu, Eliya pajwajowana sauti jukubole heji, jwilihekalia pa mihu jaki kwi ingobu jaki, jwapita nukujema kunza ji likolu. Hapa ndi jijijowania sauti jakapwaga, “Eliya! Guhenga kii paniapa?”
14Najombi anzibua, “Moniki wipu, mwaa Bambu Sapanga, Sapanga wa akomana ngondu kwa ndaba bandu buku Izilaeli bilikaniki lilaganu laku, bapabombulini mesa yaku yukupiiki matambiku na kwaakoma alota baku ku upanga, ndi nepani pena nehigali, nakabee andaputa ili angoma!”
15Bambu Sapanga ampwagila, “Gukelubuka sukupete indela jukulukoba mbaka ku Damasiko. Pawihika hoku, wannzakania mahuta Azaeli ili jubiya bambu nkolongu juku Silia. 16Najombi Yehu, mwana waka Nimushi, wannzakania mahuta ili jubiya bambu nkolongu juku Izilaeli. Elisha mwana waka Shafati, juku Abeli Mehola, wannzakania mahuta jubiya nndota pandu paku. 17Ndienu jokapi jojilemangana upanga waka Azaeli, Yehu jitenda kunkoma, na jokapi jojilemangana upanga waka Yehu, Elisha jitenda kunkoma. 18Hata sajenu mii na bandu elupu saba mu nndema uku Izilaeli, boti babube ngasebunndumbali kisapanga Baali, na boti babube ngasebikihenge isima kimong'umong'u hesi.”
Elisha ankema kuba nndota
19Eliya jaboka nu kunkole Elisha, mwana waka Shafati jutenda kulema. Jabiya julema kwa ng'ombi pea komi ni ibeli yeyabiya itenda kulema, na pea ja ng'ombi yaka Elisha jabiya munyuma ngani. Ndienu Eliya jwahula kanzu jaki nukunhwatika Elisha. 20Ndipala, Elisha jwiileka ng'ombi yaki, ampwata Eliya imbelu nukumpwagi, “Guneka hoti nyenda nakaatabuka atati bangu na amabangu.”
Eliya anzibua, “Gujendaje! Ndaba ngase nugukanike.”
21Ndienu, Elisha anndeka Eliya, nukuikelabu ng'ombi yaki, jwiisinza ng'ombi heyi nukuiteleka sukutumi hanzu yi ingolingoli, jaapekia bandu, batenda kula najombi jatenda kuboka, nukumpwata Eliya kojabiya ntumisi waki.
Currently Selected:
1Akabambu Akolongu 19: MaBV
Highlight
Share
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.