1Akabambu Akolongu 20
20
Asilia na Aizilaeli atenda kukomana
1Beni Hadadi bambu nkolongu juku Silia, jwaakusanya akomana ngondu baki boti, jajongana na akabambu akolongu bangi selasini na abeli babahika na falasi na magali gu kuhutwa. Bugujendila musi uku Samalia bugujobalia nu kugutukali. 2Ndienu, jatuma bandu ku musi kwaka bambu nkolongu Ahabu juku Izilaeli, bumpwagila ana, “Bambu nkolongu Beni Hadadi jupwaga ana, 3Madini gaku ga feza na madini gaku ga zahabu ndi mali gaku na akahanu baku baanyambiki na bana baku ndi baki.”
4Najombi bambu nkolongu juku Izilaeli jajibua, “Wabambu wangu segupwagiki ndi sa sakaka, nepani na hindu yoti yemii nayu ndi mali gaki.”
5Ndienu, bandu bala bunkelabukia kabee bambu nkolongu Ahabu, nu kumpwagila, “Nkolongu Beni Hadadi jupwaga kubanga, nugutumila bandu ili gumbekia madini ga feza na madini ga zahabu na akahanu baku pamu na bana bako. 6Ndienu, kilabu kipindi ngati senze, naatuma atumisi bangu kulikagu lijumba laku likibambu na nyumba ya atumisi baku, atola kila sindu sewikipai ngani.”
7Ndipala, Ahabu bambu nkolongu juku Izilaeli, jwaakema akakilongosi boti bu nndema, jwaapwagila, “Henu nndinga mundu ajo mwojututumbuli ngondu! Jaatumiki bandu kwangune kubanga jupala akahanu bangu, na bana bangu na madini ga zahabu gangu na madini ga feza gangu. Nepani ngasenukanila!”
8Aseja na bandu boti bumpwagila, “Wiihola wala wanzetake.”
9Ndienu, Ahabu jaapwagila bandu baka bambu nkolongu Beni Hadadi, “Mumpwagila bambu wangu nkolongu ana, ‘Nepani nu ntumisi waku nhwesa kuhenga goti gaugapalika pa mwandi, lakini malagalaki ga pili gani nganyetake hata kulenga.’”
Ndipala bandu bala babokaniya kujenda kupeleka majambu bambu nkolongu Beni Hadadi. 10Beni Hadadi antumila Ahabu bandu kumpwagi, “Isapanga inapula ngamaa, ana nganaguhalabani musi uku Samalia na ngasiihigali sindu sokapi sesuse hata akomana ngondu baku ngabiwesi kukijuku kuba ngombuke!”
11Bambu nkolongu Ahabu juku Izilaeli jajibua kubanga, “Mumpwagila bambu nkolongu Beni Hadadi mundu jojujenda kukomana ngondu ngasejikipuna, jikipuna baada jukuwesa ku ngondu!”
12Beni Hadadi jagajoanya majambu haga gaka bambu nkolongu Ahabu, kipindi jombi na akabambu akolongu bangi bababiya ajongini naku pababiya abii mu mahema gabu atenda kunywa. Ndienu jwalagalakia akoma ngondu baki, “Mliandia kujenda kukomana ngondu.” Ndienu biliandia kujenda kukomana ku Samalia.
13Kipindi sese, nndota jumu anzendila bambu nkolongu Ahabu juku Izilaeli, ampwagila ana, “Bambu Sapanga jupwaga kubanga, ‘Boo, waabweni akomana ngondu haba heajolwike? Lelenu isinaahenga asindwa palongi jaku, nanagu wiimanya kubanga nepani ndi Bambu Sapanga.’ ”
14Najombi Ahabu jalalukia, “Jwinyangatia nyane?” Nndota japwaaga, “Bambu Sapanga jupwaga ana, ‘Bagujangatia akaakombu baakomana ngondu babaatumaki akolongu ba musi.’ ”
Najombi bambu nkolongu jalalukia, “Nyane jojitumbulia kukomana?”
Nndota anzibua, “Ndi wehapa!”
15Ndipala, bambu nkolongu Ahabu jaakema akakilongosi baakomana ngondu bababi bu nkoa, babia akanalomi mia mbili selasini na mbili. Ndienu jwaakusanya Aizilaeli boti babaigali jumula jabu babia elupu saba.
16Ndienu, pakwaika lyobamutu Ahabu na akomana ngondu buku Izilaeli batenda kuboka, kipindi hesi Beni Hadadi na aka bambu akolongu ajaki selasini na abeli bababiya jujongini naku bababia aendale kunywa nu kulobe mu mahema gabu. 17Aka akombu bababia akilongosi baakomana ngondu bababi bi mikoa, batenda kulongule. Kipindi hesi bambu nkolongu Beni Hadadi jwabiya jaatumiki bandu baalaluki majambu babube bahika na kwaapwagi kubanga, akomana ngondu ahika kuhuma ku Samalia. 18Beni Hadadi jaalagalakiya, “Mwaakamula koni abii bomi. Ana ahikiki ku lukwali mwaakamula koni abii bomi na hata anahiki kwa ndaba ja ngondu mwaakamula koni abii bomi.”
19Ndienu, akombu bababia akakilongosi baakomana ngondu bu nkoa, bapita kunza ja musi koni akomana ngondu abii kunnyuma. 20Kila jumu wabu ankoma mmbaja wabu jumu. Bandu buku Silia batila imbelu, na akomana ngondu buku Izilaeli batenda kwaabenga, lakini Beni Hadadi bambu nkolongu juku Silia, koni jukwei falasi, jwatila na akomana ngondu asokopi baakwei falasi. 21Ndipala bambu nkolongu juku Izilaeli jwawesa ngondu, jwiikamula falasi pamu na magali gukuhutwa gingi, na kwaakoma bandu bingi buku Silia.
22Mwenikatai, nndota jola jajenda kwaka bambu nkolongu juku Izilaeli, ampwagila kubanga, “Wiliandia nu guholalia samboni sukuhenga. Pa mwaka bambu nkolongu juku Silia jwiihika kukomana na wehapa kabeti.”
Bandu buku Silia akomana kabe na bandu buku Aizilaeli
23Aka kilongosi bababia pai jaka ba bambu nkolongu Beni Hadadi balongila majambu ganga, “Isapanga ya bandu buku Izilaeli ndi isapanga yu muitombi, ndi maana babia na makili gukutuwesa lakini anatukomini nabu punndema uku ubambaa sakaka twiitenda kwaawesa. 24Ndienu guhenga ana, waaboa aka bambu akolongu selasini na abeli haba pandu pabu, waabeka akakilongosi bangi ba akomana ngondu badala jabu. 25Waandia akomana ngondu bingi abia ngati bababi pa mwandi, kelubukia falasi yeyaobiki na magali gukuhutwa ngati gaugahoa pa mwandi. Hapa ndi patwiiwesa kukomana na Aizilaeli pandu puubamba natwepani twiibia na makili kupeta bombi.”
Beni Hadadi jagajowania majambu gabu, na jahenga ahelahela.
26Saka sesapwata esapeta kipindi sikipepu, bambu nkolongu Beni Hadadi jwaakusanya akomana ngondu baki, jwajenda ku musi uku Afeki kukomana na bandu buku Izilaeli. 27Nabombi akomana ngondu buku Izilaeli bakusanywa na kwaapeke hindu yukukomane, bajenda kukomana na bandu buku Silia. Bandu buku Izilaeli bajenda kubeka kambi, ngati makundi masoku masoku mabeli gi imbui, lakini bandu buku Silia babiya ajagani munndema mwoti.
28Ndipala, mundu waka Sapanga anzendila bambu nkolongu juku Izilaeli, nu kumpwagi, “Bambu Sapanga jupwaga ana, ‘Kwa ndaba bandu buku Silia apwagiki kubanga nepani Bambu Sapanga ndi na Sapanga ju muitombi wala nga Sapanga wa pandu pu ubamba. Nuguhenga waawesa bandu haba bingi, na wehapa isigumanya kubanga nepani ndi Bambu Sapanga.’”
29Akomana ngondu buku Izilaeli na bandu buku Silia bapega kambi masoba saba, koni alingalani. Lisoba la saba ngondu jatenda kutumbuli. Lisoba lela akomana ngondu buku Izilaeli baakoma akomana ngondu baajenda kwa magolu laki jimu. 30Babahigalia batilila ku musi uku Afeki. Hoku lumatu lwa musi lwatenda kwahabuki na kwaakoma akomana ngondu buku Silia elupu ishilini na saba bababia ahigali.
Beni Hadadi jatila nu kulijoba mu sumba su nkati sa nyumba jejabii pikilanda ja musi. 31Atumisi baki bumpwata nu kumpwagi, “Tujowini kubanga akabambu akolongu buku Izilaeli abii ni ikia. Ndienu, gutuleka tulikonga maguni mu ibunu ni migoji nhingu, na tujenda kwaka bambu nkolongu juku Izilaeli. Pengi kwa juwesa kuguleka wa mwomi.” 32Ndienu, bilikonga maguni mwiibunu yabu ni migoji nhingu yabu, nukunzende bambu nkolongu juku Izalaeli, bumpwagila, “Ntumisi waku Beni hadadi, juguloba ana, ‘Gupepa koku nuguloba guneka namwomi.’”
Ahabu japwaga, Kumbi jakali mwomi? Sapi pena, jwombi ndi nndongu wango.
33Atumisi baka Beni Hadadi babona kuba jenieji nginyuli ja mboni, ndienu apalapa bumpwagi, “Enaa sakaka Beni Hadadi ndi nndongu waku!”
Ahabu jaapwagila, “Nzenda mukundeta kwangu nepani.” Ndienu, Beni Hadadi pabunndeta, Ahabu ankwelisa Beni Hadadi mu ligali laki lukuhutwa na falasi. 34Ndienu, Beni Hadadi ampwagila, “Misi joti jebabiya atati bangu baajopiki atati baku, nitenda kugukelubuki. Guwesa kupungu guliu lukulombesa hindu ku Damasiko hoku ngati eahengiki atati bangu ku musi uku Samalia.”
Ahabu anzibua, “Isinugulekakia kwi mihilu heji.” Ndipala jajongana naku nu kundekakela.
Nndota andapi mbamba Ahabu
35Kupete lilobi laka Bambu Sapanga, jumu ja anapunzi buku nndota, ampwagila nnzaki, “Gupepa koku, gunapula na hindu yaku yukukomane.” Lakini nnzaki jakana kunndapu. 36Najombi ampwagila, “Kwa ndaba gukaniki kujetake malagalaki gaka Bambu Sapanga, esigulekana pe nanepani lihimba isilitenda kugukoma.” Na sakaka, apalapa ejalekana pe na jwombi, jwaketangana ni lihimba latenda kunkoma.
37Ndienu, mwanapunzi hoju anketania mundu jongi, ampwagila ana, “Gupepa koku gunapula.” Mundu hoju andapula mbaka kunhumisa. 38Ndipala, nndota jatenda kuboka, jwajenda kutama pulutengu ji indela, ili kundendale bambu nkolongu juku Izilaeli, koni jilikongiki libanga laki ni pamiu kwi kitambaa ili jimanyikana. 39Ahabu pajwabiya jutenda kupeta, nndota annkema su kupwaga, “Mwaa bambu nepani nuntumisi waku nabii pu nsitali ukulongo ku ngondu, jahika nkomana ngondu jumu, janetila mundu jumu jobunkamwi nu kumpwagi, ‘Guntunza mundu jonzo anajutii gwiilepa womi waki kwa womi waku au wiilepa ipandi elupu itatu ya madini ga feza.’ 40Lakini panabiya na mahengu gangi, mundu hoju jatenda kutila.”
Ahabu bambu nkolongu juku Izilaeli apwagila, “Ndi ekwibiya kutemuliwa kwaku, gulitemwi wamwete.”
41Hapa ndi nndota jikiboa kitambaa pamihu jaki kanyata kanyata, na bambu nkolongu jammanya kubanga ndi jumu ja alota. 42Ndienu, nndota ampwagila bambu nkolongu, “Bambu Sapanga jupwaga anana, ‘Kwa ndaba gundekaki jugulema mundu jonugupwagi kunkoma, ndienu isigulepa womi waki kwa womi waku, na bandu baki kwa ndaba bandu baku.’ ”
43Ndipala, bambu nkolongu juku Izilaeli jajenda kunyumba jaki ku Samalia, koni mmwoju jaki jusukii ni inyela ngamaa.
Currently Selected:
1Akabambu Akolongu 20: MaBV
Highlight
Share
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.