2Samweli 19
19
Yoabu anndakali bambu nkolongu
1Yoabu bumpwagila kubanga bambu nkolongu jwabia julela nu kulobalake ndaba jakua kwaka mwana waki Abusolomu. 2Ndienu, kuwesa kwabu ku lisoba lela kwang'anambuka kuba kulelaneka kwa bandu boha, pabajowana kubanga bambu nkolongu andele mwana waki Abusalomu. 3Henu lisoba lela bandu bajingala ku musi kinunu ngati bandu baabuja kumusi koni abona iyoni sukutila ngondu. 4Bambu nkolongu juliyekalia pamiu jaki nukulela kwa sauti ngolongu koni jupwaga, “Nandi mwanawangu Abusalomu! Nandi mwana wangu! Mwanawango!” 5Ndi Yoabu jwajingala kunyumba jaka bambu nkolongu, nukumpwagi, “Lelenu gutupoiki lihamu twepani twaatumisi baku twaboha twetuhokwii womi waku lelenu, na womi wa bana baku akanalomi na womi wa bana baku akambomba na womi wa aka ahanu baku na womi wa mabangu gaku. 6Wehapa waapala bala babugusuki na waasuki babugupala. Gutulangii hotuhotu kupwaga aka kilongosi baakomana ngondu baku na atumisi baku ngaseabii na mana kwaku. Mona ana lelenu Abusalomu jakabi mwomi, twepani twaboha twakabia tukuiki, ndi wehapa wakabia gutoguli. 7Henu gujema gulongila na atumisi baku si isima. Ndaba napa kwaka Bambu Sapanga kubanga ana ngagujendi kulonge nabu ngahata jumu jojwiihigalia pamu na wehapa lelenu pakamii. Lendenu liibia lijambu lilia ngani kwaku wehapa kupeta majambu gilia goti gagupatiki toka pawabia unkombu mbaka lelenu.” 8Ndienu bambu nkolongu jwapita nukujenda nukutama pandu paki pambipi ni litanga. Bandu boha pabamanya bambu nkolongu jubii pi litanga batenda kunnzende.
Daudi julianda kubuja ku Yelusalemu
Kipindi sehesi bandu boha buku Izilaeli babia atiliki kila jumu kunyumba jaki. 9Bandu boha babia abisana beni na beni mu makabila goha guku Izilaeli, koni apwaga, “Bambu nkolongu Daudi jutukombula mu maboku ga abaja bitu, jutukombula mu maboku gaka Afilisiti. Lakini henu jugutiliki nndema waki ndaba jaka Abusalomu.”
10“Kabee Abusalomu jojuwe tunzakania mahuta ili jubia bambu nkolongu witu, henu jukuiki ku ngondu. Henu ndaba jakii ngase tulongale kunkelabu bambu nkolongu Daudi?”
11Bambu nkolongu Daudi jwaatuma bandu ajenda kwa agolu akolongu Sadoki na Abiatali, “Waapwagila, aseja buku Yuda, ‘Ndaba jakii bombi abia ndi bamwisu kunkelabu bambu nkolongu kunyumba jake? Malobi ga Aizilaeli boti ganhiki nepani bambu nkolongu. 12Mwanganya mwaalongu bango, mwanganya mwabandu ba mwai wango, ndaba jakii mbia mwabandu ba mwisu kungelabu nepani bambu nkolongu kunyumba? 13Munndalukia kabee Amasa ana jwombi nga mundu wa mwai gwango. Kabee Sapanga jungoma ana toka lelenu nga nunhengi jombi kuba kilongosi wa akomana ngondu bangu badala jaka Yoabu.’” 14Ndienu bambu nkolongu Daudi jaatogulisa miaoju bandu boti buku Yuda nabombi ni liwasu limu. Ndienu, baatuma bandu kumpwagi, “Gukelabuka kunyumba wehapa na aka atumisi baku boha.” 15Ndi bambu nkolongu jwahika ku losi luku Yoludani na bandu boha buku Yuda bahika mbaka ku Giligali kumpengana bambu nkolongu nu kunndoboo palosi ja Yoludani.
Daudi anndekake mahakau Shimei
16Shimei mwana waka Gela, Mbenyamini jukuhumi ku Baulimu jwahenga nyata kujenda pamu na bandu bangi ili kumpengana bambu nkolongu Daudi. 17Shimei jwapiti pamu na Abenyamini elupu jimu. Siba ntumisi wa alongu baka Sauli pamu na bana baki komi nu nhwanu atumisi ishilini bajenda nyata ku losi Yoludani kunndongule bambu nkolongu Daudi. 18Ndi balombuka mu ntandu ili kwahindaki alongu baka bambu nkolongu nu kunhenge bambu nkolongu goha gajugapala. Shimei mwana waka Gela jwatenda kuhika, japega magoti nukujinama mbaka pai palongi jaka bambu nkolongu, kipindi bambu nkolongu pajwabia juhegale kuloboka losi luku Yoludani. 19Shimei ampwagila bambu nkolongu, “Nuguloba wa bambu nkolongu wangu wiimalangi kuba ni likosa wala kukomboka likosa lenahengiki lisobalela pawabia guboka pamusi uku Yelusalemu. Nuguloba gwiiholale liyaa wala wagaholale ngani. 20Ndaba nepani ntumisi waku manya kubanga nahengiki mahakau. Hela ndi ndaba jukuhika lelenu, nepani ndi netumbuli kuhuma mu likabila laka Josepu kuhika kugupengana wehapa wabambu nkolongu wangu.” 21Ndi Abishai mwana waka Seluya jwapwaga, “Boo, Shimei ngasejupalika kukomeka ndaba anndigila yaambamba mundu jojuwe Bambu Sapanga anhagula sukumpaki mahuta?” 22Lakini Daudi jwapwaga, “Mwabana baka Seluya, ngasemi nu ubaja na mwanganya, henu ndaba jaki mlihenga ngati mwaabaja bangu leleno? Boo, jukomika mundu jokapi pa Izilaeli pani leleno? Nepani ndi bambu nkolongu juku Izilaeli na nga mundu jokapi kati ja Aizilaeli jo ngiti jukomika lelenu.” 23Ndi bambu ampwagila Shimei, “Wehapa nga gukuwe.” Bambu nkolongu anndapila Shimei.
Daudi anndekake Mefibosheti
24Mefibosheti nsokoo waka Sauli jwajenda najwombi kumpengana bambu nkolongu Daudi. Toka lisobalela bambu nkolongu hejwaboka ku Yelusalemu mbaka hejwakelabuka sapi, Mefibosheti jwabia ngase jusambisi masi magolu gaki nu kumoga indeu yaki na ngasejwapiki ingobu yaki. 25Ndi pajwahika ku Yelusalemu kumpengana bambu nkolongu Daudi, bambu nkolongu Daudi anndalukia, “Boo, Mefibosheti ndaba jakii ngasewapiti pamu na nepane?” 26Mefibosheti jwapwaga, “Mwaa bambu nkolongu wangu, ntumisi wangu jwatenda kungonga. Ndaba nepani ntumisi waku numpwagila, ‘Nhandaliya liponda ngwela ili nyenda pamu na bambu nkolongu.’ Ndaba nepani ntumisi waku mi ni kilema 27Henu jutei kungopake kwaku wabambu nkolongu wangu. Lakini wabambu nkolongu wangu gubii ngati ntumisi jukunani waka Sapanga. Guhenga lokapi legulibona laamboni kwaku. 28Ndaba alongu bangu boha baahumi kwaatati bangu babia bandu baapalika kukomeka palongi jaku wabambu nkolongu wangu. Lakini wameka nepani kuba kati ja bandu baakula pamesa jaku. Ngasembalika kuloba sindu sokapi kwaku wa bambu nkolongu.”
29Bambu nkolongu ampwagila, “Wiimbwagi nakanopi majambu gaku wamwete. Nepani tayali hamwi kubanga wehapa pamu na Siba mwiibagana milema jaka Sauli.” 30Lakini Mefibosheti ampwagila bambu nkolongu, “Nndeka Siba jujukua nndema joka kajika jake. Nepani ndosiki kwa ndaba wehapa wa bambu nkolongu wangu kubuja kunyumba sapi.”
Daudi anhenge waamboni Balizilai
31Balizilai Mgileadi jwabia juhikiki kuhuma ku Logelimu. Jwabia jupiti pamu na bambu nkolongu ku losi luku Yoludani ili kunhindaki mbaka ku kwii ja losi. 32Balizilai jwabia nseja ngamaa, jojubii na yaka semanini. Najombi Balizilai jukubika ampelake posu bambu nkolongu pajwabi ku Mahanahimu, ndaba jwabia mundu jojubii na mali gingipi. 33Ndi bambu nkolongu Daudi ampwagila Balizilai, “Tuboka twaboha ku Yelusalemu nepani niitenda nagupekiya hindu yegupala.” 34Lakini Balizilai ampwagila bambu nkolongu, “Boo, mii na yaka ingi yukutama punndema pani mbaka nyenda pamu na wehapa ku Yelusalemu? 35Nepani lelenu mi na yaka semanini. Boo, mii lee nu uwesu ukumanya majambu boo, gasapi na majambu boo mabaja? Boo, nepani ntumisi waku nhwesa kumanya kunong'ame au kubaba kwa sindu sengula au kunywa? Boo, niiwesa kumanya sauti ja bandu baajemba akanalomi au akambomba? Ndaba ja kii nepani ntumisi waku mia nsigu gongi kwaku wehapa, bambu nkolongu wango? 36Nepani ntumisi waku niijenda mbaka pambipi pee kwii ja Yoludani. Ndaba jakii bambu nkolongu junepa nhupi ngolongu ana? 37Nuguloba gunekakia ntumisi waku nguila mu musi wangu pambipi nilitenge la atati bango na amabango. Lakini ntumisi waku Kimhamu, gunndeka jujenda pamu na wehapa bambu nkolongu wangu na gunhengila jwombi lokapi legubona libii laamboni.”
38Bambu nkolongu ampwagila, “Kimhamu jwiijenda pamu na nepani na miti nunhengila lokapi lelibii laamboni kwaku. Na lokapi lewiipala nuguhengila niitenda kuguhenge.” 39Ndi bandu boha balombuka losi luku Yoludani na bambu nkolongu najwombi jwatenda kuloboka. Bambu nkolongu ambuswa nukumpenge Balizilai na Balizilai jwabuja kunyumba jaki.
Bandu buku Yuda na buku Izilaeli apengana ndaba jaka bambu nkolongu
40Bambu nkolongu jwaendalia mbaka ku Gileadi, najombi Kimhamu jwabia julongini naku. Bandu boha buku Yuda na bandu buku Izilaeli babia anhindaki bambu nkolongu.
41Ndienu bandu boti buku Izilaeli bahika kwaka bambu nkolongu nukumpwagi, “Ndaba jaki alongu bitu bandu buku Yuda alibona bombi ndi baapalika kugujukua wehapa nukugulombo ku losi luku Yoludani, wehapa nu nndongu waku pamu na bandu bako?” 42Bandu buku Yuda baapwagila bandu buku Izilaeli, “Ndaba bambu nkolongu hoju ndi nndongu witu jwapambipi. Ndaba jaki nnyoma kupete lijambu hele? Boo, tukuliki sokapi kipindi soti kukulepa bambu nkolongo? Au jombi jutupeki nhupi jokape?” 43Bandu buku Izilaeli baajibwa bandu buku Yuda, “Tubii na haki mala komi kupete bambu nkolongu, kupeta haki yemmbinaku mwanganya na hata kupetee Daudi mwene. Ndaba jakii mutupoa lihamo? Boo, twepani lee ngasetwabia twabandu bukutumbuli kupwaga bambu nkolongu witu jubujaje?” Malobi ga bandu buku Yuda gabiya makolongu kupeta malobi ga bandu buku Izilaeli.
Currently Selected:
2Samweli 19: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.