Kuboka 11

Lilapuli la komi kukomeka ibeleku yu utumbuli ya bandu ni inyama

1Bambu Sapanga ampwagila Musa, “Lakona lilapuli limu lenanndetila Falau pamu na bandu baki boti. Elipeta lilapuli heli jwanndeka mmboka jumula. Kabee pajwanndekakia jwiitenda kummbenga mmbokaninya jumula. 2Waapwagila Aizilaeli sajenu ajowana sapi, kila jumu wabu, mwanalomi nu mmbomba apalika anndoba wapambipi waki indu yealenganaki na madini ga feza na ya zaabu.” 3Bambu Sapanga jwaahenga Amisili baatendila isima Aizilaeli. Kabee Musa najombi jwabia mundu jojumanyikini ngamaa ku Misili na palongi ja aka atumisi babunzangati nkolongu Falau na bandu boa.

4Musa ampwagila Falau, “Bambu Sapanga jupwaga ana, ‘Piikilu ngani lelenu, niipeta pikilanda ju nndema uku Misili. 5Paniipeta, kila nsaliwanu mwanalomi ju utumbuli pu nndema uku Misili jwiitenda kuwa. Kutumbuli kibeleku saku Falau ju utumbuli jojuwe jojwiibia nndisi waku mbaka kibeleku sanalomi ju utumbuli waka ntumisi waku mmbomba jojupola ilebi kwi lilibu. Hata asaliwanu bu utumbuli bi mipugu yoti itenda kuwa. 6Kwikuba ni kilelu kikolongu ngamaa ku nndema uku Misili, kilelu sesuse ngasekiwahiki kupitii wala ngakiipiti kilelu ngati hesi kabete. 7Lakini nga hata jimbwa jejaabumila Aizilaeli au inyama yabu. Hapa ndi mwiimanya nepani Bambu Sapanga naabaganisa Aizilaeli na Amisili.’” 8Musa jwajomulia su kumpwagi Falau, “Aka atumisi babugujangati binhikila nu kupega magoti nukunyinami palongi jango kwi isima, koni anoba moka mu nndema uku Misili, nepani pamu na bandu baa boha baambwata. Egiipeta haga niitenda kuboka.” Ndi Musa jwatenda kuboka kwaka Falau koni juyomiki ngamaa.

9Bambu Sapanga ampwagila Musa, “Falau ngajugujowanele, ili nndondukela yangu ibonikana pu nndema uku Misili.” 10Ndienu Musa na Aloni bahenga ndonduke hei yoti palongi jaka Falau. Lakini Bambu Sapanga anhenga Falau kuba na mwoju gogunonwipi, jwakani kwaalekake Aizilaeli aboka mu nndema waki.

Currently Selected:

Kuboka 11: MaBV

Highlight

Compare

Copy