Kuboka 12

Tipati ja pasaka

1Bambu Sapanga ampwagila Musa na Aloni pababi bakona ku nndema uku Misili, 2“Mwei gongo kwinu gwibia mwei gu utumbuli mu saka. 3Mulipwagila likundi loka la Aizilaeli lisoba la komi la mwei gongo, kila mwanalomi jwiijukua mwana likondoo au imbui jimu ili bandu bu nnyumba jaki awesa kula. 4Ana nyumba jimu jibii na bandu asokopi banga kuwesa kujomo likondoo limu biijangatana na nyumba ja pambipi ndi biihagula likondoo lebiiwesa kulijomo. Ndienu, mwiilingalia kiasi boo si inyama sekipalika kulengana nu upali wa kila mundu. 5Inyama yemwiihagula ipalika ibia ikambaku ya saka simu yangakuba ni kilema, nhwesa kuijuku kati ja makondoo au imbui. 6Mwiitunza kinyama hesi mbaka lisoba la kumi nu nsesi la mwehi hogu. Lisoba heli Aizilaeli boti biisinza inyama hei kipindi sa pakamii. 7Alapu biijukua mwai wi inyama hei nu kupaki mu lutengu lu nndyangu na panani ji milyangu mobiikula inyama hei. 8Biikula inyama hei ikilu jeje baada jukuijosa, biikula pamu ni mabumunda ganga kujege amila ni likolu la mahamba lelibaba. 9Akotuka kula koni jibii mbei au koni ateliki kwamasi, ila kupalika ajosa joka, pamu sanga kuseku kimutu wala magolu au kuboha indu yunkati. 10Mwiigaki inyama jokapi mbaka pulukela. Ana mwiigakia inyama mbaka pulukela mwajitinia pa mwotu. 11Inyama jeheji mwiikula koni muliandi kuboka, mwiikuba mulikongiki mikanda mu ibunu yii nu kuwata ilatu mu magolu na ndonga yii ibii mu maboku. Kabee mwiikula nyatanyata, haga ndi tipati ja Pasaka gaka Bambu Sapanga.” 12“Ikilu jeheji, niipeta mu nndema joti juku Misili na kwaakoma bana akanalomi boti bu utumbuli na bana bi inyama. Kabee nailapula isapanga yoti yuku Misili. Nepani ndi Bambu Sapanga. 13Mwai hogu gwiibia nginyuli jii jukulangi nyumba jemwibia mmbii. Nanepani panaajibona mwai hogu, nampeta mwanganya na ngamwiipati lilapuli lokapi panagulapula nndema uku Misili. 14Mulisoba heli mwiihenga tipati jukukombuke ganunhengi nepani Bambu Sapanga wino. Nhenga hela ni ibeleku hii yoti, heli ndi lilagalaki la masoba goha.”

Tipati jakula mabumunda ganga kujege amila

15Bambu Sapanga jwapwaga, “Mwiikula mabumunda ganga kujege amila kwa masoba saba. Lisoba lu utumbuli la masoba saba haga, mwiiboa amila mu manyumba gii. Mundu jokapi ana julii sindu seajegii amila mu masoba saba haga, kupalika kummbenge kuhuma mu likundi la Aizilaeli boti. 16Lisoba lu utumbuli ni lisoba la saba ndi gu kuketangana kwa sapi. Mu masoba mabeli haga bandu biihenga lihengu lokapi ila pee kuandaa posu ili bandu akula. 17Mwiendalia kuhenga tipati heji ili jibia ngombuke kwinu na mu lisoba ngati heli nagaboha makabila goti ga Aizilaeli mu nndema uku Misili. Henu nhenga tipati heji mu lisoba ngati heli mwanganya ni ibeleku yii yoti. 18Henu mwiikula mabumunda ganga kubeka amila kutumbuli pakamii ji lisoba la kumi nu nsesi ja mwei wa gukutumbuli mbaka ikilu jilisoba li ishilini na moja ja mwei gogo gu utumbuli. 19Mu masoba saba haga mwiikuba na amila jokapi mu manyumba gii. Mundu jokapi jukubi nngeni au Nhizilaeli jukusaliwa ana juli sindu seajegi amila, mundu hoju bammboa mu likundi la Aizilaeli. 20Mwiikula sokapi seajegi amila pokapi panntama, nkula posu janga kujege amila.”

Tipati ja Pasaka gu utumbuli

21Ndienu, Musa jwaakema aseja boti buku Izilaeli na kwaapwagi “Kila jumu wii juhagula mwalikondo au imbui jejiitosa kwa bandu bu nnyumba jaki ili jusinza ndaba jukuhenga tipati ja Pasaka. 22Mwiijukua manyai gi mimea jebijikema isopo nukugasua mu mwai gogubi nkati ja bakuli nukupaki mu pelemu ji milyangu ya nyumba yii. Mundu jokapi jwiipita kunza ja nyumba ikilu heji mbaka pulukela. 23Ndaba nepani Bambu Sapanga niipeta kwaakoma Amisili. Lakini panagubona mwai go apaki mu pelemu ju nndyangu wa nyumba yii, jiitenda kupetana na ngananndekake jojukoma kujingi mu manyumba gii na kwaakoma. 24Kila jumu winu jukamula lijambu ale ngati lilagalaki la yaka petapeta, kwinu mwanganya pamu ni ibeleku inu. 25Pamwiijingala mu nndema gojunndagila Bambu Sapanga kumpeke, kupalika nhendalia kuhenga tipati heji. 26Bana bii pabanndalukiya, ‘Tipati jenze jibii maana boo kwino?’ 27Mwanganya mwaajibwa, ‘Lende litambiku la tipati ja Pasaka ndaba jukuntende isima Bambu Sapanga, ndaba jwapeta panani ja nyumba ja Aizilaeli ku Misili pa jwaakoma Amisili, lakini twepani ngasejutukomike.’” Ndienu Aizilaeli bajinamisa imutu yabu na kunndumbali Bambu Sapanga. 28Ndienu, Aizilaeli bajenda nu kuhenga ngati Musa na Aloni hejwaapwagila kulengana na mihilu jaka Bambu Sapanga.

Lilapuli kukomeka bana akanalomi bu utumbuli buku Misili

29Pamahiku Bambu Sapanga jwaakoma asaliwanu akanalomi boti bu utumbuli buku Misili. Boti batenda kuwa, kutumbuli kibeleku su kutumbuli saka Falau, jukulisa ubambu ukolongu, mbaka nsaliwa ju utumbuli juku mpungwa juku ligelesa. Hata ibeleku yu utumbuli yi inyama yatenda kuwa. 30Ndienu Falau na aka atumisi baki na bandu boti buku Misili bajumuka ikilu. Kwapitila kilelu kikolongu ku nndema woti ku Misili ndaba ngase kwabii ni kibeleku sanalomi su utumbuli sanga mu manyumba goti. 31Ikilu jelajela Falau jwaakema Musa na Aloni, nukumpwagi, “Mbokanania mwanganya na Aizilaeli boti paabii bandu bango, nzendania mukunndumbalia Bambu Sapanga wino ngati henndobiki. 32Nzukua makondoo gii na ng'ombi mmbokaniaje, nnobila na nepani mbengee ngati enndobiki.” 33Amisili baapwagila Aizilaeli aboka nyata koni baka pwaga, “Kyee tuwesa kuwa twaboa ana ngatwaalekake kuboka!” 34Ndi Aizilaeli bajukuwa kinyunga sabu su uwembi wabu sebaunyiki sanga kujege amila na mabakuli gabu gukuunyi, bakonga mwiingobu nukutoto mu mabega gabu. 35Aizilaeli bahenga ngati Musa hejwaalagalakia pu utumbuli pala, baalobiki Amisili baapekia hindu yeyalenganakiwi na madini ga feza na zaabu ni ingobu. 36Bambu Sapanga jwaahenga Amisili baatendila isima Aizilaeli nabombi Amisili baapeki kila sindu sebaloba. Hela ndi Aizilaeli hebaanyaga Amisili mali gabu.

Aizilaeli aboka ku Misili

37Aizilaeli baboka kwa magolu musi uku Lamesesi nu kujenda ku musi uku Sukoti. Babia akanalomi ngati laki sita sanga kwaabalanga akambomba na bana. 38Bandu bangi bingi balongana nabu. Kabee Aizilaeli baboka pamu na makundi makolongu gi mipugu, gabia makondoo ni imbui na ng'ombi. 39Baboka ku Misili nyatanyata ngasebawesa kuandaa posu ja kula mu indela ila pe kinyunga sela sebaunyiki sanga kujege amila. Ndienu bajosa mabumunda ganga kujege amila. 40Aizilaeli babia atemi ku nndema uku Misili yaka mia nsesi na selasini. 41Lisoba la mwisu la saka sa mia nsesi na selasini makabila goha gaka Bambu Sapanga baboka ku nndema uku Misili. 42Ikilu heji Bambu Sapanga jwabia jutenda jukeluki kwaalenda Aizilaeli pajabia jwaaboa nndema uku Misili, Aizilaeli boti ni ibeleku yabu yoti apalika kulikomboka ikilu heji kukukeluki kelukelu ili kuntende isima Bambu Sapanga.

Hekupalika kuhenga mu tipati ja Pasaka

43Bambu Sapanga jwaapwagila Musa na Aloni, “Ganga ndi malagalaki gu kukomboka tipati ja Pasaka. Nngeni jokapi jwiikula posu ja Pasaka. 44Lakini ntumwa jokapi jobunndombiki ku lupija, baada ju kunseku jandu banndekakia jukula. 45Lakini mundu jokapi jojubi ngeni au nhenga kibalua jokapi jwiikula posu heji. 46Mwanalikondoo la Pasaka baalikula mu nyumba jimu. Nga mwiiboi inyama jokapi kunza ja nyumba mobiliandali wala mwiitunu lihupa lokapi li kinyama sa Pasaka. 47Bandu boha buku Izilaeli biitenda tipati heji. 48Anajubii nngeni jokapi jojutama na mwanganya, najombi jupai kuhenga tipati ja Pasaka, kwa ndaba juntende isima Bambu Sapanga, kupalika hoti akanalomi boti baatama mu nhyumba jaki ansekula jandu, ndi bammbalangia kuba ngati mwenei nu kunndeka jukula. Mwanalomi jokapi jwanga kuseku jandu jwiikula hata kulenga nabwaka. 49Malagalaki gagahengeka kwa Aizilaeli gahengeka kabe na kwa ageni babiitama kwinu.” 50Aizilaeli boti bagajetaki malagalaki haga nu kuhenga ngati Bambu Sapanga hejwaalagalaki Musa na Aloni. 51Lisoba lele Bambu Sapanga jwaaboa Aizilaeli mu nndema uku Misili kwa makundi.

Currently Selected:

Kuboka 12: MaBV

Highlight

Compare

Copy