Kuboka 17
17
Masi kuhuma mu lilibu
Esabu 20:1-13
1Likundi loka luku Izilaeli laboka kulukoba lwa Sini lajenda sapwali pandu pamu mbaka pangi ngati Bambu Sapanga hejwalagalakia, bandu babeka kambi ku Lefidimu. Lakini kola ngasekwabia na masi gakunywa. 2Henu bandu bung'ong'otekia Musa kupwaga, “Tupekia masi ga kunywa.” Musa jwaalalukia, “Ndaba jaki nndenda kung'ong'ateka? Mbona munndenga Bambu Sapanga?” 3Lakini bandu boka babia na nywita, bunng'ong'atakia Musa koni bakapwaga, “Ndaba jaki utuboa ku Misili kola, utuleta pamba ili utukoma kwa nywita twepani twaboa na bana bitu ni mipugu jito?”
4Ndienu Musa anndelila Bambu Sapanga koni jwaka pwaga, “Naahengila kii bandu haba? Ahegale kunapu na malibu!”
5Bambu Sapanga ampwagila Musa, “Peta palongi ja bandu haba, koni waajukwi aka atumisi ba Aizilaeli asokopi gulongana naku, koni gujukwi kabe nndonga jela jewagalapula masi ku losi Naili. 6Joaniya nepani niijema palongi jaku pililibu luku Holebu kola na wehapa walilapula lilibu lela na masi giitenda kunyika homu ili bandu awesa kunywa.” Ndienu Musa jwahenga hela palongi ja aseja buku Izilaeli. 7Pandu pala Musa jwapakema, “Masa” mana jaki kulenga na “Meliba” mana jaki kung'ong'oteka ndaba Aizilaeli bung'ong'otakia nukunndenga Bambu Sapanga koni bakapwaga, “Boo, sakaka lee Bambu Sapanga jubii pamu na twepane?”
Ngondu na Aamaleki
8Aamaleki bahika nukukomana na Aizilaeli ku Lefidimu. 9Musa ampwagila Yoshua, “Agula akanalomi asokopi gujenda kukomana na Aamaleki. Kilabu niijema panani ji kitombi koni ngamwi mu kuboku kwangu ndonga jejambekia Bambu Sapanga.” 10Ndienu, Joshua jwahenga ngati Musa hejwapwaga, ndi jwajenda kukomana na Ahamaleki. Musa na Aloni na Uli bakwela kunani ji kitombi. 11Kipindi soka Musa pajwabia jutondabe kuboku kwaki kunani, Aizilaeli batenda kuwesa ngondu na pajwahulua, Aamaleki batenda kuwesa ngondu. 12Lakini baada ja muda Maboku gaka Musa gatenda kusoka. Ndi Aloni na Uli bajukua lilibu nukulibeka pambipi na Musa najombi jwatenda kutama. Ndi bakamula maboku gaki nukugatondabe, jumu jwatondabia kuboku kwa malele najongi kuboku kwa mangega. Ndi maboku gaka Musa gabia nganganganga koni bijitondabi kunani mbaka lioba palajingala. 13Ndienu, Joshua jaawesa alonda buku Amaleki ku upanga.
14Ndienu Bambu Sapanga ampwagila Musa, “Liandika lijambu lende mu kitabu ili libia sindu sukukomboka. Kabe unsomila Joshua kubanga mitinaakoma Aamaleki na ngabaakomboki kabeti pani punndema.” 15Musa jwasenga mesa jukupiiki matambiku nu kujikema, “Bambu Sapanga ndi bendela jango.” 16Koni jupwaga, “Mujikwea kunani bendela jaka Bambu Sapanga! Bambu Sapanga jwiikomana na Aamaleki masoba goa.”
Currently Selected:
Kuboka 17: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
