Kuboka 18
18
Yetulo antembale Musa
1Ndienu, Yetulo nngolu nkolongu juku Midiani akoanu baka Musa, jwajojwana namuna Bambu Sapanga ejaaboa Aizilaeli, pajwaaboa kuhuma ku nndema juku Misili. 2Ndienu, Yetulo jajenda kwaka Musa koni jubii na Sipola nhwanu waka Musa babube Musa jabiya jaalei kwaka Yetulo, 3pamu na bana abeli. Mwana ju utumbuli bunnkema Gelishomu. Musa ampekia liina heli ndaba jwapwaga, “Mii mu nndema ukigeni.” 4Mwana wa pili ankema Eliezeli ndaba Musa jwapwaga, “Bambu Sapanga wa atati bangu ndi jojunyangati ili Falau jwiingoma.” 5Yetulo pamu nu nhwanu waka Musa, na bana babu abeli bahika kwaka Musa kulukoba kobabia abei likambi mu kitombi saka Sapanga. 6Yetulo jabiya antumila Musa malobi gagapwaga, “Nepani nu nkowanu waku Yetulo nhika kwaku pamu nu nhwanu waku na bana baku abeli,” 7ndienu Musa jwapita kunza kwaapengana akoanu baki, anzinamiya nu kunzobate. Balamukania nukujingi mu lihema. 8Musa jwaapwagila akoanu baki majambu goha gajuhengiki Bambu Sapanga kunhenge Falau na Amisili ndaba ja Aizilaeli. Anndandila kabeti mang'aliku gabapata mu sapwali na namuna Bambu Sapanga hejwahokwi. 9Yetulo jwatogulia ngamaa ndaba ja goha gajuhengiki Bambu Sapanga kwa Aizilaeli, kwa kaaoko mu maboku ga Amisili. 10Yetulo jwapwaga, “Julumbalika Bambu Sapanga jojunhokwi mu maboku ga Amisili nu kuboka mu utumwa waka Falau,
julumbalika Bambu Sapanga jojaokua bandu kuhuma mu utumwa wa Amisili. 11Henu manyiki Bambu Sapanga ndi nkolongu kupeta isapanga yoka ndaba jwaaokwi bandu haba mu maboku gaka Amisili babaahengi ngukuna.” 12Ndienu Yetulo akoanu baka Musa, anndetila Bambu Sapanga litambiku lu kutinii na matambiku gangi. Najombi Aloni jwahika pamu na aseja bangi buku Izilaeli ili kula posu pamu na Yetulo ndaba jukunndumbali Bambu Sapanga.
Kwaahagu baatemu
Kukomboka 1:9-18
13Kilabu jaki Musa jwatama kuamuli matatisu ga Aizilaeli, nabombi bajema koni atei kunhyongolota toka pulukela mbaka pakamii. 14Yetulo akoanu baka Musa pajwabona majambu goha Musa ga gajwaengila Aizilaeli anndalukia, “Ndaba jakii waaengi bandu majambu haga? Ndaba jaki gutama kajika jaku koni bandu atei kukuyongalota toka lukela mbaka pakamii?”
15Musa jwaajibua akoanu baki, “Nhenga majambu haga ndaba bandu aika kwangu nepani kulaluki sejupala Sapanga. 16Ana abii nu ugombi wokapi aika kwangu nepani na nepani ndenda kwaamuli na kwaabola miilu jaka Sapanga na malagalaki gaki.”
17Ndienu Yetulo ampwagila Musa, “Seguhenga nga sape! 18Walisokisa wamweti na bandu haba ndaba lihengu leheli linonwipi ngaguwesi kuhenga kajika jako. 19Lekane nugupeke liwasu na Bambu Sapanga jwiibia pamu na wehapa. Wehapa gubiya badala ja bandu palongi jaka Bambu Sapanga nu kumpelake Bambu Sapanga matatisu gabu. 20Kabee waabola miilu na malagalaki gaka Bambu Sapanga na kwaalangi bandu heapalika kutama na majambu gagapalika kuhenga. 21Lakini guhagula bandu bangi kati jabu, bandu babii nu uwesu na babunzogopa Bambu Sapanga, baahobaleka na banga kujopa lushwa. Kati jabu waabeka kulongosa makundi ga bandu elupu jimujimu na makundi ga bandu mia jimujimu na makundi ga bandu amusiniamusini na makundi ga bandu komikomi. 22Haba ndi babibia atama ni ikau nu kuamuli kila lisoba matatisu ga bandu. Matatisu gaganonwipi baguletila weapa lakini masoku biijomula bene. Kupete indela jeheji lihengu laku litenda kujojoka ndaba biitenda kujangatana na weapa mu lihengu heli. 23Ana guhengiki hela ngati ejugulakiya Bambu Sapanga ngawiisoke na bandu haba boa biiwesa kubuja kwabu ku lukwali.”
24Musa jilijoania liwasu heli la akoanu baki na jwahenga ngati hebumpwagila. 25Ndienu jwaagula bandu baabii nu uwesu kati ja Aizilaeli, na kwaahenga abia aka atumisi bi likundi la bandu elupu jimujimu na bangi abia aka atumisi bi likundi la bandu mia jimujimu na bangi abia bandu bi likundi la bandu amusiniamusini na bangi abia aka atumisi bi likundi la bandu komikomi. 26Nabombi akubika ahamuliya matatisu ga bandu kila lisoba. Matatisu gaganonwipi bundetila Musa lakini masoku bagajomula beni.
27Baada jukuhenga hela, Musa na akoanu baki batenda kutabukana na jombi Yetulo jabuja ku nndema jaki.
Currently Selected:
Kuboka 18: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
