Kuboka 19
19
Aizilaeli ku kitombi Sinai
1Lisoba lu utumbuli la mwei wa tatu toka pabahuma ku Misili, bandu buku Izilaeli baika ku lukoba luku Sinai. 2Pababoka ku Lefidimu nukuika ku lukoba luku Sinai bandu buku Izilaeli batama kwa masoba masokopi palongi ji kitombi suku Sinai. 3Ndienu Musa jwakwela kunani jikitombi kuketangana na Bambu Sapanga.
Ndi Bambu Sapanga ankema Musa kuhuma kunani kukitombi nukumpwagi, “Hela ndi hewaapwagila ibeleku yaka Yakobu yani Aizilaeli, 4mwabe mbweni henaatei Amisili, na henuntola mwanganya ngati limbanga helitoto bana baki kwa mapapati gaki, ndi nunndeta kwangu. 5Henu ana nzetaki sauti jangu nukulikamu lilaganu langu mwiikuba mwabandu bango banaagwi kati ja makabila goha ndaba ndema joka ndi jangu. 6Mwiibiya nndumaki nepani ngati ulongosi ukibambu ukolongu wa agolu akolongu na bandu baka Bambu Sapanga. Haga ndi malobi gawaapwagila Aizilaeli.” 7Ndi Musa jwabuja nakwaabeka pamu aseja buku Izilaeli na kwaapwagi malobi haga gaampwagi Bambu Sapanga. 8Bandu boti bajetakia pamu koni baka pwaga, “Majambu goti gajwapwaga Bambu Sapanga, mbaka twagahengi.” Musa jakelubua majibu gegala kwaka Bambu Sapanga.
9Bambu Sapanga ampwagila Musa, “Henu nepani naguhikila wehapa mu lihundi likolongo ili Aizilaeli awesa kunyowana na kuguhobale wehapa pambwaga na wehapa masoba goha.”
Ndienu Musa ampwagula Bambu Sapanga bandu heapwagiki. 10Bambu Sapanga ampwagila Musa, “Jenda waapwagila bandu bilisapisa lelenu ni kilabu ili kunumbali. Waapwagila asapa ingobu yabu, 11abia tayali pamalabu, ndaba lisoba la tatu nepani Bambu Sapanga niitenda kuhika panani ji kitombi sa Sinai na palongi ja bandu boha. 12Kabee wehapa waabekila mipaka bandu kuyongolota kitombi. Waakana akotuka kukwela kukitombi wala kugusa mipaka waki. Mundu jokapi jojwiigusa jwiitenda kukomeka. 13Lakini mundu jokapi jukotuka kunngusa mundu jojuombiki mpaka, hoju jukomika sukunndapu kwa malibu au nkoa, jukubi mundu au kinyama, ngajwiilame. Kipindi pabipulaliya imbata bandu boti bihegalia pikitombi.”
14Ndienu Musa jwahuluka pikitombi na kwaapwagi bandu biliandia kwa ndaba jukunnumbali nabombi basapa ingobu yabu. 15Ndi jwaapwagila bandu boti, “Pamalabu mmbia tayali na mwanalomi jokapi jwigone nu mmbomba.”
16Ndi pamalabu jaki pulukela, kwapitila kutulami ni kililima ni liundi likolongu panani jikitombi. Jajowanika sauti ngolongu ji imbata na bandu bababii pilikambi pala batenda kubagaja kwi kiholu. 17Ndi Musa jwaalongusa bandu boha kuhuma ku likambi nukujenda kuketangana na Bambu Sapanga. Boti bajenda kujema pai ji kitombi.
18Kitombi suku sinai sabia kiyekaliwi ni liyoi ndaba Bambu Sapanga jwabia juhulwiki panani jaki kwiindela ja mwotu. Liyoi lya mwotu hogu lakwela kunani ngati liyoi li litanuli likolongu nikitombi soka sabagaja kwa makili. 19Sauti ji imbata jaendalia kujowanika na Musa jwalongila na Bambu Sapanga. Bambu Sapanga najombi annzibwa kupete kutulami.
20Bambu Sapanga jwaulukiya panani ji kitombi sa Sinai, najombi Bambu Sapanga koni jubii ku kitombi ankema Musa jujenda kukitombi najombi Musa jwakwela ku kitombi. 21Ndi Bambu Sapanga ampwagila Musa, “Huluka pai wakaakanakia bandu boha biika kuninga ana ngati ahikike bingi biitenda kuwa. 22Hata agolu baka Bambu Sapanga baanhegale apalika kulisapisa ananga kulisapisa naapekia azabu.” 23Musa ampwagila Bambu Sapanga, “Bandu haba ngaseawesa kukwela kitombi sa Sinai ndaba wamweti utulagalakia twaabekila mipaka kuyongolota kitombi nu kuuhenga kuba wa sapi.” 24Bambu Sapanga jwapwaga ana, “Uluka pai kunzukua Aloni guhika naku koni. Lakini waalekakee agolu na bandu bangi kuomba mpaka kuhika kongo ana biika niitenda kwaakoma.” 25Ndi Musa jwauluka nu kwaapwagi aka Aizilaeli majambu goha gabunndagalaki na Bambu Sapanga.
Currently Selected:
Kuboka 19: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
