Kuboka 29
29
Malagi gakaajemeka Aloni na bana baki kuba Agolu
Alawi 8:1-36
1“Haga ndi majambu gawahengila Aloni na bana baki ili kwaahenga atumika lihengu lu ugolu. Wijukua ng'ombi ji likambaku lisoku na makondoo mabeli ganga ni kilema, 2jukua mabumunda na maandasi ganga kujege amila gaakandiki kwa mahuta ni mabumunda mapepandau ganga kujege amila, yoti heyi galenganakiya ku uwembi lembulembu wii inganu. 3Ndienu gabeka mabumunda gehaga nkati ji kitonga simu nukumbiki kipindi simu ni ng'ombi likambaku na makondoo makambaku mabeli gala.”
4“Ndipala wapelika Aloni na bana baki pundyangu ulihema la Sapi nukwasambisa masi ngati ebayobali kuhenga Ayahudi. 5Ndipala wijukua ingobu ikigolu wanhwatika Aloni. Kanzu ni kizibau ni kipuku si pikigamba nu kunkonga mkanda goalokiki sapi ngani. 6Kabee wanhwatika mbumbu jela pikibongi saki nukumbeka kibati sekiandikwi panani ja mbumbu jeheji, ammboiki kwaka Bambu Sapanga. 7Ewibiya gujomwi kuhenga haga, wijukua mahuta gala nnzakaninya Aloni pamutu jaki ili kumbeka jutumika palongi jaka Bambu Sapanga.”
8“Ndipala waaleta bana baka Aloni na kwaawatika izibau. 9Wakonga mikanda mu ibunu yabu na kwaawatika kopia yabu. Hela ndi ewibiya wanhengiki Aloni na bana baki atumika palongi jaka Bambu Sapanga kuba Agolu. Haba ni ibeleku yabu bibiya agolu mu masoba gabu goti.”
10“Ndipala walileta likambaku la ng'ombi lela palongi jilihema la Sapi. Aloni na bana baki biibeka maboku gabu panani ji kimutu sa ng'ombi heji, 11ndienu nukusinza palongi jaka Bambu Sapanga, punndyangu ji lihema la Sapi. 12Wijukua mwai usokopi wa ng'ombi heji nukupakii mu nkona ja pandu pukupiiki litambiku ku lukonzi lwaku na mwai gwoti gogwihigaliya wijitala pai ja pandu pukupiiki matambiku. 13Kabee wijukua lukwamba lwoti loluyekale matumbu, pandu pa sapi pi imani sanga kibaba pamu na figu ibeli na mahuta gaki, wijosa yoti panani pandu pukupiiki litambiku. 14Lakini inyama ji kinyama sehesi pamu na ngosi jaki nu utumbu waki wijukua nukuijosale kunza ji libwalu linu. Heli libiya litambiku lukuboa mahakau.”
15“Ndipala wiijuku likondoo limu likambaku nukumpwagi Aloni na bana baki abeka maboku gabu panani ji kimutu saki si likondoo heli. 16Nanagu walisinza likondoo heli, na mwai waki wimisa pandu pukupiiki litambiku pandi yaki yoti. 17Henu walisekula likondoo leheli ipandi ipandi, na wiihuba matumbu gaki na magolu gaki na wiibeka pamu nu umutu ni ipandi yengi. 18Ndipala walijosa likondoo lyomi panani ja pandu pukupiiki litambiku. Heli ndi litambiku lukutinii, litambiku lelibii nu unungi wa sapi ukunengane nepani Bambu Sapanga.”
19“Walijukua likondoo lengi, najombi Aloni na bana baki biibeka maboku gabu panani ju mmutu ji likondoo heli. 20Nawehapa walisinza nukujua mwai usokopi nukumpaki Aloni na bana baki mu lupeta lwa makutu gabu guku malele na ng`onzi yulugumba yu mukuboku gabu guku malele, na ng`ozi igumba yu mumagolu guku malele. Mwai gowihigaliya wimisila pandu pukupiiki litambiku pandi yoti. 21Ndienu wiijukua mwai usokopi gogubii panani ja pandu pukupiiki litambiku pamu na mahuta gukupaki gala nukumisi Aloni ni ingobu yaki. Aloni na bana baki bibiya baahimiki kwa ndaba jaka Bambu Sapanga kwangu nepani pamu ni ingobu yabu yoti.”
22“Ndipala wijukua mahuta gi likondoo likambaku heli. Nu nkela waki na mahuta gagayekale matumbu na pandu pa sapi ni imani na figu yaki ibeli na mahuta gaki, pamu nu nhungu uku malele. Likondoo heli libiya kwa ndaba jukwahimika Aloni na bana baki kuhenga lihengu lu ugolu. 23Kuhuma mu kitonga sa mabumunda ganga kujege amila sekibii palongi jangu nepani Bambu Sapanga, wijukua libumunda limu ni liandasi limu leakandiki kwa mahuta ni libumunda limu lipepandau. 24Yoti heyi wankambisa Aloni na bana baki na baitondabiya kunani palongi jangu kuba litambiku lukutondabeka. 25Kabee wiijukua kuhuma mu maboku gabu nukujosale panani ja mesa jukupiki litambiku pamu na matambiku gukutinii, ibiya halupu ja sapi jejinenganinya nepani Bambu Sapanga. Haga ndi matambiku gaapia kwa mwotu.”
26“Ndipala wiijukua kidali si likondoo lukumpiki Aloni kwaka Bambu Sapanga tondabiya kunani ili jibiya litambiku ngolongu. Ni kidali sehesi kibiya sinu.”
27Nngolu ebuhimika palongi jaka Bambu Sapanga, kidali nu nhungu ulikondoo likambaku lelatumika kunhimika, biileta nukuhimika palongi jangu nginyuli yukumbiki, nayombi ibiya yaka Aloni na bana baki. 28Henu, Aizilaeli masoba goti bijukua pandu heyi kuhuma mu matambiku gabu gu lukwali gaambiki nepani Bambu Sapanga nukumpeke Aloni na bana baki. Haga ndi matambiku ga bandu buku Izilaeli gabampikia Bambu Sapanga.
29“Aloni pajibiya jukuiki ingobu yaki baikabisa kwi ibeleku yaki, nabombi biwata lisoba labu lukwajitali mahuta nukwabeka mumaboku. 30Mwana waka Aloni jojwibiya nngolu baada ja atati baki jiwata ingobu ye heyi masoba saba mu lihema Sapi ili kuhenga lihengu lu ugolu Pandu pa Sapi.
31“Wijukua inyama ji likondoo leheli kwa ndaba jangu Aloni pamu na bana baki nu wiitelika pandu pa sapi mu ua ji lihema sapi. 32Ndipala waapekia Aloni na bana baki, nabombi biikula punndyangu ji lihema la sapi pamu na mabumunda gagahigali mwi kitonga. 33Baikula indu yeheyi yebatumaliya kipindi sa kwahimika kwa ndaba ji lihengu langu na kwaaboke mahakau. Lakini nga mundu jongi jojupalika kula ndaba ibii ya sapi. 34Ana inyama yoti au mabumunda haga gagahigali mbaka pulukela jaki, ndienu wajijosa kwa mwotu biikula ndaba ndi sindu sa sapi.
35“Hela ndi emwatendila Aloni na bana baki kulengana na goti gala ganunndagalaki. Waahimika kwa masoba saba. 36Kila lisoba wipia likambaku la ng'ombi libiya litambiku lukulekake mahakau. Ili kulihenga nnzongana, nukukuhenga hela wajinyambisa pi litambiku, ndienu wajijakania mahuta ili kujihimika kuba pandu paka Sapanga litambiku heli. 37Kwi lisoba la saba mwiihenga hela ili nnzongana kwa ndaba ji litambiku nu kulihimika kwaka Bambu Sapanga. Egipeta haga, litambiku libiya la sapi ngamaa na sokapi sesakigusa sibiya sa sapi.
Matambiku ga kila lisoba
Esabu 28:1-8
38“Kila lisoba wiipia matambiku panani ja pandu pukupiki litambiku. Na matambiku gehaga makondoo mabeli gagabii na umuli wa saka simu. 39Likondoo limu wipia litambiku pulukela na lengi pakamii. 40Pamu ni likondoo lu kutumbulii, wipiya kilu jimu ju uwembi gogupoliki lembulembu goguhangangini na mahuta ga sapi na zeituni lita jimu ja sapi, na lita jimu ja divai ngati matambiku ga kunywa. 41Ahelahe kabee ni likondoo lengi la pakamii walipikia matambiku pamu na matambiku gi uwembi ni inywaji ngati egwakahengiki pulukela, ili libiya litambiku leapia pa mwotu lelinungi sapi nukunengane nepani Bambu Sapanga. 42Matambiku haga gukujosa bipia masoba goti kwi ibeleku yoti nepani Bambu Sapanga, mmbikia litambiku lukujoswa palongi ji milayangu ji lihema sapi pandu je hapa niketangana na mwanganya nukulonge na mwanganya. 43Hapa ndi paniketangana na Aizilaeli nu unang'anu wangu wapahenga pandu je hapa pabiya pa sapi. 44Nalihenga lihema sapi na pandu pukupiki litambiku ibiya ya sapi, kabee Aloni na bana baki naanhimika abiya atumisi bangu kulihengu lu ugolu. 45Niitama kati ja Aizilaeli, nanepani nibiya Bambu Sapanga wabu. 46Hapa ndi pabimanya kuba nepani ndi Bambu Sapanga wabu, nenaboaiki kuhuma ku musi uku Misili, ili ndama pamu na bombi. Nepani ndi Bambu Sapanga wabu.
Currently Selected:
Kuboka 29: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
