Kuboka 30

Litambiku lu kupogale ubani

Kuboka 37:25-28

1“Wilenganakiya lisaku ili kupogale ubani kwi imbau yu nkongu mshita. 2Lisanduku lukupogale ubani heli upandi woti wibia gugulengana, ulasu nu upana waki sentimita alubaini nu nhwanu, ulasu ukujenda kunani sentimita tisini. Manyelu gaki gukunani gakamulana pamu ni lisanduku lukupogale ubani. 3Walipakia lisanduku heli zahabu sapi, upandi waki wa panani, upandi yoti yu muluteta na kona yaki, kabee waliyongulakia lenda ja zahabu. 4Wajilenganakiya peti ibeli ya zahabu nukuibeka peti yehei pai ja lenda mu pandi ibeli yeihegalane, peti ye heji bitumia kukamulaki mapanda kipindi sukutoto lisanduku heli. 5Wilenganakiya mapanda gukutotule kwi mikongu ju mshita nu kupaki zahabu. 6Lisanduku heli libekwa palongi ji lipazia pulutengu ji lisanduku li lilaganu, palongi ji kipuniku si lisanduku gobugukema kipuniku sukulenganake lukwali sesuse niketangana na wehapa. 7Kila lisoba Aloni pajujingii kuhandaa taa yeibii hapa, jipogaliya ubani gogubii nu unungi wamboni panani ji lisanduku kila lisoba pulukela. 8Kabee jipogaliya ubani kipindi sa pakamii pajiipambakia taa. Lisanduku luku pogale ubani heli mwiipia kila lisoba sanga kukotoka mu ibeleku yii yoti. 9Panani ji lisanduku heli kyee mwiipogale ubani wanga kuba sapi, wala mwiipia matambiku gukujosa, wala matambiku gi ilebi, wala wiijakana matambiku ga kunywa panani ja ji lisanduku heli. 10Aloni jupalika kuhenga ujonganesu panani ji litambiku heli mala jimu kwa saka. Jihenga ujonganesu wa mwai upa mesa jukupiki litambiku gukuboa mahakau mala jimu kila saka mu ibeleku inu yoti, ndaba litambiku leheli la sapi ngani kwangu nepani Bambu Sapanga.”

Zaka ili hema la sapi

11Bambu Sapanga ampwagila Musa, 12“Kila pawabalanga Aizilaeli kila mundu kwa ndaba ja mwoju waki palongi jangu julepila zaka ili giikuba magonzu giliya kati jabu kipindi sukwaabalanga. 13Kila jumu joambalingi kupalika kulepa lupija kulengana ni ipemu yeapangiki ilihema la sapi. Heli ndi litambiku laki lejwiimbikia. 14Kila jumu joambalanga, tumbuka jojubii na yaka ishilini nu kupeta, jimbikia litambiku heli. 15Jwana mali gingi jipia ngani wala kapuku jiipia kisoku su lupija kipindi sukupia malepu ili kuhenga ujonganesu. 16Wehapa wiijopa lupija lwe holu lu ujonganesu kuhuma kwa Aizilaeli, nawehapa witumia kwa mahengu gi lihema la sapi, nahoku ndi kwiibiya kukomboka kwa Aizilaeli palongi jangu, ili akombuliwa womi wabu.”

Bakuli ngolongu ja shaba

17“Bambu Sapanga ampwagila Musa, 18Wilenganakiya bakuli ngolongu ja shaba jukusambi jejibii ni kitamiku sa shaba, gwibeka pikilanda ji lihema luketangane na mesa jukupiki litambiku nu kujege masi nkati jaki. 19Aloni na bana baki biitumia masi haga kusamba maboku na magolu, 20biisamba masi haga kila pajingi mu lihema la sapi au paahegale pandu pukumbiiki litambiku lukutini nepani Bambu Sapanga, biisamba masi haga ili biikua. 21Kupalika kusamba maboku gabu na magolu gabu ili biikua. Hoku kwiibiya kuyobale kwabu masoba goti, tumbuka Aloni ni ibeleku yaki yeihika.”

Namuna jukulenganake mahuta

22Bambu Sapanga ampwagila Musa, 23“Wijukua iungu ya amboni yeinungi sapi. Mahuta gabagakema manemane ga masi kilu sita na mdalasini gogunungi sapi kilu itatu nu uwembi umimea gogunungi sapi kilu itatu gogulengana ni milongulongu, 24na aina jengi ju mdalasini kilu sita ipemu yoa heyiibiya kulengana ni ipemu ilihema la sapi, jukua kabee lita nsesi ya mahuta gi mizeituni. 25Kulengana ni iungu heyi wilenganakiya mahuta ga sapi ugahangangana ngati ejuhenga mundu jojulenganake manukatu, haga gitumika kwiihimika hindu yeitumika kwangu nepani Bambu Sapanga. 26Ndienu walijakaninya mahuta haga lihema la sapi ni lisanduku li lilaganu, 27mesa na yombu yaki yoti, sindu sukubeke taa na yombu yaki ni lisanduku lukupogale ubani. 28Lisanduku lukupiiki matambiku gukutinii na yombu yaki yoti, bakuli ni kitamiku saki. 29Waihenga hindu heyi ibiya kwa ndaba jilihengu laka Sapanga, ili ibiya ya Sapi ngani. Sokapi sesigusa hindu heyi sibiya sa Sapi. 30Ndienu wajakaniya mahuta Aloni na bana baki na kwaahimika ili ahenga lihengu lu ugolu. 31Waapwagila Aizilaeli ana haga ndi gibiya mahuta gangu ga sapi gukwajakani bandu bikibeleku yinu yoti. 32Mahuta haga kyee banzakani mundu jwanga kuba nngolu, wala giilenganakewa mahuta gangi ga aina jenze, ganga ndi mahuta ga sapi na kupalika ndi gibiya sapi masoba goti kwinu. 33Jokapi jojwilenganakiya mahuta ngati haga, au kumpaki mundu jwanga nngolu, mundu hoju jwiibia nga jwangu.”

Namuna jukulenganake Ubani

34Bambu Sapanga ampwagila Musa, “Wijukua ipemu yeilengana ni iungu yeibii nu unungi wa sapi yeyuye ndi uliba gu nnatapi na uliba wa Shekeleti na uliba wa kelubena nu ubani sapi. 35Witumia hindu heji kulenganake ubani ngati egulenganakeka na pundi wa manukatu, jegala mwinyu ili gutunzika na kuba wa sapi. 36Ndienu wiipola ubani we hogu ili gubiya uwembi gogulembuliki, guwesa kutumika nkati ji Lihema la Sapi nukulipaki Lisanduka li Lililaganu, pandu paniketangana na wehapa na hogu wibiya ubani wa sapi kwinu. 37Mwiilenganake ubani ngati gongu kwa ndaba jinu mwabeti kutumi ndaba ubani we hogu ndi wa sapi kwangu nepani Bambu Sapanga. 38Jokapi jojwilenganakiya ubani ngati ago nukutumii ngati manukatu gaki mweni, mundu we hoju nga jiikubi jwangu.”

Currently Selected:

Kuboka 30: MaBV

Highlight

Compare

Copy