Kuboka 31
31
Akapundi bukulenganake Lihema la Sapi
Kuboka 35:30-36:1
1Bambu Sapanga ampwagila Musa, 2“Nepani nunhagwi Bezaleli, mwana waka Uli, msokoo waka Uli wi likabila la Yuda, 3na nepani nuntwelaki loho jangu. Numpeki uwesu na malangu, umanyi nu upundi ukuhenga lihengu la kila namuna, 4ili juholaliya namuna jukuhenga lihengu lu kupola hindu ndalindali sukutumii madini ga feza na zahabu na shaba. 5Numpeki umanyi ukubasa malibu gukupambi nukubeka mwiibati, nu kusonga imbau, nukuhenga mahengu gangi gu upundi. 6Ahelahe nunhagwi Oholiabu mwana waka Ahisamaki, ulikabila la Dani, ili anzangatiya. Ahelahe naapeki uwesu nkolongu bandu bangi kwa ndaba ji mahengu ndalindali, ili alenganakiya hindu yoa yenalagalaki ahenga. 7Lihema la Sapi ni Lisanduku li Lilaganu ni kipuniku panani jaki, pamu na hindu yaki yoti, 8mesa na yombu yaki, na sindu sukubeke taa sekilenganakiwi kwa zahabu ja sapi na yombu yaki ni lisanduku luku pogale ubani, 9lisanduku lukupiki litambiku lukutini na yombu yaki yoti, bakuli ja masi pamu ni litaku laki, 10pamu ni ingobu sapi yaealokiki samboni yuku nngolu Aloni na bana baki babube biihenga lihengu lu ugolu, 11kabee mahuta gukwajakani agolu nu ubani gogunungali sapi kwa ndaba ja pandu pa Sapi. Hindu heyi yoti ilenganakiwa kulengana na enugulagalakiya.”
Lisoba Lukupomulela
12Bambu Sapanga ampwagila Musa, 13waapwagila Aizilaeli ana, “Mwanganya mwiiikamula Masoba gangu gukupomule, kwa ndaba heji ndi jibiya nginyuli kati jinu na nepani ku ibeleku inu yoti yeihika, mmanya ana nepani ndi Bambu Sapanga nenunhagwi mwanganya mmbiya mwabandu bangu. 14Mwalikamula Lisoba Lukupomulela, nalombi libiya kwinu lisoba lelihanguliwi kwa ndaba jangu. Jokapi jojalihenga lisoba heli libia lijetakeka palongi jangu ndi kwiipalika ankoma. Ahelahe na mundu jokapi jojihenga lihengu lokapi mu lisoba heli jibiya nga mundu wangu. 15Mwiihenga mahengu ginu kwa masoba sita, lakini lisoba la saba ndi lisoba lukupomulela, na ndi lisoba langu leabekiki kwa ndaba jukunumbali. Mundu jokapi jojuhenga lihengu lokapi lisoba heli jupalika kukomeka. 16Henu Aizilaeli mkamula lisoba Lukupomulela mwi ibeleku yabu yoa kuba nginyuli ji lilaganu la masoba goti ganga na mwisu. 17Lijambu heli libiya nginyuli ja masoba goti ganga na mwisu kati ja Aizilaeli na nepani, ndaba nepani Bambu Sapanga kwa masoba sita nukuhenga kunani nu nndema, lakini lisoba la saba nakotuka kuhenga mahengu, nukupomulela.”
18Bambu Sapanga pajajomula kulongee na Musa kukitombi suku Sinai, ampekiya Musa ibau ibeli ya malibu yeyuye Bambu Sapanga jabia juandiki mweni.
Currently Selected:
Kuboka 31: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
