Kuboka 3
3
Bambu Sapanga ankema Musa
1Lisoba limu Musa jwabia julima mipugu jaka Yetulo nkoanu waki, nngolu juku Midiani. Musa jijipelika mipugu jela upandi wa kolijingi lyoba ulukoba, jwahika pikitombi sa Holebu liina lengi kitombi saka Bambu Sapanga. 2Ndienu, Ntumi jukunani waka Bambu ampitila Musa pikilanda jikitengu sekijaka mwotu. Musa hejwalingalia jwasangia, ohoo! Kitengu kinyaka mwotu na ngasekitinyika. 3Ndienu, jilipwagila, leka oti nikilingalia sapi. “Ndaba jaki kitengu ase ngase kitinyika?”
4Bambu Sapanga pajwabona Musa pajahegaliya kitengu sela, ankema kuhuma pi kitengu pala, “Musa! Musa!”
Najombi Musa jwajetika, “Ooo!”
5Bambu Sapanga ampwagila Musa, “Wiihegale ngani! Hula ilatu yaku ndaba pandu pagujemiki je pani pa Sape.” 6Ndi Bambu Sapanga ampwagila, “Nepani ndi Bambu Sapanga wa akahoku baku, Bambu Sapanga waka Ibulaimu, Bambu Sapanga waka Isaka na Bambu Sapanga waka Yakobu.” Ndihela Musa jayekaliya pamihu jaki kwa maboku ndaba jajogupa kunndingali Bambu Sapanga.
7Ndienu Bambu Sapanga ampwagila ana, “Nagabweni mang'aliku ga bandu bangu baabii ku Misili na nikijowini kilelu sabu, sekitokana nu ukali akolongu ba atumwa. Nagamanyi mang'aliku gabu, 8na henu nhulwiki ili kwaaoko kuhuma mu maboku ga bandu buku Misili. Niitenda kwaapia mu nndema gongo na kwaapeleka mu nndema wa sapi gogubii nkolongu, gogubii nuluombi lolulengane kulema nu kupugi mipugu jingi. Nndema ja Akaanani na Ahiti na Ahamoli na Apelisi na Aivi na Ayebusi. 9Sakaka kilelu sa Aizilaeli kinhiki, mweni namuna Amisili hebaang'alisa. 10Henu nugutuma kwaka Falau ili wakapia bandu bangu Aizilaeli, kuhuma ku Misili.”
11Lakini Musa Ampwagila Bambu Sapanga, “Nepani na nyane mbaka nyenda kwaka Falau na kwaapia Aizilaeli ku nndema juku Misili?” 12Bambu Sapanga anzibua, “Nepani niibia pamu na weapa. Wakaapia bandu buku Izilaeli nukuika kungungamali nepani Bambu Sapanga panani jikitombi senze. Heji jiibia nginyuli kupwaga nepani ndi Bambu Sapanga jo nugutumiki weapa.”
13Ndi Musa ampwagila Bambu Sapanga, “Henu ana naajendi Aizilaeli na kwaapwagi, ‘Bambu Sapanga wa akahoku bii jundumiki kwiinu,’ nabombi ana analuki, ‘Liina laki nyane.’ Boo naajibua bole?” 14Bambu Sapanga anzibua Musa, “NEPANI MII JO MII. Hela ndi hewaapwagila Aizilaeli MII JO MII, jundumiki kwinu. 15Waapwagila ana Aizilaeli, Bambu Sapanga wa akahoku bii, Bambu Sapanga waka Ibulaimu, Bambu Sapanga waka Isaka, Bambu Sapanga waka Yakobu jundumiki kwinu. Heli ndi liina lebingema ibeleku yoti yeihika. 16Jenda wakaakusanya aseja ba Aizilaeli na waapwagila, Bambu Sapanga, Bambu Sapanga wa akahoku bii, Bambu Sapanga waka Ibulaimu, Bambu Sapanga waka Isaka, Bambu Sapanga waka Yakobu, jumbiiti nukumbwagi, ‘Nhika kwinu nukugabona majambu gabunhenge bandu buku ndema uku Misili. 17Nagi kwaaboa Aizilaeli mu mang'aliku ku Misili nu kumpeleka mu Ndema ja Akaanani na ahiti na Ahamoli, Apelizi na Ahivi na Ayebusi, nndema wa sapi gogulengane kulema nu kupugi mipugu jengi.’
18“Bombi bagujowana, wehapa pamu na aseja buku Izilaeli mwanzendila Falau nukumpwagi, ‘Bambu Sapanga, Bambu Sapanga wa Ahebulania, jutupitii. Henu utulekakya tujenda sapwali ja masoba matatu kulukoba, ili tukumpikia matambiku Bambu Sapanga witu.’ 19Lakini manyiki sapi Falau nga junndeki nzenda sanga kulasimiswa. 20Henu niinyosa kuboku kwangu nukujilapu ndema juku Misili nukuhenga nginyuli kwabu. Mwisu weni janndeka mmboka. 21Kabee naahenga Amisili abiya mioju ja sapi ja kwaahenge gaamboni a Izilaeli, na pamwiiboka ku Misili nga mwiiboki maboku matopo. 22Kila mmbomba Nhebulania anndoba Mmisli jojubii pambipi jaki, au mmbomba nngeni joatamani pamu mu nyumba jumu, ampekia hindu yealenganaki na madini ya feza na hindu ya zaabu na madini ga zaabu ni ingobu yeheyi mwaawatika bana bii aka nalomi na akambomba. Ndi he mwaajopa Amisili mali gabu.”
Currently Selected:
Kuboka 3: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
