Kuboka 33

Aizilaeli aboka kukitombi suku Sinai

1Bambu Sapanga ampwagila Musa, “Tumbuliya sapwali guboka pamba wehapa na bandu haba bawaboiki ku nndema uku Misili. Nnzendanya mu musi goniiligila ibeleku yinu, Ibulaimu, Isaka na Yakobu kupwaaga, ‘Nampekiya ibeleku inu nndema gongo.’ 2Naantuma ntumisi wangu jukunani junndongua, naabenga Akaanani na Aamoli na Ahiti na Apelezi na Ahivi na Ayebusi. 3Nnzendannya mu nndema wa sapi gogulengane kukulema nu kupugi. Lakini ndaba mwanganya mmbii ni ing'omu na nsempala kunyoane nganiijendi pamu na mwanganya, naankoma mwiindela.”

4Bandu balela pabajoa majambu giliya, batumbuliya kulobalake na wala nga mundu jowata hindu yaki yeinyapiki. 5Bahenga hela ndaba Bambu Sapanga jabiya ampwagi Musa, “Waapwagila Aizilaeli, ‘Mwanganya mmbii ni ing'omu na ngaseapala kunyetake ananyendiki pamu na mwanganya ku kipindi kisokopi pena ngiti ndenda kunkoma. Henu nhula hindu inu yukulipambila ili nepani niamua sukunhenge.’” 6Ndienu Aizilaeli bahula hindu yebilipambiki tumbuka pababoka ku kitombi suku Holebu liina lengi Sinai.

Lihema la Sapi

7Aizilaeli kila paabekika likambi Musa jayobali kulijuku lihema nukujemeka kunza ji likambi. Lihema leheli jilipekiya liina li Lihema la Sapi. Mundu jokapi jojupala kulaluki sindu kwaka Bambu Sapanga jajenda ku lihema la Sapi kunza ji likambi. 8Kila kipindi Musa pajapita kujenda ku lihema leheli, kila mundu jajema pu nndyangu ji lihema laki nukunndingali Musa mbaka pajujingi mu lihema leheli. 9Kipindi Musa pajajingala nkati ji lihema leheli, nguzu ji liundi jabiya jihuluka nukujema mu ndyangu u Lihema la Sapi, na Bambu Sapanga jatenda kulonge naku. 10Bandu boti pabijibona nguzu ji liundi jela jijemiki mu nndyangu u Lihema la Sapi, kila mundu jujemika mu nndyangu u lihema laki nu kundumbali. 11Hela ndi mweni Bambu Sapanga ejabiya julonge na Musa ngati mundu ejulonge nu nkosi waki. Ndienu Musa jakelubuka kabee mu likambi lakini nkombu Joshua mwana waka Nuni jojuwe jabii ntumisi waki ngasejaboka mu Lihema la Sapi.

Bambu Sapanga julagi kuba pamu na bandu baki

12Musa ampwagila Bambu Sapanga, “Linga, wehapa gumbwagi, ‘Walongua bandu haba,’ lakini ngasegunangi nya jowantuma juhika kunyangati. Gupwagiki, ‘Nugumanyiki wehapa kwi liina laku, nawehapa gunyetaki palongi jaku.’ 13Henu nuguloba ana sakaka gunyetaki palongi jaku, mola sukuhenga ili nugumanya na nhendaliya kujetakalewa palongi jaku. Noba gukombuka ana wahagwi bandu haba kuba bandu baku.”

14Bambu Sapanga jaapwaga, “Nepani namweti nijenda pamu na wehapa naguhenga kuba jojuwesiki.” 15Ndienu, Musa jaapwaga, “Ana wehapa kajika ngawiijendi pamu na nepani, ndienu watuboa pandu pamba. 16Ndaba nepani niimanya boo, ana nepani pamu na bandu baku nyetakaliwi palongi jaku koni wamweti ngagujendi pamu na twenga? Ana gujendiki pamu na twenga kwinhenga nepani na bandu baku kuba bandu batopauti na bangi baabi mu nndema waku.”

17Bambu Sapanga ampwagila Musa, “Naguhengila lijambu lela legulobiki kwa ndaba gujetakaliwi palongi jangu, nanepani nugumanyiki kwi liina laku.”

18Musa jaapwaga, “Nuguloba gunangia unang'anu gogulangi kuba kwaku.” 19Bambu Sapanga anzibua, “Niipeta palongi jaku nukulangi uamboni wangu woti na niilandila liina langu palongi jaku. Nepani Bambu Sapanga nunndangi uamboni mundu jonumpai kundangi uamboni, numbone ikia mundu jombai kumbone ikia. 20Lakini ngaguwesi kumona pamihu jangu ndaba nga mundu jokapi jojiwesa kumona nu kutama.” 21Ndipala Bambu Sapanga ampwagila Musa, “Kubii pandu pambipi nanepani papuje wehapa guwesa kujema panani ji lilibu, 22nu unang'anu gogulangi kuba kwangu pawiipeta, nagubeka mu uluba u lilibu nukuyekale ku kuboku kwangu, mbaka enibiya mbetiki. 23Ndienu nakuboa kuboku kwangu, nawehapa wiimona munyuma, lakini pamihu jangu ngawapabone.”

Currently Selected:

Kuboka 33: MaBV

Highlight

Compare

Copy